29/10/2025
တရုတ်၏ ကြားဝင်ညှိနိုင်းမှုနဲ့TNLA မိုးကုတ်နှင့် မိုးမိတ်မြို့များမှ ဆုတ်ခွာ ပြီး အပစ်ရပ်ငြိမ်းချမ်းရေးလက်မှတ်ရေးထိုး
ရှမ်းမြောက်ဒေသ စစ်မျက်နှာဟာ တရုတ်နိုင်ငံရဲ့ ကြားဝင် ညှိနှိုင်းမှု ကြောင့် အရေးပါတဲ့ စစ်ရေး အပြောင်းအလဲ တစ်ရပ်ကို ပြုလုပ်လိုက်တယ်လို့ ပြောပါတယ်။
TNLA သိမ်းပိုက်ထားတဲ့ မိုးကုတ် နဲ့ မိုးမိတ်မြို့များ မှ ဆုတ်ခွာရန် သဘောတူညီလိုက်ပြီး၊ စကမတပ် နဲ့ အပစ်အခတ် ရပ်စဲရေး သဘောတူညီချက် ကို လက်မှတ်ရေးထိုးလိုက်ကြောင်း ယနေ့ TNLA က တရားဝင် သတင်းထုတ်ပြန်လိုက်ပါတယ်။
ဒီတွေ့ဆုံဆွေးနွေးပွဲဟာ တရုတ်နိုင်ငံ၊ ကူမင်းမြို့ မှာ နှစ်ထောင့်နှစ်ဆယ့်ငါး ခုနှစ်၊ အောက်တိုဘာလ နှစ်ဆယ့်ခုနစ်ရက် နဲ့ နှစ်ဆယ့်ရှစ်ရက် တို့တွင် ပြုလုပ်ခဲ့တဲ့ ကိုးကြိမ်မြောက် တွေ့ဆုံဆွေးနွေးပွဲ ဖြစ်ပါတယ်။
ပလောင်ပြည်နယ် လွတ်မြောက်ရေးတပ်ဦး (TNLA) မှ ဒုတိယဗိုလ်ချုပ်ကြီး တားဂျုတ်ဂျား ဦးဆောင်တဲ့ ကိုယ်စားလှယ်အဖွဲ့နဲ့ ဒုတိယဗိုလ်ချုပ်ကြီး ကိုကိုဦး ဦးဆောင်တဲ့ NSPNC ကိုယ်စားလှယ်အဖွဲ့တို့ဟာ တရုတ်နိုင်ငံ အထူးကိုယ်စားလှယ် မစ္စတာ တိန့်ရှီကျွင်းရဲ့ ကြားဝင် ညှိနှိုင်းမှု ဖြင့် ဆွေးနွေးခဲ့ကြတာ ဖြစ်ပါတယ်။
တရုတ်နိုင်ငံ အထူးကိုယ်စားလှယ်ကြီးရဲ့ ကြားဝင် စေ့စပ်ညှိနှိုင်းမှုကြောင့် TNLA တပ်များဟာ သဘောတူ သတ်မှတ်ထားသည့် ကာလအတွင်း မိုးကုတ် နဲ့ မိုးမိတ်မြို့နယ်တို့မှ ပြန်လည် ဆုတ်ခွာ မည်ဖြစ်ကြောင်း သိရှိရပါတယ်။
အပြန်အလှန်အားဖြင့် TNLA ၏ တအာင်းဒေသကို မြန်မာစစ်တပ်မှ လေယာဉ်ဖြင့် ဗုံးကြဲခြင်း နဲ့ ထိုးစစ်ဆင် တိုက်ခိုက်ခြင်းများ မပြုဘဲ နှစ်ထောင့်နှစ်ဆယ့်ငါး ခုနှစ်၊ အောက်တိုဘာလ နှစ်ဆယ့်ကိုးရက် နေ့ သုညနာရီ သုညသုညမိနစ် (၀၀:၀၀ နာရီ) အချိန်မှစတင်၍ နှစ်ဖက် ရောက်ရှိသည့်နေရာတွင် တပ်များရပ်တန့်ကာ အပြန်အလှန် အပစ်အခတ် ရပ်စဲရေးအတွက် သဘောတူညီချက် လက်မှတ်ရေးထိုးခဲ့ကြပါတယ်။
