เปิดทำการกี่โมง?

จันทร์ 09:00 - 18:00 อังคาร 09:00 - 18:00 พุธ 09:00 - 18:00 พฤหัสบดี 09:00 - 18:00 ศุกร์ 09:00 - 18:00 เสาร์ 09:00 - 18:00 อาทิตย์ 09:00 - 18:00

Myanmar Fight Edition, Bangkok (2026)

05/06/2026

အခုပွဲမှာ စောမင်းမင်း အသာစီးဖြစ်ပြီး အမှတ်ပေးဒိုင်မှားတယ်လို့ပဲ မြင်တယ်။ စောမင်းမင်းက လူပျင်းလား။ ကျော်စွာဝင်းကို ထိုးတုန်းကလည်း အခုလို မြင်ရဖူးတယ်။ အချီကြာရင် သက်လုံမရတော့ဘဲ အမောဖောက်လာတယ်။ ပျော့တီးပျော့ဖတ်ဖြစ်လာပြီး လဲချင်လာတယ်။ Yodlekpet က Body Shot ချည်းပဲ လှိမ့်ထိုးနေတယ်။

Yodlekpet ကစားတာကိုလည်း မကြိုက်ပါဘူး။ အခံသက်သက်လို့ပဲ မြင်တယ်။ စောမင်းမင်းက အခုလို ထိုးကြေးရဖို့ လာထိုးတာမဟုတ်ဘဲ ပိုကြိုးစားဖို့ လိုပါတယ်။ ဒီအတိုင်းဆိုရင် ဒို့ရိုးရာကလပ်က ညီငယ်တွေက ထိုးကြေးအတွက် ဘန်ကောက်လာမှန်း မြန်မာပရိသတ်တွေ သိနေကြပြီမို့ ဘက်ကန်လာကြတာ တော်တော်ထောနေကြပါပြီ။ စာဖတ်သူတွေ ဘေးကင်းပါစေ။

04/06/2026

တစ်ခါက ငယ်ချစ်ဦး စံပယ်ပန်းလေး

ဒီအကြောင်းတွေ ပြန်ပြောရရင် အတိတ်ကို ပြန်လွမ်းမိပါရဲ့။ ငယ်ငယ်တုန်းက နယ်ကျောင်းမှာပဲ တက်ဖူးတာပါ။ ဆယ်တန်းရောက်မှသာ တောသားလေး ကျွန်တော်က မန္တလေးမြို့မှာ ကျောင်းတက်ရပါတယ်။ နယ်မှာတုန်းက ကျောင်းသားနည်းလို့ (အေ) ခန်း၊ (ဘီ) ခန်းမရှိပါဘူး။ အခန်းမခွဲဘူး။ မြို့ကျောင်းမှာတော့ အမှတ်အလိုက် (အေ) ခန်း၊ (ဘီ) ခန်းခွဲထားတယ်။ (အက်ဖ်) အထိရှိတယ်။ ကျွန်တော်က ကျောင်းသားသစ်ဆိုတော့ ကြိုက်တဲ့အခန်းကို ရွေးချယ်ခွင့်ရှိတယ်။

ဆရာကြီးရဲ့ အကြံပေးချက်အရ ကျွန်တော်က (ဘီ) ခန်းမှာ နေလိုက်တယ်။ အောင်မယ် တောသားလေး မောင်ကျော်က (ဘီ) ခန်းမှာ မော်နီတာတွေ ဘာတွေဖြစ်လိုက်သေးတယ်ခင်ဗျ။ ကျောင်းတက်၊ စာကျက်ပြီး ဆယ်တန်းဘဝကို ဖြတ်သန်းနေမိပါတယ်။ ကျောင်းသစ်မှာ အစတုန်းက ရုန်းကန်ရတယ်။ သူငယ်ချင်းလည်း မရှိသေးဘူး။ ပတ်ဝန်းကျင်အသစ်ဆိုတော့ အစစ၊ အရာရာက မျက်စိသူငယ်၊ နားသူငယ်ဖြစ်နေတယ်။ တောသားမြို့တက်ကိုး။

နှစ်လသုံးလကြာတော့ ကျွန်တော်လည်း သူငယ်ချင်းသစ်တွေ ရလာတယ်။ ကိုယ့်သူငယ်ချင်းတွေက ကိုယ်လို ခပ်ပေါပေါကောင်တွေချည်းပဲ။ အခုချိန်မှာ ဒီကောင်တွေကိုလည်း လွမ်းမိပါရဲ့။ ကျောင်းမုန့်ဈေးတန်းထဲမှာ စလိုက်နောက်လိုက်ပါပဲ။ အဲဒီအချိန်တုန်းက တိမ်ပြာပြာကောင်းကင်အောက်မှာ ကျွန်တော့်ရဲ့စံပယ်ပန်းလေးကို ရုတ်တရက်မြင်လိုက်ရတယ်။

ပြီးခဲ့တာတွေလည်း ပြီးခဲ့ပါပြီ။ အခုချိန်ကျမှ နာမည်တွေ ဘာတွေထုတ်မပြောချင်ပါဘူး။ သူလေးက စံပယ်ပန်းကို တမြတ်တနိုးပန်လို့ 'စံပယ်ပန်း' လို့ပဲ နာမည်ပေးထားလိုက်တယ်။ ကိုယ်ပေးထားတဲ့ နာမည်လေးကိုလည်း သူသိမှာ မဟုတ်ပါဘူး။ ကံကောင်းချင်တော့ မုန့်ဈေးတန်းမှာ မကြာခဏမော်ဖူးခွင့်ရတာပါပဲ။ အပြစ်ကင်းစင်တဲ့ သူ့မျက်နှာလေးကို ကြည့်နေခွင့်ရရုံနဲ့ လူဖြစ်ကျိုးနပ်ပါတယ်။

စံပယ်ပန်းလေးက (အေ) ခန်းမှာ နေတယ်တဲ့။ မာနကြီးတယ်၊ စာတော်တယ်လို့ သိရတယ်။ ကျွန်တော်က စိတ်ဝင်စားတဲ့သူကိုး။ (အေ) ခန်းသမားတွေကို မုန့်ကျွေးပြီး လိုက်မေးရတာကိုး။ အများအားဖြင့် (အေ) ခန်းသမားတွေက ဘဝင်မြင့်တယ်။ စာအတော်ဆုံးမို့လို့ (အေ) ခန်းမှာ နေရတာမလား။ မြင့်ရင်လည်း မြင့်ထိုက်ပါတယ်။

ဒါပေမယ့် ဒီ (အေ) ခန်းကောင်တွေက ကျွန်တော့်ကို အဖက်လုပ်ပါတယ်။ ဘာလို့လဲဆိုတော့ ဘော်ဒါမှာ သူတို့နားမလည်တာတဲ့ ဘာသာတွေကို ကျွန်တော်က ကူတွက်ပေးလေ့ရှိတယ်။ ဘာလို့ (အေ) ခန်းမနေတာလဲလို့ သူတို့မေးဖူးတယ်။ ဘာရယ်လို့ မဟုတ်ဘူးကွာ။ ငါ့ဆရာကြီးက (ဘီ) ခန်းနေဆိုလို့ နေလိုက်တာလို့ပဲ ဖြေလိုက်တယ်။

မုန့်ဈေးတန်းမှာ ကျွန်တော်က စံပယ်ပန်းလေးကို ငေးကြည့်တယ်။ သူမုန့်ဈေးတန်းဆင်းမလာရင် (အေ) ခန်းပြတင်းပေါက်နေ ချောင်းကြည့်တယ်။ 'ချောင်းကြည့်ပြုံးပြ' အဆင့်တောင် မဟုတ်သေးဘူး။ စံပယ်ပန်းလေးက သူ့ဘာသာစာဖတ်နေတာ။ ကျွန်တော့်ကို ပြုံးမပြပါဘူး။ အချိန်တွေ တရွေ့ရွေ့ကုန်လာတယ်။ သံယောဇဉ်ဒီဂရီတွေလည်း တက်လာတယ်။ ကျွန်တော်က တစ်ဖက်တည်းလိမ့်နေတဲ့ကောင်ပါ။ ဘယ်အချိန်မှာ ငါးပါးမှောက်မလဲဆိုတာ အဲတုန်းက မသိခဲ့ပါဘူး။ အခုနေ တွေးမိတိုင်း နာကျင်ရပါတယ်။

