Hsan Loi Voice (2025)

26/07/2025

ကျောက်မဲမြို့နယ်၊ နောင်ပိန်တိုက်နယ်ထဲကို စစ်ကောင်စီက လက်နက်ကြီးဖြင့် ပစ်ခတ်လို့ ပြည်သူ ၄ ဦးထက်မနည်း ထိခိုက်ဒဏ်ရာရ

26 July 2025

တိုက်ပွဲဖြစ်ပွားခြင်းမရှိတဲ့ ကျောက်မဲမြို့နယ် နောင်ပိန်တိုက်နယ်ထဲကို ယနေ့မွန်းလွဲပိုင်းအချိန်တွင် စစ်ကောင်စီက လက်နက်ကြီးဖြင့် ဗုံး ၁၀ လုံးခန့် ပစ်ခတ်တာကြောင့် ပြည်သူ ၄ ဦးထက်မနည်း ထိခိုက်ဒဏ်ရာရရှိတယ်လို့ ဒေသခံတစ်ဦးက Hsan Loi Voice ကိုပြောပါတယ်။

"လက်နက်ကြီးက ရပ်ကွက် ၁၊ ရပ်ကွက် ၂နဲ့ရပ်ကွက် ၃ ထဲ ကျရောက်တာ ဗုံး ၁၀ လုံးခန့် လောက်ရှိတယ်၊သိရသလောက်တော့ လက်နက်ကြီးရဲ့ ကျည်စတွေကြောင့် ၄ ယောက်ထိထားတယ်၊ ပြင်ထန်ဒဏ်ရာရတဲ့သူ ၂ ဦးကတော့ လားရှိုးကိုခေါ်သွားပြီ" လို့ ဆိုပါတယ်။

နောင်ပိန်ထဲကို နောင်ချိုဘက်ကနေ စစ်ဘေးရှောင် လာတဲ့ ပြည်သူ ၁၀၀၀ ကျော်ခန့်ရှိပြီး စစ်ကောင်စီက လက်နက်ကြီးဖြင့် ရမ်းသမ်းပစ်ခတ်မှုကြောင့် ဒေသခံပြည်သူများ စိုးရိမ်နေကြတယ်လို့ သိရပါတယ်။

အဆိုပါနောင်ပိန်တိုက်နယ်ထဲတွင် သျှမ်းပြည်တိုးတက်ရေးပါတီ/ သျှမ်းပြည်တပ်မ‌တော် SSPP/SSA တပ်ရဲ့ လှုပ်ရှားရာဒေသဖြစ်ပြီး အခြားမည်သည့်အဖွဲ့အစည်းမှ မရှိဘူးလို့သိရပါတယ်။

26/07/2025

ကမ္ဘောဒီးယားက ချက်ချင်းအပစ်အခတ်ရပ်စဲဖို့ ထိုင်းကို တောင်းဆို

26 July 2025

ထိုင်းနဲ့ ကမ္ဘောဒီးယားတို့ နယ်စပ်တိုက်ပွဲ ဖြစ်ပွားပြီးတဲ့နောက် ကမ္ဘောဒီးယားအနေနဲ့ ထိုင်းနဲ့ ချက်ချင်းအပစ်အခတ်ရပ်စဲရေးဖို့ လိုလားတယ်လို့ ကုလသမဂ္ဂဆိုင်ရာ ကမ္ဘောဒီးယား သံအမတ် Chhea Keo က သောကြာနေ့က ပြောကြား လိုက်တယ်လို့ Bangkok Post သတင်းဌာနက ဖော်ပြထားပါတယ်။

နှစ်နိုင်ငံအကြား နယ်စပ်အငြင်းပွားမှုသည် ဇူလိုင်လ ၂၄ ရက်က တိုက်လေ ယာဉ်တွေ၊ အမြောက်တွေ၊ တင့်ကားတွေနဲ့ မြေပြင်တပ်ဖွဲ့တွေနဲ့ ပြင်းထန်တဲ့ တိုက်ပွဲများဖြစ်ပွားခဲ့ပြီး ကုလသမဂ္ဂလုံခြုံရေး ကောင်စီက ဒီကိစ္စနဲ့ပတ်သက်ပြီး ဇူလိုင်လ ၂၅ ရက်က အရေးပေါ်အစည်းအဝေးတစ်ခု ကျင်းပခဲ့တယ်လို့ သိရပါတယ်။

ကမ္ဘောဒီးယားနဲ့ ထိုင်းနိုင်ငံတို့ တက်ရောက်ခဲ့တဲ့ ကုလသမဂ္ဂလုံခြုံရေးကောင်စီ ၏ တံခါးပိတ် အစည်းအဝေးကျင်းပပြီးနောက် ဖနွမ်းပင်မှ ကုလသမဂ္ဂဆိုင်ရာ သံအမတ် Chhea Keo က “ကမ္ဘောဒီးယားသည် ချက်ချင်းအပစ်အခတ်ရပ်စဲရေးကို အကန့်အသတ်မရှိ တောင်းဆိုထားပြီး အငြင်းပွားမှုကို ငြိမ်းချမ်းစွာ ဖြေရှင်းရန်လည်း တောင်းဆိုပါတယ်” လို့ ပြောကြားခဲ့ပါတယ်။

