15/10/2025
ဗန်းမော်မြို့(၃)မိုင်လမ်းဆုံအနီး တိုက်ပွဲမှာ စစ်ကောင်စီ(၂)ဦးသေဆုံးပြီးလက်နက်(၂)လက်ရ ရှိ
🟥နေ့စဥ်တိုက်ပွဲပြင်းထန်ပြီKIA တပ်မဟာ(၃)၊(၁၁)တာဝန်ယူထားတဲ့နေရာတို့မှ စခန်းကုန်းအချို့ပြန်ရရှိ
BBM-အောက်တိုဘာ၁၄
သတင်း-မင်းသော်
ကချင်ပြည်နယ်၊ ဗန်းမော်မြို့ (၃)မိုင်လမ်းဆုံအနီး စစ်ကောင်စီစစ်ကြောင်းတွေနဲ့တော်လှန်ရေးအင်အားစုတွေကြား တိုက်ပွဲဖြစ်ပွါးခဲ့ပြီးနောက် စစ်ကောင်စီဘက်က(၂)ယောက်သေကာ လက်နက်(၂)လက်ကို သိမ်းဆည်းရရှိခဲ့တယ်လို့ သိရပါတယ်။
စစ်ကောင်စီအနေနဲ့ သြဂုတ်လမှစတင်ကာ ဂေါဝိန်ဆိပ်ကမ်းမှတဆင့် ဗန်းမော်မြို့ကို လူ၊လက်နက်အင်အားဖြည့်တင်းပြီးတဲ့နောက် ခံစစ်အနေအထားမှ ထိုးစစ်ပုံစံပြောင်းလာပြီးတော်လှန်ရေးအင်အားစုတွေရှိရာနေရာကို ထိုးစစ်ဆင်မှုတွေပိုမိုပြုလုပ်ခဲ့တယ်လို့ သိရပါတယ်။
ပြီးခဲ့တဲ့အောက်တိုဘာလ (၁၀)ရက်နေ့ကလည်း စစ်ကောင်စီစစ်ကြောင်းထိုးလာမှုကြောင့် KIAတပ်ဖွဲ့ဝင်တွေနဲ့ စစ်ကောင်စီတို့ကြား ဗန်းမော်မြို့(၃)မိုင်လမ်းဆုံရှိ အောင်ပင်လယ်KTV အနီးအနားမှာ ထိတွေ့တိုက်ပွဲပြင်းထန်စွာ ဖြစ်ပွါးခဲ့တယ်လို့ သိရပါတယ်။
အဆိုပါတိုက်ပွဲအတွင်း စစ်ကောင်စီဘက်မှ စကစ (၂)ယောက်သေဆုံးသွားခဲ့သလို ဒဏ်ရာရရှိသူအမြောက်အများလည်း ရှိခဲ့တယ်လို့ သိရပါတယ်။
အထိနာသွားတဲ့ စစ်ကောင်စီအနေဖြင့် တိုက်ပွဲဖြစ်ပွါးရာ အဆိုပါ(၃)မိုင်လမ်းဆုံအနီးမှ ပြန်လည်ဆုတ်ခွါသွားခဲ့ပြီးနောက် တော်လှန်ရေးအင်အားစုတွေက ရှင်းလင်းရေးလုပ်ရာမှာ စကစအလောင်း(၁)လောင်းနဲ့လက်နက်(၂)လက်ကို ရရှိခဲ့တယ်လို့ မြေပြင်တော်လှန်ရေးသတင်းရင်းမြစ်တစ်ဦးက BBM ကိုပြောပါတယ်။
"ဟိုရက်ကတော့ (၃)မိုင်လမ်းဆုံ အောင်ပင်လယ် KTV လမ်းဆုံနားမှာ ခွေးမသာ(စစ်သား) အလောင်း (၂) ကောင်၊ (၁)ကောင်ကတော့ သူတို့ဆွဲသွားတယ်၊ MA-1တစ်လက်ရယ်၊ MA-3တစ်လက်ရယ် ရလိုက်တယ်"
ဒါ့အပြင် ဗန်းမော်မြို့တွင်း(၃)မိုင်ပတ်ချာလည်မှာသာမက အခြားသော စစ်မျက်နှာတွေမှာလည်း စစ်ကောင်စီဘက်က စစ်ကြောင်းတိုးတာတွေပြုလုပ်နေတာကြောင့် နေ့စဥ်တိုက်ပွဲဖြစ်ပွါးလျက်ရှိတယ်လို့ သိရပါတယ်။
ဒါတင်မက KIAရဲ့ တပ်မဟာ(၁၁)နဲ့ တပ်မဟာ(၃)မှ တပ်ဖွဲ့တွေ တာဝန်ယူထားတဲ့ ဗန်းမော်ရှေ့တန်းစစ်မျက်နှာမှ လက်လွှတ်ထားရတဲ့ ကာကင်းစခန်းအချို့ကိုလည်း KIAမှ ဒီရက်ထဲမှာ ပြန်လည်သိမ်းပိုက်နိုင်ခဲ့တာတွေရှိတယ်လို့လည်းအဆိုပါတော်လှန်ရေးသတင်းရင်းမြစ်မှ BBM ကိုဆက်ပြောပါတယ်။
"တိုက်ပွဲကတော့ နေ့တိုင်းလိုလို ဖြစ်တယ်၊
ဗန်းမော် စစ်မျက်နှာဘက်က တပ်မဟာ၁၁ တပ်မဟာ၃၊ တာဝန်ယူထားတဲ့ဘက်က၊ ကာကင်းတွေပြန်ရတယ်ဆိုတာလည်း ဟုတ်တယ်၊ ဟုတ်တယ်၊ "
ဗန်းမော်မြို့ဟာ ကချင်ပြည်နယ်ရဲ့ဒုတိယအကြီးဆုံးမြို့ဖြစ်သလို မြောက်ပိုင်းတိုင်းအခြေစိုက်ရာမြစ်ကြီးနားမြို့တို့ကိုသာမက မိုးကောင်း၊မိုးညှင်းကိုပါဆက်သွယ်တဲ့လမ်းမကြီးပေါ်မှာရှိနေတာကြောင့် ထောက်ပံ့ပို့ဆောင်ရေးဆိုင်ရာအရေးကြီးတဲ့မြို့ပဲဖြစ်ပါတယ်။
ဒါကြောင့် KIA ဦးဆောင်တဲ့တော်လှန်ရေးအင်အားစုတွေက ဗန်းမော်မြို့ကို ၂၀၂၄ခုနှစ် ဒီဇင်ဘာလ ကစတင်တိုက်ခိုက်ခဲ့တာဖြစ်ပြီး စစ်ကောင်စီကလည်း မြို့မကျစေရေးအတွက် ရေကြောင်း၊လေကြောင်းတွေကပါ စစ်ကူအင်အားဖြည့်တင်းပြီးခုခံကာကွယ်နေတယ်လို့ သိရပါတယ်။
Photo-ပုံဟောင်း