စံပယ်ပန်းလေးက ချမ်းသာတယ်။ ကျောင်းလာရင် ဆိုင်ကယ်စီးနိုင်တယ်။ အခုခေတ်ချာတိတ်တွေက ဒီစာကိုမြင်ရင် ရယ်နေမလားပဲ။ ကျွန်တော်တို့ခေတ်တုန်းက လူတိုင်းဆိုင်ကယ်မစီးနိုင်ဘူး။ ကျောင်းမှာ ဖီးဆင့်ဘီးစီးနိုင်ရင် အကောင်ပဲ။ ကျွန်တော်က တရုတ်စက်ဘီးအစုတ်လေးပဲ စီးနိုင်တယ်။ စံပယ်ပန်းလေးက ဂျပန်စူပါကပ်စီးတာ။ မှတ်မိသေးတယ် (၁) ယ စိမ်းရွှင်လေး။

ကံကောင်းတာတစ်ခုပြောရဦးမယ်။ သူ့ကျူရှင်က ကျွန်တော်တို့ဘော်ဒါနဲ့ မလှမ်းမကမ်းပဲ။ ကျူရှင်လာတက်ရင်လည်း မြင်နေရတယ်။ ဩော် စံပယ်ပန်းလေးက အဖြူအစိမ်းနဲ့လည်း လှတယ်။ အပြင်အဝတ်အစားနဲ့လည်း လှတာပါလား။ မြင်ပါများတော့ ကြင်လာတယ်။

ကျောင်းမှာ အခမ်းအနားတစ်ခုရှိတော့ (ဘီ) ခန်းအတွက် ကျွန်တော်က ဦးဆောင်လုပ်ရတယ်။ စံပယ်ပန်းလေးက (အေ) ခန်းဦးဆောင်သူထဲမှာပါတယ်။ အဲဒီမှာ ခင်ကြတာပါပဲ။ ခင်ပြီး မကြာခင်ရည်းစားဖြစ်မယ်လို့ စိတ်ကူးယဉ်ပြီး ရေးလိုက်ရင် လွန်သွားမလားပဲ။ ကျွန်တော့်သောက်ခွက်က လီယိုနာဒိုလို မချောဘူး၊ ဘရက်ပစ်လိုလည်း ခန့်ညားနေတာမှ မဟုတ်တာလေ။

မာနခဲ စံပယ်ပန်းလေးက ကျွန်တော့်လို (ဘီ) ခန်းသားကို အထင်မကြီးပါဘူး။ ကျွန်တော့်မှာ အထင်ကြီးစရာဘာမှမရှိတာပါ။ ကျောင်းစိမ်းပုဆိုးတောင် အရောင်မပေါ်ဘူး။ အဖြူအင်္ကျီက ခပ်နွမ်းနွမ်း။ စံပယ်ပန်းလေးက ကျွန်တော့်ကို 'ပေတူး' လို့ ခေါ်တယ်။ ခပ်နွမ်းနွမ်းကောင်မို့လို့ ဖြစ်မှာပါ။ တစ်ခါတလေ စိတ်ကြည်ရင် ကျော်စိုးအောင်လို့လည်း ခေါ်ပါတယ်။ သူစံပယ်ပန်းကြိုက်မှန်းသိတော့ ငါတို့ရွာက အိမ်မှာ စံပယ်ပန်းတွေ အရမ်းပွင့်တာဆိုပြီး ပြောခဲ့လိုက်သေးတယ်။

အဲဒီတော့ စံပယ်ပန်းလေးက စိတ်ဝင်စားလာတယ်။ အပွင့်တွေကြီးလား၊ တော်တော်မွှေးလာဘာညာ ပြန်မေးတယ်။ ကြီးတာပေါ့၊ မွှေးတာပေါ့ဆိုပြီး ကျွန်တော်က ပြန်ဖြီးလိုက်တယ်။ ရွာကနေ ငါမှာထားလိုက်မယ်၊ နောက်ရက်လာပေးမယ်နော်။ တကယ်တမ်းတော့ ကျွန်တော့်ရွာအိမ်မှာ ဘာစံပယ်ပန်းမှ မရှိပါဘူး။ မျက်နှာလုပ်ချင်လို့ လိမ်ပြောမိတာပါ။ အဲဒီနေ့ကစပြီး ကျွန်တော်က ပန်းဆက်သမား ကိုယ်ဗျတ္တဖြစ်ခဲ့ပါတော့တယ်။

ကျွန်တော်ဆိုရင် မနက်စောစောထတယ်၊ စာကျက်တယ်။ ပြီးရင် ဈေးထဲကို ပြေးတယ်။ အပွင့်အကြီးဆုံး၊ အမွှေးဆုံး စံပယ်ပန်းကုံးကို ရွေးဝယ်တယ်။ ကြာတော့ ပန်းသည်ကြီးနဲ့တောင် ခင်လာတယ်။ ကျောင်းရောက်ရင် (အေ) ခန်းထဲကိုဝင်ပြီး စံပယ်ပန်းလေးရဲ့ ထိုင်ခုံမှာ တင်ထားလိုက်တယ်။ နေ့စဉ်အလုပ်က ဒါပဲ။ ကျွန်တော်ဝယ်လာတဲ့ စံပယ်ပန်းတွေ သူပန်ထားတာမြင်တော့ ပီတိဖြစ်ရတယ်။

ဒီလိုပြောလို့ ကျော်စိုးအောင်လေးကို တဏှာတောမှာ အသာမျောနေတယ်လို့ မထင်ပါနဲ့။ စာကြိုးစားပါတယ်။ ဆယ်တန်းမှာ ဂုဏ်ထူးပါအောင် ကြိုးစားမယ်လို့လည်း ဆုံးဖြတ်ထားတယ်။ ဒါမှလည်း ရွာအပြန် မျက်နှာပန်းလှမှာမလား။ စံပယ်ပန်းလေးနဲ့ စကားပြောရတဲ့ အချိန်တွေက ကျွန်တော့်အတွက် အချိုမြိန်ရဆုံးကာလပါပဲ။

"ဘာလိုလိုနဲ့ ဒီဇင်ဘာလထဲကို ရောက်လာပြီနော်။ ဆယ်တန်းပြီးဖို့ ဘာမှမလိုတော့ဘူးဟာ။ ဆယ်တန်းပြီးရင် ငါက ရွာပြန်ရမှာဟ"

"ဟုတ်တယ် ပေတူး။ အချိန်တန်ရင် အိမ်ပြန်ရမှာပဲလေ"

"အင်း ဟုတ်တယ်၊ ငါ့ရင်ထဲ မကောင်းဘူး။ စိတ်မဆိုးနဲ့။ နင့်ကိုတော့ ငါတကယ်သံယောဇဉ်ဖြစ်မိတယ်"

"ဘာပြောတယ် ပေတူး။ လူပါးဝလိုက်တာ။ ဆယ်တန်းတက်တုန်းမှာ ငါက အဲလိုဟာတွေ မစဉ်းစားဘူး။ ရှင်းအောင်ပြောလိုက်မယ်။ အေး စဉ်းစားရမယ့် အချိန်ရောက်ရင်လည်း နင့်လိုကောင်ကို ထည့်မတွက်ဘူး။ ကိုယ့်အဆင့်ကို သိစမ်းပါ။ ကိုယ့်ကိုယ်ကိုယ် ကိုဗျတ္တလုပ်ပြီး စိတ်ကူးယဉ်မနေစမ်းနဲ့။ ငါ့အဖေနဲ့ နင့်ဆရာကြီးက သူငယ်ချင်းအရင်းကြီး။ ငါတိုင်ခိုင်းလိုက်ရမလား။ ဘော်ဒါက အထုတ်ခံရလို့ ရွာပြန်ရမယ် ဘာမှတ်နေ"