ထိုင်းနိုင်ငံရဲ့ ကျန်းမာရေးဝန်ကြီးဌာန၏ ထုတ်ပြန်ချက်အရ နယ်စပ်ဒေသများမှ ပြည်သူ ၁၃၈,၀၀၀ ကျော်ကို ဘေးလွတ်ရာသို့ ရွှေ့ပြောင်းပေးခဲ့ပြီး ‌အရပ်သား ၁၄ ဦးနဲ့ စစ်သား ၁ ဦး အပါအဝင် သေဆုံးသူ ၁၅ ဦးနဲ့ စစ်သား ၁၅ ဦးအပါအဝင် ဒဏ်ရာရရှိသူ ၄၆ ဦး ရှိခဲ့တယ်လို့ သိရပါတယ်။

ဇူလိုင်လ ၂၅ ရက် မွန်းလွဲပိုင်းမှာ တိုက်ပွဲများ လျော့ပါးလာပြီလို့ ထိုင်းနိုင်ငံ ခြားရေးဝန်ကြီးဌာန ပြောရေးဆိုခွင့်ရှိသူ နီကွန်ဒပ်ဘာလန်ကူရာ က AFP သတင်းဌာနသို့ ပြောကြားပြီး ဘန်ကောက်အနေနဲ့ မလေးရှားနိုင်ငံ၏ ကူညီဖျန်ဖြေမှုဖြင့် နှစ်နိုင်ငံဆွေးနွေးမှု သို့မဟုတ် သံတမန်ရေးရာလမ်းကြောင်းများ မှတဆင့် ဖြေရှင်းရန် အဆင်သင့်ရှိတယ်လို့ ထည့်သွင်းပြောကြားသွားပါတယ်။

ကမ္ဘောဒီးယားကသာ ဒီပြဿနာကို သံတမန်ရေးလမ်းကြောင်းမှတဆင့် နှစ်နိုင်ငံ ဆွေးနွေးမှု ဒါမှမဟုတ် မလေးရှားမှတစ်ဆင့် ဖြေရှင်းလိုပါက ကျွန်ုပ်တို့ အဆင်သင့်ရှိပါတယ်၊ သို့သော် ယခုချိန်ထိ မည်သည့်တုံ့ပြန်မှုမှ မရရှိသေးဘူးလို့ နီကွန်ဒပ်က က AFP ကို ပြောပါတယ်။

မလေးရှားနိုင်ငံသည် ယခုလက်ရှိ အရှေ့တောင်အာရှနိုင်ငံများအသင်း(ASEAN) ၏ အလှည့်ကျ ဥက္ကဋ္ဌဖြစ်ပြီး ထိုင်းနဲ့ ကမ္ဘောဒီးယား တို့က အဖွဲ့ဝင်နိုင်ငံတွေ ဖြစ်ပါတယ်။

ထိုင်းနိုင်ငံရဲ့ ယာယီဝန်ကြီးချုပ် ဖုံထမ်ဝီကျာချိုင်းက အကယ်၍ အခြေအနေများ ပိုမိုဆိုးရွားလာပါက “စစ်ပွဲအဖြစ်သို့ ဖြစ်ပေါ်လာနိုင်သည်” ဟု သတိပေးခဲ့ပြီး ယခုအချိန်ထိတော့ ပဋိပက္ခများအဆင့်တွင်သာ ရှိသေးတယ်လို့ သတင်း ထောက်များကို ပြောကြားခဲ့တယ်လို့ Bangkok post သတင်းဌာနက ဖော်ပြထားပါတယ်။

24/07/2025

နယ်စပ်အငြင်းပွားမှုကြောင့် ကမ္ဘောဒီးယားစစ်တပ်က BM-21 ဒုံကျည်များဖြင့် စတင်ပစ်ခတ်လို့ လက်ရှိ ထိုင်းပြည်သူ ၉ ဦးသေဆုံးပြီး ၁၄ ဦးဒဏ်ရာရ

ထိုင်းစစ်တပ်က F 16 တိုက်လေယာဉ်နဲ့ ကမ္ဘောဒီးယား စစ်စခန်းကို ပြန်လည်တိုက်ခိုက်

24 July 2025

ထိုင်းနှင့်ကမ္ဘောဒီးယား နှစ်နိုင်ငံ နယ်စပ်အငြင်းပွားမှု ကြောင့် ယနေ့နံနက်ပိုင်းမှာ ကမ္ဘောဒီးယားစစ်တပ်က ထိုင်းဘက်ကို BM-12 ဒုံးကျည်များဖြင့် စတင်ပစ် ခတ်ကာ ထိုပစ်ခတ်မှုကြောင့် လက်ရှိအချိန်တွင် ထိုင်းအရပ်သားပြည်သူ ၉ ဦးအထိသေဆုံးမှုရှိလာပြီး ၁၄ ဦး ဒဏ်ရာရရှိကာ နေအိမ်များလည်း ထိခိုက်ပျက်စီးသွားကြောင်း ထိုင်းသတင်းဌာနများက ဖော်ပြပါသည်။

ကမ္ဘာဒီးယားဘက်က ဒုံးကျည်နဲ့ ပစ်ခတ်မှုအပြီးမှာထိုင်းစစ်တပ်က F16 တိုက်လေယာဉ် ၆ စီးနဲ့ ကမ္ဘောဒီးယားရဲ့ စစ်စခန်းကို ယနေ့ ဒေသစံတော်ချိန်နံနက် ၁၁ နာရီခွဲမှာ ဗုံးကြဲခဲ့ကြောင်းသိရပါသည်။

