เว็บไซต์คืออะไร?

BBM

🍉 Media of
📻 True Story
📺 Fresh News
📺 Breaking News
💡 Remove Brainwashed

24/04/2026

ပြည်သူ့စစ်သားဇနီးများ စကားသံ အစီအစဥ်

🟨 ဒီတစ်ပတ်ရဲ့ စကားသံ အစီအစဥ်မှာတော့ “Men Engaging in Gender-Based Violence Awareness” ကို အခြေခံ၍ လိင်အခြေပြု အကြမ်းဖက်မှုများကို နားလည်သဘောပေါက်လာစေရန်နှင့် တားဆီးကာကွယ်နိုင်ရန် ရည်ရွယ် ပြီး
ပိတောက်ဖူး မှ CDM များအတွက် Gender-Based Violence (GBV) ဆိုင်ရာ အသိပညာမြှင့်တင်ရေး ဆွေးနွေးပွဲ တစ်ခု ပြုလုပ်ခဲ့ပြီး Workshop ကို တက်ရောက်ပါဝင်ခဲ့သူများ၏ အတွေ့အကြုံ ၊ ခံစားချက် စကားသံများကို တင်ဆက်ပေးသွားမှာပဲဖြစ်ပါတယ် ။

ပိတောက်ဖူး နှင့် ပြည်သူ့စစ်သားဇနီးများက စီစဉ်တဲ့ယခုစကားသံအစီအစဉ်ကို အပါတ်စဉ် သောကြာနေ့ ည7:00 မှာ

ပြည်သူ့စစ်သားဇနီးများ

,

News
#ပိတောက်ဖူး-Blooming Padauk

+

Page များမှ တိုက်ရိုက် ထုတ်လွှင့်ပြသသွားမှာဖြစ်ပါတယ်။
#ပြည်သူ့စစ်သားဇနီးများ

17/04/2026

ပြည်သူ့စစ်သားဇနီးများပြောတဲ့ တပ်တွင်းအကြောင်း

10/04/2026

ပြည်သူ့စစ်သားဇနီးများ စကားသံ အစီအစဥ်

🟨 ဒီနေ့ ဆွေးနွေးမယ့် အကြောင်းအရာက
တချို့အမျိုးသမီးတွေအတွက် ပြောရခက်ပြီး
တချို့အတွက်တော့ နေ့စဉ်ကြုံတွေ့နေရတဲ့ အကြောင်းအရာတစ်ခုပါ။
အဲဒါကတော့ Gender-Based Violence လို့ ခေါ်တဲ့ Gender အခြေပြု အကြမ်းဖက်မှု အကြောင်း ဖြစ်ပါတယ်။
GBV ဆိုတာဟာ
ရုပ်ပိုင်းဆိုင်ရာ အကြမ်းဖက်မှုတစ်ခုတည်းမဟုတ်ပဲ
စိတ်ပိုင်းဆိုင်ရာ၊ စီးပွားရေး၊ လိင်ပိုင်းဆိုင်ရာ
အားလုံး ပါဝင်ပါတယ်။
ဒီနေ့ Panel မှာတော့
– GBV ကို နားလည်ဖို့
– အမျိုးသမီးတွေ ကြုံတွေ့နေရတဲ့ အခက်အခဲတွေကို သိဖို့
– ပြန်လည်ကာကွယ်နိုင်တဲ့ နည်းလမ်းတွေကို မျှဝေဖို့
ဆွေးနွေးသွားပါမယ်။

ဒီတစ်ပတ်ရဲ့ စကားသံ အစီအစဥ်မှာတော့ မစုသစ် ( ပိတောက်ဖူး နှင့် ပြည်သူ့စစ်သားဇနီးများအဖွဲ့ တည်ထောင်သူ ) နှင့် မ မဒီချို( တပ် CDM ဇနီး ) ၊ မနှင်းဝေအောင် ( တပ် CDM ဇနီး ) တို့က ဆွေးနွေး တင်ဆက်ပေးသွားပါမယ်။

ပိတောက်ဖူး နှင့် ပြည်သူ့စစ်သားဇနီးများက စီစဉ်တဲ့ယခုစကားသံအစီအစဉ်ကို အပါတ်စဉ် သောကြာနေ့ ည7:00 မှာ

ပြည်သူ့စစ်သားဇနီးများ

,

News
#ပိတောက်ဖူး-Blooming Padauk

+

Page များမှ တိုက်ရိုက် ထုတ်လွှင့်ပြသသွားမှာဖြစ်ပါတယ်။
#ပြည်သူ့စစ်သားဇနီးများ

16/01/2024

◼ဗိုလ်ချုပ်ထွန်းမြတ်နိုင်ပြောတဲ့ "မသေချင် အလံဖြူထောင်" ဆိုတဲ့ ရခိုင်စစ်မျက်နှာ

စစ်ကောင်စီတပ်စွဲထားတဲ့ မီးဝ ဗျူဟာစခန်းကုန်းကို ဇန်နဝါရီ ၉ ရက်နေ့မှာ ရက္ခိုင့်တပ်တော် AAမှ စတင်တိုက်ခိုက်ခဲ့ပြီး၊ ဇန်နဝါရီ ၁၄ ရက်နေ့မှာ အပြီးသတ် သိမ်းပိုက်ရရှိခဲ့တာ ဖြစ်တယ်။ ဒီနောက်တော့ ပလက်ဝ ဒေသတခုလုံး စစ်ကောင်စီ ကင်းစင်နယ်မြေဖြစ်ကြောင်း ရက္ခိုင့်တပ်တော် AAမှ ထုတ်ပြန်ထားပါတယ်။

ရက္ခိုင့်တပ်တော် AA အနေနဲ့ ပြီးခဲ့တဲ့ ၂၀၂၃ ခုနှစ်၊ နိုဝင်ဘာလပိုင်းမှစတင်ပြီး ပလက်ဝဒေသတွေကို ထိုးစစ်ဆင်တိုက်ခိုက်ခဲ့တာ ဖြစ်တယ်။ တိုက်ခိုက်မှုအတွင်း စစ်ကောင်စီရဲ့ စစ်ရေးအရ အရေးပါတဲ့ ထရွန်အိုင်ဗျူဟာနဲ့ နှုံးဘူးဗျူဟာ ၂ ခုစလုံးကို နိုဝင်ဘာလ ၁၄ ရက်နေ့မှာ စတင်တိုက်ခိုက်ခဲ့ပြီး၊ ဒီဇင်ဘာလ အစပိုင်းမှာ သိမ်းပိုက်ရရှိခဲ့တာဖြစ်တယ်။

တဆက်တည်းမှာပဲ ၂၀၂၄ ခုနှစ်၊ ဇန်နဝါရီ ၂ ရက်နေ့မှာ ပလက်ဝ အထက်ပိုင်းရှိ ရှင်းလက်ဝ ဗျူဟာစခန်းကို ဆက်လက်သိမ်းပိုက်နိုင်ခဲ့တာဖြစ်တယ်။ လက်ရှိမှာတော AA တပ်ဖွဲ့မှ ပလက်ဝ ဒေသတခုလုံးကို ထိန်းချုပ်နိုင်ခဲ့ပြီဖြစ်တယ်။ ပလက်ဝ ဒေသအတွင်း စစ်ကောင်စီရဲ့ စခန်းကုန်းတချို့ ပြန့်ကျဲ ရှိနေသေးပေမယ့် ပထဝီအရ အရေးပါတဲ့ ကုလားတန် မြစ်ကြောင်း တလျှောက်မှာတော့ စစ်ကောင်စီရဲ့ အချက်အချာကျတဲ့ ဗျူဟာကုန်းတွေကို ထိန်းချုပ်ထားနိုင်ခဲ့တာဖြစ်တယ်။

"ရခိုင်ပြည်နယ်အတွင်းက လက်ရှိ တိုက်ပွဲတွေဟာ အနောက်ပိုင်းတိုင်းစစ်ဌာနချုပ်တည်ရှိရာ အမ်းမြို့နယ်ကို ဦးတည်လာနိုင်သလို၊ ကျောက်ဖြူရေနက်ဆိပ်ကမ်းနဲ့ စပ်ဆက်နေတဲ့ စစ်ကောင်စီရဲ့ ဓညဝတီရေတပ်စခန်းဟာလည်း အရေးကြီးတဲ့ ပစ်မှတ် တစ်ခု ဖြစ်လာကြောင်း" နိုင်ငံရေးလေ့လာသူ ဦးသန်းစိုးနိုင်က ပြောဆိုထားပါတယ်။

ဒီအခြေအနေမှာ စစ်ကောင်စီဘက်က တန်ပြန်တိုက်ခိုက်နိုင်တာဆိုလို့ လေကြောင်းတိုက်ခိုက်မှုနဲ့ ရေတပ်ကနေ အမြောက်လက်နက်ကြီးနဲ့ပစ်ခတ်တိုက်ခိုက်တာတွေပဲ တတ်နိုင်ပါတော့တယ်။ တကယ်တမ်းလည်း ရခိုင်ဒေသမှာ စစ်ကောင်စီ တပ်တွေ သွားလာလှုပ်ရှားနိုင်တာ ရေတပ်တခုပဲ ရှိတယ်လို့ ဆိုနိုင်ပါတယ်။ ဒီအခြေအနေမှာ ရေတပ်စစ်ဦးစီးချုပ် မိုးအောင်ကို ရုပ်ချဥ်း ရာထူးပြောင်းရွှေ့လိုက်တာဟာ တိုက်ပွဲတွေအတွင်း ရေတပ်က ထိထိရောက်ရောက် မပါဝင်ပေးနိုင်တာလည်း ဖြစ်နိုင်ပါတယ်။

ပလက်ဝဒေသဟာ စစ်ရေးအရဆိုတာထက် နိုင်ငံရေးအရ၊ စီးပွားရေးအရလည်း အတော်ကို အရေးပါပါတယ်။ ပလက်ဝကိုရရှိခြင်းဟာ စစ်ကောင်စီအဓိက လုပ်ဆောင်နေတဲ့ အိန္ဒိယ-မြန်မာ ကုလားတန် ဘက်စုံ ဖွံဖြိုးရေးစီမံကိန်းကို AA တပ်ဖွဲ့က ထိန်းချုပ်လိုက်နိုင်တယ်လို့ ဆိုနိုင်သလို စစ်ကောင်စီအနေနဲ့ စီးပွားရေးလုပ်ငန်းအတော်များများ လက်လွှတ်ရတော့မှာပဲဖြစ်တယ်။ ဒီအတွက် စစ်ကောင်စီအနေနဲ့ တပူပေါ် နှစ်ပူဆင့် နိုင်ငံခြားဝင်ငွေ အများကြီး ဆုံးရှုံးမှာပဲ ဖြစ်တယ်။ ဒါ့အပြင် အိန္ဒိယ-မြန်မာ စီမံကိန်းစမယ်ဆိုရင် အိန္ဒိယအနေနဲ့ ရက္ခိုင့်တပ်တော် AAနဲ့ အဓိက ပြောဆိုဆက်ဆံရမှာပဲ ဖြစ်တယ်။