စံပယ်ပန်းလေးက အဲလိုပြောမယ်လို့ ထင်မထားဘူး။ ငြင်းခံရကိန်းရှိမှန်း ကြိုတွက်ပြီးသားပါ။ ကျွန်တော့်ကို အဲလိုနှိမ်မယ်လို့ ကြိုမသိတာပါ။ ကျွန်တော်လည်း အလိုလိုသိမ်ငယ်လာတယ်။ အားငယ်တတ်တဲ့ ကျွန်တော်က ချက်ချင်းပဲ မျက်ရည်ဝိုင်းလာတယ်။ "ငါတောင်းပန်ပါတယ်။ ငါက မမှီတဲ့ပန်းကို တုံးခုပြီး လှမ်းမိတာလေ။ ပြီးတော့ ပြည့်စုံတဲ့လူပဲဖြစ်ဖြစ်၊ မပြည့်စုံတဲ့လူပဲဖြစ်ဖြစ် ချစ်တတ်ကြတာပါပဲဟာ။ ကိုယ့်အဆင့်ကို ကိုယ်မသိလို့ ဝမ်းနည်းရပါတယ်" လို့ ပြောပြီး ထွက်ခဲ့လိုက်တယ်။

တကယ်တမ်းဆိုရင်လည်း စံပယ်ပန်းလေးပြောတာ မမှားဘူး။ ကျွန်တော်က နွမ်းပါးတယ်။ သိမ်ငယ်မှုအပြည့်ပါ။ ဆယ်တန်းတက်မယ်ဆိုပြီး မြို့တက်သွားတယ်။ ဘော်ဒါက အထုတ်ခံရလို့ ရွာပြန်ရရင်လည်း မိဘတွေ ရင်ကျိုးရမယ်။ အဲဒီတော့ နေတတ်သလိုပဲ နေလိုက်ရတယ်။ လွမ်းတာရှိရင်လည်း နာတာနဲ့ ဖြေတယ်။ စံပယ်ပန်းလေးဆီကို မသွားတော့ဘူး။ ပန်းသည်အဒေါ်ကြီးက ဘာလို့ပန်းဝယ်မလာတာလဲလို့ မေးနေသေးတယ်။ ပန်းဆက်သမား ကိုဗျတ္တရာထူးပြုတ်သွားပြီလို့ပဲ နာနာကျင်ကျင်ဖြေခဲ့လိုက်တယ်။

(အေ) ခန်းနဲ့ (ဘီ) ခန်းက ကပ်လျက်ပါ။ ကျောင်းမှာ မတော်တဆဆုံတာမျိုးရှိပါတယ်။ အဲဒီအချိန်မှာ ကျွန်တော်က စံပယ်ပန်းလေးကို မကြည့်တော့ဘူး။ မမြင်ချင်ဟန်ဆောင်လိုက်တယ်။ ကျွန်တော့်အဆင့်နဲ့ ဘယ်လိုမှ မှန်းမရဘူးလေ။ ဝေဒနာတက်လာဖို့ပဲရှိတယ်။ သူမုန့်ဈေးတန်း သွားတတ်မှန်းသိလို့ ကျွန်တော်က မသွားတော့ဘူး။ ကော်ရစ်ဒါမှာ ဆုံရင်လည်း မျက်နှာလွှဲထားလိုက်တယ်။ ဒီလိုလုပ်နေရတာလည်း ကြေကွဲရပါတယ်။

တစ်ရက်တော့ စံပယ်ပန်းလေးက ကျွန်တော့်ဘေးကို ရောက်ချလာတယ်။ ဘာဖြစ်လို့ ငါ့ဆီကို မလာတာလဲလို့ မေးနေတယ်။ "ဟုတ်ကဲ့ ကျွန်တော့်အခြေအနေကို နားလည်သွားလို့ပါ။ အရင်တုန်းက စိတ်ကူးယဉ်ခဲ့တာတွေအတွက် အနူးအညွတ်တောင်းပန်ပါတယ်" လို့ ပြောခဲ့လိုက်တယ်။ စံပယ်ပန်းလေးကို အပြင်ကို ခပ်ငေးငေးကြည့်ပြီး တွေဝေသွားတယ်။ နောက်ရက်တွေမှာလည်း ကျွန်တော်က စံပယ်ပန်းလေးကို ပြန်ရှောင်တာပါပဲ။ သူစကားစမယ်ကြံလိုက်တိုင်း ကျွန်တော်က ရှောင်ထွက်လိုက်တယ်။

ဆယ်တန်းစာမေးပွဲကာလကို ရောက်လာတယ်။ ဂုဏ်ထူးပါအောင် ကြိုးစားမယ်ဆိုပြီး ကျွန်တော်လည်း စာကိုပဲ အာရုံစိုက်ထားတယ်။ အားလုံးအဆင်ချောပါတယ်။ ဘိုင်အိုဖြေပြီးလို့ အိမ်ပြန်ဖို့ပဲ ကျန်တော့တယ်။ နောက်ဆုံးစာမေးပွဲပြီးတော့ အချင်းချင်းနှုတ်ဆက်ကြတယ်။ ကျွန်တော်လည်း စက်ဘီးလေးစီးပြီး ပြန်လာခဲ့လိုက်တယ်။ လမ်းထောင့်မှာ စံပယ်ပန်းလေးက ကျွန်တော့်ကို စောင့်နေရှာတယ်။ "ကျော်စိုးအောင် ခဏရပ်ဦး" ဆိုပြီး ဆိုင်ကယ်ပေါ်က လှမ်းပြောတယ်။

"ကျော်စိုးအောင် နင်စာမေးပွဲဖြေနိုင်လား"

"ဟုတ်ကဲ့ ဖြေနိုင်ပါတယ်ခင်ဗျ။ လမ်းမှာ စကားရပ်ပြောတာ မသင့်တော်ပါဘူး။ ကျွန်တော် အထုပ်အပိုးပြင်စရာရှိလို့ သွားတော့မယ်နော်"

"နေပါဦး။ နင်ရည်းစားစကားပြောတုန်းက ငါရိုင်းသလိုဖြစ်သွားတာ စိတ်မဆိုးနဲ့နော်။ ကျော်စိုးအောင်ရဲ့ အကြောင်းတွေကိုလည်း ကြားပါတယ်။ ဘယ်လိုစာကြိုးစားတဲ့အကြောင်း၊ စာတော်ပေမယ့် ဆရာကြီးရဲ့ စကားကို နားထောင်ပြီး (ဘီ) ခန်းမှာနေတဲ့အကြောင်း။ ပြီးတော့လေ ရည်းစားမထားဖူးတဲ့အကြောင်းလည်း ပါတာပေါ့"

"ဟာ ရပါတယ်။ ကိုယ်မကြိုက်တဲ့လူကို ဒီလိုပဲ တုံ့ပြန်တာ မဆန်းပါဘူး။ ကျွန်တော်က ဘာမှမဟုတ်ဘူးလေ။ အခုအိမ်ပြန်ရင် ကျွန်တော်က နွားနဲ့ဖက်ရုန်းရမှာခင်ဗျ။ ကိုယ်ချစ်တဲ့လူက ကိုယ့်ကို ပြန်မချစ်တာ ဘယ်တတ်နိုင်မလဲ"

"ဘယ်သူက မချစ်ဖူးလို့ ပြောလို့လဲ။ ဆယ်တန်းတက်နေရင်း ရည်းစားမထားချင်ဘူးလို့ ပြောတာပါ။ အခုဆယ်တန်းပြီးပြီလေ။ မနက်ဖြန်မှာ ငါပြောစရာရှိတယ်။ နင်ကျောင်းထိပ်က စောင့်နေ။ မနက် (၉) နာရီနော်။ ငါပြောမယ့်စကားက နင်လိုချင်တဲ့ အဖြေဖြစ်မလား မပြောတတ်သေးဘူး တာ့တာ"