နှစ်ဖက်တင်းမာမှုဖြစ်နေချိန် က‌မ္ဘောဒီးယားနိုင်ငံ၊ ဖနွမ်းပင်မှာရှိတဲ့ ထိုင်း‌တော်ဝင်သံရုံးက ထိုင်းနိုင်ငံသားတွေကို ကမ္ဘေားဒီးယားကနေ အမြန်ဆုံးထွက်ခွာဖို့ တိုက်တွန်းထားပါသည်။

ကမ္ဘောဒီးယားကတော့ ထိုင်းနိုင်ငံ၏ ရန်လိုမှုကို ရပ်တန့်ရန် လုံခြုံရေးကောင်စီ၏ အရေးပေါ် အစည်းအဝေး ပြုလုပ်ရန် ကုလသမဂ္ဂ လုံခြုံရေးကောင်စီသို့ စာတစ်စောင် ပေးပို့ခဲ့တယ်လို့ သိရပါသည်။

22/07/2025

"ဝ" ဒေသ မိုင်းပေါက်မြို့မှာ ရေကြီးရေလျှံမှုဖြစ်ပြီး ကား ဆိုင်ကယ်များ ရေထဲမျှောပါသွား

22 July 2025

သျှမ်းပြည်နယ်အရှေ့ပိုင်း၊ "ဝ" အထူးဒေသ(၂)၊ မိုင်းပေါက်မြို့မှာ မိုးအဆက်မပြတ် ရွာသွန်းမှုကြောင့် ရေကြီးရေလျှံမှုတွေ ဖြစ်ပွားကာ ကား၊ ဆိုင်ကယ်များလည်း ရေထဲမျှောပါသွားတယ်လို့ ဒေသခံ‌တွေဆီက သိရှိရပါတယ်။

ယမန်နေ့ညက တစ်ညလုံးမိုးရွာသွန်းတာကြောင့်ယနေ့ ဇူလိုင်လ ၂၂ ရက် နံနက်အစောပိုင်းကစတင်ပြီး ရေကြီး၊ ရေလျှံမှုတွေ ဖြစ်ပေါ်ကာ နေအိမ် အဆောက်အဦးများ ရေနှစ်မြုပ်ကာ လယ်ယာစိုက်ခင်းများလည်း ထိခိုက်ပျက်စီးတယ်လို့ သိရပါတယ်။

ဗီယက်နမ်နိုင်ငံ မြောက်ပိုင်းကမ်းခြေကို ဖြတ်ကျော် ဝင်ရောက်လာတဲ့ မုန်တိုင်း "ဝီဖာ"(WIPHA)သည် ဘင်္ဂလားပင်လယ်အော်မှာ LPA တစ်ခုဖြစ်လာပြီးအနောက်တောင်မုတ်သုံလေအား ပိုကောင်းလာတာကြောင့် မြန်မာနိုင်ငံမှာ မုတ်သုံမိုး၊ မုန်တိုင်းအကြွင်း အကျန်မိုးတွေဟာ ဇူလိုင် ၂၂ ရက်မှ လကုန်အထိ မိုးဆက်လက်ရွာမှာဖြစ်ပြီး နေရာဒေသအလိုက် မိုးသည်းထန်တာ မိုးရေချိန်များနိုင်တာတွေ ရှိနေမယ်လို့ မိုး‌လေဝသပညာရှင် ဦးဝင်းနိုင် က ခန့်မှန်းပြောဆိုထားပါတယ်။

Video - Credit to original uploader

22/07/2025

ယာယီနေရပ်စွန့်ခွာနေရတဲ့ တိုင်းရင်းသားများ စစ်တပ်ကို ယုံကြည်အားကိုးသည်ဟု ဒုစစ်ခေါင်းဆောင် စိုးဝင်း က နောင်ချိုခရီးစဥ်မှာ ပြောကြား

နောင်ချိုကို ပြန်လည်သိမ်းပိုက်ရရှိတဲ့ အရာရှိ စစ်သည်များကိုလည်း ဂုဏ်ပြုတံဆိပ်တပ်ဆင်ပေး

22 July 2025

ယမန်နေ့ ဇူလိုင်လ ၂၁ ရက် မွန်းလွဲပိုင်းက ဒုစစ်ခေါင်းဆောင် ဒုဗိုလ်ချုပ်မှူးကြီး စိုးဝင်း ဟာ နောင်ချိုမြို့သို့ သွားရောက်ပြီး နောင်ချိုကို ပြန်လည်သိမ်းပိုက်ရရှိတဲ့ အရာရှိ၊ စစ်သည်များကို တွေ့ဆုံကာ ဂုဏ်ပြုဆုတံဆိပ်များ တပ်ဆင်ပေးခဲ့တယ်လို့ စစ်ကောင်စီထိန်းချုပ် သတင်းဌာနတွေက ဖော်ပြထားပါတယ်။

နောင်ချိုမြို့ရှိ မြို့နယ်ခန်းမမှာ အရာရှိ၊ စစ်သည်များကို ဂုဏ်ပြုအခမ်းအနားနဲ့ ပြုလုပ်ပြီး ဒုစစ်ခေါင်းဆောင် စိုးဝင်း က ယာယီနေရပ်စွန့်ခွာနေရတဲ့ တိုင်းရင်းသားများအနေနဲ့ စစ်တပ်ကို မည်မျှ ယုံကြည်အားကိုးသည်ကို အားလုံးအသိပင်ဖြစ်တယ်လို့ ပြောကြားပါတယ်။

