03/07/2026
NLD အစိုးရလက်ထက် တည်ဆောက်ခဲ့သည့် ဗိုလ်ချုပ်အောင်ဆန်းရုပ်တုများအားလုံးကို အပြီးသတ် ဖြိုချဖျက်ဆီးရန် အစည်း အဝေးတွင် အမိန့်ပေးခဲ့(သတင်း)
Khit Ta Media -KTM ဇူလိုင် ၃
အမျိုးသားဒီမိုကရေစီအဖွဲ့ချုပ် (NLD) အစိုးရလက်ထက်တွင် တည်ဆောက်ခဲ့သည့် ဗိုလ်ချုပ်အောင်ဆန်း ကြေးရုပ်တုများနှင့် နိုင်ငံရေးအထိမ်းအမှတ်များကို အပြီးသတ် ဖယ်ရှားဖြိုချရန် စစ်ကောင်စီခေါင်းဆောင် မင်းအောင်လှိုင်က ဇွန်လ ၂၅ ရက်နှင့် ဇွန်လ ၂၆ ရက်နေ့များတွင် နေပြည်တော်၌ ပြုလုပ်သည့် ပြည်နယ်နှင့် တိုင်းဒေသကြီး ဝန်ကြီးချုပ်များ အစည်းအဝေးအတွင်း အမိန့်ပေးညွှန်ကြားခဲ့ကြောင်း နေပြည်တော်စစ်ဘက်သတင်းရင်းမြစ်က ပြောဆိုသည်။
အဆိုပါ အစည်းအဝေးတွင် မင်းအောင်လှိုင်က NLD အစိုးရလက်ထက် တည်ဆောက်ခဲ့သည့် ဗိုလ်ချုပ်အောင်ဆန်းရုပ်တုများအားလုံးကို ဖယ်ရှားဖြိုချရန် ညွှန်ကြားခဲ့ပြီး မြို့နယ်အလိုက် ဆောင်ရွက်ပြီးစီးမှု အခြေအနေများကိုလည်း စစ်ဘက်လုံခြုံရေးဌာနနှင့်ရဲသတင်းတပ်ဖွဲ့ က နေ့စဉ် အစီရင်ခံတင်ပြရန် ညွှန်ကြားထားကြောင်း သိရသည်။
တစ်နိုင်ငံလုံးရှိ NLD အစိုးရလက်ထက် တည်ဆောက်ခဲ့သည့် ဗိုလ်ချုပ်အောင်ဆန်း ကြေးရုပ်တုများ၏ တည်နေရာ၊ တည်ဆောက်သည့် ရက်စွဲနှင့် အသေးစိတ်အချက်အလက်များကို ပြည်နယ်နှင့် တိုင်းဒေသကြီးအသီးသီးရှိ မြို့နယ်များတွင် အရေးပေါ်စာရင်းကောက်ယူထားပြီး ဗိုလ်ချုပ်ကြေးရုပ်များအားလုံးကို ဖယ်ရှားမည်ဖြစ်ကြောင်း သိရှိရသည်။
"NLD အစိုးရလက်ထက်က တည်ဆောက်ခဲ့တဲ့ ဗိုလ်ချုပ်ကြေးရုပ်တွေကိုပဲ အဓိကထား ဖယ်ရှားတာပါ။ အရင်ခေတ်က တည်ဆောက်ခဲ့တဲ့ ဗိုလ်ချုပ်အောင်ဆန်းရုပ်တု၊ အထိမ်းအမှတ်တွေ မပါဘူး။ ဒါ့အပြင် NLD ခေတ်မှာ လုပ်ခဲ့တဲ့ အခြားနိုင်ငံရေးအထိမ်းအမှတ်တွေကိုလည်း ဖယ်ရှားခိုင်းထားပါတယ်" ဟု နေပြည်တော်စစ်ဘက်သတင်းရင်းမြစ်က ရှင်းပြသည်။
