23/08/2025
បទថ្មីបរាជ័យរឿងស្នេហាច្រើនដង
បរាជ័យរឿងស្នេហាច្រើនដងមក ខ្ញុំមិនដែលបើកបេះដូងទទួលយកអ្នកណាទៀតទេ មានអារម្មណ៍ប្រាប់ថាហត់នឹងស្នេហាតែដោយសារវ័យក៏កាន់តែច្រើន ឃើញមនុស្សជុំវិញខ្លួនមានគូ មើលថែគ្នាទៅវិញទៅមកហាក់ដូចមានសុភមង្គលណាស់ហើយ ។ ខុសពីខ្ញុំរវល់តែរឿងការងារផ្ទាល់ខ្លួនពេលទំនេរអង្គុយមើលតែរឿងកូរ៉េ រឿងចិន មើលរហូតគិតថាខ្លួនឯងអាចនឹងជួបតួស្រីក្នុងរឿង នៅក្នុងជីវិតពិត ។ នរណាក៏មានគំនិតបែបនេះដែលត្រូវអត់ ? តែពេលស្រមៃដល់រូបភាពទាំងនោះពិតជាមានក្ដីសុខ កក់ក្ដៅ ហើយមិនមានអារម្មណ៍ថាឯកាអីទេ ។
រហូតដល់ពេលមូយនោះខ្ញុំមិនសប្បាយចិត្តដោយសារបញ្ហាចូលមកផ្ទួនៗគ្នាពេក ស្មុគស្មាញដល់ថ្នាក់គ្មានអារម្មណ៍មើលរឿងឬគិតពីខ្លួនឯងទៀតឡើយ តែឲ្យតែពេលគេងក៏យល់សប្តិរហូត ។ បើតាមពេទ្យគេនិយាយថាការគេងយល់សប្តិគឺបណ្ដាលមកពីរាងកាយយើងអស់កម្លាំងពេក ខ្ញុំក៏យល់ស្របដែរ តែអ្នកខ្លះក៏និយាយថាមកពីយើងគិតច្រើនរហូតដល់ថ្នាក់ខួរក្បាលបង្កើតរូបភាពប្លែកៗពេលយើងគេងលក់ ហើយអ្នកខ្លះទៀតក៏និយាយថាការយល់សប្តិរបស់យើងក៏ជាយើងម្នាក់ទៀតដែលនៅចក្រវាឡមួយទៀត ។ តែការយល់សប្តិរបស់ខ្ញុំនេះមិនមែនឃើញសត្វ ខ្មោច ឬរឿងអីអាក្រក់ៗទេ ខ្ញុំយល់ឃើញមន្ស្សស្រីម្នាក់តែងតែមកគេងក្បែរខ្ញុំ ឱបខ្ញុំ ហើយដៃរបស់គេកក់ក្ដៅដូចយើងមនុស្សមែនទែនចឹង ។ វត្តមានរបស់គេតែលេចឡើងពេលដែលផ្លូវចិត្តរបស់ខ្ញុំទន់ខ្សោយ ក្រោយពេលខ្ញុំត្រឡប់ប្រក្រតីវិញក៏លែងយល់សប្ដិឃើញគេទៀតហើយ ។
និយាយមែនការយល់សប្តិឃើញមនុស្សស្រីម្នាក់ហ្នឹងហាក់បីជួយធ្វើឲ្យខ្ញុំលែងខ្លាចនឹងបញ្ហា ខ្ញុំលែងស្មុគស្មាញអ្វីទាំងអស់ ។ ព្រោះគ្រប់ពេលដែលខ្ញុំឃើញគេហើយខ្ញុំសប្បាយចិត្ត ប៉ុន្តែខ្ញុំពិតជាចង់ដឹងណាស់ថាមុខរបស់គេបែបណាខ្ញុំឃើញត្រឹមពណ៌នៃស្បែករបស់គេ សក់ ដៃដ៏ស្រឡូនទន់ភ្លន់តែរឹងមាំមានសរសែរដៃតាំងពីម្រាមដៃឡើងទៅ មានស្មាបើក ហើយពេលខ្លះម្នាក់ស្រីហ្នឹងយកដៃមកអង្អែលផ្ពាល់ខ្ញុំទៀត ផង កម្ដៅនៃបាតដៃរបស់គេធ្វើឲ្យខ្ញុំវង្វេង មិនដឹងថាវាជាការយល់សប្ដិឬការពិត តែពេលភ្ញាក់ឡើងគឺមានតែខ្ញុំនិងសភាពនៅក្នុងបន្ទប់ដ៏ស្ងាត់ជ្រងំ ការយល់សប្តិនេះមិនមែនតែម្ដងទេគឺច្រើនដងហើយគ្រប់ពេលយល់សប្តិឃើញគេខ្ញុំមិនចង់ភ្ញាក់ពីគេឡើយ ។
បើថ្ងៃណាមួយជួបគេម្ដងទៀតខ្ញុំសន្យាថានឹងមើលមុខគេឲ្យបាន ព្រោះចំណាយដែលចេញពីខ្លួនគេសុទ្ធតែជាថាមពលវិជ្ជមាន រាល់ថ្ងៃមុនចូលគេគឺខ្ញុំផ្សងយល់សប្តិឃើញគេម្ដងទៀត