ဒါ့အပြင် ဒီဒေသကို AA တပ်ဖွဲ့ ထိန်းချုပ်နိုင်ခဲ့ခြင်းရဲ့နောက်ကွယ်မှာ တရုတ်ရဲ့ အကူအညီသာ ပါခဲ့မယ်ဆိုရင် အမေကျော်ဒွေးတော်လွမ်းပြီး ရုရှားကို ခြံခုန်ချင်နေတဲ့ စစ်ခေါင်းဆောင်ကို တကွက်ပြလိုက်တယ်လို့ဆိုရမှာပါ။ ပလက်ဝတည်ရှိရာနေရာဟာ အိန္ဒိယ-မြန်မာ- ဘင်္ဂလားဒေရှ့်နယ်စပ် စုံရာဒေသဖြစ်ပြီး နိုင်ငံရေးအရလည်း စစ်ကောင်စီအနေနဲ့ အရှက်ရစရာဖြစ်လာပါတယ်။

အခုလို အချက်အခြာဒေသတခုကို AA တပ်ဖွဲ့က ထိန်းချုပ်လိုက်နိုင်တာဟာ တော်လှန်ရေးအပေါ် အများကြီး အကျိုးသက်ရောက်တယ်လို့လည်း ဆိုချင်ပါတယ်။ ဘာ့ကြောင့်လဲဆိုတော့ စစ်ကောင်စီ အာဏာသိမ်းပြီးအချိန်ကတည်းက အမျိုးသားညီညွတ်ရေးအစိုးရ NUGနဲ့ AAဟာ စစ်အာဏာရှင်ဖြုတ်ချရေး တူညီတဲ့ ရည်ရွယ်ချက်ရှိခဲ့သလို၊ တော်လှန်ရေးအပေါ် ကန်လန်ကာ နောက်ကွယ်ကနေ ထောက်ပံ့ကူညီပေးနေခဲ့တာဖြစ်တယ်။

အသိသာဆုံးဆိုရင် စစ်တပ်အာဏာသိမ်းပြီးနောက်ပိုင်း AA တပ်ဖွဲ့ဟာ ရခိုင်ပြည်နယ်အတွင်း လက်နက်ကိုင်တပ်ဖွဲ့တွေတည်ထောင်ခွင့်မပေးတာကလွဲရင် တော်လှန်ရေးအင်အားစုတွေအပေါ် စစ်ပညာ၊ လက်နက်စတဲ့ထောက်ပံ့မှုမျိုးရှိခဲ့ပါတယ်။ထိုအထဲမှာ ဗမာပြည်သူ့လွတ်မြောက်ရေးတပ်တော် (BPLA)၊ ကျောင်းသားလက်ရုံးတပ်တော်(ရန်ကုန်)၊မကွေးဒေသရှိ တော်လှန်ရေးအင်အားစုများအပြင်၊ မင်းတပ်ဒေသရှိ ချင်းကာကွယ်ရေးတပ်ဖွဲ့များလည်း ပါဝင်ပါတယ်။

ဒါ့ကြောင့် အခုလို ရခိုင်-ချင်း ဒေသအစပ်ရှိ ပလက်ဝ ဒေသကို ထိန်းချုပ်လိုက်နိုင်တဲ့နောက်မှာ မကွေးတိုင်းအတွင်းရှိ အညာတပ်ပေါင်းစုတွေဆီကို လက်နက်ခဲယမ်း စီးဆင်းဖို့ လမ်းကြောင်း ပိုမိုပွင့်လာနိုင်ပါတယ်။ လက်ရှိမှာ ရခိုင်ပြည်နယ်အတွင်းရှိ စစ်ကောင်စီ အခြေစိုက် တပ်ရင်းတပ်ဖွဲ့များ၊ စခန်းကုန်းများကို ရက္ခိုင့်တပ်တော် AA မှ အပြင်းအထန် ထိုးစစ်ဆင် တိုက်ခိုက်လျက် ရှိပါတယ်။

အခုချိန်မှာ တနိုင်ငံလုံးအတိုင်းအတာနဲ့ စစ်ကောင်စီအတွက် အကျပ်တည်းဆုံးအချိန်ကိုရောက်ရှိလာသလို၊ စစ်တိုက်ဖို့လူအင်အားလိုအပ်ချက်ဟာလည်း အမြင့်မားဆုံးအနေအထားမှာ ရှိနေပါတယ်။ ဒါ့ကြောင့် ရခိုင်ပြည်နယ်အတွင်း စစ်တပ်ဟာ စိတ်ရှိတိုင်း တိုက်ပွဲမဝင်နိုင်တာတွေ့ရပါတယ်။ တဖက်မှာလည်း နေပြည်တော်ကို ပိတ်ဆိုလာနိုင်တဲ့ ပဲခူးတိုင်းအတွင်း PDF စိမ့်ဝင်မှုကို နောက်ကျောမလုံတဲ့အတွက် ပြည်သူ့စစ် အတင်းအဓမ္မစုဆောင်းနေတာတွေရှိပါတယ်။

ရှမ်းမြောက်ဒေသအတွင်းမှာဆိုရင်လည်း တရုတ်ရဲ့ ဖိအားကြောင့်သာ ငြိမ်းချမ်းရေး လုပ်ရပေမယ့် နှစ်ဖက်အပြန်အလှန် ယုံကြည်မှုမရှိတော့တဲ့အနေအထားပါ။ ဒီအချိန်မှာ ရှမ်းမြောက်ဒေသရှိ ခလရ (၁၂၃) တပ်ရင်းကို KIA/PDF တပ်များမှ တိုက်ခိုက်ခဲ့သလို၊ ကချင်ပြည်နယ်အတွင်းမှာလည်း စစ်ကောင်စီတပ်ရင်းတွေကို စစ်ရေးအရ ဖိအားပေးနေတာတွေ့ရပါတယ်။ ဒါ့အပြင် ကရင်နီနဲ့ ချင်း တော်လှန်ရေးအင်အားစုများကလည်း နယ်မြေရဲ့ ၈၀ ရာခိုင်နှုန်း ထိန်းချုပ်နိုင်မှုအပေါ် အုပ်ချုပ်ရေး၊ ဥပဒေပြုရေး တည်ဆောက်နေတာတွေ့ရပါတယ်။

တော်လှန်ရေးအင်အားစုမှ သိမ်းပိုက်ရရှိထားတဲ့ မြို့တွေဟာ လက်ရှိ (၃၁) မြို့အထိရှိလာသလို၊ တိုက်ပွဲတွေလည်း အလယ်ပိုင်းဒေသရှိ စစ်ကိုင်း၊မကွေးအပါအဝင် မန္တလေးတိုင်းအတွင်းမှာပါ ပိုမို အားကောင်းလာပါတယ်။ ဒီအခြေအနေမှာ စစ်ကောင်စီတပ်သားတွေအနေနဲ့ ဗိုလ်ချုပ်ထွန်းမြတ်နိုင်ပြောသလို "မသေ၊မနာချင်ရင်စောစောစီးစီးအလံဖြူထောင်" လို့ပဲ နောက်ဆုံးအနေနဲ့ ပြောချင်ပါတယ်။

✍မောင်ဝိ

#တော်လှန်ရေး
#စစ်ကောင်စီ

15/01/2024

◼ စစ်ရေးအရှိန်ပြင်းပြင်း ရိုက်ခတ်လာတဲ့အခါ

ပြည်သူက ရွေးကောက်ထားတဲ့ ရွေးကောက်ခံအစိုးရကို စစ်တပ်ကလက်နက်အားကိုးနဲ့ ဖြုတ်ချပြီး တိုင်းပြည်အာဏာကိုသိမ်းပိုက်ခဲ့တဲ့ ၂၀၂၁ ခုနှစ် ဖေဖော်ဝါရီလ ၁ ရက်နေ့ကနေစပြီး ယနေ့အချိန်ထိ နိုင်ငံအနှံ့ရှိ ပြည်သူအများစုဟာ ငြိမ်းချမ်းစွာ ဆန္ဒပြတောင်းဆိုမှုအပါအဝင် စစ်တပ်ကိုနည်းလမ်းပေါင်းစုံနဲ့ ဆန့်ကျင်မှုတွေ ပြုလုပ်ကြပါတယ်။ နောက်ဆုံး အာဏာသိမ်းမှုကို လက်မခံကြောင်း စစ်အာဏာရှင်စနစ်အလိုမရှိကြောင်း လက်နက်ဆွဲကိုင် တိုက်ပွဲဝင်ကြပါတော့တယ်။

ပြည်သူများရဲ့ ဆန့်ကျင်မှုတွေ၊ ဆန္ဒထုတ်ဖော်မှုတွေ လက်နက်ကိုင်တိုက်ပွဲဆင်နွှဲမှုများကိုပါ စစ်တပ်နဲ့ စစ်တပ်ထောက်ခံသူ လူအနည်းစုဟာ ဒီလိုဆန့်ကျင်မှုတွေဟာ မြင့်မိုရ်တောင်ကို ဇီးစေ့နဲ့ပေါက်သလောက်သာရှိကြောင်း၊ နှစ်ပေါင်း၇၀ ကျော်တည်ဆောက်ထားတဲ့ ကမ္ဘာ့အဆင့်ရှိတဲ့ တပ်မတော်တစ်ခုကို သေနတ်လေးပစ်တက်ရုံလောက်နဲ့ တွန်းလှန်လို့မဖြစ်နိုင်ကြောင်းတွေ ပြောဆိုကာ နွေဦးတော်လှန်ရေးကို လှောင်ပြောင်တာတွေပြုလုပ်ခဲ့ပါတယ်။

နွေဦးတော်လှန်ရေးအစပိုင်းကာလတွေ ဖြစ်တဲ့ ၂၀၂၁ ခုနှစ်၊ ၂၀၂၂ ခုနှစ်နဲ့ ၂၀၂၃ ခုနှစ်အစောပိုင်းကာလတွေမှာဆိုရင်လည်း မင်းတို့တော်လှန်ရေးက ၁ နှစ်ကျော် ၂ နှစ်လောက်ထိ ရောက်နေပြီ ခုချိန်ထိ စစ်တပ်ရဲ့ ဘယ်စခန်းတွေကိုများ တိုက်ခိုက်နေပြီလဲ၊ မြန်မာနိုင်ငံမှာရှိတဲ့ ရာပေါင်းများစွာသော မြို့တွေထဲက ဘယ်မြို့ကိုများသိမ်းနိုင်နေပြီလဲ၊ စစ်သားအနည်းငယ်လောက်သာရှိတဲ့ ကင်းစခန်းတွေကို ပစ်ပြီးပြေးနိုင်ရုံလောက်နဲ့ စစ်တပ်ကိုမတော်လှန်ချင်နဲ့ဆိုတဲ့ ထေ့လုံးတွေသုံးကာ နွေဦးတော်လှန်ရေးကို အထင်သေး လှောင်ပြောင်ခဲ့ကြပါတယ်။

