25/08/2025
နောင်ထောင်စျေးဆိုင်များအားလုံး ဖျက်ရမည်ဟု စစ်ကောင်စီလက်အောက်ခံ PNA တပ်က ဆိုင်ရှင်များကိုအမိန့်ပေးထား
အင်းလေးလူထု ၊ဩဂုတ်လ ၂၅ ရက် ၊၂၀၂၅။
ဆီဆိုင်မြို့နယ် ၊ နောင်ထောင်စျေးဆိုင်များအားလုံး ဖျက်ရမည်ဟု စစ်ကောင်စီလက်အောက်ခံ PNA တပ်က ဆိုင်ရှင်များကိုအမိန့်ပေးထားကြောင်း ဒေသခံများမှတဆင့် စုံစမ်းသိရှိရပါသည်။
ရှမ်းပြည်တောင်ပိုင်း ၊ ဆီဆိုင်မြို့နယ် ၊ တောင်ရှေ့ကျေးရွာအုပ်စု နောင်ထောင်ကျေးရွာသည် တချိန်ကရှမ်းပြည်လူမျိုးပေါင်းစုံ ပြည်သူ့လွှတ်မြောက်ရေးအဖွဲ့{ရလလဖ}ဗဟိုဌာနချုပ်အခြေစိုက်ရာနေရာဖြစ်ခဲ့ပြီး စျေးကုန်း ၊ မန့်ဒုံး ၊ ဒုံကုန်း ၊ ရွာသစ် ၊ ကုလာ့လမ်းရွာများဖြင့် ပေါင်းစုထားသော ကျေးရွာကြီးတခုဖြစ် သည်။
နောင်ထောင်စျေးသည်လည်း အရှေ့ဖက်မောက်မယ်ဒေသအတွင်း ရှိကျေးရွာများနှင့်တောင်ရှေ့အုပ်စုတွင်းရှိကျေးရွာများကြောင့် စည်ကားသောစျေးတခု
ဖြစ်ခဲ့ပါသည်။
၂၀၂၅ ခုနှစ်အတွင်း နောင်ထောင်ကျေးရွာကို ပအို၀်းပြည်သူ့လွတ်မြောက်ရေးတပ်မတော် PNLA မှထိန်း ချုပ်ထားခဲ့ပြီး စစ်ကောင်စီမှ ဒေသပြန်ရရေးထိုးစစ် ဆင်နေစဥ်ကာလအတွင်း ဧပြီလ ၁ ရက်နေ့တွင် စစ်ကောင်စီ လက်အောက်ခံ PNA အုပ်စုအဖွဲ့များမှ နောင်ထောင်စျေးကို မီးလာရှို့သဖြင့်လူထုနှင့် PNLA တပ်သားများ ၀ိုင်း၀န်းမီးငြိမ်းသတ်ရသည့်ဖြစ်စဥ်ဖြစ်ပွားခဲ့ပါသည်။
ပြီးခဲ့သည့် သြဂုတ်လ ၁၆ ရက်နေ့မှစ၍ နောင်ထောင်စျေးကို ဖျက်ဆီးကာအချို့ဆိုင်ပိုင်ရှင်များ ဆိုင်တံခါးများဖြုတ်ယူခွင့်ပြုသော်လည်း အများစုမှာ ဖြုတ်ယူခွင့်မရဘဲ PNA တပ်မှဖျက်ဆီးကာ တိုင်နှင့်တံခါးများယူဆောင်သွားကြောင်း နောင်ထောင်ဒေသခံများက ပြောဆိုသည်။
PNA တပ်ဖွဲ့သည်၂၀၂၅ ခုနှစ် ၊ ဇွန်လ ၁၅ ရက်နောက်ဆုံးထား၍ တောင်ရှေ့အုပ်စုတွင်းရှိပြည်သူ များအားလုံးကို နေအိမ်ရပ်ရွာများမှ အတင်းအကြပ်မောင်းထုတ်ခဲ့ကာ စစ်ကောင်စီတပ်များနှင့်အတူထိုးစစ်ဆင်တိုက်ခိုက်ခဲ့ကြပြီးနောင်ထောင်ဒေသကိုပြန်လည်ထိန်းချုပ်ခဲ့ခြင်းဖြစ်သည်။
#အင်းလေးလူထုလှုပ်ရှားမှု
#ဆီဆိုင် #နောင်ထောင်ဈေး
#ဖျက်သိမ်းခိုင်း