ကျွန်တော်က စက်ဘီးလေးစီးပြီး လေထဲကို လွင့်နေတယ်။ စံပယ်ပန်းလေးက ကျောင်းထိပ်မှာ ချိန်းလိုက်တာ အိုဘားမားနဲ့ တွေ့ခွင်ရသလောက်ကို အဖိုးတန်ပါတယ်။ ဘော်ဒါပြန်ရောက်တော့ ရေမိုးချိုးပြီး လမ်းထိပ်ထွက်တယ်။ စာအုပ်ဆိုင်ကနေ စာအုပ်တွေငှားပြီး သာယာနေလိုက်တယ်။ မနက်ဖြန်မှာ စံပယ်ပန်းလေးနဲ့ တွေ့ခွင့်ရမှာမို့ ညအိပ်လို့တောင် မပျော်ပါဘူး။

ကျွန်တော်က စီးတော်ရာ စက်ဘီးလေးကို ရပ်ပြီး ကျောင်းထိပ်မှာ ထိုင်စောင့်နေတယ်။ စံပယ်ပန်းလေးက မနက် (၉) နာရီမှာ ရောက်မလာဘူး။ (၁၀) နာရီထိုးလည်း မလာပါဘူး။ ကျွန်တော်တစ်နေကုန်ထိုင်စောင့်တယ်။ ဘုန်းမောင် တစ်ယောက်တည်းဖြစ်ပြီး အရူးမီးဝိုင်းပဲ။ သူမေ့လို့ဖြစ်မှာပါဆိုပြီး နောက်ရက်လည်း ရွာမပြန်သေးဘဲ ကျောင်းထိပ်မှာပဲ တစ်နေကုန်ထိုင်စောင့်တယ်။ ရောက်မလာဘူး။ စံပယ်ပန်းလေးရေ . . . ငါ့ကိုများ နောက်သွားတာလား။ နေ့စဉ်ရက်ဆက် ထိုင်စောင့်နေတယ်။ ရွာမှာရှိတဲ့ အဖေတို့အမေတို့က စိတ်ပူလာတယ်။ ဒီကောင်လေး စာမေးပွဲပြီးတာတောင် ရွာပြန်မလာသေးဘူးဆိုပြီး မန္တလေးကို လိုက်ခေါ်တယ်။ ကျွန်တော်လည်း ဆန့်ငင်ဆန့်ငင်ဖြစ်ပြီး ရွာပြန်ခဲ့ရတယ်။

ကျွန်တော်က မန္တလေးကို အောင်စာရင်းကြည့်ဖို့ ပြန်ရောက်လာတယ်။ စံပယ်ပန်းလေးလည်း ဆယ်တန်းအောင်တယ်။ ဂုဏ်ထူးတွေ အများကြီးပဲ။ ကျွန်တော်လည်း အောင်တယ်။ ကျွန်တော်မြင်ချင်တဲ့ စံပယ်ပန်းလေးကို မတွေ့ခဲ့ရဘူး။ ခုံနံပါတ်ကိုပဲ တွေ့ခဲ့ရတယ်။ လက်လှမ်းမှီသလောက် စုံစမ်းကြည့်ပေမယ့် ဘယ်လိုမှမရခဲ့ဘူး။

အချိန်တွေလည်း ပြောင်းလာပြီ။ အဲဒီနောက်မှာ ကျွန်တော်က တက္ကသိုလ်ကျောင်းသားဖြစ်လာတယ်။ အဲတုန်းကလည်း စုံစမ်းသေးတယ်။ မရဘူး။ နှစ်ပေါင်းများစွာကြာတော့ ကျွန်တော် အိမ်ထောင်ကျတယ်။ တစ်ရက်မှာတော့ ကျွန်တော်တို့နှစ် ကျောင်းသားဟောင်းတွေစုလုပ်တဲ့ ဆရာကန်တော့ပွဲရှိတယ်။ ကျွန်တော့်ကိုလည်း ဖိတ်ထားတယ်။

ကျောင်းကို ပြန်မရောက်တာ ဆယ်စုနှစ်တစ်ခုတောင် မကတော့ပါဘူး။ တရုတ်စက်ဘီးစီးနေတဲ့ ငယ်ပုံရိပ်ကို ပြန်တွေးမိတယ်။ ကျောင်းထိပ်က အုတ်ခုံကို မြင်ပြီး မျက်ရည်တောင် ဝဲမိသေးတယ်။ စံပယ်ပန်းလေးရယ် ရက်စက်လိုက်တာကွာ။ သူငယ်ချင်းဟောင်းတွေနဲ့ ပြန်ဆုံရတယ်။ စံပယ်ပန်းလေး မလာပါဘူး။ အဲဒီမှာ စံပယ်ပန်းလေးရဲ့ (အေ) ခန်းသူငယ်ချင်းတွေလည်း ပါလာတယ်။

"ကျော်စိုးအောင် ဟိုသတင်းကြားပြီးပြီလား။ ---- ဆုံးသွားပြီတဲ့"

"ဟာ . . . ဘယ်လိုဖြစ်တာလဲ"

"ဒီလိုတဲ့ အစက ပြန်ပြောရမှာပဲ။ ဆယ်တန်းပြီးတဲ့နောက်ရက်မှာ ကျောင်းထိပ်ကို သွားတာတဲ့။ အဲဒီမှာ ဟိုဘက်က တက်လာတဲ့ ကားအောက်ကို ဝင်တိုးမိတာ။

"ဟင် ဘိုင်အိုဖြေပြီးတဲ့ နောက်ရက်ကို ပြောတာလား"

"ဟုတ်တယ် ကျော်စိုးအောင်။ ဘာသွားလုပ်မှန်းမသိဘူး။ စာမေးပွဲဖြေဖို့လည်း မရှိတော့ဘူးလေ။ သနားစရာပါ။ ခြေနှစ်ဖက်လုံး ဖြတ်ပစ်လိုက်ရတယ်။ ဝှီးချဲပေါ်မှာတင် ဘဝရဲ့ နေဝင်ချိန်ကို စောင့်နေရတာပဲ။ သူငယ်ချင်းတွေကိုလည်း အတွေ့မခံဘူး။ အားလုံးကို အဆက်အသွယ်ဖြတ်ထားတယ်။ အိမ်လာလည်ရင်လည်း ထွက်မတွေ့ဘူး။ စိတ်အရမ်းထိခိုက်သွားတာ။ တစ်ရက်တော့ ငါမေးမိတယ်။ နင့်မှာ ချစ်ရတဲ့လူရှိလားလို့။ ပေတူးကို ချစ်တယ်လို့ ငိုယိုပြီး ဖြေတယ်။ ပေတူးဆိုတာ ဘယ်သူမှန်းငါလည်း မသိဘူးဟယ်။ အဲနောက်မှာ သူက ငါ့ကိုတောင် အတွေ့မခံတော့ဘူး။ စိတ်ထောင်းကိုယ်ကြေဖြစ်ပြီး လုံးပါးပါးတာပဲ။ ဆုံးသွားတာ (၂) နှစ်ကျော်ပြီ ကျော်စိုးအောင်"

ရင်ထဲမှာ အားလုံးကို ပြန်မြင်ကြည့်တယ်။ ကျောင်းထိပ်မှာ ထိုင်စောင့်နေတဲ့ ဆယ်ကျော်သက်လေး။ စိမ်းရွှင်စူပါကပ်လေး စီးလာတဲ့ စံပယ်ပန်းလေး။ တစ်ဖက်က အရှိန်ပြင်းပြင်း ထွက်လာတဲ့ ကား။ ကျိုးကြေသွားတဲ့ ခြေနှစ်ဖက်။ သွေးအိုင်ထဲက စံပယ်ပန်းလေး။ ဘယ်တော့မှ ပြန်ဆုံခွင့်မရတဲ့ ငယ်ချစ်ဦး။ စာဖတ်သူတွေ ဘေးကင်းပါစေ။