ဒီအပစ်အခတ် ရပ်စဲရေး သဘောတူညီချက်ဟာ (၁၀၂၇ စစ်ဆင်ရေး) ရဲ့ ရလဒ်အပေါ် ကြီးမားတဲ့ သက်ရောက်မှု ကို ဖြစ်ပေါ်စေခဲ့ပါတယ်။၁၀၂၇ အတွင်း TNLA က မူလက မိုးကုတ်၊ သီပေါ၊ ကျောက်မဲ၊ နောင်ချို၊ မိုင်းလုံ၊ မိုင်းငေါ့၊ နမ့်ဆန်၊ မန်တုံ၊ ကွတ်ခိုင်၊ နမ့်ခမ်း၊ နမ္မတူမြို့များ ထိမ်းချုပ်ထားနိုင်ခဲ့ပါတယ်။
သို့သော်လည်း ဒီနောက်ပိုင်းမှာ စကမ တပ်က ကျောက်မဲ၊ နောင်ချို၊ သီပေါ ကို ပြန်လည် ထိမ်းချုပ်ထားနိုင်ခဲ့ ပါတယ်။ ယခု TNLA က မိုးကုတ် နဲ့ မိုးမိတ်မြို့များ ကိုပါ ထပ်မံ စွန့်လွှတ်မည် ဖြစ်သောကြောင့် TNLA လက်ထဲတွင် မိုင်းလုံ၊ မိုင်းငေါ့၊ နမ့်ဆန်၊ မန်တုံ၊ ကွတ်ခိုင်၊ နမ့်ခမ်းနဲ့ နမ္မတူမြို့များ သာ ကျန်ရှိတော့မည် ဖြစ်ပါတယ်။
TNLA ရဲ့ ဒီလို နယ်မြေ ဆုတ်ခွာမှု ဟာ တရုတ်အစိုးရရဲ့ ဖိအား ကြောင့် ဖြစ်တယ် နိုင်ငံရေးအသိုင်းအဝိုင်းကပြောပါတယ်။ တရုတ်အနေနဲ့ ရှမ်းမြောက်မှာ တည်ငြိမ်မှုကို လိုလားခြင်း၊ နယ်စပ်ကုန်သွယ်ရေးကို ပြန်လည် ဖွင့်လှစ်လိုခြင်း နဲ့ စကမကို အသက်ဆက်ပေးလိုခြင်း ဆိုတဲ့ ဗျူဟာ သုံးခု (၃ ခု) ကြောင့် ညီနောင် မဟာမိတ် သုံးဖွဲ့ကို အမြဲတမ်း ဖိအားပေးနေခဲ့တာ ဖြစ်ပါတယ်။
TNLA က မိုးကုတ် လို အရေးပါတဲ့ မြို့ကို စွန့်လွှတ်လိုက်ရခြင်းဟာ စစ်ရေးအရရှုံးနိမ့်မှုလား၊ ဒါမှမဟုတ် တရုတ်ရဲ့ နိုင်ငံရေး-စီးပွားရေး ဖိအား ကို မလွန်ဆန်နိုင်လို့လား။
ဒီအပစ်ရပ်စဲရေး သဘောတူညီချက်ဟာ စကမတပ်ကို TNLA ထိန်းချုပ်နယ်မြေများ ပြန်လည် ဝင်ရောက်ဖို့ လမ်းကြောင်း ဖွင့်ပေးလိုက်ခြင်း ဖြစ်မလား။
၁၀၂၇ ရဲ့ ရည်မှန်းချက် ဖြစ်တဲ့ အာဏာရှင်စနစ် အမြစ်ဖြတ်ရေး ဟာ ဒီလို နယ်မြေ စွန့်လွှတ်မှုတွေကြောင့် ဘယ်လောက်အထိ အလှမ်းဝေးသွားမလဲ။
#မိုးကုတ်