ဒါပေမဲ့လည်း စစ်တပ်ထောက်ခံသူ လူနည်းစုရဲ့တော်လှန်ရေးအပေါ် အထင် အမြင်သေးမှုတွေဟာ ၂၀၂၃ ခုနှစ် နှစ်ကုန်ပိုင်းကနေစပြီး တဖြည်းဖြည်း ငါတို့အမြင်တွေ မှားယွင်းနေပြီဆိုတာကို လက်ခံလာနိုင်အောင် တော်လှန်ရေးအင်အားစုတွေက သက်သေပြလာပါတယ်။ ၂၀၂၃ ခုနှစ် နှောင်းပိုင်းလတွေကစပြီး နေရာအစုံက တော်လှန်ရေးအဖွဲ့တွေဟာ စစ်တပ်ကို အရင်ကထက်စစ်ရေးအရ ဖိအားပေးနိုင်ခဲ့ပါတယ်။

စစ်ကောင်စီရဲ့ စီးပွားရေး၊ စစ်ရေးအရ အရေးပါလှတဲ့ အာရှလမ်းမကြီးတစ်လျှောက်မှာဆိုရင်လည်း တောင်ပိုင်းတိုင်းက တော်လှန်ရေးအဖွဲ့တွေအနေနဲ့ ပုံမှန်စစ်ဆေးမှု ပြုလုပ်တာတွေ၊ စစ်တပ်ကသူတွေနဲ့ သတင်းပေးတွေကို မသင်္ကါရင် မသင်္ကါသလို ချက်ချင်းစစ်ဆေးဖမ်းဆီးတာတွေပင်ပြုလုပ်နိုင်ခဲ့ပါတယ်။ ဒါ့အပြင် စစ်တပ်ရဲ့ထိုးစစ်ကြောင့် ၁၉၇၅ ခုနှစ်နောက်ပိုင်း ဆုတ်ခွာခဲ့ရတဲ့ ပဲခူးရိုးမကိုလည်း ၂၀၂၃ ခုနှစ်နောက်ပိုင်းကစပြီး တော်လှန်ရေးအဖွဲ့တွေအနေနဲ့ ပြန်လည်ခြေချနိုင်ကာ စစ်ကောင်စီရဲ့စီးပွားရေးမြိုံ့တော်ဖြစ်တဲ့ရန်ကုန်နဲ့ လေတပ်စခန်းဌာနချုပ်တွေရှိရာ တောင်ငူမြို့ကိုပါ ကောင်းစွာခြိမ်းခြောက်နိုင်တဲ့အခြေအနေကိုရောက်ရှိလာပါတယ်။

တောင်ပိုင်းတိုင်းရဲ့ စစ်ရေးအရှိန်ဟာ မြှင့်တက်လာသလို မြောက်ပိုင်းစစ်ဒေသမှာဆိုရင်လည်း မြန်မာ့နွေဦးတော်လှန်ရေးရဲ့ အချိုးအကွေ့တစ်ခုလို့ဆိုနိုင်တဲ့ ၁၀၂၇ စစ်ဆင်ရေးကို ညီနောင်မဟာမိတ်တွေက ဦးဆောင်ပြီး စစ်တပ်ရဲ့စခန်းရာပေါင်းများစွာနဲ့ စီးပွားရေး၊ စစ်ရေးအရ အရေးပါလှတဲ့ နယ်စပ်မြို့တွေကိုပါ သိမ်းပိုက်ခဲ့ကြပါတယ်။ ၁၀၂၇ စစ်ဆင်ရေး အရှိန်ပြင်းပြင်းနဲ့ ဘယ်လောက်ရိုက်ခက်လိုက်သလဲဆိုရင် ချင်းပြည်နယ်၊ စစ်ကိုင်းတိုင်းနဲ့ အခြားသော တိုင်းနဲ့ပြည်နယ်က မြို့ပေါင်း ၂၀ ကျော်အထိ တော်လှန်ရေးအဖွဲ့တွေက သိမ်းပိုက်နိုင်ခဲ့ပြီဖြစ်ပါတယ်။

မြို့တွေသိမ်း စစ်တပ်ခန်းတွေသိမ်းပိုက်နေတဲ့အချိန်မှာ တချိန်က ဗမာ့စစ်တပ်ရဲ့ အကြမ်းဆုံး တိုက်ခိုက်ရေးတပ်မဖြစ်တဲ့ တပ်မ၉၉ ရဲ့ တပ်မမှူးဖြစ်တဲ့ ဗိူလ်မှူးချုပ်အောင်ကျော်လွင်အပါအဝင် စစ်သည်အရာရှိပေါင်းများစွာလည်း ၁၀၂၇ စစ်ဆင်ရေးအတွင်းသေဆုံးခဲ့ရသလို၊ ခုနောက်ဆုံး လောက်ကိုင် ဒကစမှူးအပါအဝင် ဗိုလ်မှူးချုပ် ၆ ယောက်နဲ့ စစ်သည်မှီခိုအားလုံးပေါင်းလိုက်ရင် ၄ ထောင်ကျော်ဟာလည်း တော်လှန်ရေးအဖွဲ့တွေထံ လက်နက်ချအညံ့ခံခဲ့ရပါတယ်။

လောက်ကိုင်က စစ်ကောင်စီတပ်ရဲ့ လက်နက်ချအညံ့ခံပွဲကြီးဟာ စစ်တပ်သမိုင်းတစ်လျှောက် ပထမဆုံးအကြိမ်အဖြစ် သမိုင်းမှတ်တမ်းဝင်သွားခဲ့ပါပြီ။ ၁၀၂၇ စစ်ဆင်ရေးအတွင်းမှာတော့ တပ်မမှူးတွေ၊ အရာရှိကြီးအဆင့်ရှိတဲ့ ဗိုလ်မှူးချုပ်တွေ စစ်ပွဲအတွင်းသေဆုံးသလို လက်နက်ချ အညံ့ခံခဲ့ကြရတာဖြစ်တဲ့အတွက် ကမ္ဘာ့အဆင့် ၃၈ ဆိုပြီး အမြဲဝံ့ကြွားနေတက်တဲ့ စစ်ခေါင်းဆောင်တွေအတွက်တော့ အရှက်ရစရာ အဖြစ်အပျက် သမိုင်းဆိုးကြီး ဖြစ်သွားခဲ့ရပါပြီ။

စစ်ခေါင်းဆောင်တွေဟာ အစဥ်အဆက် တိုင်းရင်းသားတော်လှန်ရေးတပ်ဖွဲ့တွေကြောင့် တိုင်းပြည်နစ်နာနေရတာဖြစ်ပြီး စစ်တပ်ရှိနေလို့သာ တိုင်းပြည်မပြိုကွဲတာဖြစ်ကြောင်း အကြောင်းပြချက်တွေပေးပြီး နိုင်ငံတော်ဘဏ္ဍာကိုခိုးယူခဲ့ကြသလို ဝါဒဖြန့်ကာ သူရဲကောင်းကြီးလို ဖန်တီးထားတဲ့အခြေအနေကနေ အဖက်ဖက်က တိုးတက်လာတဲ့ ယနေ့ခေတ် ဒီကနေ့ နွေဦးတော်လှန်ရေးမှာတော့ စစ်တပ်ရဲ့သဘောထားအမှန်ကို ပြည်သူတွေကသိရှိလာပြီး ယခုလို စစ်တပ်အထိနာပြီး သမိုင်းဝင် လက်နက်ကိုင် တော်လှန်ရေးကြီးကိုဆင်နွှဲနေကြခြင်း ဖြစ်ပါတယ်။

တော်လှန်ရေး အစကဆိုရင် စစ်ကောင်စီလက်အောက်ခံတွေနဲ့ စစ်ကောင်စီ ဝါဒဖြန့် လော်ဘီတွေက မင်းတို့တော်လှန်ရေး ဘယ်တော့ပြီးမှာလဲ၊ ဘယ်နှစ်မြို့ကိုများသိမ်းပိုက်ပြီးပြီလဲဆိုပြီး လှောင်ပြောင်သရော်ခဲ့တဲ့သူတွေ ဒီကနေ့မှာတော့ ပြင်းထန်လှတဲ့ တော်လှန်ရေးအဖွဲ့တွေရဲ့တိုက်ခိုက်မှုတွေ သူတို့ရှိရာမြို့တွေ၊ တပ်တွေဆီမရောက်လာဖို့အတွက် ဆုတောင်းနေရတဲ့ အခြေအနေကိုရောက်ရှိလို့လာနေပါပြီ။ လာတိုက်ရင်တောင် ပြေးဖို့အသင့်ဖြစ်နေပြီ လက်နက်ချဖို့အသင့်ဖြစ်နေပြီဆိုတာမျိုးတွေ ဖြစ်နေပါပြီ။

စစ်ကောင်စီတပ်အတွင်း ဘယ်လောက်တုန်လှုပ်နေလဲဆိုရင် အထင်ရှားဆုံး တကယ်ဖြစ်ပျက်နေတဲ့ အခြေအနေတခုကို ပြပါဆိုရင် ဇန်နဝါရီလ ၃ရက်နဲ့ ၄ ရက်နေ့က တိုက်ခိုက်သိမ်းပိုက်နိုင်ခဲ့တဲ့ ပြင်ဦးလွင်မြို့အနီး သံဘိုစခန်း သိမ်းပိုက်မှု ဖြစ်စဥ်အပြီးမှာတော့ တပ်မြို့လို့ဂုဏ်ယူနေပြီး အမြဲတမ်း တော်လှန်ရေးအဖွဲ့တွေကို လှောင်ပြောင်နေတဲ့ ပြင်ဦးလွင်မြို့ရှိ အရာရှိစစ်သည်တွေပါ ကြောက်လန့်တုန်လှုပ်နေပြီး မိသားစုဝင်တွေကို ရန်ကုန်၊ မန္တလေး၊ နေပြည်တော်တို့လို မြို့တွေကို ပြောင်းရွေ့နေကြပြီလို့ သိရပါတယ်။