03/06/2026

ကျွန်တော်တို့ ဝေဖန်ကြရာဝယ်

ကျွန်တော်က ရိုးရာလက်ဝှေ့သမားတွေကို ဝေဖန်တယ်။ ဘာဖြစ်လို့ ဝေဖန်တာလဲ။ ဖြစ်စေချင်လို့ပါ။ ကျွန်တော်ဆိုရင် ရိုးရာလက်ဝှေ့ပွဲတွေကို လွန်ခဲ့တဲ့ (၁၀) နှစ်တည်းက ရုံအရောက် အားပေးလာခဲ့တာပါ။ တက္ကဆီဖိုးမရှိရင်တောင် လိုင်းကားစီးပြီး သွားကြည့်တယ်။ တခြားမြို့မှာ ရိုးရာလက်ဝှေ့ပွဲရှိရင်လည်း သွားကြည့်တယ်။ အလုပ်ကြောင့် လာကြည့်တာဆိုရင် ဒီလောက်အထိ ငွေကုန်ကြေးကျခံပြီး သွားစရာမလိုပါဘူး။ ဖန်သားပြင်ပေါ်ကပဲ စောင့်ကြည့်မှာပဲလေ။ ဝါသနာပါလွန်းလို့သာ ရုံအရောက်သွားကြည့်တာပါ။

လက်ရှိအချိန်မှာ ရိုးရာလက်ဝှေ့သမားတွေက သေချာအားမစိုက်ကြဘူး။ ကိုယ်တွေက ရင်ဘတ်ကြီးရင်းပြီး အားပေးရတာပါ။ ဆရာတွေက ထိုးချင်သလိုထိုးပြီး ကန်ချင်သလို ကန်ကြတယ်။ ရှုံးသွားရင်လည်း မျက်နှာမပျက်ဘူး။ ရှက်ရကောင်းမှန်း မသိကြဘူး။ အားပေးရတဲ့ ကိုယ်တွေမှာ အသည်းတွေ ကွဲရပါတယ်။ အဲဒါကြီးကို မကြိုက်တာပါ။

ONE Friday Fights ပြိုင်ပွဲမှာ ကျော်စွာဝင်းက (၁) ပွဲနိုင်ပြီး (၁) ပွဲရှုံးထားတယ်။ ရလဒ်ကောင်းတယ်လို့ မဆိုနိုင်ပေမယ့် ဝေဖန်လို့ မရပါဘူး။ ဘာဖြစ်လို့လဲဆိုတော့ တအားကြိုးစားနေလို့ပါ။ အိမ်စာလုပ်ထားမှန်းသိသာတယ်။ အဲဒါကြောင့်မို့ ရှုံးရင်တောင် စွမ်းဆောင်ရည်မကျဘူး။ ဒီလိုတွေ ကွာတယ်။

အခုဆိုရင် ကျွန်တော်က ကျော်စွာဝင်းကလွဲရင် ရိုးရာလက်ဝှေ့သမားတွေကို ဝေဖန်တယ်။ ရှုံးပွဲဆက်လို့ ရေးရတာမဟုတ်ဘဲ နေချင်သလိုနေ ထိုင်ချင်သလိုထိုင်တဲ့ အကျင့်စရိုက်ကြောင့်သာ ပြောရတာပါ။ ပုံမှန်လေးသာ ကြိုးစားစေချင်တယ်။ ရှုံးတာနိုင်တာထက် စွမ်းဆောင်ရည်ကောင်းနေဖို့ အရေးကြီးတယ်။ စွမ်းဆောင်ရည်ကောင်းရင် ရှုံးသွားလည်း ပရိသတ်က စိတ်မပျက်ဘူး။ အခုက သက်လုံကို ပါမလာတာပါ။

နိဂုံးချုပ်ပါမယ်။ ရိုးရာလက်ဝှေ့သမားတွေရဲ့ အနေအထိုင်တွေကြောင့်သာ ပြောရတာပါ။ ကျွန်တော်က ရိုးရာလက်ဝှေ့ချစ်သူပါ။ ဘယ်လက်ဝှေ့သမားကိုမှ မမုန်းပါဘူး။ အကန်သမားလည်း မဟုတ်ပါဘူး။ ကြိုးစားကြတဲ့ ရိုးရာလက်ဝှေ့သမားတွေကို ချီးကျူးဖို့ ဝန်မလေးပါဘူး။ စွမ်းဆောင်ရည်ကောင်းလာရင် ကျွန်တော်က စကားလုံးလှလှသုံးပြီး ထိပ်ဆုံးက ချီးကျူးပါမယ်။ ကိုယ့်လူတွေလည်း ကြိုးစားကြပါ။ ကျွန်တော်လည်း ဒီလိုတွေ မရေးချင်ပါဘူး။ ကိုယ့်ရိုးရာလက်ဝှေ့သမားတွေကို ချစ်ခင်စိတ်ကြောင့် ဖြစ်စေချင်လို့သာ အမုန်းခံပြီး ရေးရတာပါ။ စာဖတ်သူတွေ ဘေးကင်းပါစေ။

Reference Source - Bangkok Post
Photo Credit - ONE Championship
ကျော်စိုးအောင် (Myanmar Fight Edition)

03/06/2026

"Ilia Topuria က လေကြီးမိုးကြီးရယ်။ ကိုယ့်ကိုယ်ကိုယ် ဘုရင်ကြီးလို့ ထင်နေတယ်။ နတ်ဘုရားလို့တောင် ယူဆနေတယ်။ တော်တော်အာရုံနောက်တဲ့ ငစား။ အခန်းထဲမှာ နာရီဝက်လောက်သာ သူနဲ့ စကားထိုင်ပြောရရင် စဉ်းစားလို့တောင် မရဘူး။ အဲဒါကြောင့်မို့လို့လည်း အမျိုးသမီးက သူ့ကို ထားခဲ့တာဖြစ်မယ်။ သည်းခံနိုင်စရာအကြောင်းမှ မရှိတာလေ"

လိုက်ဝိတ်ကြားဖြတ်ချန်ပီယံ Justin Gaethje က လိုက်ဝိတ်ချန်ပီယံ Ilia Topuria ကို လေတိုက်လိုက်ပါတယ်။ Ilia Topuria က Conor Clone လို့တောင် ဆိုထားသေးတယ်။ Justin Gaethje ရဲ့ အဖေ John Ray Gaethje ကလည်း Ilia Topuria ကို လူပုလူသေး လူဗလံလေးလို့ နှိမ်ထားဖူးတယ်။

Ilia Topuria ကလည်း ကြွက်သားထုထည်တင်နေတယ်။ Ilia Topuria နဲ့ Alex Pereira တို့က အတူလေ့ကျင့်ဖူးတယ်။ နည်းပြ Plinio Cruz က Ilia Topuria ထွားလာတယ်လို့ ဆိုထားတယ်။ ၁၉၈ ပေါင် (၉၀ ကီလိုဂရမ်) ရှိတယ်တဲ့။ ကလပ်ရောက်တုန်း ဝိတ်ချိန်ထားတာဖြစ်မယ်။

သံဇကာထဲမှာ Ilia Topuria က နှင်းဆီပွင့်ယူလာတယ်။ နှင်းဆီပွင့်အနီကို အဆင်ပြေသလို သယ်လာတာပါ။ ဒီတစ်ခါမှာတော့ အနီမဟုတ်တော့ဘူး။ ရှားပါးနှင်းဆီအဖြူတဲ့။ အိမ်ဖြူတော်အတွက် နှင်းဆီအဖြူ။ UFC White House ပြိုင်ပွဲအတွက် White Rose ပါပဲလေ။ စာဖတ်သူတွေ ဘေးကင်းပါစေ။

