เว็บไซต์คืออะไร?

https://www.facebook.com/114626274899406/

Naga News, Chiang Mai (2025)

08/08/2025

နန်းယွန်း-ပန်ဆောင် ကြား လမ်းအပျက်အစီးကြောင့် အသွားအလာခက်ခဲနေပြီး အရေးပေါ်ကျန်းမာရေးကိစ္စတွေနဲ့ အခြေခံ ကုန်ပစ္စည်း တင်ပို့ရေး ကိစ္စတွေမှာ အခက်အခဲ ကြုံနေကြရတာ ၃ လ နီးပါး ရှိလာ

ဩဂုတ်လ ၈ ရက် ၂၀၂၅
Naga News

နာဂဒေသ၊ နန်းယွန်းမြို့နယ်ရှိ နန်းယွန်း-ပန်ဆောင် ကြား လမ်းပိုင်းနေရာအများစု မြေပြိုပျက်စီးမှုတွေကြောင့် ဒေသခံပြည်သူများ ခရီးသွားလာရေး ခက်ခဲကြန့်ကြာမှုတွေနဲ့ ကြုံတွေ့နေကြရတာ ၃ လနီးပါးရှိလာပြီလို့ ဒေသခံများက ပြောပါတယ်။ ပြီးခဲ့တဲ့ မေလ မိုးသည်းထန်စွာ ရွာသွန်းခဲ့ပြီးနောက် နန်းယွန်း-ပန်ဆောင်လမ်းပိုင်းနေရာအတော်များများ မြေပြိုမှုကြောင့် လမ်းပျက်စီးမှုကြီးကြီးမားမားဖြစ်ခဲ့ပြီးကတည်းက သွားလာရေး ခက်ခဲနေကြောင်း ယခင်ကလည်း လမ်းပန်းဆက်သွယ်ရေး ခက်ခဲတဲ့ဒေသဖြစ်တဲ့အပြင် လက်ရှိအချိန်မှာ ကုန်ပစ္စည်းတင်ပို့ရေးနဲ့ အထူးသဖြင့် ကျန်းမာရေးကိစ္စတွေမှာ ခက်ခဲလာတယ် လို့ ပန်ဆောင်ဒေသနေသူ တစ်ဦး က Naga News ကို ပြောပါတယ်။

“မေလ လဆန်းပိုင်းမှာ မိုးကြီးတာကြောင့် ပြိုခဲ့တာ ဟုတ်တယ်။ လမ်းမြေပြိုမှုကြောင့်မလို့ ကားလမ်းပျက်သွားတယ်။ ကားလမ်းပျက်သွားတော့ ကားတွေ သွားလာမရတဲ့အခါကျတော့ ဒေသခံတွေအတွက်တော့ ဆိုင်ကယ်နဲ့ သွားလာရတယ်။ ဆိုင်ကယ်နဲ့ သွားလာရတော့ အဓိက ကတော့ ကုန်ဈေးနှုန်းပေါ့ဗျာ။ ဆိုင်ကယ်နဲ့ သယ်ရတဲ့အခါမှာ ကယ်ရီခ များတဲ့အခါမှာ ကုန်ဈေးနှုန်းတွေကြီးတယ်။ ပြီးကျတော့ အဓိက ကျနော်တို့ ဒီ နန်းယွန်းဆေးရုံကိုမှီခိုအားထားရတယ်။ လမ်းပျက်တဲ့အခါကျတော့ ကျန်းမာရေးကိစ္စတွေ အခက်အခဲ ဖြစ်လာတယ်။ အခု လတ်တလောမှာတော့ ကျနော်တို့ ဒေသအာဏာပိုင်တွေက ဆောင်ရွက်ပေးလို့ ရဲဘော်လူနာဆိုရင်တော့ အိန္ဒိယဖက်ခြမ်းကို သွားရောက်ကုသမှုတော့ ရှိတယ်။ သို့သော်ငြားလည်း နိုင်ငံခြားမှာ ဖြစ်တဲ့ အတွက်ကြောင့်မလို့ ကိုယ့်နိုင်ငံမှာသွားသလောက်တော့ အဆင်မပြေမှုတွေ၊ မချောမွေ့မှုတွေ ရှိတယ်။ ပြီးကျတော့ အဓိက ဘာသာစကား အခက်အခဲတွေလည်း ရှိတယ်” လို့ ပြောပါတယ်။

ကား အသွားအလာ ခက်ခဲတာကြောင့် ဆိုင်ကယ်ဖြင့်သာ ခရီးသွားလာရာမှာ နန်းယွန်း-ပန်ဆောင်ကြား ခရီးသည်တစ်ဦး ဆိုင်ကယ်ကယ်ရီခ ကျပ်ငွေ ၂ သိန်းကျော်အထိ ရှိကြောင်း၊ ကုန်စျေးနှုန်း အဆမတန် မြင့်တက်လာမှုကိုလည်း တစ်နှစ်ထက် တစ်နှစ်ကြုံကြရကြောင်း၊ လူမှုကိစ္စ အဝဝ မှာ ပိုမိုခက်ခဲလာကြောင်း ယင်းဒေသခံက ဖြည့်စွက် ဖြေကြားထားပါတယ်။