ဒါဟာ တော်လှန်ရေးအရှိန်ဘယ်လောက်ထိကြီးမားပြီး ဘယ်လောက်အထိ ရိုက်ခတ်မှု ပြင်းထန်နေလဲဆိုတာကို ပါးစပ်က ထုတ်မပြောပေမဲ့ တပ်တွင်းကသူတွေကိုယ်တိုင် သွယ်ဝိုက်တဲ့နည်းလမ်းနဲ့ ဝန်ခံနေခြင်းဖြစ်တယ်။ ဒါကြောင့် အခု နွေဦးတော်လှန်ရေးဟာ ဟိုးယခင်တော်လှန်ရေးတွေလို ၁ နှစ် ၂ နှစ်တလောက်နဲ့ နေရာအနည်းစုမှာသာ တွန်းလှန်တော်လှန်နေတာ မဟုတ်ဘဲ နိုင်ငံအနှံ့ ဒေသအနှံ့မှာပါ အရှိန်ပြင်းပြင်းနဲ့ တော်လှန်နေကြတယ်ဆိုတာကို တပ်ထဲကသူတွေအနေနဲ့ ကောင်းကောင်းသဘောပေါက်သင့်ပါပြီ။

အခု လက်နက်ကိုင် နွေဦးတော်လှန်ရေးဟာ တစ်ပါတီ၊ တစ်စုတဖွဲ့၊ လူတစ်ဦးတစ်ယောက်အတွက် တိုက်ပွဲဝင်နေကြတာမဟုတ်ပါဘူး။ လူတစ်ဦးတစ်ယောက်၊ မိသားစုတစ်ခုကို မုန်းလို့ တိုက်ပွဲဝင်နေကြတာ မဟုတ်ပါဘူး။ တန်းတူရေးနဲ့ ဖက်ဒရယ်ဒီမိုကရေစီရေးအတွက် အာဏာရှင်တွေကို အမြစ်ပြတ်တိုက်ထုတ်နေတာဖြစ်တယ်ဆိုတာကို စစ်တပ်ထဲက အာဏာရှင်လက်ပါးစေတွေအနေနဲ့ သိသင့်တယ်။

အဲဒါကြောင့် စစ်ကောင်စီတပ်တွင်းက အမှန်တရားကို လိုလားပြီး လက်နက်မဲ့ ပြည်သူတွေကို သတ်ဖြတ်နေဖို့ အမိန့်ပေးသမျှလုပ်နေရတဲ့ စစ်သည်တွေအနေနဲ့ အချိန်မလွန်ခင် ပြည်သူ့ဘက်ကိုသာ ရပ်တည်လိုက်ရင် သမိုင်းဝင်တော်လှန်ရေးကြီးရဲ့ အောင်ပွဲတွေကို ဂုဏ်သိက္ခာရှိရှိ ပြည်သူတွေ တော်လှန်ရေးရဲဘော်တွေနဲ့အတူ ဂုဏ်ယူဝံ့ကြွားစွာ အောင်ပွဲခံနိုင်မှာဖြစ်ကြောင်း တင်ပြလိုက်ရပါတယ်။ ။

✍ မင်းသော်

#တော်လှန်ရေး

11/01/2024

◼ စစ်ကောင်စီ ပြိုလဲကြောင်း ထင်ရှားလာတဲ့ တပ်တွင်း အကွဲအပြဲများ

၂၀၂၁ ခုနှစ် မင်းအောင်လှိုင်ဦးဆောင်တဲ့ စစ်တပ်က အာဏာသိမ်းပြီးနောက်ပိုင်း ခရိုနီ စစ်ဗိုလ်ချုပ်ကြီးများ အချင်းချင်း အဝေမတည့်မှုများ၊ ရာထူးကြီးသူက ရာထူးငယ်တဲ့ ဗိုလ်ချုပ်တွေကို ဖြုတ်၊ထုတ်၊ ထောင်ချတဲ့ ဖြစ်စဥ်တွေ အများဆုံး မြင်တွေ့လာရပါတယ်။ အခုလည်း ရှမ်းမြောက်အပါအဝင်၊ တနိုင်ငံလုံး စစ်ရေးရှုံးနိမ့်နေချိန် ကာကွယ်ရေး ဦးစီးချုပ် (ရေ) ဗိုလ်ချုပ်ကြီး မိုးအောင် ကို အနားပေးလိုက်ပြီး၊ စစ်ဦးစီး အရာရှိချုပ် (ရေ) ဒုတိယဗိုလ်ချုပ်ကြီး ဇွဲဝင်းမြင့် ကို အစားထိုး ခန့်အပ်လိုက်ကြောင်း ဇန်န၀ါရီ ၈ ရက်နေ့မှာ စစ်ကောင်စီမှ ထုတ်ပြန်ထားပါတယ်။

အခုလို ရေတပ်ဦးစီးချုပ်တယောက်ကို အချိန်းအပြောင်းပြုလုပ်ခဲ့တာဟာ မင်းအောင်လှိုင်အနေနဲ့ သူ့ရဲ့ အာဏာကို ထိပါးလာမှာစိုးရိမ်နေသလို၊ အနားမှာရှိတဲ့ စစ်ဗိုလ်ချုပ်တွေကိုလည်း ယုံကြည်မှုပျက်ပြားလာကြောင်း ထင်ရှားပါတယ်။ တဆက်တည်းမှာပဲ ရှမ်းမြောက်ကို လက်လွှတ်ရပြီး၊ ရှမ်းတောင်ဒေသမှာ ဖယ်ခုံအထိ ထိုးစစ်ဆင်နေတဲ့ တော်လှန်ရေးတပ်ဖွဲ့တွေရဲ့ ထိုးစစ်ကြောင့်၊ တောင်ကြီးမြို့ အခြေစိုက် အရှေ့ပိုင်းတိုင်း စစ်ဌာနချုပ် (ရပခ) တိုင်းမှူး ဗိုလ်ချုပ် မျိုးမင်းထွန်းကို အရန်အင်အား အဖြစ် ဖြုတ်ချခဲ့ပြီး၊နေပြည်တော်ရှိ နိုင်ငံတော် ကာကွယ်ရေး တက္ကသိုလ် ကျောင်းအုပ် ဗိုလ်ချုပ် ဇော်မင်းလတ်ကို (ရပခ) တိုင်းမှူး ခန့်အပ်ခဲ့ပါတယ်။

ရှမ်းမြောက်ဒေသမှာ စစ်ရေးအရ အရေးနိမ့်လာတဲ့ စစ်ကောင်စီဟာ ရှေ့မှာလည်း လောက်ကိုင် ဒကစ တခုလုံး လက်နက်ချတဲ့ သာဓကတခု ရှိပြီး ဖြစ်တယ်။ လောက်ကိုင် (ဒကစ) အပါအဝင် တခြားသော တပ်များမှ ဒကစမှူးနဲ့ ဗိုလ်မှူးချုပ် အဆင့်ရှိသူ (၆) ဦး၊ တပ်အင်အား (၂၄၀၀) နဲ့ တပ်မိသားစုဝင် (၁၆၀၀) ကျော် လက်နက်ချခဲ့ပြီး၊ လက်နက်ငယ်ပေါင်း (၄၀၀၀) ကျော်၊ တင့်၊ သံချပ်ကာ၊ အမြောက်၊ အတွဲလိုက်ပစ် ဒုံးများကိုလည်း စစ်တပ်က လက်လွှတ်ခဲ့ရတာဖြစ်ပါတယ်။ ဒီလောက်လူအရေအတွက်နဲ့ လက်နက်အင်အားဟာ စစ်ကောင်စီအတွက် အကြီးမားဆုံး ဆုံးရှုံးမှုထဲက တခုဖြစ်တယ်။

စစ်ကောင်စီရဲ့ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကတော့ "တပ်မတော် အနေနဲ့ လောက်ကိုင်ဒေသ အခြေအနေနဲ့ပတ်သတ်ပြီး အဖက်ဖက်က စဥ်းစားခဲ့ပါတယ်။ စဥ်းစားခဲ့တဲ့နေရာမှာ နံပါတ်(၁) အနေနဲ့ မိသားစုဝင်များရဲ့ လုံခြုံရေးကို စဉ်းစားပါတယ်၊ လောက်ကိုင်ဒေသမှာက တပ်မတော်သားအပြင် တပ်မတော်သားတွေရဲ့ မိသားစုဝင်တွေ နေထိုင်တာဖြစ်တယ်၊ မိသားစုဝင်တွေရဲ့ လုံခြုံရေးကို ဦးစားပေး စဥ်းစားခဲ့ကြောင်း" ပြောဆိုခဲ့ပါတယ်။စစ်ကောင်စီမှ လက်နက်ချခိုင်းတယ်ဆိုပေမယ့် တကယ့် လက်တွေ့မှာက ဗိုလ်မှူးချုပ် အဆင့်ရှိသူတွေဖြစ်တဲ့ မိုးကျော်သူ (ဒကစ လောက်ကိုင်)၊ထွန်းထွန်းမြင့် (ကိုးကန့် ဦးစီး ဥက္ကဋ္ဌ )၊ ဇော်မျိုးဝင်း (တပ်မ ၅၅ ဌာနချုပ်)၊ အောင်ဇော်လင်း (စကခ ၁၂ ဌာနချုပ်)၊ အေးမင်းဦး(စကခ ၁၄ ဌာနချုပ်)၊ သော်ဇင်ဦး (စကခ ၁၆ ဌာနချုပ်) တို့ကို အမိန့် မနာခံမှု၊ တပ်တွင်း ပုန်ကန်မှု စတာတွေနဲ့ လားရှိုးကိုခေါ်ယူပြီး စစ်ဆေးမှုတွေ ပြုလုပ်နေကြောင်း ကြားသိရပါတယ်။

တဖက်မှာလည်း အလားတူဖြစ်စဥ်မျိုး ထပ်မံ မဖြစ်ပွားစေရန် ရာထူးအကြီးပိုင်းတွေကိုအချိန်းအပြောင်းပြုလုပ်ပြီး၊ အောက်ခြေစစ်သားတွေကို လစာတိုးမြှင့်ကာ ဆွဲဆောင်မှုမျိုး ပြုလုပ်လာတာတွေ့ရတယ်။ ၂၀၂၃ ခုနှစ်၊ စစ်တပ်ရဲ့ ကာကွယ်ရေးဌာနကောင်စီ အထူး အမိန့် အမှတ် ၆/အထူး/၂၀၂၃ ဖြင့် စစ်သားများ အားလုံး ၂၄ နာရီ တာဝန် ထမ်းဆောင်ရတဲ့အတွက် ပင်ပန်းကြမ်းတမ်းမှုနဲ့ သက်စွန့်တာဝန်စရိတ် ကို ပုံမှန်လစာအပြင် ငွေကျပ် ငါးသောင်း ခံစားပြုခဲ့ကြောင်း၊ အခု ၂၀၂၄ ခုနှစ် ဇန်နဝါရီလမှ စတင်ပြီး၊ ပုံမှန် လစာအပြင် သက်စွန့်စရိတ်ကို တစ်သိန်း အထိ တိုးမြှင့် ခံစားခွင့်ပေးလိုက်ကြောင်း စစ်တပ်သတင်းရင်းမြစ်မှ သိရပါတယ်။ အခုလို လစာငွေ တိုးမြှင့်ပေးလိုက်တာဟာ စိတ်ဓာတ်ကျဆင်းပြီး၊ တပ်ပြေးများလာတဲ့ စစ်ကောင်စီတပ်သားတွေအပေါ် ချွေးသိပ်ပေးလိုက်တာ ထက်မပိုပါဘူး။

