16/03/2026
ကမ္ဘာ့အကြီးဆုံး ဘောလုံးသင်တန်းအဖြစ် မက္ကဆီကိုစီးတီး စံချိန်တင်
AP
ဇွန်လမှာ ကမ္ဘာ့ဖလား အဖွင့်ပွဲစဉ်ကို အိမ်ရှင်အဖြစ်လက်ခံကျင်းပဖို့ ပြင်ဆင်နေတဲ့ မက္ကဆီကိုနိုင်ငံဟာ တနင်္ဂနွေနေ့က မြို့တော်ရဲ့ ဇိုကာလို ရင်ပြင်မှာ လူပေါင်း ၉,၅၀၀ နဲ့အတူ Soccer class အကြီးဆုံးကို ပြုလုပ်ပြီး ကမ္ဘာ့စံချိန်မှတ်တမ်းသစ်တခုကို ရေးထိုးခဲ့ကြပါတယ်။
မြို့ရဲ့ ပင်မရင်ပြင်ကြီးဟာ နည်းပြတွေရဲ့ လမ်းညွှန်မှုအောက်မှာ ဘောလုံးအခြေခံလေ့ကျင့်ခန်းတွေ လုပ်ဆောင်နေကြတဲ့ လူအုပ်ကြီးနဲ့အတူ အကြီးစား ဟင်းလင်းပြင် လေ့ကျင့်ရေးကွင်းကြီးတခု ဖြစ်သွားခဲ့ပါတယ်။ ပါဝင်သူတွေဟာ အားကစားနဲ့ လူမှုအသိုက်အဝန်းကြား ထိတွေ့မှု ပိုကောင်းလာစေဖို့အတွက် ဘောလုံးကန်တာတွေ၊ စနစ်တကျ လေ့ကျင့်ခန်းလုပ်တာတွေကို ပူးပေါင်းဆောင်ရွက်ခဲ့ကြတာပါ။
ဂင်းနစ်ကမ္ဘာ့စံချိန်အဖွဲ့မှ အဲလ်ဖရက်ဒို အရစ္စတာ ရူအီဒါက ဒီစံချိန်ကို ပွဲအတွင်း အတည်ပြုပေးခဲ့ပါတယ်။
သူက “ခင်ဗျားတို့ဟာ တကယ်ကို အံ့သြဖို့ကောင်းပါတယ်။ အခုအချိန်ကစပြီး တရားဝင် အံ့အားသင့်စရာကောင်းသူများ ဖြစ်သွားပါပြီ။ ဂုဏ်ယူပါတယ်" လို့ ပြောကြားလိုက်ချိန်မှာတော့ လူအုပ်ကြီးက ဝမ်းသာအားရ အော်ဟစ်အောင်ပွဲခံခဲ့ကြပါတယ်။
မက္ကဆီကိုစီးတီးက သင်တန်းရောက်သူဦးရေဟာ ၂၀၂၅ ခုနှစ်၊ ဇွန်လ ဆီယက်တဲလ်မြို့မှာ လူပေါင်း ၁,၀၃၈ ဦးနဲ့ တင်ထားခဲ့တဲ့ ယခင်ဂင်းနစ်စံချိန်ကို ကျော်ဖြတ်နိုင်ခဲ့တာလို့ ပွဲစီစဉ်သူတွေက ပြောပါတယ်။
တက်ရောက်လာတဲ့ ပရိသတ်တွေကတော့ ဒီလိုစံချိန်တင်နိုင်တာဟာ လာမယ့်ကမ္ဘာ့ဖလားအတွက် ပိုပြီး စိတ်လှုပ်ရှားတက်ကြွစရာ ဖြစ်စေတယ်လို့ ဆိုပါတယ်။
“အက်ဇ်တီကာ အားကစားကွင်းကြီးက ပီလီနဲ့ မာရာဒိုနာတို့ကို လက်ခံကျင်းပပေးခဲ့ဖူးတယ်။ ဒီမှာကျင်းပမယ့် ကမ္ဘာ့ဖလားကတော့ တကယ့်ကို မှော်ဆန်ပါတယ်” လို့ ဘောလုံးနည်းပြ ဘောလုံးနည်းပြ မာရီယို အယ်လ်ဘာတို အယ်လ်ဗာရက်ဇ် အကော့စတာက ပြောပါတယ်။
မက္ကဆီကိုနိုင်ငံဟာ ၁၉၇၀ နဲ့ ၁၉၈၆ ခုနှစ်တွေမှာလည်း ကမ္ဘာ့ဖလားကို လက်ခံကျင်းပခဲ့ဖူးပါတယ်။ အဲဒီပြိုင်ပွဲတွေမှာ ဘရာဇီးလ်နဲ့ အာဂျင်တီးနား ဂန္ထဝင်ကစားသမားကြီးတွေက ဆုဖလားကို ဆွတ်ခူးသွားခဲ့ကြတာ ဖြစ်ပါတယ်။
အိမ်ရှင်မတဦးဖြစ်သူ ဆန်ဒရာ လိုပက်ဇ် ဖီဂူရိုအာကလည်း “ကျွန်မ တကယ်ကို ပျော်ခဲ့ရပါတယ်။ ကိုယ်တိုင်လုပ်နိုင်မယ်လို့ မထင်ထားတဲ့ အရာတွေကိုလည်း လုပ်ဆောင်ခဲ့ရတာ”လို့ ပြောကြားခဲ့ပါတယ်။