ပန်ဆောင်မြို့ဟာ နန်းယွန်းမြို့နယ်အတွင်းရှိ နာဂဒေသ ဖြစ်တဲ့အပြင် အိန္ဒိယနယ်စပ်မြို့ တစ်မြို့လည်း ဖြစ်ပါတယ်။ အာဏာသိမ်းပြီးနောက် နယ်စပ်ဖြတ်သန်းသွားလာရေး တင်းကြပ်မှုတွေလည်း ယခင်ကထက် ကြုံတွေ့နေကြရတာလည်း ဖြစ်ပါတယ်။

06/08/2025

Cloudburst ခေါ် ရုတ်တရက် မိုး ပြင်းထန်စွာရွာချမှု ဖြစ်ပေါ်ခြင်း

ဩဂုတ်လ ၆ ရက် ၂၀၂၅
Naga News

Cloudburst လို့ခေါ်တဲ့ တချိန်တည်းမှာ မိုးပြင်းထန်စွာ ရွာသွန်းမှု ဆိုတာဟာ မိုးတိမ်ထဲမှာ ရေငွေ့တွေစုလာပြီး စိုစွတ်မှုထပ်မံ မထိန်းထားနိုင်တဲ့ တိမ်တိုက်ဟာ ရုတ်တရက် ပြင်းထန်တဲ့ မိုးရွာသွန်းမှုအဖြစ် ပြောင်းလဲဖြစ်ပေါ်စေတာ ဖြစ်ပါတယ်။ အထူးသဖြင့် ပူနွေးတဲ့လေထုဟာ မြင့်တက်လာပြီး အမြင့်ပိုင်းက အေးတဲ့လေထုနဲ့ တွေ့တဲ့အခါ မိုးတိမ်ထဲမှာ စိုစွတ်မှုကို ဖြစ်ပေါ်စေတတ်ပါတယ်။ ရေငွေ့ပါဝင်မှုများလာတဲ့အမျှ စိုစွတ်မှု လွန်ကဲခြင်းကို မထိန်းနိုင်တော့ပဲ မိုးတိမ်ကနေ တပိုင်းတည်း မိုးရေသွန်ချသလို ဖြစ်တာကြောင့် သာမန် မိုးရွာသွန်းမှုထက် ပိုသည်းထန်တဲ့မိုးရေချိန်ကို ဖြစ်ပေါ်စေပါတယ်။

ဒါကြောင့် Cloudburst လို့ သိကြတဲ့ ရုတ်တရက် မိုးပြင်းရွာချမှုဟာ ရေကြီးမှုကို မိနစ်ပိုင်းအတွင်းဖြစ်ပေါ်စေကာ မြေပြိုမှုဘေးအန္တရာယ်ကိုပါနောက်ဆက်တွဲတွေ့ကြုံရတတ်ပါတယ်။ အထူးသဖြင့် ယခုလို သဘာဝဘေးမျိုးဟာ မိုးများတဲ့ ကုန်းမြင့်ဒေသမှာ တွေ့ရတတ်ပြီး မြေမျက်နှာသွင်ပြင်အရ တောင်ကျရေတွေကို အရှိန်အဟုန် စီးဆင်းစေနိုင်တဲ့ တောင်စောင်း၊ ကုန်းမြင့်တွေကြောင့် ရုတ်ရက် တောင်ကျရေလျှံခြင်းနဲ့ မြေပြိုတဲ့ ဒဏ်တွေကို ပြင်းထန်စွာ ခံစားနိုင်ချေ များတာ ဖြစ်ပါတယ်။ အခြားသက်ရောက်မှုတွေ ဖြစ်တဲ့ သစ်တောတွေပြုန်းတီးလာခြင်း၊ မြေယာ အသုံးချမှု စနစ်တကျ မရှိခြင်းတို့ဟာလည်း အခုလို သဘာဝဘေးတွေကို အကာအကွယ်မဲ့ တွေ့ကြုံစေကြရတဲ့ အကြောင်းတရားတွေ ဖြစ်ပါတယ်။

ရာသီဥတုပြောင်းလဲမှုရဲ့ လက္ခဏာဖြစ်တဲ့ အပူချိန်မြင့်တက်လာမှုဟာလည်း အခုလို သဘာဝဘေးဖြစ်ပေါ်ခြင်းနဲ့ တိုက်ရိုက်သက်ရောက်မှု မရှိပေမယ့် ဆက်နွယ်မှုရှိနေတာ ဖြစ်ပါတယ်။ အပူချိန်မြင့်တက်မှုကြောင့် လေထုထဲမှာ စိုစွတ်မှုကိုပိုမို ဖြစ်ပေါ်စေနိုင်ပြီး အခုလို သဘာဝဘေးကို ဖန်တီးဖြစ်ပေါ်စေတာပဲ ဖြစ်ပါတယ်။ ကုန်းမြင့်နေ ဒေသခံတွေအနေဲ့ မိုးများတဲ့ကာလမှာ အထူးသတိရှိသင့်တာ ဖြစ်ပါတယ်။

06/08/2025

သံတောင်ကြီးမှာ တောင်ကျရေကြောင့် ဆိုးရွားတဲ့မြေပြိုမှု ဖြစ်ပွါးပြီး လူအသေအပျောက်တိုးနေ