အောက်ခြေစစ်သားတွေဘက်က ကြည့်ရင်လည်း လစာ တသိန်းတိုးပေးတာပဲရှိတာ ပေးတဲ့လစာနဲ့ ရင်းထားရတဲ့ အသက် မကာမိပါဘူး။ ကိုယ်တိုင်က ရှေ့တန်းမှာ နေ့လားညလား မသိ သေရမယ့်အခြေအနေ၊ ဇနီးဖြစ်သူက နောက်တန်းကတပ်ရင်းမှာ သေနတ်ကိုင်ပြီး တပ်လုံခြုံရေးလုပ်ရတယ်။ အခန့်မသင့်ရင် မိသားစုဝင် ကလေးငယ်တွေပါ အသက်ပေးရမယ့် ကိန်းဆိုက်နေပါပြီ။ တိုင်းပြည်ကို ကာကွယ်လိုစိတ်နဲ့ စစ်တိုက်ရတာမဟုတ်ပဲ လစာတသိန်းပိုပေးလို့ စစ်တိုက်ရတယ်တဲ့ စစ်သားတွေနဲ့ ပြည်သူအတွက်ရပ်တည်ပြီးတိုက်ပွဲဝင်နေတဲ့ PDF တွေရဲ့ ကွာဟ မှုကို လက်ရှိစစ်ရေးအခြေအနေနဲ့ ချိန်ထိုးကြည့်နိုင်ပါတယ်။

ဒီအခြေအနေမှာ စစ်ခေါင်းဆောင်မင်းအောင်လှိုင်အနေနဲ့ လက်အောက်ခံ စစ်ဗိုလ်ချုပ်တွေအပေါ်လည်းယုံကြည်မှုမရှိ၊ အောက်ခြေမှာ အသေခံပေးမယ့် စစ်သားအင်အားကလည်း နည်းပါးလာတာကြောင့် ဘယ်နေရာ သွားသွာ လုံခြုံရေး အထပ်ထပ်နဲ့ ပိုဂရုစိုက်လာတာတွေ့ရပါတယ်။ အသိသာဆုံးဆိုရင် ၁၀၂၇ စစ်ဆင်ရေးနောက်ပိုင်း၊ ဒီဇင်ဘာ ၁၀ ရက်နေ့က စစ်ခေါင်းဆောင် မင်းအောင်လှိုင်ရဲ့ လားရှိုးခရီးစဥ်ဖြစ်ပြီး၊ လုံခြုံရေးကို နဂိုကထက် ပိုမို ချထားကာ၊ ခါးကြားတွင် ပစ္စတိုချိတ် ထားတာကို တွေ့ရှိရပါတယ်။ ဒါ့အပြင် ၂၀၂၃ ခုနှစ်၊ ဒီဇင်ဘာလ ၁၃ ရက်နေ့၊ ပြင်ဦးလွင်မှာ ပြုလုပ်တဲ့ DSTA ကျောင်းဆင်းပွဲမှာဆိုရင်လည်း သင်တန်းဆင်းမိန့်ခွန်း ဟောပြောရာ စင်မြင့်နေရာတွေကို လုံခြုံမှုရှိစေရန် အကာအရံများ ပြုလုပ်ထားတာကိုလည်း မြင်တွေ့လာရပါတယ်။

ဒါတွေဟာ စစ်ကောင်စီတပ်အတွင်းမှာရှိတဲ့ စစ်ဗိုလ်ချုပ်အဆင့်များကြားမှ အကွဲအပြဲများ၊ အောက်ခြေရဲဘော်များရဲ့ လက်နက်ချအညံ့ခံမှုများအပြင်၊ စစ်ခေါင်းဆောင်ရဲ့ သူကိုယ်တိုင် လုံခြုံမှုမရှိတော့တဲ့အခြေအနေကို ဖော်ပြနေပြီး၊ စစ်ကောင်စီပြိုလဲဖို့ ထင်ရှားလာတဲ့ အက်ကြောင်းကြီး တခုပဲ ဖြစ်တယ်။ဒါတွေဟာ နွေဦးတော်လှန်ရေးကာလ ၃ နှစ်အတွင်း တော်လှန်ရေးအင်အားစုတွေရဲ့စစ်ကောင်စီအပေါ် အကြီးမားဆုံး ထိုးနှက်ချက်ဖြစ်ပြီး၊ တိုးမြှင့်လာမယ့် ထိုးစစ် အရှိန်တွေနဲ့အတူ စစ်အာဏာရှင်ချုပ်ငြိမ်းရေးဟာ နီးကပ်လာပြီဆိုတဲ့အကြောင်း တင်ပြပေးလိုက်ရပါတယ်။

✍မောင်ဝိ
#သတင်းအချက်အလတ်ကိုးကား

#တပ်တွင်းအကွဲအပြဲ
#စစ်ကောင်စီ

10/01/2024

◼ ဗိုလ်မှူးချုပ် မင်းမင်းထွန်းမှ ပြည်သူလူထုအပေါ်တောင်းပန်

နမ့်ဆန်လူထုကို (၁၀၁)တပ်မမှူး ဗိုလ်မှူးချုပ်မင်းမင်းထွန်းမှ လက်နက်ကြီး၊ လေယာဥ်စတာတွေနဲ့ပစ်ဖို့ အမိန့်ပေးခဲ့တယ်လို့ဆို

၁၀၂၇ စစ်ဆင်ရေးအတွင်း နမ့်ဆန်မြို့သိမ်းတိုက်ပွဲမှာ TNLA ဖမ်းဆီးရမိထားတဲ့ စစ်ကောင်စီရဲ့တပ်မ (၁၀၁) တပ်မမှူး ဗိုလ်မှူးချုပ် မင်းမင်းထွန်းက နမ့်ဆန်လူထုနဲ့ မြန်မာနိုင်ငံသားများအား တောင်းပန်ခြင်းနှင့် ဝန်ခံထွက်ဆိုချက်

/TNLA
#1027 Operation

09/01/2024

◼ မင်းအောင်လှိုင်ရဲ့ညံ့ဖျင်းမှုနဲ့အတူ လက်နက်ချတဲ့အရသာ သိသွားတဲ့ စစ်သားများ

နွေဦးတော်လှန်ရေးကာလအတွင်း ပေါ်ပေါက်လာခဲ့တဲ့ မြောက်ပိုင်း မဟာမိတ် ၃ ဖွဲ့ရဲ့ "၁၀၂၇" စစ်ဆင်ရေးဟာ စစ်ကောင်စီတပ်ဖွဲ့တွေကို အနားမပေးဘဲ ထိုးစစ်ဆင်နေခဲ့တာဖြစ်တယ်။ အဓိကကတော့ အရှိန်ရနေတဲ့ ထိုးစစ်တွေနဲ့ အောင်မြင်မှုတွေကို ရပ်တန့်မသွားစေခဲ့တာဖြစ်တယ်။ လက်ရှိအချိန်ထိ ရှမ်းမြောက်ဒေသအတွင်းမြောက်ပိုင်းမဟာမိတ် ၃ ဖွဲ့မှ သိမ်းပိုက်ရရှိထားတဲ့မြို့ပေါင်း ၁၆ မြို့အထိ ရှိလာသလို၊ ရခိုင်ပြည်နယ်အတွင်းမှာဆိုရင်လည်း စစ်တပ်ရဲ့ အရေးပါတဲ့ ဗျူဟာကုန်းများ၊ တပ်စခန်းများကိုအဓိကထား သိမ်းပိုက်နိုင်ခဲ့သလို ရာနဲ့ချီတဲ့ စစ်သားတွေကိုယ်တိုင် လက်နက်ချ လာခဲ့ပါတယ်။

အသိသာဆုံးဆိုရင် အရှေ့မြောက်တိုင်းစစ်ဌာနချုပ်လက်အောက်ခံ၊ လောက်ကိုင်အခြေစိုက် စစ်ကောင်စီရဲ့ ဒကစအတွင်း တပ်မ ၅၅ မှ စစ်ကူပို့ထားသော တပ်ဖွဲ့ဝင်များ၊ စကခ ၁၂ ၊ စကခ ၁၆ ၊ စကခ ၁၄ မှ တပ်ဖွဲ့ဝင်များ၊ ကိုးကန့်အုပ်ချုပ်ရေးအဖွဲ့မှ ဌာနဆိုင်ရာ ဝန်ထမ်းများ၊ ပြည်သူ့စစ်အဖွဲ့များ၊ ရဲတပ်ဖွဲ့ဝင်များအပါအဝင်၊ သံချပ်ကာနှင့်တင့်ကားများ၊ အတွဲလိုက်ဒုံးပစ်ကားများ၊ ဟောင်ဝစ်ဇာအမြောက်များ အပါအဝင် လက်နက်နှင့်ခဲယမ်းများစွာ ခုခံစစ်အတွက် ဖြည့်တင်းကာ လက်နက်အပြည့်အစုံနဲ့ စစ်ကောင်စီမှ ခံစစ် ပြင်ဆင်ခဲ့ပါတယ်။ ဇန်နဝါရီလ ၄ ရက်နေ့မှာ ဗိုလ်မှူးချုပ်မိုးကျော်သူ၊ ဗိုလ်မှူးချုပ်ထွန်းထွန်းမြင့်ဦးဆောင်တဲ့ လောက်ကိုင် ဒကစမှ စစ်အင်အား ၄၀၀၀ ကျော်ဟာ လက်နက်အပြည့်အစုံနဲ့ လက်နက်ချ အညံ့ခံခဲ့ပါတယ်။