ဒါ့အပြင် လုံခြုံရေးတပ်ဖွဲ့ဝင်များအနေနဲ့ ဒေသခံပြည်သူများ စိတ်အေးချမ်းသာစွာ ဖြင့် နေထိုင်စားသောက်နိုင်ဖို့ လူမှုစီးပွားဘဝဖွံ့ဖြိုးတိုးတက်ရေးလုပ်ငန်းများ ဆောင်ရွက်နိုင်ဖို့နဲ့ နယ်မြေ လုံခြုံရေးနှင့် နယ်မြေစိုးမိုးရေး လုပ်ငန်းများကို အရှိန်အဟုန်နဲ့ ဆက်လက်ဆောင်ရွက် သွားကြရမှာ ဖြစ်တယ်လို့ မှာကြားသွားပါတယ်။

ဒုစစ်ခေါင်းဆောင်ရဲ့ နောင်ချိုခရီးစဥ်အတွင်းမှာ ဒေသခံတွေနဲ့တွေ့ဆုံပြီး ယနေ့ခေတ်သည် ပညာခေတ် ဖြစ်တဲ့အတွက် ပညာတတ်များ ပေါများစေရေး တစ်နှစ်နီးပါးပိတ်ထားခဲ့ရတဲ့ အခြေခံပညာကျောင်းများ ကို ယနေ့ ဇူလိုင် ၂၂ ရက်နေ့မှစပြီး ကျောင်းအပ်နှံမှု စတင်လက်ခံနိုင်ရန် စီစဥ်ထားကြောင်း၊ ၂၅ ခုတင်ဆံ့ နောင်ချိုမြို့နယ် ပြည်သူ့ဆေးရုံကိုလည်း ပြည်လည်ပြုပြင်မည်ဖြစ်ကြောင်း၊ နောင်ချိုမြို့နှင့်အနီး ရှိ ကျေးရွာများ အစိုးရ အုပ်ချုပ်မှုယန္တရားလည်ပတ်နိုင်ရေးအတွက် လုံခြုံရေးနှင့် တရားဥပဒေစိုးမိုးရေး အပြည့်အဝရရှိရန် ဆောင်ရွက်သွားမှာဖြစ်တယ်လို့ ဆိုပါတယ်။

ယခုနှစ် ဒီဇင်ဘာလမှာ ကျင်းပမယ့် ရွေးကောက်ပွဲကို အောင်မြင်စွာ ကျင်းပသွားမှာြဖစ်လို့ မဲပေးပိုင်ခွင့် ရှိတဲ့ မည်သူမဆို ပါဝင်မဲပေးခွင့်ရရှိရန်အတွက် နိုင်ငံသားစိစစ်ရေးကတ်ပြားနဲ့ အိမ်ထောင်စုစာရင်းများ အကြောင်းအမျိုးမျိုးကြောင့် ပျောက်ဆုံးခဲ့လျှင် သက်ဆိုင်ရာဝန်ကြီးဌာနမှ ဝန်ထမ်းများက အမြန်ဆုံး ပြန်လည်ပြုလုပ်ပေးသွားမယ်လို့ ပြောပါတယ်။

မိမိမြို့/ရွာကို မိမိတို့က ပြန်လည်တည်ဆောက်ရမှာဖြစ်သဖြင့် အကြမ်းဖက်သောင်းကျန်းသူများ ယာယီ ထိန်းချုပ်ထားစဉ် ဖျက်ဆီးခဲ့တဲ့ နေအိမ်များ၊ ရုံးဌာန အဆောက်အအုံများနဲ့ လမ်းတံတားများ အမြန်ဆုံး ပြန်လည်ပြုပြင်ခြင်းလုပ်ငန်းများ ဆောင်ရွက်နိုင်ရန်အတွက် တစ်ပိုင်တစ်နိုင် ဆောင်ရွက်ခြင်းအပြင် ဌာနဆိုင်ရာ တာဝန်ရှိသူများနှင့် ဝိုင်းဝန်းပူးပေါင်းဆောင်ရွက်သွားကြရန်လိုတယ်လို့ ဒုစစ်ခေါင်းဆောင် စိုးဝင်းက ပြောပါတယ်။

21/07/2025

ပင်းတယ- ရွာငံလမ်းတွင် ကားတစ်စီးချောက်ထဲ ပြုတ်ကျ ပြီး လူ ၃ ဦးထိခိုက်ဒဏ်ရာရ

21 July 2025

သျှမ်းပြည်တောင်ပိုင်း ၊ ရွာငံမြို့နယ် ပင်းတယ - တောင်ပေါ်ကြီး - ရွာငံ လမ်း ၊ ဝါးပိုးရေကျေးရွာ အနီးမှာ ဇွန်လိုင်လ ၂၀ ရက်နေ့က ကားတစ်စီးချောက်ထဲ ပြုတ်ကျခဲ့ပြီး လူ ၃ ဦးထိခိုက်ဒဏ်ရာ ရရှိခဲ့ကြောင်း သိရသည် ။

" မိထ္ထီလာကနေ ပင်းတယကို လာလည်ကြတာ၊ လာ
လည်ပြီး မိတ္ထီလာကိုအပြန် မှာဖြစ်တာ လူသေတာတွေတော့ မရှိဘူး ၃ ဦးထိခိုက်ဒဏ်ရာရရတယ် " ဟု ကူညီကယ်ဆယ်ပေးသူတစ်ဦးက ပြောသည် ။