ဩဂုတ်လ ၆ ရက် ၂၀၂၅
Naga News

ကရင်ပြည်နယ် ၊သံတောင်ကြီးမြို့နယ်မှာ တောင်ကျရေကြာင့် ဆိုးရွားတဲ့မြေပြိုမှုဖြစ်ပွါးခဲ့ကာ ဒီကနေ့မနက်အထိ သေဆုံးသူ ဦးရေ ၈ ဦး အထိ တိုးလာတယ် လို့ လူမှုကွန်ယက်စာမျက်နှာပေါ်က တဆင့် သိရပါတယ်။ တောင်ကျရေအရှိန်ကြောင့် မြေပြိုမှုနဲ့အတူ ရေကြီးမှုပါတဆက်တည်း ကြုံနေကြရပြီး အချို့ကျေးရွာများ ရွာလုံးကျွတ် ဘေးလွတ်ရာကို တိမ်းရှောင်နေကြရတယ် လို့ သိရပါတယ်။ မြေပြိုကျမှုကြောင့် သံတောင်ကြီးမြို့မှာ နေအိမ်အများအပြားပျက်စီးကာ ဒီကနေ့မနက်က စပြီး တောင်ငူ-သံတောင်ကြီးလမ်းလည်း ပိတ်ထားရကြောင်း၊ ကျေးရွာချင်းဆက်လမ်း အများအပြားလည်း ပျက်စီးကာ သွားလာရေး ခက်ခဲနေကြောင်း လို့ သိရပါတယ်။

ဓာတ်ပုံ - လူမှုကွန်ယက်

05/08/2025

အိန္ဒိယ မြောက်ပိုင်း Uttarkashi ခရိုင် Dharali ကျေးရွာမှာ အလွန်ပြင်းထန်တဲ့ မိုးရွာသွန်းမှုကြောင့် ရုတ်တရက် တောင်ပြိုကျမှု ဖြစ်ပေါ်ခဲ့

ဩဂုတ်လ ၆ ရက် ၂၀၂၅
Naga News

အိန္ဒိယ နိုင်ငံ မြောက်ပိုင်း Uttarakhand ပြည်နယ် Uttarkashi ခရိုင်ရှိ ဟိမဝန္တာတောင်တန်းကျေးရွာ ဖြစ်တဲ့ Dharali မှာ သြဂုတ်လ ၅ရက်နေ့ မွန်းလွဲပိုင်းအချိန် ရုတ်တရက် မိုးသည်းထန်စွာရွာသွန်းခဲ့ပြီး ပြင်းထန်တဲ့မိုးရွာသွန်းမှုကြောင့် တောင်ပေါ်ကနေ ရေတွေတဟုန်ထိုးဆင်းလာကာ ရုတ်တရက် ပြင်းထန်တဲ့ မြေပြိုမှု ဖြစ်ပွါးခဲ့ပါတယ်။ မြေပြိုမှုကြောင့် နောက်ဆက်တွဲ ရေကြီးရေလျှံမှုဖြစ်ပွါးခဲ့ပြီး တခဏချင်းတွင်း ရွာအနှံ့ ရေလျှံကာ နေအိမ်အများအပြား နစ်မြုပ်ပျက်စီးသွားတယ် လို့ နိုင်ငံပိုင်သတင်းတွေမှာ ဖော်ပြထားပါတယ်။

ယင်း မြေပြိုမှုကြောင့် လူ ၄ ဦး သေဆုံးကာ ၅၀ ကျော် ပျောက်ဆုံးနေဆဲဖြစ်တယ်လို့ သိရပြီး အသက်ရှင်ကျန်ရစ်သူတွေကို ရှာဖွေကယ်ဆယ်နိုင်ရေး လုပ်ဆောင်လျက်ရှိတယ် လို့ ဆိုပါတယ်။

ပြည်နယ်တစ်ဝှမ်း အနီရောင်သတိပေးချက်ထုတ်ပြန်ထားပြီး၊ အရေးပါတဲ့ အဝေးပြေးလမ်းမကြီးအပါအဝင် ဆက်သွယ်ရေးလမ်းပေါင်း ၁၀၀ ကျော်ကိုလည်း ယာယီပိတ်ဆို့ထားရပြီး ခရိုင်မြို့အချို့မှာ စာသင်ကျောင်းတွေကိုလည်း ပိတ်ထားရတယ် လို့ သိရပါတယ်။

တိမ်ပြိုမိုးလို့ ခေါ်ကြတဲ့ အခုလို အလွန်ပြင်းထန်တဲ့ မိုးရွာသွန်းမှုမျိုးဟာ တစ်နာရီအတွင်း မိုးရေချိန် ၄ လက်မ (100 mm) ထက် ပိုတဲ့ မိုးရွာသွန်းမှု ဖြစ်ပါတယ်။