အခုလို လက်နက်အပြည့်အစုံတပ်ဆင်ထားရှိပြီး၊ အင်အားထောင်နဲ့ချီတဲ့ ဒကစတခု လက်နက်ချတယ်ဆိုတာ မြန်မာ့စစ်တပ် သမိုင်းမှာတကြိမ်မှ မရှိခဲ့ဖူးခဲ့ပါဘူး။ ဒါက စစ်ကောင်စီတပ်ဖွဲ့ဝင်တွေကို ထိတ်လန့်စေခဲ့သလို၊ စစ်ခေါင်းဆောင် မင်းအောင်လှိုင်ကိုယ်တိုင် မျက်နှာမသာယာ ဖြစ်နေတာကို ရုပ်သံတွေမှာမြင်တွေ့ခဲ့ရပါတယ်။

ဒါနဲ့ပတ်သတ်ပြီး စစ်ခေါင်းဆောင်ကိုယ်တိုင်ဇန်နဝါရီလ ၆ ရက်နေ့မှာတော့ "ရွေးကောက်ပွဲကို မဖြစ်ဖြစ်အောင်ပြုလုပ်ဖြစ်ကြောင်းပြောဆိုကာ နိုင်ငံရေးပါတီ ၃၉ ပါတီနဲ့ နေပြည်တော်မှာ တွေ့ဆုံခဲ့ပါတယ်။ တွေ့ဆုံချိန်မှာလည်း "ရွေးကောက်ပွဲ အမြန်ဆုံး ပြုလုပ်နိုင်ရေးနဲ့ ပြည်သူ့စစ် တပ်ပေါင်းစု ဖွဲ့စည်းဖို့ နိုင်ငံရေးပါတီတွေက ကူညီရန်" ဆိုတဲ့ အချက် ၂ ချက်ကို အဓိကထားပြောဆိုကြောင်း စစ်တပ်သတင်းရင်းမြစ်မှ သိရပါတယ်။

ပထမ အချက်ဖြစ်တဲ့ ရွှေးကောက်ပွဲ အမြန်ဆုံး ပြုလုပ်နိုင်ရေးဆိုတာဟာ စစ်ဗိုလ်ချုပ်တွေအနေနဲ့ အမြန်ဆုံး ထွက်ပေါက်ရှာဖို့ပြင်ဆင်နေတယ်လို့ မြင်မိပါတယ်။ ဘာ့ကြောင့်လဲဆိုတော့ ၁၀၂၇ စတင်ချိန်ကတည်းက တနိုင်ငံလုံးနီးပါး တော်လှန်မှုတွေကြောင့် စစ်ကောင်စီတပ်စခန်းတွေ၊ မြို့တွေအသိမ်းခံနေရတာကို စစ်ခေါင်းဆောင်ကိုယ်တိုင်သိရှိပြီးဖြစ်တယ်။ ဒါပေမယ့် သူလက်အောက်ခံစစ်သားတွေ အကျအဆုံးများနေတဲ့အပေါ် စိတ်မဝင်စားဘဲ ဘုရားတည်ဖို့နဲ့ မိသားစု စီးပွားရေးသာ အာရုံရှိကြောင်း တပ်ထောက်ခံသူတွေကိုယ်တိုင်က ပြောဆိုထားပါတယ်။ အခုချိန်မှာတော့ ရှမ်းမြောက်ဒေသရှိ အဓိက ခံတပ်ကြီး ဖြစ်တဲ့ ဒကစ တခုလုံးလက်နက်ချခြင်းနဲ့အတူ ပြိုဆင်းလာမယ့် ထိုးစစ်တွေကြောင့် မင်းအောင်လှိုင်တို့ စစ်ဗိုလ်ချုပ်တွေရဲ့ ထိုင်ခုံလှုပ်လာတဲ့အတွက်ဖြစ်တယ်။

ဒုတိယအချက်အနေနဲ့ ရှမ်းမြောက်မှာ သိမ်းပိုက်ရရှိတဲ့ လက်နက်ခဲယမ်းတွေထဲက ဟောင်ဝှစ်ဇာ၊ သံချပ်ကာ၊တင့် စတဲ့လက်နက်ကြီးတွေကလွဲလို့ စစ်ကောင်စီရဲ့ လက်နက်ငယ်တွေကို မြောက်ပိုင်းမဟာမိတ် ၃ ဖွဲ့က မသုံးဘူးလို့သိရပါတယ်။ စစ်တပ်ထုတ် သေနတ်တွေအသုံးမပြုခဲ့ရင် ၅.၅၆ ကျည်ဆံတွေကလည်း ထည့်ပစ်ဖို့ အဆင်မပြေပါဘူး။ ဒီလက်နက်ခဲယမ်းတွေသာ ချင်း-ရခိုင်ဒေသ၊ ရှမ်းမြောက်-ကချင်ဒေသစတဲ့ နေရာတွေကနေ လူအင်အား များပြားပြီး၊ လက်နက်အင်အားနည်းပါးတဲ့ အညာဒေသတပ်တွေလက်ထဲ ရောက်ရှိခဲ့မယ်ဆိုရင် စစ်တပ်ဟာ အချိန်ခနအတွင်း ပြုတ်ကျမှာသေချာပါတယ်။ ဒါ့ကြောင့်ပဲ ပြည်သူ့စစ်တပ်ပေါင်းစုဆိုတဲ့ခေါင်းစဥ်နဲ့ နိုင်ငံရေးပါတီတွေကို ကူညီဖို့ စစ်ခေါင်းဆောင်ကိုယ်တိုင်တွေ့ဆုံ ပြောဆိုခဲ့တာဖြစ်တယ်။

လောက်ကိုင် ဒကစမှာ လက်နက်ချခဲ့တဲ့ စစ်သားတွေကို စစ်ကောင်စီက ပြန်သုံးနိုင်လားဆိုတော့၊ စစ်သားအင်အားမရှိတဲ့အတွက် တိုက်ပွဲအတွင်း ပြန်သုံးမှာ သေချာပါတယ်။ ဒကစမှာလက်နက်ချခဲ့တဲ့ စစ်သားနဲ့တပ်မိသားစုဝင် ၄၀၀၀ ကျော်မှာ စစ်တိုက်နိုင်တဲ့ စစ်သားအင်အားဟာ ၂၄၀၀ ခန့်ရှိပါတယ်။ ဒီတပ်ဖွဲ့တွေကို စစ်ကောင်စီက အခြားသောတပ်ရင်းတပ်ဖွဲ့တွေမှာ ဖြန့်ခွဲထားတယ်လို့သိရပါတယ်။ ဒါဆိုရင် ရှမ်းမြောက် ဒကစမှ စစ်တပ်အင်အားတွေနဲ့အခြားဒေသတွေကို ပြန်တိုက်နိုင်သလားဆိုရင် တပ်ဖွဲ့တွေဟာ လက်နက်ချခြင်းရဲ့အရသာကိုသိရှိပြီးတဲ့အတွက် တော်လှန်ရေးတပ်ဖွဲ့တွေနဲ့ ထပ်တွေ့ရင် လက်နက်ထပ်ချမှာသေချာပါတယ်။ ဒါ့အပြင် အာဏာရှင်တွေအတွက် အသေခံစစ်တိုက်နေလည်း ရလဒ်က ဘာမှမထူးတဲ့အပြင် "လက်နက်ချ အညံ့ခံရင် ငါတို့ အေးဆေးနေလို့ရတယ်" ဆိုတဲ့ အသိစိတ် ရိုက်သွင်းနိုင်ခဲ့ပါတယ်။

"၁၀၂၇ စစ်ဆင်ရေး အတွင်း ရှမ်းမြောက်ဒေသမှာ စစ်တပ် အင်အား ပြုန်းတီးမှုဟာ အင်အား (၅၄၀၀) ကျော်မယ်လို့ ခန့်မှန်းရင် ရန်သူ့အင်အား ပြုန်းတီးမှုဟာ ပြည်သူ့ ရင်ခွင်ဝင်ရောက်မှု အပါ ၂၀၂၃ ခုနစ် နိုဝင်ဘာ နဲ့ ဒီဇင်ဘာ (၂) လအတွင်း အင်အား (၇၉၀၀) ထက် နည်းမှာ မဟုတ်ပါဘူး။ အဲဒါ အင်အားဟာ လက်ရှိ စစ်တပ် ဖွဲ့စည်းပုံ အရ တပ်မ (၅) ခု ကျော် အင်အားရှိကြောင်း" PDF Insight ကဖော်ပြထားပါတယ်။ အခုဆိုရင် ရခိုင်စစ်မျက်နှာမှာလည်း ဇန်နဝါရီ ၇ ရက်နေ့မှာကို ကျောက်တော်မြို့နယ်ရှိ စစ်ကောင်စီရဲ့ တောင်ရှည်တောင်ဗျူဟာစခန်းမှ စစ်ကောင်စီ တပ်ဖွဲ့ဝင် ၂၀၀ ခန့် AA ထံ ထပ်မံ လက်နက်ချခဲ့ပါတယ်။

လက်အောက်ခံ စစ်သားတွေအပေါ် အုပ်ချုပ်ထောက်ပံ့မှု လုံလောက်စွာမပေးနိုင်ခြင်းနဲ့ မိမိအကျိုးစီးပွားအတွက်သာ အာရုံစိုက်ခြင်းတွေရဲ့ နောက်ဆက်တွဲအနေနဲ့ အခုလိုကြုံတွေ့နေရခြင်းဖြစ်တယ်။ မြန်မာနိုင်ငံရဲ့ စစ်အာဏာရှင်အဆက်ဆက်မှာ နေဝင်း၊သန်းရွှေ၊ မင်းအောင်လှိုင်စတဲ့သူတွေမှာ အခုလက်ရှိ မင်းအောင်လှိုင်ဟာ အညံ့ဖျင်းဆုံးဖြစ်တယ်။ အခုလို စစ်ကောင်စီတပ်ဖွဲ့ဝင်တွေရဲ့ အကျအရှုံးများပြားကာ လက်နက်ချအညံ့ခံခြင်း၊စိတ်ဓာတ်ကျဆင်းလာခြင်းရဲ့ အဓိက တရားခံဟာ စစ်ခေါင်းဆောင် မင်းအောင်လှိုင်ကြောင့်သာဖြစ်တယ်။ ဒါ့ကြောင့် လက်ရှိ စစ်တပ်ကနေ ရုန်းမထွက်နိုင်ကြပဲ တိုက်ပွဲဝင်နေကြတဲ့ စစ်သားတွေအနေနဲ့လည်း တိုက်ပွဲ ဖြစ်ခဲ့သည်ရှိသော် ထွက်မပြေးကြဖို့နဲ့ လက်နက်ချအညံ့ခံခြင်းကသာ အကောင်းဆုံးနည်းလမ်းဖြစ်ကြောင်း အသိပေးလိုပါတယ်။