+-x÷+-x÷+-x÷+-x÷+-x÷+-x÷+-x÷+-x÷+-x÷+-x÷

ဘောလုံးပွဲတွေလောင်းရတာ ဝါသနာပါသူတွေအတွက် သတင်းအချက်အလက်တွေကို တစ်နေရာတည်းမှာ စုံစုံလင်လင် ရှာဖွေနိုင်ဖို့ဆိုတာ မလွယ်ကူပါဘူး။ ဒါပေမယ့် Golden Goal Myanmar က အကောင်းဆုံးအဖြေတစ်ခုပါ။ Application မှာ ပွဲစဉ်တွေရဲ့ စဖွင့်စျေး ၊ မနက်ပိုင်းစျေး ၊ ညနေပိုင်းစျေးတွေ၊ နိုင်ခြေ/ရှုံးခြေ ဂိုးပေါ်/ဂိုးအောက် ရာခိုင်နှုန်းတွေအပြင် နောက်ဆုံး ၅ ပွဲကြေးအောင်ရှုံးအချက်အလက်တွေနဲ့ ပွဲကြိုအချက်အလက်တွေ သုံးသပ်ချက်တွေကိုပါ တိကျမှန်ကန်စွာ ဖော်ပြပေးထားပါတယ်။ ဒါ့အပြင် အထူးပွဲရွေးချယ်မှုတွေကိုပါ တင်ဆက်ပေးနေတာမို့ ကိုယ့်ရဲ့နိုင်ခြေကို ပိုမိုတိုးတက်စေမှာပါ။ ဘောလုံးပွဲစဉ် ခန့်မှန်းမှုတွေအတွက် သတင်းအချက်အလက်အစုံအလင်ကို အချိန်တိုအတွင်းမှာ ဖတ်ရှုနိုင်ဖို့ Golden Goal Myanmar ကို ယခုပဲ ဒေါင်းလုဒ်ဆွဲလိုက်ပါ။

Reference Source – ESPN
Photo Credit - UFC
ကျော်စိုးအောင် (Myanmar Fight Edition)

03/06/2026

ကိုရဲနဲ့ ကျွန်တော်က စိတ်ကူးပေါက်ရာ ရောက်တတ်ရာရာ ပြောထားပါတယ်။

03/06/2026

"ရိုးရာလက်ဝှေ့သမားတွေ မရှိတာ နည်းစနစ်မဟုတ်ဘဲ အရှက်ဖြစ်နေတယ်"

မြန်မာ့ရိုးရာလက်ဝှေ့သမား (အများစု) က ပုံမှန်မလေ့ကျင့်ဘဲ နေချင်သလိုနေ ထိုင်ချင်သလိုထိုင် စားချင်သလို စားကြတယ်။ ပွဲနီးလာမှ လေ့ကျင့်တယ်။ ဘူမသိ ကိုးမသိဆိုတော့ ဝေဖန်လာတဲ့ ပရိသတ်ကို မထီမဲ့မြင်ပြုပြန်တယ်။ ပရိသတ်တွေထဲမှာ သူတို့ထက် ပိုနားလည်တဲ့လူတွေ ရှိတာကို နားမလည်ရှာဘူး။ ပွဲနီးရင် အားပေးကြပါဦးဆိုပြီး အရှက်ဘေးချိတ်လို့ မဲဆွယ်ကြပြန်တယ်။ ပွဲရှုံးတော့ ပရိသတ်တွေကို တောင်းပန်လိုက်တယ်။ ထပ်ရှုံးတော့ ထပ်တောင်းပန်ပါတယ်။ ရှုံးပွဲဆက်နေတော့ တောင်းပန်လို့ မဆုံးတော့ဘူး။ ဒီကလူတွေ မရှိတာ နည်းစနစ်မဟုတ်ပါဘူး။ အရှက်ပါ။

ရိုးရာလက်ဝှေ့သမားတွေက ဘာဖြစ်ချင်နေမှန်း မသိပါဘူး။ အဆိုတော်ဖြစ်ချင်တာလား၊ ဘောလုံးသမားဖြစ်ချင်တာလား၊ နိုက်ကလပ်တက်ချင်တာလား၊ ပန်းရန်ဆရာဖြစ်ချင်တာလား၊ ဆယ်လီဖြစ်ချင်တာလား။ ကိုယ့်ဆရာတွေက လေ့ကျင့်ဖို့ကလွဲရင် ကျန်တာ အကုန်အာရုံစိုက်တယ်။ မရောင်ရာ ဆီလူးလွန်းလို့ အခုလို ခံကြီးမောင်ဖြစ်နေရတာပါ။ ခံကြီးမောင်လို့ ပြောရင်လည်း နာမယ်မထင်ဘူး။ ထိုးကြေးရရင်တော့ ဘယ်လိုပြောပြော မရှက်ပါဘူး။

မြန်မာပရိသတ်တွေက ONE Friday Fights ပြိုင်ပွဲတွေကို အရင်လောက် စိတ်မဝင်စားတော့ဘူး။ ဒါကလည်း ပရိသတ်အပြစ်ရယ်လို့လည်း မဟုတ်ပါဘူး။ ထိုးကြေးရရင်ပြီးရောဆိုပြီး ဘန်ကောက်မြို့အထိ လာအထိုးခံတယ်။ နိုင်တာ၊ ရှုံးတာကို စိတ်မဝင်စားဘူး။ ထိုးကြေးရဖို့သာ အဓိကပါ။ အလဲထိုးရှုံးလည်း ထိုးကြေးပိုက်ပြီး ပြန်မယ်။ အိမ်ရောက်ရင် စပ်ဖြဲဖြဲပြန်လုပ်မယ်။ ယိုသူမရှက် မြင်သူရှက်ရတဲ့ ဘဝကြီးပါ။

ပါးနပ်တဲ့ ပရိသတ်တွေက မြန်မာဖိုက်တာတွေကို ဘက်ကန်လောင်းတယ်။ အရင်လို ရင်ဘတ်ကြီးရင်းပြီး အားမပေးတော့ဘူး။ မြန်မာဖိုက်တာတွေကို (၁၀) ပွဲဘက်ကန်လောင်းရင် အနည်းဆုံး (၇) ပွဲနိုင်တယ်။ ဒီလောက်ကြီးက ရှက်စရာကောင်းပါတယ်။ ပါးနပ်တဲ့ ပရိသတ်တွေက အမြတ်ကျန်ပါတယ်။

နည်းစနစ်အားနည်းတာက သင်ပေးလို့ရတယ်။ ခံယူချက်အားနည်းတာက သင်ပေးလို့ပါမရဘူး။ အခုလို အရှက်မရှိလုပ်နေတာကိုလည်း ပြင်ပေးလို့ မရပါဘူး။ ငါးပိရည်ကြိုက်တဲ့ ခံကြီးမောင်တွေက ရေပေါ်ဆီ၊ အသပြာသမားတွေမို့လို့ စိတ်ဓာတ်နဲ့ ခံယူချက်ကောင်းတဲ့ အညာသား ကျော်စွာဝင်းကိုပဲ မရဲတရဲမျှော်လင့်မိပါတယ်။ စာဖတ်သူတွေ ဘေးကင်းပါစေ။

Reference Source - Bangkok Post
Photo Credit - ONE Championship
ကျော်စိုးအောင် (Myanmar Fight Edition)

02/06/2026

"ကျွန်တော့်သား Justin Gaethje က လူပုလူသေး လူဗလံလေးကို ကစားရတော့မယ်။ Justin Gaethje က Michael Chandler ၊ Rafael Fiziev တို့အပြင် တခြားပြိုင်ဘက်တွေကိုလည်း လုပ်ပြခဲ့ပြီးပါပြီ။ အခုပွဲမှာ ဒီအတိုင်းပဲ ဖြစ်လာမှာပါ။ ကျွန်တော်တို့က အဲဒီအတွက် လေ့ကျင့်ခဲ့တာလေ။ သူ့ရဲ့ဘဝတစ်ခုလုံးကို ဒီအတိုင်းဖြစ်အောင် ပုံစံသွင်းခဲ့တာပါ"