လက်ရှိ Uttarakhand မှာ ဖြစ်ပွါးခဲ့တဲ့ သဘာဝဘေးဟာ ၎င်းဒေသရဲ့ ဘူမိဗေဒဆိုင်ရာ ထိခိုက်လွယ်မှု အပါအဝင် ရာသီဥတုပြောင်းလဲမှုဆိုင်ရာ သက်ရောက်မှုကလည်း အကြောင်းရင်းတစ်ခု ဖြစ်နိုင်ပြီး စည်းကမ်းမဲ့ ခရီးသွားလုပ်ငန်းကဲ့သို့ ရေရှည်တည်တံ့မှု ထိခိုက်စေတဲ့ ဖွံ့ဖြိုးရေးလုပ်ငန်း အလေ့အကျင့် စတဲ့ အားနည်းချက် တွေကို မီးမောင်းထိုးပြလိုက်တာ ဖြစ်တယ် လို့ သုံးသပ်ဖော်ပြထားကြပါတယ်။

Video Credit

05/08/2025

ဩဂုတ်လ ၁၄ ရက်နေ့မတိုင်မီ ခန္တီး-ထန်ပါခွေ လမ်းပိုင်း ပျက်စီးနေတဲ့နေရာတွေကို အမြန်ဆုံး ပြုပြင်ကြဖို့ Ang Mai ဦးဆောင်တဲ့ NSCN-K အဖွဲ့က ကျေးရွာတွေကို နှိုးဆော်

ဩဂုတ်လ ၅ ရက် ၂၀၂၅
Naga News

Ang Mai ဦးဆောင်တဲ့ NSCN-K အဖွဲ့က ခန္တီး-ထန်ပါခွေ လမ်းပိုင်း ပျက်စီးနေတဲ့နေရာတွေကို အမြန်ဆုံးပြုပြင်ဖို့ Khiamniungan Region အတွင်းက ကျေးရွာတွေကို နှိုးဆော်ထားတာဖြစ်ပါတယ်။ ကျေးရွာချင်းဆက်လမ်း အများစုဟာ ဆက်သွယ်သွားလာရေးအတွက် ဆိုးရွားတဲ့အခြေအနေမှာ ရှိနေတာကြောင့် သြဂုတ်လ ၁၄ ရက်နေ့ Naga Independence Day မတိုင်ခင်မှာ အလျှင်အမြန်အရေးတကြီး ပြုပြင်ကြဖို့ နှိုးဆော်အသိပေးထားတာဖြစ်ပါတယ်။

နှိုးဆော်စာအရ သက်ဆိုင်ရာ ဒေသတွင်းက ကျေးရွာတွေနဲ့ မြို့တွေအနေနဲ့ ထန်ပါခွေကျေးရွာမှတဆင့် ဆင်သေ-တုံနုတ်ကျေးရွာများအထိ လမ်းအပျက်အစီးတွေကို တာဝန်ယူ ပြုပြင်ပေးရမယ်လို့ ဆိုထားပါတယ်။ လမ်းပြုပြင်ရေးလုပ်ငန်း ပြီးစီးတဲ့ ကျေးရွာတွေကို ချီးမြှင့်ငွေအနေနဲ့ ကျပ်ငွေ ၅ သိန်း ပေးအပ်သွားမယ်လို့လည်း ဖော်ပြထားပါတယ်။ ယခု အသိပေးညွှန်ကြားချက် လိုက်နာခြင်းမရှိတဲ့ ကျေးရွာတွေကို ဖြေရှင်းချက်တွေ တောင်းခံသွားမယ်လို ဆိုပြီး ဒဏ်ငွေ ကျပ် ဆယ်သိန်း ကိုလည်းပေးဆောင်စေမယ် လို့ ဖော်ပြပါတယ်။

ရွှေနဲ့ ကျောက်စိမ်းတူးဖော်ရေးလုပ်ငန်းလုပ်ကိုင်သူများအားလုံးအနေနဲ့လည်း ယခု လုပ်ငန်းစဉ်မှာ ပူးပေါင်းပါဝင် လုပ်ဆောင်ဖို့ တောင်းဆိုကြောင်း၊ မိမိတို့အနေဖြင့် ဒေသအတွင်း တည်ငြိမ်အေးချမ်းရေးနဲ့ ကျေးရွာဖွံ့ဖြိုးရေး အလေးပေးဆောင်ရွက်လျှက်ရှိကြောင်းတို့ကို ဖော်ပြထားပါတယ်။ ယခု နှိုးဆော်ချက်ဟာ Khiamniungan Region အတွင်းက ကျေးရွာတွေကို အသိပေးထားတာပဲ ဖြစ်ပါတယ်။

ဓာတ်ပုံ - Social Media

02/08/2025

ပန်ဆောင်မူကြိုကျောင်းမှာ စစ်ကောင်စီအဖွဲ့ တပ်ချထားခြင်းကိစ္စ ရေးသားပြောဆိုတာဟာ လုပ်ငန်းနှောင့်ယှက်မှု ဖြစ်လို့ ကန့်ကွက်ကြောင်း ပန်ဆောင် အုပ်ချုပ်ရေးမှူးက စာထုတ်ပြန်