ယာဥ်ပေါ်တွင်လိုက်ပါလာ သောခရီးသည် ၈ ဦးနက် အမျိုးသား ၂ ဦးနှင့် အမျိုး သမီးတစ်ဦး ထိခိုက်ဒဏ်ရာရရှိခဲ့တယ်လို့ အခင်းဖြစ်ပွားရာနေရာကို သွားရောက်ကူညီကယ်ဆယ်ရေး ပြုလုပ်ခဲ့တဲ့ မြန်မာနိုင်ငံ လူမှုကယ်ဆယ်ရေးအဖွဲ့-ရွာငံမြို့ ထံမှ သိရသည် ။

" အဲဒီ လမ်းကြောင်းက မကျွမ်းကျင်ရင်အခုလိုမိုးရွာတဲ့ကာလမှာမမောင်းသင့်ပါဘူး ၊ လမ်းကြောင်းအနေအ ထားမသိခြင်းကြောင့်လို့ကောက်ချက်ချမိတယ် အကွေ့တိုင်းအန္တရာယ်များတယ် ဂီယာအချိန်းအပြောင်းမလျင်ရင် မလွယ်ဘူး အော်တိုကားတွေ ဂီယာအချိန်းအပြောင်းမလျင်ရင် ပိုသတိထားမောင်းသင့်တယ် " ဟု ရွာငံဒေသခံတစ်ဦးကပြောသည် ။

ထိခိုက်ဒဏ်ရာရရှိသူ ၃ ဦးကို ရွာငံမြို့နယ် မြိုင်တိုက်နယ်ဆေးရုံအရေးပေါ်ဋ္ဌာနကတစ်ဆင့် မန္တလေးဆေးရုံကြီးသို့လွှဲပြောင်းဆေးကုသမှုခံယူရန် မြန်မာနိုင်ငံ လူမှုကယ်ဆယ်ရေးအဖွဲ့-ရွာငံ ကကူညီပို့ဆောင်ပေးခဲ့ ကြောင်း သိရသည် ။

20/07/2025

စစ်ကောင်စီတပ်က လက်နက်ကြီးနဲ့ ပစ်ခတ်လို့ ဖယ်ခုံအင်းအရှေ့ဘက်ရွာမှ အရပ်သားပြည်သူ ၅ ဦးသေဆုံးပြီး ၇ ဦး ထိခိုက်ဒဏ်ရာရ

20 July 2025

ပြီးခဲ့တဲ့ ဇူလိုင်လ ၁၈ ရက်နေ့ နေ့လည် ၁၂ နာရီ ဝန်းကျင်အချိန်မှာ စစ်ကောင်စီတပ်က ဖယ်ခုံအင်း အရှေ့ဘက်ကမ်းရှိ လူနေကျေးရွာ ၆ ရွာဖက်သို့ တာဝေးပစ် လက်နက်ကြီးများဖြင့် ပစ်ခတ်တာကြောင့် အရပ်သားပြည်သူ ၅ ဦး သေဆုံးပြီး ၇ ဦး ထိခိုက်ဒဏ်ရာ ရတယ်လို့ ကရင်နီအမျိုးသားများ ကာကွယ်ရေးတပ် KNDF က ထုတ်ပြန်ထားပါတယ်။

ဖယ်ခုံအင်းအရှေ့ဘက်ကမ်းရှိ ကျေးရွာတွေကို လွိုင်ကော်မြို့၊ လွိုင်လင်လေးမြို့ နဲ့ မိုးဗြဲမြို့တို့မှာ အခြေစိုက်ထားတဲ့ စစ်ကောင်စီ အမြောက်တပ်များက လက်နက်ကြီးများဖြင့် အကြောင်းမဲ့ ပစ်ခတ်တိုက်ခိုက်ခဲ့တယ်လို့ ဆိုပါတယ်။

စစ်ကောင်စီရဲ့ လက်နက်ကြီး ပစ်ခတ်မှုကြောင့် အမျိုးသမီး ၂ ဦးနဲ့ အမျိုးသား ၃ ဦး သေဆုံးပြီး ၇ ဦးခန့် ထိခိုက်ဒဏ်ရာများရရှိကာ နေအိမ်နဲ့ ဘာသာရေးအဆောက်အအုံအချို့ ထိခိုက်ပျက်စီးမှုများရှိတယ်လို့ ဖော်ပြထားပါတယ်။

လွိုင်ကော်- ကုန်းသာ - မိုးဗြဲလမ်းမကြီး တစ်လျှောက်မှာ စစ်ကောင်စီတပ်နဲ့ တော်လှန်ရေးတပ်များ အကြား ထိတွေ့တိုက်ပွဲများ ဖြစ်ပွားနေဆဲဖြစ်တာကြောင့် ပြည်သူလူထုအနေနဲ့ စစ်ရေးအသိ သတိဖြင့် လုံခြုံရေးအထူးသတိပြု နေထိုင်သွားလာကြရန်လည်း KNDF က တိုက်တွန်းထားပါတယ်။

Photo – KNDF

16/07/2025

စစ်ကောင်စီက နောင်ချိုမြို့ကို ပြန်လည်ထိန်းချုပ်နိုင်ပြီဟု ဓါတ်ပုံနှင့်တကွထုတ်ပြန်လာ