လတ်တလော နိုင်ငံတစ်ဝန်းရှိ ဗိုလ်ချုပ်အောင်ဆန်း ကြေးရုပ်တုများကို ညအချိန်များတွင် လုံခြုံရေးတင်းကျပ်စွာဖြင့် ကရိန်းယာဉ်များ၊ ဘက်ဟိုးများနှင့် မြေကော်ယာဉ်များ အသုံးပြုကာ ဆက်တိုက် ဖယ်ရှားဖြိုချမှုများ ဆက်တိုက်ပြုလုပ်လျက်ရှိသည်။
ရန်ကုန်တိုင်း တောင်ဥက္ကလာပမြို့နယ်တွင် ဇူလိုင်လ ၁ ရက်နေ့ ည ၁၀ နာရီခန့်မှ စတင်၍ စစ်တပ်နှင့် ရန်ကုန်မြို့တော်စည်ပင်သာယာရေးအဖွဲ့တို့က ဘက်ဟိုးများ၊ မြေကော်ယာဉ်များဖြင့် ဗိုလ်ချုပ်အောင်ဆန်း ကြေးရုပ် ၂ ရုပ်ကို ဖြိုချဖယ်ရှားခဲ့သည်။
အဆိုပါ ရုပ်တုနှစ်ရုပ်အနက် တစ်ရုပ်မှာ ၈၈ မျိုးဆက်ကျောင်းသားခေါင်းဆောင် ဦးကိုကိုကြီး ဦးဆောင်တည်ဆောက်ခဲ့သည့် ကြေးရုပ်ဖြစ်ပြီး ကျန်တစ်ရုပ်မှာ တောင်ဥက္ကလာပမြို့နယ် ဗိုလ်ချုပ်အောင်ဆန်းကြေးရုပ် ဖြစ်မြောက်ရေးကော်မတီနှင့် မြို့နယ်လွှတ်တော်ကိုယ်စားလှယ်များ ဦးဆောင်တည်ဆောက်ခဲ့သည့် ကြေးရုပ်ဖြစ်ကြောင်း သိရသည်။
အဆိုပါ ကြေးရုပ်များကို ၂၀၁၇ ခုနှစ် ဖေဖော်ဝါရီလ ၁၃ ရက်နေ့ ဗိုလ်ချုပ်အောင်ဆန်း၏ ၁၀၂ နှစ်ပြည့် မွေးနေ့အထိမ်းအမှတ်အဖြစ် အများပြည်သူ ဂါရဝပြုနိုင်ရန် စိုက်ထူခဲ့ခြင်းဖြစ်ပြီး၊ ဗိုလ်ချုပ်အောင်ဆန်း အင်္ဂလန်နိုင်ငံသို့ လွတ်လပ်ရေးဆွေးနွေးရန် သွားရောက်စဉ် ဝတ်ဆင်ခဲ့သည့် လောင်းကုတ်အင်္ကျီပုံစံဖြင့် သွန်းလုပ်ထားသော အမြင့် ၉ ပေ၊ ကြေးပိဿာချိန် ၃၀၀ ရှိသည့် ရုပ်တုဖြစ်ကြောင်း သိရသည်။
အလားတူ ဇူလိုင်လ ၁ ရက်နေ့ ညပိုင်းတွင် သာကေတမြို့နယ် မြကန်သာပန်းခြံအတွင်းရှိ ဗိုလ်ချုပ်အောင်ဆန်း ကြေးရုပ်ကိုလည်း စစ်တပ်နှင့် စည်ပင်သာယာရေးအဖွဲ့တို့က ဘက်ဟိုးများဖြင့် ဖြိုချဖယ်ရှားခဲ့သည်။
အဆိုပါ ကြေးရုပ်မှာ ၂၀၁၅ ခုနှစ် ဖေဖော်ဝါရီလ ၁၃ ရက်နေ့ ဗိုလ်ချုပ်အောင်ဆန်း၏ နှစ် ၁၀၀ ပြည့် မွေးနေ့အထိမ်းအမှတ်အဖြစ် သာကေတမြို့နယ် ပြည်သူများ စုပေါင်းလှူဒါန်းငွေဖြင့် တည်ဆောက်ခဲ့ခြင်းဖြစ်ပြီး ရန်ကုန်မြို့အတွင်း မြို့နယ်အဆင့်၌ ပြည်သူများ စုပေါင်းအလှူငွေဖြင့် တည်ဆောက်ခဲ့သည့် ပထမဆုံး ဗိုလ်ချုပ်အောင်ဆန်းကြေးရုပ်များအနက် တစ်ရုပ်ဖြစ်ကြောင်း သိရသည်။