ဩဂုတ်လ ၂ ရက် ၂၀၂၅
Naga News

ပန်ဆောင်မြို့က မူကြိုကျောင်းမှာ စစ်ကောင်စီ တပ်ဖွဲ့ဝင်တွေ နေရာယူတပ်ချထားတဲ့ကိစ္စ ရေးသားပြောဆိုမှုဟာ လုပ်ငန်းနှောက်ယှက်မှုဖြစ်လို့ ကန့်ကွက်ကြောင်း စစ်ကောင်စီ လက်အောက်ခံ အထွေထွေအုပ်ချုပ်ရေးအဖွဲ့၊ အုပ်ချုပ်ရေးမှူးမှ ထုတ်ပြန်ထားပါတယ်။ သူတို့ရဲ့ ထုတ်ပြန်ဖော်ပြချက်အရ မူကြိုကလေးများစာသင်ကြားရာ နေရာမှာ စစ်ကောင်စီ တပ်ဖွဲ့နေရာယူ တပ်ချထားသည်မှာ မှန်ကန်ကြောင်း ဖော်ပြထားပြီး နေရာအခက်အခဲအရဟု ပြောဆိုထားပါတယ်။ သူတို့ရဲ့ ရေးသားချက်အရ လက်ရှိ မူကြိုကျောင်းမှာ အခက်အခဲ မရှိဟု ပြောဆိုကြသူများမှာလည်း စစ်ကောင်စီအဖွဲ့ဝင်များနဲ့ ယင်းတို့ ခန့်အပ်ထားသည့် ဝန်ထမ်းများက ပြောဆိုထားကြောင်း တွေ့ရပါတယ်။

ယခုသတင်းအား မြေပြင်အခြေအနေနှင့်ကွဲလွဲစွာရေးသားဖော်ပြခြင်းဖြစ်သည်ဟုလည်း စစ်ကောင်စီကို အကာအကွယ်ပေးကာ ပြောဆိုထားပါတယ်။ ဒီထုတ်ပြန်ချက်နဲ့ ပတ်သက်ပြီး ကွဲလွဲမှု တစုံတရာ ရှိမရှိ Naga News က ဒေသ ပြည်သူနဲ့ ဆက်သွယ်မေးမြန်းရာမှာ ဒေသပြည်သူ ကလေးမိဘ အချို့က အခုလို ပြန်လည် တုံ့ပြန်ထားပါတယ်။

“ကလေးမိဘတွေဖက်ကပဲ ကျနော်တို့ကပြောတာပါ။ သူတို့အချင်းချင်းကတော့ အဆင်ပြေတယ်ပဲ ပြောကြမှာပဲလေ။ ကျနော်တို့က ကလေးတွေကျောင်းတက်တဲ့နေရာနဲ့ စစ်တပ်က တပ်ချထားတဲ့နေရာ တနေရာတည်း ဖြစ်နေတာ ကလေးတွေအတွက် မလုံခြုံတာကို ပြောနေတာပါ။ ခေတ်ကာလကလည်း ကောင်းနေတာ မဟုတ်ဘူး” လို့ ပြန်လည် ဖြေကြား ထားပါတယ်။

ထွေအုပ်အဖွဲ့က ပြန်လည်တုံ့ပြန် ပြောကြားထားတာကတော့ “နားလည်ပါတယ်။ လုံခြုံရေးကိစ္စ စိုးရိမ်တာမှန်ပါတယ်။ သို့ပေမဲ့ နေရာအဆောက်အဦးလိုအပ်ချက်အရ ညှိနိုင်းပြီး ယာယီဖွင့်လှစ်ထားတာမို့ပါ။ မူးယစ်သောက်စားတာတို့၊ ခလေးများမလွတ်မလပ်ဖြစ်တာတို့ လုံးဝမရှိပါဘူး။ သူတို့အဖွဲ့အစည်းအတွက် အခက်အခဲဖြစ်လာတော့ ညှိနှိုင်းဆောင်ရွက်လုပ်ကိုင်တဲ့နေရာမှာ စိတ်မကျေမနပ်ဖြစ််စရာတွေနဲ့ကြုံတွေ့ရလို့ပါ” လို့ ပြန်လည် ဖြေကြားထားပါတယ်။

31/07/2025

လေရှီး-ထမံသီ လမ်း မိုင်တိုင် ၃၄ နဲ့ ၃၅ ကြား လမ်းပြိုကျမှု ထပ်မံဖြစ်ပွါး

ဇူလှိုင်လ ၃၁ ရက် ၂၀၂၅
Naga News

လေရှီး-ထမံသီ လမ်းပိုင်း မိုင်တိုင် ၃၄ နဲ့ ၃၅ ကြား (ဒေသအခေါ် သက်ကယ်တောင်) လမ်းမြေပြိုကျမှု ထပ်မံဖြစ်ပွါးပြီး လမ်းခရီးသွားလာရေး ပြန်လည် ခက်ခဲနေကြောင်း ဒေသ ခံတွေက ပြောပါတယ်။ ယခုနှစ် ရာသီဥတုက မိုးများနေပြီး လမ်းထပ်မံပြိုကျတာကြောင့် တံတားပြင်ဆင်ပြီး စတင် သွားလာလို့ အဆင်ပြေစမှာပဲ ထပ်မံပြီး လမ်းခရီး ခက်ခဲနေပြီ ဖြစ်ကြောင်း ဒေသ ပြည်သည် တစ်ဦးက အခုလို ဆိုပါတယ်။