John Ray Gaethje ပြောစကား

Vlog ထဲမှာ John Ray Gaethje က Justin Gaethje လုပ်ပြနိုင်မယ်လို့ ယုံကြည်တဲ့အကြောင်း ထည့်ပြောသွားတယ်။ Michael Chandler နဲ့ Rafael Fiziev တို့လို အရပ်ပုတဲ့ပြိုင်ဘက်တွေကိုလည်း လုပ်ပြဖူးတယ်တဲ့။

Ilia Topuria ကလည်း လူပုလူသေး လူဗလံလေးမို့ အေးဆေးပါပဲလို့ John Ray Gaethje က ဆိုသွားတယ်။ အိမ်စာလုပ်ထားတယ်တဲ့။ ဒါကိုကြည့်ပြီး Ilia Topuria တင်းသွားပုံပေါ်တယ်။ အထူးသဖြင့် လူပုလူသေး လူဗလံလေးလို့ သုံးနှုန်းသွားတာကို ဘဝင်မကျတာပါ။ နှိမ်တယ်လို့ ခံစားမိပုံပဲ။ လူမှုကွန်ရက်မှာ အခုလိုပဲ တုံ့ပြန်ထားပါတယ်။

"အဖေတွေက မျှော်လင့်ချက်ပဲ ထားနိုင်တယ်။ ချန်ပီယံက ဘာဖြစ်မယ်ဆိုတာ သိတယ်။

ဒီလိုစကားလုံးတွေကို အရင်တည်းက ကြားခဲ့ဖူးပါတယ်။ ငါ့ထက် ပိုသန်မာတဲ့ကောင်တွေ၊ ပိုထွားတဲ့ကောင်တွေ၊ ပိုကောင်းတဲ့ကောင်တွေပေါ့လေ။ ကျွန်တော့်ကို လူပုလူသေး လူဗလံလေးလို့ ပြောခဲ့ကြတဲ့ ပြိုင်ဘက်တွေကပဲ ကိုယ့်ကိုယ်ကိုယ်နှိမ့်ချတတ်ဖို့ သင်ခန်းစားရသွားကြတာပါ (အလဲထိုးခံရတာကို ဆိုလိုတာပါ)

ခင်ဗျားသား Justin Gaethje က ကျွန်တော်ဘာကောင်လဲဆိုတာ သိနေပြီ။ ဇွန်လ (၁၄) ရက်နေ့မှာ ခင်းဗျားလည်း သိလာလိမ့်မယ်။ (၁၈) ပွဲနိုင်ပြီး ရှုံးပွဲမရှိပါ ဖေဖေရေ"

အခုစာသားကို အကဲခတ်ရရင် လိုက်ဝိတ်ချန်ပီယံ Ilia Topuria က ယုံကြည်ချက်အပြည့်ပါပဲ။ လေ့ကျင့်ကွင်းမှာတည်းက အနိုင်သေချာနေပြီ၊ သံဇကာထဲဝင်တာက ခါးပတ်ယူဖို့ပဲဆိုတဲ့ လက်သုံးစကားကို အရင်တည်းက ပြောခဲ့တာပါ။ အခုလည်း "အဖေတွေက မျှော်လင့်ချက်ပဲ ထားနိုင်တယ်။ ချန်ပီယံက ဘာဖြစ်မယ်ဆိုတာ သိတယ်" ဆိုတဲ့ စကားလုံးက သင်းတယ်။ စပါးသူများ စပါး၊ သား ကိုယ့်သားဆိုသလို မိဘတွေက ကိုယ့်သားသမီးကို အကောင်းဆုံးမျှော်လင့်ထားကြတာပါ။ အဲဒါကြောင့်မို့ John Ray Gaethje ဘက်က မျှော်လင့်ရုံပဲ တတ်နိုင်တယ်လို့ ဆိုသွားတာပါ။

ကိုယ့်ထက် အရပ်ပိုရှည် (ပိုထွား) တဲ့ ပြိုင်ဘက်တွေကို အလဲထိုးလာတာမို့ Justin Gaethje ကို စာမဖွဲ့ဘူးလို့ Ilia Topuria က ပြောသွားတာပါ။ လက်ရှိရလဒ်က (၁၇) နိုင်ထားပါတယ်။ Justin Gaethje ကိုလည်း အနိုင်သေချာနေပြီမို့ (၁၈) ပွဲနိုင်ပြီး ရှုံးပွဲမရှိဘူးလို့ Ilia Topuria က ဆိုသွားတာပါ။ ဇာတ်လမ်းက ကြည့်လှနေပြီ။ UFC Freedom 250 ပြိုင်ပွဲရဲ့ ခေါင်ပွဲက ပိုလှုပ်လာပြီ။ စာဖတ်သူတွေ ဘေးကင်းပါစေ။

Reference Source - Justin Gaethje
Photo Credit - Ilia Topuria
ကျော်စိုးအောင် (Myanmar Fight Edition)

02/06/2026

တောင်ဥက္ကလာပမြို့နယ် အခြေစိုက် The Sports Corner မှာ Video Editor ခေါ်နေပါတယ်။ Job Description ကို အထူးမရေးတော့ဘူး။ အားကစားဗီဒီယိုတွေကို တည်းဖြတ်ပေးရုံပါပဲ။ ဗီဒီယိုရိုက်တတ်ရင် ပိုကောင်းပါတယ်။

Urgent လိုတာမို့ အင်တာဗျူးအမြန်ဝင်ရပါမယ်။ စိတ်ဝင်စားရင် [email protected] ကို CV Form ပို့ပေးပါ။ မျှော်မှန်းလစာလည်း ထည့်ထားပေးနော်။ ကျေးဇူးတင်ပါတယ်။

02/06/2026

Conor McGregor ချန်ပီယံပြန်ဖြစ်နိုင်လား

Conor McGregor ကို နာမည်ကြီးစေတာ ဖယ်သာဝိတ်တန်းပါ။ အလုံးအထည်က အနေတော်ပဲ။ Reach (၇၄ လက်မ) က အတော်ကောင်းတယ်။ ဖယ်သာဝိတ်တန်းမှာ နိုင်ပွဲဆက်ပြီး ချန်ပီယံဖြစ်လာတယ်။

Conor McGregor က လိုက်ဝိတ်တန်းတက်ပြီး ချန်ပီယံလုတယ်။ ဝိတ်တန်း (၂) ခုမှာ ချန်ပီယံဖြစ်တယ်။ Cage Warriors နဲ့ UFC အဖွဲ့အစည်းမှာ ဒီလိုပဲ ကစားလာတယ်။

လိုက်ဝိတ်တန်းမှာ Conor McGregor က သေးတယ်။ ပြိုင်ဘက်တွေထက် အနည်းဆုံး (၁၀) ပေါင်ငယ်တယ်။ ပါဝါနဲ့ မာဂုဏ်ကွာတယ်။ အထူးသဖြင့် အငယ်တန်းမှာ ဝိတ်ကွာတာ သိသာတယ်၊

လူတွေမှာ ပါဝါနဲ့ မာဂုဏ်က အကန့်အသတ်ရှိတယ်။ ဥပမာပေးကြည့်မယ်။ ဖလိုင်းဝိတ်မှာ (၁၂၅) ပေါင်ရှိတယ်။ ဖယ်သာဝိတ်က (၁၄၅) ပေါင်ပါ။ (၂၀) ပေါင်ကွာလို့ ပါဝါနဲ့မာဂုဏ်က သိသာတယ်။ ဖလိုင်းဝိတ်က ဖယ်သာဝိတ်ကို အလဲထိုးနိုင်ဖို့ မလွယ်ဘူး။ ဖယ်သာဝိတ်က ဖလိုင်းဝိတ်ကို အလဲထိုးနိုင်တယ်။