နောင်ချိုမြို့မှာ တိုက်ပွဲများ ဆက်လက်ပြင်းထန်နေမယ်လို့ TNLA ကဆို

16 July 2025

TNLA တိုက်ခိုက်သိမ်းပိုက်ထားတဲ့ နောင်ချိုမြို့ကို စစ်ကောင်စီက ထိုးစစ်ဆင် တိုက်ခိုက်မှုကြောင့် မြို့ကို ပြန် လည်ထိန်းချုပ်နိုင်ပြီလို့ စစ်ကောင်စီထောက်ခံ တယ်လီဂရမ်ချန်နယ် ကနေ ဓါတ်ပုံနဲ့တကွ ယမန်နေ့က ဖော်ပြလာပြီး‌နောက် နောင်ချိုမြို့မှာ တိုက်ပွဲများ ဆက်လက်ပြင်းထန်နေမယ်လို့ TNLA က ယနေ့ ညနေပိုင်းမှာ ထုတ်ပြန်လာပါတယ်။

နောင်ချိုမြို့ပေါ်ရှိ ဌာနဆိုင်ရာရုံးများ၊ ဘဏ်များ၊ မြို့မစျေးနဲ့ မြို့ပေါ်စာသင်ကျောင်းတို့မှာ စစ်ကောင်စီက ဝင်ရောက်နေရာယူ ထိန်းချုပ်လိုက်တာဖြစ်တယ်လို့ သိရပါတယ်။

နောင်ချိုမြို့ တိုက်ပွဲအခြေအနေများနဲ့ ပတ်သက်ပြီး TNLA က မေလတွင် စတင်ခဲ့တဲ့ စစ်ကောင်စီတပ်၏ ပြင်းထန်သည့် ထိုးစစ်ဆင်မှုကြောင့် တိုက်ပွဲများ ပြင်း ထန်စွာ ဖြစ်ပွားနေရပြီး မြို့စီမံအုပ်ချုပ်ရေး လုပ်ငန်းများ ဆက်လက်ဆောင်ရွက်ရန် ခက်ခဲလာသည့်အတွက် ဇူလိုင်လ(၁၅)ရက်နေ့တွင် PSLF/TNLA အနေဖြင့် နောင်ချိုမြို့ပေါ်ရှိ အရပ်ဖက်ဆိုင်ရာစီမံအုပ်ချုပ်မှုရုံးလုပ်ငန်းများကို အခြားလုံခြုံသည့် နေရာသို့ပြောင်းရွေ့ကာ လူထုဝန်ဆောင်မှုလုပ်ငန်းများ ဆက်လက်ဆောင်ရွက် နိုင်ရန် ပြုလုပ်ထားတယ် လို့ ဆိုပါတယ်။

ဒါ့အပြင် နောင်ချိုမြို့မှာ တိုက်ပွဲများဆက်လက်ပြင်းထန်နေမည်ဖြစ်တာကြောင့် တိုက်ပွဲကြားတွင် ပြည်သူထုလူများ ကြားညှပ်မပိတ်မိစေရန် လုံခြုံရေးသတိ ထားပြီး နေထိုင်သွားလာကြရန် TNLA က သတိပေးထားပါတယ်။

နောင်ချိုဒေသမှာ စစ်ကောင်စီတပ်နှင့် တအာင်းတပ်မတော် TNLA တို့အကြား ၂၀၂၅ခုနှစ် မေလမှ ဇူလိုင်လ (၁၅)ရက်နေ့အထိ တိုက်ပွဲဖြစ်ပွားမှု ၃၁၉ ကြိမ် အထိဖြစ်ပွားခဲ့ပြီး တိုက်ပွဲကာလအတွင်း စစ်ကောင်စီ တပ်မှ လေကြောင်းတိုက်ခိုက်မှု (၁၀၆)ကြိမ်၊ ဒရုန်းတိုက်ခိုက်မှု(၁၆၂)ကြိမ်၊ လက်နက်ကြီး ပစ်ခတ်မှု (၄၆၉၂)ကြိမ်နဲ့ အဆိပ်ငွေ့ဗုံးဖြင့် တိုက်ခိုက်မှု(၁၈၆) ကြိမ်တို့ ပြုလုပ်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

သျှမ်းပြည်မြောက်ပိုင်း နောင်ချိုမြို့ကို လက်လွတ်မှာ မဟုတ်ဘူး၊ ခုခံကာကွယ်ဖို့အတွက် အကောင်းဆုံး ပြင်ဆင်ထားတယ်လို့ TNLA ပြောရေးဆိုခွင့်ရှိသူ လွေးယေဦးက ပြီးခဲ့တဲ့ ဇူလိုင်လ ၅ ရက်က ပြုလုပ်တဲ့ သတင်းစာရှင်းလင်းပွဲမှာ ပြောဆိုထားပါတယ်။

13/07/2025

ကျောက်မဲမြို့ကို စစ်ကောင်စီမှ လေကြောင်းဖြင့် ဗုံး ၃လုံး ထပ်မံကြဲချ လူထိခိုက်မှုရှိတယ်လို့ဆို

13 July 2025

သျှမ်းပြည်နယ်မြောက်ပိုင်း၊ ကျောက်မဲမြို့ကို စစ်ကောင်စီတပ်မှ ယနေ့ ဇူလိုင်လ ၁၃ ရက် နံနက် ၆ နာရီကျော်အချိန်တွင် လေကြောင်းနဲ့ ဗုံး ၃လုံး ထပ်မံလာရောက်ကြဲချတိုက်ခိုက်ခဲ့တယ်လို့ သိရပါတယ်။