“လိမ္မော်ခြံနေရာ အသစ်ထပ်ပြိုတယ်။ ဒီနှစ်က မိုးများတယ်။ မြေသားလမ်းပြိုကျတာ။ ပြိုပြီးတော့အောက်က လမ်းမှာပြန်ပြီးတော့သွားပိတ်ထားတာ။ ဆိုင်ကယ်လည်း သွားမရတော့ဘူး” လို့ ပြောပါတယ်။

ယခု ထပ်မံပြိုကျခဲ့တဲ့နေရာဟာ လေရှီးမြို့နဲ့ ၅ မိုင် ၆ မိုင် ခန့် အကွာနေရာတွင်ဖြစ်ပြီး ဇူလိုင် ၂၈ ရက် နေ့ကတည်းက ခရီးသွာလာရေး ပြန်လည် ခက်ခဲနေတယ် လို့ ဆိုပါတယ်။ လမ်းပြိုကျမှုဖြစ်တဲ့နေရာဟာ တောင်ကုန်းအမြင့်နေရာဖြစ်တာကြောင့် လမ်းအထက်ပိုင်းပြိုကျလာရာကနေ အနိမ့်ပိုင်းက လမ်းပေါ်ကို မြေစာကျရောက်ပိတ်ဆို့နေတာလို့ သိရပြီး ကားအချို့ ပိတ်မိနေတယ် လို့လည်း သိရပါတယ်။ လတ်တလော လမ်းပြင်ဆင်မှု လုပ်ဆောင်နေတာ မရှိသေးတဲ့အတွက် ခရီးသွားလာရေး ခက်ခဲနေအုံးမယ် လို့ သိရပါတယ်။

ဓာတ်ပုံ - ပေးပို့

31/07/2025

ပန်ဆောင်မြို့က မူကြိုကျောင်း တစ်ကျောင်းမှာမှာ စစ်ကောင်စီတပ်ဖွဲ့ တပ်စွဲထား

ဇူလှိုင်လ ၃၁ ရက် ၂၀၂၅
Naga News

နာဂဒေသ၊ နန်းယွန်းမြို့နယ်၊ ပန်ဆောင်မြို့ က မူကြိုကျောင်း တစ်ကျောင်းမှာ စစ်ကောင်စီတပ်ရင်းအမှတ် (၁၂၆) တပ်ဖွဲ့ဝင်များ လာရောက်တပ်စွဲထားတာတယ်လို့ ဒေသ သတင်းရင်းမြစ်က ပြောပါတယ်။ ပန်ဆောင်မြို့ လီဒိုလမ်းပေါ်မှာတည်ရှိတဲ့ ဒေါ်ခင်ကြည်ရိပ်သာနေရာမှာ လူမှုကယ်ဆယ်ရေးနဲ့ ပြန်လည်ထူထောင်ရေးဌာနက ဦးစီးပြီး မူကြိုကျောင်းဖွင့်လှစ်ထားကာ ယင်းနေရာကို စစ်ကောင်စီတပ် အမှတ် (၁၂၆) တပ်ရင်းတပ်ဖွဲ့က တပ်စွဲထားတာ ဖြစ်ပါတယ်။ မူကြိုကလေးတွေနဲ့ တစ်ခန်းတည်းမှာ တပ်ရင်းမှူးကိုယ်တိုင်လာရောက်အထိုင်ချနေထားကြောင်း၊ တပ်ရင်းမှူး အစောင့်များက အချိန်ပြည့် မူးယစ်ရမ်းကားနေတာကြောင့် မူကြိုကလေးတွေအတွက် မသင့်တော်သလို မူကြိုကျောင်းက ဆရာမတွေနဲ့ ကလေးမိဘတွေကလည်း ကလေးတွေရဲ့ လုံခြုံရေးကို စိုးရိမ်ကြောင်း ကလေး မိဘ တစ်ဦးက အခုလို ဆိုပါတယ်။

“တပ်ရင်းမှူး ရဲမင်းထွဍ် နဲ့ ဗိုလ်ကြီး ဇွဲထက်နိူင်တို့အဖွဲ့က တပ်မှာမနေဘဲ ဒေါ်ခင်ကြည်ရိပ်သာမှာလာပြီး တပ်ဆွဲထားတယ်။ ဒေါ်ခင်ကြည်ရိပ်သာမှာ လူကယ်ပြန်က ဖွင့်ထားတဲ့မူကြိုကျောင်းလည်းရှိနေတော့ ကလေးတွေနဲ့ ဆရာမတွေအတွက်စိုးရိမ်နေရတယ်။ ဒါကို ထွေအုပ်ကလည်း စစ်တပ်ကိုပြန်မပြောရဲဘူးဖြစ်နေတယ်။ တပ်ရင်းမှူး နေတဲ့အခန်းနဲ့ မူကြိုကျောင်းခန်းက တစ်ခန်းဖြစ်ပြီး ကြားမှာတော့ မိုးကာနဲ့ဘဲ အခန်းကန့်ထားတယ်။ ကလေးတွေက အပြင်ထွက်ဆော့ဖို့လည်း မလွတ်လပ်ဘူး၊ အထဲမှာပဲ နေရမလို ဖြစ်နေတယ်။ ကျနော်တို့ မူကြိုမိဘတွေကတော့ ကလေးတွေအတွက် စိုးရိမ်မိတယ်။ တပ်ရင်းမှူးအစောင့်တွေကလည်းအရက်သောက်စားမူးရူးတဲ့ သူတွေချည်းပဲ” လို့ ပြောပါတယ်။