ဟဲဗီးဝိတ်တန်းမှာ ကစားတယ်ဆိုပါစို့။ (၂၄၀) ပေါင်နဲ့ (၂၆၀) ပေါင်လည်း (၂၀) ပေါင်ပဲကွာတာပါ။ ပါဝါနဲ့ မာဂုဏ် မသိသာဘူး။ ဘယ်သူမဆို အလဲထိုးနိုင်တယ်။ အကြီးတန်းမှာ ဝိတ်ကွာတာက မသိသာဘူး။

သတိထားမိရဲ့လား။ MMA Industry က အရွေ့တစ်ခုလို ပြောင်းလဲလာတယ်။ ဖိုက်တာတွေက ပိုပြည့်စုံလာတယ်။ တစ်ပေါက်သမားက ချန်ပီယံဖြစ်ဖို့ မလွယ်ဘူး။ ဖြစ်ရင်လည်း ခဏပဲ။

Conor McGregor ရဲ့ Striking က အနုပညာမြောက်တယ်။ Grappling Skill လည်း မနိမ့်ဘူး။ အကောင်ကြီးတဲ့ ပြိုင်ဘက်ကို ယှဉ်လုံးရင် အားပိုသုံးရတယ်။ သက်လုံကုန်လွယ်တယ်။ ခန္ဓာကိုယ်နဲ့ အဖိခံရတယ်။ ပါဝါက ပြိုင်ဘက်ရဲ့ မာဂုဏ်ကို မကျော်နိုင်ဘူး။

အားကစားလောကမှာ Conor McGregor လုပ်ပြခဲ့တာ အများကြီးပဲ။ ချမ်းသာနေပြီ။ ကုမ္ပဏီတွေလည်း ထောင်ထားတယ်။ အားကစားအပြင် တခြားလုပ်စရာတွေလည်း ရှိနေသေးတယ်။ အာရုံစိုက်စရာတွေ များနေတယ်။

အလုံးအထည်အရ Conor McGregor က ဖယ်သာဝိတ်တန်းကို ပြန်မဆင်းဘူး။ တစ်ကျော့ပြန်ခရီးမှာ Max Holloway ကို ဝယ်တာဝိတ်တန်းမှာ ကစားလိမ့်မယ်။ နိုင်ရင် လိုက်ဝိတ်ချန်ပီယံလုခွင့် ရနိုင်ပါတယ်။ ဒါပေမယ့် (၅) နှစ်ကြာပွဲဝေးနေသလို အသက် (၃၈) နှစ်ပြည့်တော့မှာမို့ လိုက်ဝိတ်ချန်ပီယံပြန်ဖြစ်ဖို့ မလွယ်ပါဘူး။ စာဖတ်သူတွေ ဘေးကင်းပါစေ။

Reference Source - ESPN ၊ UFC
Photo Credit - The Sun
ကျော်စိုးအောင် (Myanmar Fight Edition)

02/06/2026

"ပွဲမထိုးခင်မှာ လိင်ဆက်ဆံပါတယ်ရှင့်"

ဘင်တန်ဝိတ်ချန်ပီယံဟောင်း အမေရိကန် ပဘာဝတီ Ronda Rousey နာမည်ကြီးတာ Conor McGregor ထက် အများကြီးစောတယ်။ အသက်အားဖြင့် (၁) နှစ်လောက်ပဲ ကွာခြားပေမယ့် Ronda Rousey က ဝါကြီးတယ်။ Ronda Rousey က ဘင်တန်ဝိတ်ချန်ပီယံဖြစ်တဲ့အချိန်မှာ Conor McGregor က ချာတိတ်ပဲရှိသေးတယ်။ လိင်ကိစ္စနဲ့ စွမ်းဆောင်ရည် ဆက်စပ်ပုံကို အလှဘုရင်မ Ronda Rousey က နတ်သံနှောပြီး အခုလို ရှင်းပြသွားပါတယ်။

"လိင်ကိစ္စဆိုတာကလေ အမျိုးသမီးတွေအတွက် Testosterone Hormone ကို မြင့်တက်စေတယ်လေ။ ကျွန်မဆိုရင် ပွဲမထိုးခင်မှာ လိင်ဆက်ဆံပါတယ်ရှင့်။ ခွန်အားရှိသလောက် ကိုယ်စွမ်းသလောက် အားရပါးရဆက်ဆံတယ်ပေါ့ရှင်"

Armbar မူပိုင်ရှင် Ronda Rousey က The Jim Rome Show မှာ ပွင့်ပွင့်လင်းလင်းပြောသွားတာပါ။ Testosterone Hormone မြင့်လာရင် အမျိုးသမီးတွေက ပိုတက်ကြွလာသလို သက်လုံပိုကောင်းတယ်။ ကြွက်သားထုထည်ကို ပိုတက်စေပြီး အရိုးသိပ်သည်းဆကိုလည်း မြင့်တက်စေပါတယ်။ စိတ်အားတက်ကြွလာပြီး အာရုံစူးစိုက်မှုပိုကောင်းတယ်တဲ့။ ဒါ့ကြောင့်လည်း UFC အဖွဲ့အစည်းရဲ့ သမိုင်းမှာ ပထမဆုံးအမျိုးသမီးဘင်တန်ဝိတ်ချန်ပီယံဖြစ်လာပြီး ချန်ပီယံဘွဲ့ကို (၆) ကြိမ်ကာကွယ်နိုင်တာလား မပြောတတ်ဘူး။ သွေးသားဆန္ဒက စွမ်းဆောင်ရည်တိုးတက်စေတယ်လေ။

ဒါက လူတိုင်းအတွက် မမှန်နိုင်ဘူး၊ ပွဲထိုးခင်လေးမှာ လိင်ဆက်ဆံတာက တိုက်ခိုက်ရေးကစားသမားတွေအတွက် မကောင်းပါဘူးလို့ အားကစားဆေးပညာရှင် Maria Cristina Rodriguez Gutierrez က ဆိုထားဖူးတယ်။

"တစ်ယောက်နဲ့တစ်ယောက်တော့ မတူနိုင်ဘူးပေါ့။ ပွဲမတိုင်ခင်မှာ လိင်ဆက်ဆံတာက တိုက်ခိုက်ရေးကစားသမားတွေအတွက် တက်ကြွမှုကို အားနည်းစေသလို လေးတိလေးကန်ဖြစ်စေပါတယ်။ ဆိုးကျိုးက လူတိုင်းအပေါ်မှာ တူညီနိုင်မှာ မဟုတ်ပါဘူး"

နိဂုံးချုပ်ရရင် တခြားအားကစားသမားတွေအတွက် ပွဲမတိုင်ခင်မှာ လိင်ဆက်ဆံတာက သိပ်မထူးခြားပေမယ့် တိုက်ခိုက်ရေးကစားသမားတွေအတွက် လှုပ်ရှားမှုကို ထိခိုက်စေပါတယ်တဲ့။ အလှဘုရင်မ Ronda Rousey အတွက် လိင်ကိစ္စက ဆေးနည်းကောင်းလို ဖြစ်နေပါတယ်။ စာဖတ်သူတွေ ဘေးကင်းပါစေ။

Reference Source - The Jim Rome Show
Photo Credit - Getty Images
ကျော်စိုးအောင် (Myanmar Fight Edition)

Myanmar Fight Edition

05/06/2026

04/06/2026

03/06/2026

03/06/2026

03/06/2026

03/06/2026

02/06/2026

02/06/2026

02/06/2026

02/06/2026

ที่อยู่

เวลาทำการ

เบอร์โทรศัพท์

เว็บไซต์

แจ้งเตือน

ติดต่อ ธุรกิจของเรา

ทางลัด

แชร์

ประเภท

จันทร์	09:00 - 18:00
อังคาร	09:00 - 18:00
พุธ	09:00 - 18:00
พฤหัสบดี	09:00 - 18:00
ศุกร์	09:00 - 18:00
เสาร์	09:00 - 18:00
อาทิตย์	09:00 - 18:00