ဗုံးကြဲမှုကြောင့် ကျောက်မဲမြို့ ပိန္နဲကုန်းမှာ ကျရောက်ပေါက်ကွဲပြီး လူထိခိုက်မှုရှိကာ နေအိမ်အဆောက် အဦများလည်း ထိခိုက်ပျက်စီးတယ်လို့ ကနဦး သိရပါတယ်။

“ ပိန္နဲကုန်း က ဝါဆိုကျောင်းအနီးမှာ ကျရောက်ပေါက်ကွဲတာ၊ လူထိခိုက်မှုတော့ရှိပေမယ့် အသေးစိတ်တော့ မသိရသေးဘူး၊ နေအိမ်တွေလည်း ပျက်စီးသွားတယ်” လို့ ဒေသခံသတင်းရင်းမြစ် ထံမှ သိရပါတယ်။

ပြီးခဲ့တဲ့ ဇူလိုင်လ ၁၁ ရက်ကလည်း ကျောက်မဲမြို့ရှိ ကော်လီဟိုတယ်၊ မြို့မရဲစခန်းနဲ့ ခရိုင်ရဲရုံးဘက်မှာ လေကြောင်းနဲ့ ဗုံး ၃ လုံးလာရောက်ကြဲချတာကြောင့် အမျိုးသား ၁ ဦး သေဆုံးပြီး ပြည်သူ ၅ ဦး ထိခိုက်ဒဏ်ရာရရှိကာ နေအိမ်အဆောက်အဦများလည်း ထိခိုက်ပျက်စီးခဲ့တယ်လို့ TNLA က ထုတ်ပြန်ထားပါတယ်။

Photo - Goung Sar RK

11/07/2025

မောက်မယ်မြို့ USDP ဥက္ကဋ္ဌ လုပ်ကြံပစ်သတ်ခံရ

11 July 2025

သျှမ်းပြည်နယ်တောင်ပိုင်း၊ လင်းခေးခရိုင်၊ မောက်မယ်မြို့နယ်က USDP ဥက္ကဋ္ဌ ဦးစိုင်းငေါင်းဆိုင်ဟိန်း သည် ယနေ့ ဇူလိုင်လ ၁၁ ရက် နံနက်ပိုင်း ၉ နာရီအချိန်မှာ လုပ်ကြံပစ်သတ်ခံရတယ်လို့ ကြံဖွံ့ပါတီရဲ့ သတင်းရင်းမြစ်ထံမှ သိရပါတယ်။

မောက်မယ်မြို့ ကြံ့ဖွံ့ပါတီရဲ့ ဥက္ကဋ္ဌလည်းဖြစ် ပြည်သူ့လွှတ်တော်ကိုယ်စားလှယ်ဟောင်းလည်းဖြစ်တဲ့ ဦးစိုင်းငေါင်းဆိုင်ဟိန်း ဟာ ၎င်းတောင်ယာခြံအတွင်း လုပ်ငန်းလုပ်ကိုင်နေစဥ် လုပ်ကြံပစ်ခတ်ခံရသဖြင့် အခင်းဖြစ်ပွားရာနေရာမှာ သေဆုံးသွားတယ်လို့ သိရပါတယ်။

ကြံ့ဖွံ့အမတ်ဟောင်း သေဆုံးသွားတာနဲ့ ပတ်သက်ပြီး မည်သူမည်ဝါ လုပ်ကြံသွားတယ်ဆိုတာကိုတော့ မသိရသေးပါဘူး။

ဦးစိုင်းငေါင်းဆိုင်ဟိန်းသည် ၂၀၁၀၊ ၂၀၁၅ နဲ့ ၂၀၂၀ ရွေးကောက်ပွဲတွေမှာ ၃ ကြိမ်လုံး အနိုင်ရထားတဲ့ အမတ်တစ်ဦးဖြစ်တယ်လို့လည်း သိရပါတယ်။

10/07/2025

ဝါဆိုလပြည့်နေ့ညက စစ်ကောင်စီတပ်မှ လေကြောင်းဖြင့် ကရင်နီဒေသနဲ့ မိုးကုတ်မြို့တို့ကို တစ်ချိန်တည်း ဗုံးကျဲချတာကြောင့် ကလေးငယ် အပါအဝင် ပြည်သူ ၈ ဦး သေဆုံးပြီး နေအိမ်အချို့နဲ့ ခရစ်ယာန်ဘုရားကျောင်း ထိခိုက်ပျက်စီး

10 July 2025

ဝါဆိုလပြည့်နေ့ညက စစ်ကောင်စီတပ်မှ လေကြောင်းဖြင့် ကရင်နီဒေသနဲ့ မိုးကုတ်မြို့တို့ကို တစ်ချိန်တည်း ဗုံးကျဲချတာကြောင့် ကလေးငယ် အပါအဝင် ပြည်သူ ၈ ဦး သေဆုံးပြီး နေအိမ်အချို့နဲ့ ခရစ်ယာန်ဘုရားကျောင်း ထိခိုက်ပျက်စီးခဲ့တယ်လို့ သိရပါတယ်။

ယမန်နေ့ ဇူလိုင်လ ၉ ရက် ည ၇ နာရီ ၃၀ မိနစ်အချိန်ခန့်က စစ်ကောင်စီတပ်မှ ကရင်နီပြည်၊ ဖားဆောင်းမြို့နယ်၊ မော်ချီးဒေသ၊ လိုလော်တီးရွာဘက်သို့ လေယာဉ်ဖြင့် ဗုံးကျဲချမှုကြောင့် ကလေးငယ် ၂ ဦးအပါအဝင် မိသားစုဝင် ၆ ဦး သေဆုံးသွားပြီး နေအိမ်နဲ့ ခရစ်ယာန်ဘုရားကျောင်း ထိခိုက် ပျက်စီးခဲ့တယ်လို့ ဒေသတွင်း သတင်းရင်းမြစ်ထံမှ သိရပါတယ်။