တပ်ရင်းဘက်ကပြောဆိုချက်အရ လုံခြုံရေးအရ ဟု ဆိုကာ မူကြိုကျောင်းနေရာကို ရွေးချယ်တပ်စွဲထားပြီး ကလေးမိဘအချို့က သူတို့ရဲ့ ကလေးတွေကိုကျောင်းမလွတ်ရဲတာတွေရှိကာ၊ ကျောင်းချိန်အတွင်း ကလေးများ လွတ်လပ်လုံခြုံမှု မရှိကြောင်း၊ ဒေသတွင်းလက်နက်ကိုင်အဖွဲ့ ဖြစ်တဲ့ NSCN-K/YA အဖွဲ့ လည်း ရှိနေပေမယ့် ဒေသပြည်သူတွေကို အကာအကွယ်ပေး ကူညီမှု မရှိကြောင်း၊ အသိပေးအကြောင်းသော်လည်း တုံ့ပြန်လုပ်ဆောင်မှာ မဟုတ်ကြောင်း ယင်း ဒေသခံက ဖြည့်စွက် ပြောဆိုထားပါတယ်။

ပုံ - ဒေါ်ခင်ကြည် ရိပ်သာ (ပုံဟောင်း)

29/07/2025

KIA အဖွဲ့က ဖမ်းဆီးခဲ့တဲ့ NSCN -K အဖွဲ့ဝင် ၁၆ ဦး ပြန်လည်လွတ်မြောက်လာပြီ ဖြစ်ကြောင်း သိရ

ဇူလိုင်လ ၂၉ ရက် ၂၀၂၅
Naga News

တလူးကျေးရွာအနီးရှိ ချန်ရားဂိတ်မှာ ဂိတ်ချထားတဲ့ NSCN-K (Yung Aung) တပ်ဖွဲ့ဝင် ၁၆ ဦးကို ဇူလိုင်လ ၁၈ ရက်နေ့မှာ KIA အဖွဲ့က အင်အားသုံးပြီး ဖမ်းဆီးခဲ့တဲ့ တပ်ဖွဲ့ဝင်တွေဟာ ဇူလိုင် ၂၈ ရက်နေ့မှာပဲ ပြန်လည်လွတ်မြောက်လာပြီ ဖြစ်ကြောင်း NSCN-K နဲ့ နီးစပ်တဲ့ သတင်းရင်းမြစ်က Naga News ကိုပြောပါတယ်။

KIA က ဖမ်းဆီးသွားတဲ့ NSCN-K တပ်ဖွဲ့ဝင် ၁၆ ဦးအနက် ၃ ဦးမှာ ထွက်ပြေးလွတ်မြောက်ခဲ့တယ် လို့ သိရပြီး သူတို့နဲ့အတူ သေနတ် ၂ လက်သာ ပြန်ပါလာခဲ့ကြောင်း၊ ကျန် ၁၃ ဦးမှာ KIA ဘက်မှ ဇူလိုင်လ ၂၈ ရက်နေ့ တုမ်နီစခန်းမှ တိုက်တီးကို ပြန်လည်ပို့ဆောင်ပေးခဲ့ကြောင်း သိရပါတယ်။

ဖမ်းဆီးမှု လုပ်ဆောင်စဉ် သိမ်းဆည်းခဲ့တဲ့ NSCN-K အဖွဲ့ဝင်တွေရဲ့ လက်နက်တွေကိုတော့ KIA အဖွဲ့က ဆက်လက် ထိန်းသိမ်းထားပြီး NSCN-K ရဲ့ သက်ဆိုင်ရာ တာဝန်ရှိ ခေါင်းဆောင်များထံကိုသာ ပေးအပ်သွားမှာ ဖြစ်ကြောင်း၊ ထိန်းသိမ်းထားတဲ့ လက်နက်အတွက် အပေးအယူ ပြုလုပ်ပြီးမှ ပေးအပ်သွားမယ်လို့လည်း KIA ဘက်က ပြောဆိုထားကြောင်း သိရပါတယ်။

KIA လက်နက်ကိုင်အဖွဲ့က အပေးအယူပြုလုပ်ပြီးမှ လက်နက်ပေးအပ်မယ်လို့ ပြောဆိုနေခြင်းဟာ NSCN-K ဂိတ်ကို ဖယ်ရှားပေးဖို့ သဘောတူ လက်မှတ်ထိုးဖို့ဖြစ်နိုင်ကြောင်း NSCN-K နဲ့ နီးစပ်တဲ့ သတင်းရင်းမြစ်က Naga News ကို ပြောဆိုထားပါတယ်။

28/07/2025

မင်္ဂလာပါ ……
အအပတ်စဉ် ထုတ်လွှင့်ပေးနေတဲ့ Naga News တိုက်ရိုက်ထုတ်လွှင့်မှု မှ နားဆင်ရမယ့် အကြောင်းအရာများ ကတော့ -

• နာဂ လူငယ်များကို KIA ဖမ်းဆီးမှု ရန်စ နှောက်ယှက်မှု ဖြစ်တယ် လို့ နာဂ ကျောင်းသားများအဖွဲ့အစည်း ဆို