✍ မောင်ဝိ

#တော်လှန်ရေး
#စစ်တပ်
#လက်နက်ချ

08/01/2024

◼ စစ်မြေပြင်မှာ အသက်တမျှအရေးကြီးတဲ့ အမိန့်နာခံမှုနဲ့ နေပြည်တော်မှာ ပြေးပေါက်ရှာနေတဲ့ စစ်ရာဇဝတ်ကောင်များ

၂၀၂၄ ခုနှစ်ရဲ့ နှစ်သစ်မှာ တော်လှန်ရေးက အားအကောင်းဆုံးလို့ ပြောလို့ရသလို တော်လှန်ပြည်သူတွေအတွက်လည်း အားတက်စရာသတင်းတွေဆက်တိုက်ဆိုသလို ကြားနေရပါတယ်။ ဇန်နဝါရီလ ၂ ရက်နေ့မှာ Mandalay (PDF) နဲ့ TNLA တို့ပူးပေါင်းပြီး “တောင်သမန် စစ်ဆင်ရေး”နဲ့ နောင်ချိုမြိုနယ် သံဘိုကျေးရွာရှိ စစ်ကောင်စီအခြေစိုက်စခန်းအား ဝင်ရောက် စီးနင်းတိုက်ခိုက်ခဲ့ပါတယ်။

ဇန်နဝါရီလ ၃ ရက်နေ့ မနက်ပိုင်းမှာတော့ သံဘိုကျေးရွာစခန်းကို အပြီးသတ်သိမ်းပိုက်ရရှိခဲ့ပြီး၊ စစ်ကောင်စီရဲ့ ဒုတိယဗိုလ်မှူးကြီး သက်အောင်ကို ဖမ်းဆီးရမိသလို၊ စစ်တပ်ရဲ့ Drone Jammer စက်အကြီးအပါအဝင် လက်နက်ခဲယမ်းများစွာ သိမ်းဆည်းရမိခဲ့တာဖြစ်တယ်။ သံဘို စစ်ကောင်စီရဲ့ကာကင်းစခန်းကိုသိမ်းပိုက်ရရှိချိန်မှာ ထူးခြားချက်တချို့တွေ့ရှိရတယ်။

ဒါကတော့ ဖမ်းဆီးရမိချိန် ယူနီဖောင်းတွေမှာ စစ်ကောင်စီရဲ့ ခြေလျင်ခြေမြန်ဘက်ရယ်လို့ သေချာမတွေ့ရဘဲ လက်မောင်းဘက်တွေဟာ ကက (ယာ)၊ကက (ပြည်)၊ ကက(လျှပ်)၊ ကက(ဆက်)၊ ကက(ဆေး) စတဲ့ လက်ရုံးတပ်ဘက်တံဆိပ်တွေကို စုပေါင်းမြင်ရပြီး တိုင်းစစ်ဌာနချုပ်၊ တပ်မ ၁၁ နဲ့ အရံမီးသတ် ဘက်တံဆိပ်တွေလည်း တွေ့ရှိရတယ်။

စစ်ကောင်စီရဲ့ အလယ်ပိုင်းတိုင်း စစ်ဌာနချုပ် (လပခ)ကို ကာကွယ်ဖို့ ဖွဲ့စည်းထားတဲ့ သံဘိုကာကင်းစခန်းရဲ့အခြေအနေကိုကြည့်ပြီး စစ်ကောင်စီရဲ့ တိုက်ခိုက်ရေးတပ် ခြေလျင်ခြေမြန်တွေ မရှိတော့ဘူးလားလို့တောင် မြင်မိပါတယ်။ စစ်ဌာနချုပ်ကို ကာကွယ်ဖို့ ဖွဲ့စည်းထားတဲ့ ကာကင်းစခန်းဟာ ဘယ်လောက်အရေးကြီးတယ်ဆိုတာ အားလုံး ရိပ်မိမယ် ထင်တယ်ပါတယ်။

အခုလို တိုက်ခိုက်ခံရတာနဲ့ပတ်သတ်ပြီး "ပြင်ဦးလွင် - မိုးကုတ်လမ်းရှိ နောင်ချိုမြို့ နယ်၊ သံဘိုရွာနဲ့ မလှမ်းမကမ်းမှာရှိတဲ့ ဆီးဖြူရေရွာနဲ့ဆက်စပ်ရွာတွေနားမှာ TNLA/MDY PDF ခန့်မှန်းအင်အား ၈၀၀ နီးပါးလောက် လှုပ်ရှားနေတာ ကြာပါပြီ၊ ရှေ့ဆက်သွားရင် ဟိုခိုရွာဝန်းကျင်ဆို ပိုဆိုးတယ်လို့ စစ်တပ်လော်ဘီတွေ ဘက်ကနေ သတိပေးပြောဆိုထားပါတယ်။ လက်ရှိ သိမ်းပိုက်ရရှိထားတဲ့ သံဘိုစစ်စခန်းဟာ စစ်ကောင်စီရဲ့ DSA ဗိုလ်သင်တန်းကျောင်း အခြေစိုက်ရာ ပြင်ဦးလွင်မြို့နဲ့ ၁၅ မိုင်ဝန်းကျင်သာ ဝေးပါတော့တယ်။

အခုဆိုရင် ပြင်ဦးလွင်မြို့မှာရှိတဲ့ စစ်ကောင်စီ အထိုင်တပ်ရင်းတွေက စစ်သည်ရဲမေတွေ ကိုယ်တိုင်ထိတ်လန့်နေတယ်လို့ ကြားလာရပြီ။ သံဘိုကာကင်းစခန်းကို တိုက်ပြီးနောက်ပိုင်းမှာ "ပြင်ဦးလွင်မြို့ထဲက တပ်တွေကို တိုက်မယ်ဆိုတဲ့ သတင်းကြားကြောင်းနဲ့ တကယ်လို့ လာတိုက်ခဲ့ရင် လက်နက်ချရမလား၊ ထွက်ပြေးရမလား” ဆိုတာတွေကို ပြင်ဦးလွင်တပ်တွင်းစစ်သည်တစ်ဦးနဲ့ အဆက်အသွယ်ရချိန်မှာ အထိတ်တလန့် မေးလာခဲ့ပါတယ်။

ဘယ်လိုပဲ စစ်တပ်ထောက်ခံသူတွေဘက်က သတင်းပေးပြောဆိုနေပေမယ့် သံဘိုတိုက်ပွဲမှာဆိုရင် စစ်ကောင်စီတပ်ရဲ့ ခေါင်းဆောင်မှု စွမ်းရည်ကိုထင်ထင်ရှားရှားမြင့်တွေ့ရမှာပဲ ဖြစ်တယ်။ ဦးဆောင်သူဟာ DSTA ကျောင်းမှ စက်မှုလက်မှုကထိက တစ်ဦးဖြစ်တဲ့ ဒုတိယဗိုလ်မှူးကြီး သက်အောင်လို့သိရတယ်။ သူကိုယ်တိုင်က စစ်ရေးနဲ့ ဝေးကွာနေတဲ့သဘောမှာရှိတယ်။ ဆင့်ကဲ့အမိန့်ပေးသူတွေ ကိုယ်တိုင်ကလည်း စစ်မတိုက်ရတဲ့ အထိုင်တပ်ရင်းတွေကို အများဆုံးတွေ့ရပါတယ်။ ဒါဟာ တပ်မတော်တခုရဲ့ စွမ်းရည်ဖြစ်တဲ့ "စစ်ရေး၊အုပ်ချုပ်ရေး၊ စည်းရုံးရေး” စတဲ့ စွမ်းရည်တွေ ကျဆင်းလာတဲ့ စစ်ကောင်စီရဲ့ပကတိအခြေအနေဖြစ်တယ်။

စစ်ကောင်စီအနေနဲ့လည်း တော်လှန်ရေးတပ်ဖွဲ့တွေ လာတိုက်မယ်ဆိုတာကို သိတဲ့အတွက် ခံစစ်ပြင်ဆင်ထားရှိပေမယ့် တော်လှန်ရေးတပ်ဖွဲ့ဝင်တွေရဲ့ အဆင့်ဆင့် အမိန့်ပေးကွပ်ကဲမှု (COC) အားကောင်းလာမှုများ၊ စစ်ရေးစွမ်းရည်ပြည့်ဝလာမှုတို့ကြောင့် ၂ ရက်အတွင်း စစ်ကောင်စီရဲ့ အဓိက ကာကင်းစခန်းကြီး တခုကို သိမ်းပိုက်လိုက်နိုင်ခဲ့တာဖြစ်တယ်။ ဒါဟာ အောင်ပွဲများစွာထဲက ထူးခြားလာတဲ့အချက်တွေဖြစ်တယ်။

၂၀၂၁ ခုနှစ်ရဲ့ အစောပိုင်းကာလမှာ ပြည်နယ်အသီးသီးရှိ တော်လှန်လူငယ်တွေဟာ စစ်ကောင်စီရဲ့ မတရားမှုတွေအပေါ် လက်နက်စွဲကိုင် တိုက်ထုတ်နိုင်ဖို့ ကြိုးပမ်းခဲ့ကြတယ်။ လက်နက်ကိုင်တိုက်တယ်ဆိုတဲ့နေရာမှာ အစောပိုင်းကာလအတွင်း "လက်နက်ရှိရင် တော်လှန်ရေး လုပ်လို့ရတယ်" ဆိုတဲ့အတွေး အခေါ်နေရာမှာ "အနာဂတ်တပ်မတော်အသစ်အတွက် စည်းမျဥ်းစည်းကမ်း၊ အဆင့်ဆင့်အမိန့်နာခံတတ်မှုတွေ လိုအပ်တယ်” ဆိုတာကို သတိထားမိလာကြတယ်။ ဒါ့ကြောင့်ပဲ အမျိုးသားညီညွှတ်ရေးအစိုးရ၊ ကာကွယ်ရေးဝန်ကြီး ဌာနရဲ့ ဦးဆောင်မှုနဲ့ COC စနစ်ကို ပုံဖော်လာခဲ့ကြတယ်။

တပ်တခုမှာ အဆင့်ဆင့် အမိန့်ပေးစနစ်က ဘာ့ကြောင့် လိုအပ်တာလဲဆိုတော့ စစ်ရေးကိစ္စဖြစ်နေလို့ပါ။ သူသေကိုယ်သေ တိုက်နေရတဲ့အချိန်မှာ အမိန့်နာခံမှုဟာ အရေးကြီးပါတယ်။ အားလုံးက လူသေစေနိုင်တဲ့ လက်နက်တွေ ကိုင်ထားကြတာ ဖြစ်လို့ပါ။ အမိန့်ပေးစနစ်သာ မအောင်မြင်ဘူးဆိုရင် အဲဒီလက်နက်ကိုင်အဖွဲ့ဟာ ကျဆုံးမှာ ဖြစ်ပါတယ်။ လက်နက်ကိုင်အဖွဲ့တခုမှာ စစ်ရေး၊ စည်းရုံးရေးတွေဟာ အလွန်အရေးကြီးတဲ့အတွက် ဒါတွေအောင်မြင်အောင်လုပ်နိုင်ဖို့အတွက် စည်းကမ်းဟာလည်း အသက်တမျှ အရေးကြီးလှပါတယ်။

