27/01/2026
😋တစ်နိုင်တစ်ပိုင် စီးပွားရေးလုပ်မလား၊ အိမ်မှာပဲ လုပ်စားမလား? "ကြက်ကြောလုံးပေါင်း" လုပ်နည်း အသေးစိတ်!
ဒီနေ့ခေတ်မှာ လူကြိုက်များပြီး လူငယ်တွေကြား ရေပန်းစားနေတဲ့ "ကြက်ကြောလုံးပေါင်းနဲ့ ထိုင်းစတိုင်လ်အချဉ်ရည်" ကို ဆိုင်မှာတန်းစီစောင့်စရာမလိုဘဲ အိမ်မှာတင် အရသာရှိရှိ လုပ်စားလို့ရမယ့်နည်းလမ်းကို ဝေမျှပေးလိုက်ပါတယ်နော်။
စီးပွားရေးအနေနဲ့ ပြန်ရောင်းချင်သူတွေအတွက်လည်း အရမ်းအဆင်ပြေတဲ့ Recipe လေးပါ။
(၁) ကြက်ကြောလုံး ပြုလုပ်ရန် လိုအပ်သောပစ္စည်းများ
အသားလုံးလေးတွေ တင်းတင်းရင်းရင်းနဲ့ စားလို့ကောင်းဖို့အတွက် ဒီပစ္စည်းလေးတွေ ပြင်ဆင်ထားရအောင် -
* ကြက်သား - (၂၅ ကျပ်သား)
* မုန့်ဖုတ်ပေါင်ဒါ - လက်ဖက်ရည်ဇွန်း ၁ ဇွန်း
* သကြား - လက်ဖက်ရည်ဇွန်း ၅ ဇွန်း
* ဆား - လက်ဖက်ရည်ဇွန်း ၁ ဇွန်းခွဲ
* ငံပြာရည် - လက်ဖက်ရည်ဇွန်း ၁ ဇွန်း
* ငရုတ်ကောင်း - လက်ဖက်ရည်ဇွန်း ၁ ဇွန်းခွဲ
* ကြက်သားမှုန့် - လက်ဖက်ရည်ဇွန်း ၂ ဇွန်း
* အချိုမှုန့် - လက်ဖက်ရည်ဇွန်း ၁ ဇွန်းခွဲ
* ရေသန့်ရေခဲ - ၁၀ တုံး (အသားတင်းရင်းစေရန်)
* ပီလောပီနံကော်မှုန့် - လက်ဖက်ရည်ဇွန်း ၇ ဇွန်း
* ကြက်သွန်ဖြူ - ၅ ကျပ်သား (အခွံနွှာထားရန်)
ပြုလုပ်ပုံအဆင့်ဆင့် -
၁။ ပါဝင်ပစ္စည်းများအားလုံးကို ရောပြီး အသားကြိတ်စက်နဲ့ ညက်နေအောင် ကြိတ်ပေးပါ။
၂။ ရေနွေးအိုးတည်ပါ (ရေကို အရမ်းမဆူပွက်စေဘဲ မီးအေးအေးပဲ ထားပါ)။
၃။ မိမိလိုချင်တဲ့ အရွယ်အစားအတိုင်း လက်နဲ့ အလုံးလေးတွေညှစ်ပြီး ထည့်ပြုတ်ပါ။
၄။ အသားလုံးလေးတွေ ကျက်ရင် ရေစစ်ထုတ်ပြီး ရေငွေ့နဲ့ တစ်ခါပြန်ပေါင်းပေးရင်တော့ အနံ့မွှေးပြီး အိစိမ့်နေတဲ့ ကြက်ကြောလုံးလေးတွေ ရပါပြီ။
(၂) ထိုင်းစတိုင်လ် အချဉ်ရည်ပြုလုပ်နည်း
ကြက်ကြောလုံးကောင်းဖို့တင်မကဘဲ တွဲစားမယ့် အချဉ်ရည်ကလည်း အရေးကြီးပါတယ်။ ထိုင်းမှာ နာမည်ကြီးတဲ့ အသားလုံးအချဉ်ရည် လုပ်နည်းလေးကို မျှဝေပေးလိုက်ပါတယ်။
အဆာပလာများ -
* ကြက်သွန်နီ (၁၅ ကျပ်သား)၊ ကြက်သွန်ဖြူ (၁၀ ကျပ်သား)
* ငရုတ်သီးခြောက်အရှည် (၅ ကျပ်သား)၊ အပွ (၅ ကျပ်သား)
* ကြက်သွန်ဖြူအချဉ်စိမ် (၅ ကျပ်သား)
* မန်ကျည်းအနှစ် (၂၀ ကျပ်သား)
* သကြား (၄၀ ကျပ်သား)၊ ဆား (ထမင်းစားဇွန်း ၂ ဇွန်း)
* ပြောင်းကော်မှုန့် (၂ ဇွန်းခွဲ)
ပြုလုပ်ပုံအဆင့်ဆင့် -
၁။ ကြက်သွန်နီ၊ ကြက်သွန်ဖြူကို အခွံနွှာပြီး ဆီနည်းနည်းနဲ့ မွှေးအောင်ကြော်ပြီး ဆယ်ထားပါ။
၂။ ငရုတ်သီးခြောက်နှစ်မျိုးလုံးကိုလည်း ဆီနဲ့မွှေးအောင်ကြော်ပါ။
၃။ ကြော်ထားတဲ့ အမယ်အားလုံးနဲ့ ကြက်သွန်ဖြူအချဉ်စိမ်ကို ရောပြီး ညက်အောင်ကြိတ်ပါ။
၄။ ရေ ၆၀၀ မီလီလီတာ (နို့ဆီဘူး ၁ဘူးခွဲ)ကို ဆူအောင်တည်ပြီး ကြိတ်ထားတာတွေ ထည့်ပါ။
၅။ မန်ကျည်းနှစ်၊ ကြက်သွန်ဖြူအချဉ်စိမ်ရည်၊ သကြား၊ ဆား တို့ထည့်ပြီး မီးအေးအေးနဲ့ တည်ပါ။
၆။ အရသာ စိတ်ကြိုက်ဖြစ်ရင် ရေဖျော်ထားတဲ့ ပြောင်းကော်မှုန့်ထည့်ပြီး ပျစ်လာရင် ချလို့ရပါပြီ။
> Tip- အချဉ်ရည်ထဲကို ငရုတ်သီးအတောင့်ကြော်၊ နံနံပင်နဲ့ ကြက်သွန်ဖြူအချဉ်စိမ်ဖတ်လေးတွေ ထပ်ထည့်ရင် ဆိုင်ကအတိုင်း အရသာရော ရုပ်ထွက်ပါ ရှယ်ပဲနော်! 😋
အရသာရှိတဲ့ ကြက်ကြောလုံးပေါင်း ပူပူနွေးနွေးလေးကို အချဉ်ရည်စပ်စပ်လေးနဲ့ တွဲဖက်သုံးဆောင်လိုက်ပါ။ တစ်နိုင်တစ်ပိုင် ရောင်းချင်သူတွေအတွက်လည်း အရမ်းအကျိုးရှိမယ့် Recipe လေးမို့ သိမ်းထားဖို့ မမေ့နဲ့ဦးနော်။
#ဟင်းချက်နည်းများ