ယင်းရုပ်တုကို ဗိုလ်ချုပ်အောင်ဆန်း၏ ရန်ကုန်တက္ကသိုလ် ကျောင်းသားသမဂ္ဂခေါင်းဆောင်ဘဝ သမိုင်းဝင်ဓာတ်ပုံကို အခြေခံ၍ သွန်းလုပ်ထားခြင်းဖြစ်ပြီး သာကေတမြို့ခံများအတွက် သမိုင်းအမှတ်တရတန်ဖိုးရှိသည့် အထိမ်းအမှတ်တစ်ခုအဖြစ် သတ်မှတ်ခံထားရကြောင်း သိရသည်။
ထို့အပြင် ရန်ကုန်တိုင်း ကော့မှူးမြို့နယ် စည်ပင်သာယာရေးရုံးဝင်းအတွင်း စိုက်ထူထားသည့် ဗိုလ်ချုပ်အောင်ဆန်း ကြေးရုပ်ကိုလည်း ဇူလိုင်လ ၂ ရက်နေ့ ညပိုင်းတွင် ဘက်ဟိုးယာဉ်ဖြင့် ဖြိုချဖယ်ရှားခဲ့ကြောင်း သိရသည်။
ဧရာဝတီတိုင်း ကျုံပျော်မြို့နယ်တွင်လည်း ဇူလိုင်လ ၂ ရက်နေ့ နံနက်အစောပိုင်း၌ အောင်ဆန်းရပ်ကွက်အတွင်းရှိ ဗိုလ်ချုပ်အောင်ဆန်း ကြေးရုပ်ကို စစ်ကောင်စီတပ်က ကရိန်းယာဉ်များအသုံး ပြု၍ ဖယ်ရှားခဲ့သည်။
စစ်ကောင်စီသည် ပြီးခဲ့သည့်လများအတွင်း စစ်ကိုင်းတိုင်း ရေဦးမြို့၊ ပဲခူးတိုင်း တောင်ငူမြို့၊ နေပြည် တော် ပုဗ္ဗသီရိမြို့နယ်၊ ပဲခူးမြို့၊ ပုသိမ်မြို့နှင့် မန္တလေးတိုင်း သာစည်မြို့တို့ရှိ ဗိုလ်ချုပ်အောင်ဆန်း ကြေးရုပ်တုများကိုလည်း ညအချိန်များတွင် လုံခြုံရေးတင်းကျပ်စွာ ချထားပြီး ကရိန်းယာဉ်များ၊ ဘက်ဟိုးများနှင့် မြေကော်ယာဉ်များ အသုံးပြု၍ ဆက်တိုက် ဖယ်ရှားဖြိုချခဲ့ကြောင်း သိရသည်။
လက်ရှိတွင် စစ်ကောင်စီသည် NLD အစိုးရလက်ထက် တည်ဆောက်ခဲ့သည့် ဗိုလ်ချုပ်အောင်ဆန်း ကြေးရုပ်တုများနှင့် နိုင်ငံရေးအထိမ်းအမှတ်များကို နိုင်ငံတစ်ဝန်း ဆက်လက်ဖယ်ရှားလျက်ရှိပြီး ယင်းလုပ်ရပ်များအပေါ် ပြည်သူများ၏ တုံ့ပြန်မှုများကိုလည်း အနီးကပ်စောင့်ကြည့်လျက်ရှိကြောင်း နေပြည်တော်စစ်ဘက်သတင်းရင်းမြစ်ထံမှ သိရှိရသည်။