နွေဦးတော်လှန်ရေး အစမှာတုန်းကတော့ အာဏာရှင်စနစ်ကိုမကြိုက်လို့ လက်နက်စွဲကိုင်တဲ့ လူငယ်တွေကြားထဲမှာ တိုက်ပွဲတွေအတွင်း အထက်စီးကနေ အမိန့်လာပေးရင် မကြိုက်တဲ့သူတွေ ရှိခဲ့ပါတယ်။ ဒါကလည်း သူသူကိုယ်ကိုယ် ဖြစ်ကြမှာပါပဲ၊ လက်နက်ကိုင်တိုက်နေတဲ့သူတွေဟာ စည်းကမ်းတွေကို ပြင်းပြင်းထန်ထန်လိုက်နာရပါတယ်။ အစပိုင်းမှာတုန်းကတော့ ကိုယ်ယုံကြည်အားကိုးရတဲ့ ဆရာ (ဒါမှမဟုတ်) အဖွဲ့အစည်းရဲ့ခေါင်းဆောင်တစ်ဦးတယောက်ရဲ့စကားကိုပဲ နားထောင်ကြတာ များပါတယ်။ ဒီအခြေအနေမှာ လေးစားယုံကြည်ရတဲ့ ခေါင်းဆောင်ဆိုသူက တိုက်ပွဲမှာ မကွပ်ကဲနိုင်တာပဲ ဖြစ်ဖြစ် ကျဆုံးတာပဲဖြစ်ဖြစ် အောက်ခြေကတပ်ဖွဲ့ဝင်တွေဟာ ခြေမကိုင်မိလက်မကိုင်မိ ဖြစ်လာကြတယ်။ ဒါကဘာနဲ့တူသလဲဆိုတော့ ရောမခေတ်က ခေါင်းဆောင်တိုက်ပွဲကျတာနဲ့ အကုန်လက်နက်ချသလိုပုံစံဖြစ်နေပါတယ်။

အခုတော့ လက်နက်ကိုင်တော်လှန်ရေးဟာလည်း အရှိန်မြင့်လာသလို တိုက်ပွဲအတွေ့အကြုံတွေကလည်း များလာကြပြီ၊ နွေဦးတော်လှန်ရေးမှ လက်နက်ကိုင်တိုက်ပွဲဝင်နေတဲ့ ရဲဘော်တွေဟာ တပ်တခုမှာ အမိန့်ပေးစနစ်နဲ့အတူ စည်းကမ်းဟာအရေးကြီးကြောင်း သိလာကြပါပြီ အားလုံးနားလည်လာကြလို့ အရေးကြီးလို့လည်း Chain Of Command ဆိုတာကို အားလုံးက ပြောလာကြတာဖြစ်ပါတယ်။

အခု မန္တလေးပြည်သူ့ကာကွယ်ရေးတပ်ဖွဲ့တွေကစလို့ တော်လှန်ရေးတပ်ဖွဲ့ဝင်တွေဟာ Chain Of Command တည်ဆောက်မှု အားကောင်းလာတာကို ပိုပြီး သတိထားမိပါတယ်။ တပ်စိတ်မှူး၊ တပ်စုမှူး၊ တပ်ခွဲမှူး၊ တပ်ရင်းမှူးစသဖြင့် စနစ်တကျဖွဲ့စည်းလာကြသလို တိုက်ပွဲအတွင်း တပ်ရင်းမှူးကျခဲ့ရင် ဒုတပ်ရင်းမှူးဦးဆောင်မယ်၊ ဒုတပ်ရင်းမှူးကျခဲ့ရင် တပ်ခွဲမှူးက ဦးဆောင်တိုက်တယ်။ ဒီလိုမျိုး တည်ဆောက်လာနိုင်တာ တကယ့်ကိုစွမ်းရည်ပြည့်ဝတဲ့ တပ်မတော်တရပ်အသွင်ဆောင်ပါတယ်။ သံဘိုတိုက်ပွဲမှာဆိုရင်လည်း ပြည်သူ့ကာကွယ်ရေးတပ်ဖွဲ့တွေဘက်က တချို့တွေ ကျဆုံးတာရှိခဲ့ပေမယ့် အဆင့်ဆင့် ထိန်းချုပ်နိုင်ခဲ့တယ် အောင်ပွဲရသည်အထိ တိုက်ခိုက်နိုင်ခဲ့ကြတယ်။

အခုဆိုရင်စစ်ကောင်စီဟာ မန္တလေးကို ကာကွယ်နိုင်ဖို့ ပြင်ဦးလွင်မြို့အထွက်မှာ သင်တန်းတက်နေတဲ့ စစ်သားတွေကို စီမံချက်နဲ့ ကာကင်းသဘောမျိုး စောင့်ခိုင်းတာတွေ လုပ်နေတယ်လို့ တပ်တွင်းသတင်းတွေကနေ သိရပါတယ်။ နေပြည်တော်ကို ကာကွယ်နိုင်ဖို့အတွက် မန္တလေးဟာ စစ်ကောင်စီအတွက် နောက်ဆုံးခံတပ်ပုံစံဖြစ်နေပါပြီ။ ဒီအတွက် စစ်တပ်ကလည်း အသေအလဲ ကာကွယ်မယ့် သဘောမှာရှိပါတယ်။ ဒါပေမဲ့ မင်းအောင်လှိုင်အပါအဝင် အကြမ်းဖက် စစ်ခေါင်းဆောင်တွေဟာ ရှမ်းမြောက်တိုက်ပွဲမှာလည်း မရှုံးချင်လောက်ပါဘူး။ အခုဆိုရင် လောက်ကိုင်ဟာလည်း MNDAA လက်ထဲ ကျရောက်သွားပြီ။

တိုက်ပွဲတွေနဲ့ ပတ်သက်လို့ အခုနောက်ဆုံး သံဘိုစခန်းသိမ်းတိုက်ပွဲ ရလဒ်ကိုကြည့်ပြီး စစ်ကောင်စီရဲ့ အခြေအနေနဲ့ ပြည်သူ့ကာကွယ်ရေးတပ်ဖွဲ့တွေရဲ့ စစ်ရေးစွမ်းရည်ကို ချိန်ထိုးကြည့်နိုင်ပါတယ်။ ဒါ့ဟာ "နောက်လိုက်ကောင်းမှ ခေါင်းဆောင်ကောင်း ဖြစ်မယ်” ဆိုတဲ့ ဆောင်ပုဒ်နဲ့အညီ အမိန့်နာခံမှုကောင်းပြီးတိုးတက်လာတဲ့ ပြည်သူ့ကာကွယ်ရေးတပ်ဖွဲ့ဝင်တွေရဲ့ စစ်ရေးစွမ်းရည်ကို မြင်တွေ့လာရတာဖြစ်တယ်။ စစ်ကောင်စီဘက်မှာတော့ အဲလိုတွေ မမြင်ရပါဘူး လောက်ကိုင်က ထောင်ချီတဲ့ စစ်ကောင်စီလက်အောက်ခံတွေဟာ လက်နက်ချ အညံ့ခံလိုက်ရတယ်။ ဘယ်စစ်ခေါင်းကမှလည်း သူတို့တွေကို အရေးတယူလုပ်ပြီး စစ်ကူလည်းမပို့နိုင်တော့ဘူး ဒါဟာ အားလုံးမြင်သာတဲ့ အပိုင်းကို ပြောပြတာပါ။

အစပိုင်းမှာပြောခဲ့သလိုပါပဲ စစ်ကောင်စီတပ်မှာက ဗျူဟာတခုခု မြို့တခုခု အသိမ်းခံနေရပြီဆိုရင်တော့ အနီးအနားက လက်နက်ကြီးနဲ့ လေယာဉ်နဲ့သာ ရမ်းသမ်းပစ်ခတ်နေရတဲ့ အနေအထားဆိုက်နေပြီ။ မြေပြင်စစ်ကူတို့ ရိက္ခာပို့စစ်ကြောင်းတို့ဆိုတာ လိုရာမရောက် လမ်းခုလတ်တင်မှာပဲ တော်လှန်ရေးအင်အားစုတွေက ပိတ်ဆို့တိုက်ခိုက်နေတာပါ။ ရန်ကုန်၊ မန္တလေးလို့ မြို့တွေကို နောက်ဆုံးခံတပ်ပြင်ပြီး နေပြည်တော်မကျရေးကိုတောင် စစ်ကောင်စီ ကာကွယ်နိုင်ပါ့မလား။ နောက်ဆုံး ဂူအောင်းမလား ထွက်ပြေးမလား နယ်မြေတွေ ဆက်တိုက်ပေးပြီး ရူးချင်ယောင် ဆောင်မလား ဒီလိုအခြေအနေကိုရောက်ဖို့ မကြာတော့ပါဘူး။

ရှမ်းပြည်အထူးဒေသ (၁) နဲ့ ရှမ်းမြောက် တအာင်း စစ်ဆင်ရေးနယ်မြေတွေ ကုန်သွားရင်တော့ မန္တလေးနဲ့ စစ်ကိုင်း၊ မကွေးဟာ အင်အားပိုများပြီး စစ်ရေးအရှိန်ထပ်မြင့်လာနိုင်ပါတယ်။ နောက်တခုက ချင်းကလည်း အခိုင်အမာ တည်ဆောက်နေပြီ တောင်ပိုင်းတိုင်းကလည်း မြို့တွေ ဝင်တိုက်ပြနေပြီ ပဲခူးတိုင်း ရန်ကုန် - မန္တလေး လမ်းဟောင်းမှာလည်း ဝင်တိုက်ပြနေပြီ ပဲခူးတိုင်းအနောက်ခြမ်းမှာလည်း PDF တွေ စိုးမိုးထားပြီဆိုတော့ စစ်ကောင်စီအတွက်နေပြည်တော်မရောက်ခင်လေး တခုခုတော့ ကြံနေကြပြီထင်ပါတယ် နောက်ဆုံးတော့ ပြည်သူတွေဟာ ပျော်ပွဲရွှင်ပွဲတွေနဲ့ အောင်ပွဲခံကြမဲ့အချိန်ရောက်ဖို့ တနေ့ထက် တနေ့ နီးကပ်နေပြီဆိုတဲ့အကြောင်း တင်ပြလိုက်ရပါတယ်။ ။

✍ မောင်ဝိ

#စစ်ကောင်စီ