27/08/2026
🟪ဒုက္ခသည်စခန်းက ကလေးတွေ ပညာသင်ခွင့်ရရေး ထိုင်းအစိုးရကို လွှတ်တော်အမတ် တိုက်တွန်း
🟪မူအရ ကလေးတိုင်း ပညာသင်ခွင့်ရှိဟု ဆို
____________
တာ့ခ်ခရိုင်၊ ထာ့ဆောင်ယန်းမြို့နယ် မယ်လား ယာယီခိုလှုံရာစခန်းက ကလေး ၁၃ ဦးကို မဲရမတ်မြို့နယ်က ကျောင်းမှာ ပညာသင်ကြားခွင့် ရပ်ဆိုင်းလိုက်တာနဲ့ ပတ်သက်ပြီး ထိုင်းအစိုးရအနေနဲ့ မူဝါဒနဲ့အညီ ကလေးတိုင်း ပညာသင်ခွင့်ရရှိရေး အမြန်ဆုံး ဆောင်ရွက်ပေးဖို့ တိုက်တွန်းမှုတွေ ထွက်ပေါ်လာပါတယ်။ အဆိုပါကလေးတွေကို တာခ့် အမှတ် ၂ မူလတန်းပညာရေးနယ်မြေရုံးက သတ်မှတ်ထားတဲ့ လူပုဂ္ဂိုလ်အဆင့်အတန်းနဲ့ မကိုက်ညီတာကြောင့် ကျောင်းတက်ခွင့် ရပ်ဆိုင်းခဲ့တာပါ။
ဖွေထိုင်းပါတီ လွှတ်တော်အမတ် ချာတူရွန် ချိုင်ဆန်က ထိုင်းနိုင်ငံအတွင်း ရှိနေတဲ့ ကလေးတိုင်း ပညာသင်ကြားခွင့် ရရှိရမယ်ဆိုတဲ့ “Education for All” မူကို လိုက်နာဖို့ လိုအပ်ကြောင်း ပြောထားပါတယ်။ ကလေးတစ်ဦး ထိုင်းနိုင်ငံထဲ ဝင်ရောက်လာပုံ တရားဝင်၊ မဝင်ရောက်မှုထက် ပညာရေးအခွင့်အရေး ပေးနိုင်ရေးကို ဦးစားပေး စဉ်းစားသင့်ပြီး ပြန်ပို့မယ့်နေရာမှာ လုံခြုံမှုမရှိ၊ ပညာသင်ယူနိုင်မယ့်နေရာ မရှိရင် ပညာသင်ခွင့်ပေးတာက လူမှုအသိုင်းအဝိုင်းအတွက် ပိုအကျိုးရှိတယ်လို့ ဆိုပါတယ်။
ထိုင်းပညာရေးဝန်ကြီးဌာန အကြံပေး ဆူရဖုန် ကလည်း ဒုက္ခသည်စခန်းနဲ့ စစ်ဘေးရှောင်စခန်းတွေမှာ ရှိနေတဲ့ ကလေးတွေအပါအဝင် ကလေးတိုင်း ပညာသင်ကြားခွင့် ရှိကြောင်း ပြောပါတယ်။ ၂၀၀၅ ခုနှစ်က အစိုးရအဖွဲ့ ဆုံးဖြတ်ချက်တွေမှာ မှတ်ပုံတင်အထောက်အထား မရှိသူနဲ့ ထိုင်းနိုင်ငံသားမဟုတ်သူတွေကို ပညာရေးအခွင့်အရေး ပိုမိုကျယ်ပြန့်စွာ ပေးဖို့ သတ်မှတ်ထားပြီး စစ်ဘေးရှောင်သူတွေကို နေထိုင်ရာဒေသမှာ ပညာသင်ကြားခွင့် ပေးရမယ်လို့လည်း ဖော်ပြထားပါတယ်။
အဆိုပါ မူဝါဒအရ ဒုက္ခသည်စခန်းတွေအတွင်း ပညာရေးစီမံပေးဖို့ အခြေခံပညာကော်မရှင် (OBEC) မှာ တာဝန်ရှိပေမယ့် ၂၁ နှစ်အတွင်း လက်တွေ့ အကောင်အထည်ဖော်မှု မရှိသေးတာကြောင့် စခန်းတွင်း ပညာရေး ထိခိုက်နေတယ်လို့ ဆိုပါတယ်။ ဒါကြောင့် OBEC အနေနဲ့ မူဝါဒအတိုင်း စခန်းတွင်းကျောင်းတွေ ဖွင့်လှစ်ပေးပြီး ကလေးတွေကို ပညာရေးစနစ်အတွင်း ထည့်သွင်းပေးဖို့၊ ပညာရေးဝန်ကြီးဌာနအနေနဲ့လည်း အရေးတကြီး ကြီးကြပ်ဆောင်ရွက်ပေးဖို့ တိုက်တွန်းထားပါတယ်။
#ဘီကွန်မြန်မာ #ထိုင်း
