01/10/2025
အင်းလေးတွင် ယမန်နေ့ထက် ရေတက်နှုန်း အနည်းငယ်မြန်လာ
အင်းလေးလူထု ၊ အောက်တိုဘာလ ၁ ရက်၊၂၀၂၅။
ရှမ်းပြည်နယ်တောင်ပိုင်း ၊ ညောင်ရွှေမြို့နယ် ၊အင်းလေး ကန်ရေမှာ ယမန်နေ့ထက် ရေတက်နှုန်း အနည်းငယ်မြန်လာကြောင်း ဒေသခံများကပြောဆိုသည်။
ယမန်နေ့ စက်တင်ဘာလ ၃၀ ရက် ၊ ညသန်းခေါင်ယံချိန်မှစ၍ လေပြင်းနှင့်အတူ လျှပ်စီးလက်ခြင်း ၊ မိုးကြိုးပစ်ခြင်းများလည်း ဖြစ်ပွားခဲ့ကာ မိုးသည်း ထန်စွာရွာသွန်းခဲ့ပါသည်။
ညောင်ရွှေ အင်းလေးအပြင် တောင်ကြီး ၊ ကလော နှင့် အောင်ပန်းမြို့တို့တွင်လည်း မိုးကြီးနေပြီး ကလောနှင့် အောင်ပန်းမြို့၏ အနောက်ဖက်တောင် ကြောမှ တောင်ကျရေများမှာ အင်းလေးကန်သို့ ဝင်ရောက်လာနိုင်ပါသည်။
ထို့ကြောင့် ယမန်နေ့ထက် ရေတက်နှုန်း အနဲငယ်မြန်လာသည့်အတွက် အနိမ့်ပိုင်းအိမ်များမှ ဒေသခံပြည်သူများအနေဖြင့် ကြိုတင်သတိထားစေလိုကြောင်း ဒေသခံများက အသိပေးပြောကြားထားသည်။
ထို့ပြင် အကြမ်းဖက် စစ်ကောင်စီက မိုးဗြဲဆည်ရေတံခါးကို တောက်လျှောက်ဖွင့်ချထားသည့်အတွက်ဘီလူးချောင်းရေမြင့်တက်လာနိုင်ပြီး တောင်ပိုင်းဒေသများလည်း ပိုမိုသတိထားရန်လိုအပ်ကြောင်း သိရှိရသည်။
အင်းလေးကန်သည် မိုးရာသီတွင် နှစ်စဉ် ပုံမှန်ရေတက် နေကျဖြစ်သော်လည်း ပြီးခဲ့သည့် ၂၀၂၄ ခုနှစ်၊ စက်တင် ဘာလ ဒုတိယပတ်တွင် ဖြစ်ပေါ်ခဲ့သည့် ရာဂီမုန်းတိုင်းအရှိန်ကြောင့် ရွှေညောင်၊ ညောင်ရွှေနှင့် အင်းလေးကန် နေရာဒေသအနှံ့ရေကြီး၍ နေအိမ်များရေနှစ်မြှုပ်ခဲ့ရပြီး ဒေသခံများ အခက်ခဲကြုံတွေ့ခဲ့ရကာ ရေကြီးမှုစံချိန်အမြင့်ဆုံးဖြစ်ပေါ်ခဲ့ပါသည်။
#အင်းလေးလူထုလှုပ်ရှားမှု
#အင်းလေး