အလားတူ ဇူလိုင်လ ၉ ရက်နေ့ ည ၈ နာရီဝန်းကျင်အချိန်တွင် မိုးကုတ်မြို့ အရှေ့ပိုင်း၊ တောင်ကချင်ရပ်ကွက်၊ ပန်းမထိပ်ဘက်ခြမ်း ကုလားခြံထဲအတွင်းသို့ ပေါင် ၃၀၀ ဗုံး ၁ လုံးကျဲချ မှုကြောင့် အသက် ၁၂ နှစ်အရွယ်ရှိ ကလေးငယ် ၂ ဦး သေဆုံးပြီး ဒေသခံပြည်သူ ၅ ဦး ပြင်းထန် ဒဏ်ရာရရှိခဲ့ကာ နေအိမ် ၁၀ လုံးထက်မနည်း ဗုံးစထိမှန်ပြီး ပျက်စီးသွားတယ်လို့ စုံစမ်းသိရပါတယ်။

စစ်ကောင်စီသည် အရပ်သားပြည်သူများရှိရာနေရာသို့ ဦးတည်ပစ်မှတ်ထားကာ လေယာဉ်ဖြင့် အကြိမ်ကြိမ် ဗုံးကျဲတိုက်ခိုက်ကာ ပြီးခဲ့တဲ့ ဇူလိုင်လ ၈ ရက်နေ့က မိုးကုတ်မြို့အနောက်ဘက်ခြမ်း ဂေါင်းဘာလျှို စာသင်ကျောင်းအနီးမှာ ပေါင် ၅၀၀ ဗုံး ၁ လုံးကျဲချသွားခဲ့ပြီး ဗုံးကျဲချမှုကြောင့် ပြည်သူ ၃ ဦးသေဆုံးကာ ပြည်သူအများအပြား ထိခိုက်ဒဏ်ရာရှိခဲ့ပါတယ်။

အလားတူ ပြီးခဲ့တဲ့ ဇွန်လ ၂၅ ရက်နေ့ကလည်း ကရင်နီပြည်၊ ဖားဆောင်မြို့နယ်၊ မော်ချီးဒေသဘက်ရှိ တောင်ပေါ်ရွာသို့ လေကြောင်းဖြင့် ဗုံးကျဲချတာကြောင့် ဒေသခံပြည်သူ ၈ ဦးသေဆုံးကာ ၇ ဦး ထိခိုက်ဒဏ်ရာရရှိခဲ့တယ်လို့ သိရပါတယ်။

08/07/2025

ကျောက်မဲမြို့နှင့် မိုးကုတ်မြို့ကို စစ်ကောင်စီတပ်မှ လေကြောင်းနဲ့ ဗုံးကြဲချတိုက်ခိုက် လူထိခိုက်မှုရှိသည်ဟုသိရ

8 July 2025

ယနေ့ ဇူလိုင်လ ၈ ရက် နံနက် ၉ နာရီ၀န်ကျင် အချိန်မှာ ကျောက်မဲမြို့နှင့် မိုးကုတ်မြို့ အနောက်ပိုင်:ကို စစ်ကောင်စီတပ်မှ လေကြောင်းနဲ့ တစ်ပြိုင်နက်တည်း ဗုံးကြဲချတိုက်ခိုက်ခဲ့တယ်လို့ သိရပါတယ်။

“ငြိမ်းချမ်းရေးကုန်းနားက ဘိုးဘွားရိပ်သာ နောက်ကျောဘက်က တစ်လုံးကျတယ်၊ လူထိခိုက်မှုတော့ အတိအကျမသိရသေးဘူးလို့ “ ကျောက်မဲဒေသခံတစ်ဦးက ပြောပါတယ်။

အလားတူ မိုးကုတ်မြို့ကို စစ်ကောင်စီက ယနေ့ နံနက် ၉ နာရီ ၁၀ မိနစ်ခန့်အချိန်မှာ ဂျက်ဖိုက်တာနဲ့ ဗုံးကြဲတိုက်ခိုက်လို့ အနောက်ပိုင်းရပ်က ဂေါင်းဦးဘာလျှိုထဲ ကျရောက်ပေါက်ကွဲကာ လူထိခိုက် သေဆုံးမှုရှိသလို နေအိမ်အဆောက်အဦးများလည်း ထိခိုက်ပျက်စီးခဲ့တယ်လို့ မိုးကုတ်ဒေသတွင်း သတင်းရင်းမြစ်ထံမှ သိရပါတယ်။

ဗုံးကြဲတိုက်ခိုက်မှုကြောင့် ထိခိုက်သေဆုံးမှု အသေးစိတ်ကိုတော့ Hsan Loi Voice အနေနဲ့ ဆက်လက် စုံးစမ်းနေဆဲဖြစ်ပါတယ်။

Crd - video

Hsan Loi Voice

26/07/2025

26/07/2025

24/07/2025

22/07/2025

22/07/2025

21/07/2025

20/07/2025

16/07/2025

13/07/2025

11/07/2025

10/07/2025

08/07/2025

Address

Telephone

Website

Alerts

Contact The Business

Shortcuts

Share