• NSO ရဲ့ထုတ်ပြန်ချက် ဟာ စိုးရိမ်စရာဖြစ်တယ် လို့ NSCN- K (Angmai) အဖွဲ့ တုံ့ပြန်

• တံတားပျက်စီးမှုကြောင့် ခရီးသွားလာရေး ခက်ခဲနေတာ ၃ ပတ်နီးပါးရှိလာတဲ့ ထမံသီ-လေရှီး လမ်း

• NSCN-K တပ်ဖွဲ့ဝင် ဖမ်းဆီးခံရမှုနဲ့ ပတ်သက်ပြီး KIO နဲ့ ညှိုနှိုင်းနေကြောင်းသိရ စတဲ့ သတင်းတွေအပါအဝင် တေးသီချင်းကဏ္ဍကနေ နာဂရိုးရာတေးသီချင်းများကို နားဆင်ကြရပါမယ်။ နားဆင်နေကြတဲ့ မိဘပြည်သူများ ဘေးရန်ကင်းကွာ ကြပါစေ။

26/07/2025

NSCN-K တပ်ဖွဲ့ဝင် ဖမ်းဆီးခံရမှုနဲ့ ပတ်သက်ပြီး KIO နဲ့ ညှိုနှိုင်းနေကြောင်းသိရ

ဇူလှိုင်လ ၂၆ ရက် ၂၀၂၅
Naga News

တလူးကျေးရွာအနီးရှိ ချန်ရားဂိတ်ကို ဇူလှိုင်လ ၁၈ ရက်နေ့မှာ KIA အဖွဲ့က ဝင်ရောက်ပြီး NSCN-K လက်နက်ကိုင်အဖွဲ့ဝင် ၁၆ ဦးကို ဖမ်းဆီးခဲ့တာနဲ့ ပတ်သက်ပြီး NSCN-K အဖွဲ့က KIO ထိပ်ပိုင်းခေါင်းဆောင်တွေနဲ့ တိုက်ရိုက်ညှိနှိုင်းဖြေရှင်းနေတယ်လို့ NSCN-K နဲ့ နီးစပ်တဲ့ သတင်းရင်းမြစ်က Naga News ကို ဖြေကြားထားပါတယ်။ Kachin Independence Army-KIA အဖွဲ့ရဲ့ ဖမ်းဆီးမှုနဲ့ ပတ်သက်ပြီးတော့လည်း ယင်းသတင်း ရင်းမြစ်က အခုလို ဖြေကြားထားပါတယ်။

“KIA အနေနဲ့ ခရီးသွားလူငယ် အမျိုးသား၊အမျိုးသမီးတွေ၊ ရွာထဲက လူငယ်တွေကို ဖမ်းဆီးပြီး စစ်မှုထမ်းခိုင်းတာ၊ လူသားဒိုင်း တပ်သားတွေအဖြစ် အသုံးပြုနေတာတော့ ကြာပါပြီ။ အခုဖြစ်ရပ်နောက်ပိုင်း နောက်ထပ်ဖမ်းဆီးမှုတွေ ရှိ မရှိတော့ မသိရသေးပါဘူး။ တလူးကျေးရွာက မြန်မာပြည်ရဲ့ ၂၀၀၈ ဖွဲ့စည်းပုံ အခြေခံဥပဒေ နယ်မြေခွဲဝေမှုအရတော့ ကချင်ပြည်နယ်ထဲမှာပါဝင်တဲ့ နာဂလူမျိုးများ နေထိုင်ရာဒေသ ဖြစ်ပါတယ်။ ဘိုးဘေးဘီဘင်ကတည်းက ဌာနေနာဂလူမျိုးတွေနေထိုင်ရာ ဒေသဖြစ်တယ်။ ဒါဟာ မြန်မာနိုင်ငံရဲ့ အုပ်ချုပ်ရေးနယ်နိမိတ်သာ ဖြစ်ပါတယ်” လို့ ဖြေကြားထားပါတယ်။

Naga Students Organisation ရဲ့ ထုတ်ပြန်ချက်ဟာ ဖြစ်ပျက်နေတဲ့ အမှန်တရားတွေကို ထောက်ပြချက်တွေသာ ဖြစ်ပြီး လူမျိုးနှစ်မျိုးအကြား မလိုလားအပ်တာတွေမဖြစ်လာဖို့ ဆောင်ရန်၊ရှောင်ရန်တွေ၊ တောင်းဆိုသင့်၊ တောင်းဆိုထိုက် တာတွေကို KIO/KIA ဘက်ကို တောင်းဆိုတာလို့ မြင်ကြောင်း ယင်းသတင်းရင်းမြစ်က ဖြည့်စွက် ဖြေကြားထားပါတယ်။

ယခု ဖမ်းဆီးမှုနဲ့ ပတ်သက်ပြီး အရပ်ဖက်ဆိုင်ရာ အဖွဲ့အစည်း တစ်ခု ဖြစ်တဲ့ United TanShang Naga Council အနေနဲ့ ကြားဝင် ညှိနှိုးမှုတွေ လုပ်နေတာလည်း ရှိတယ် လို့ ဒေသ ပြည်သူ အချို့က တဆင့် သိရပါတယ်။

24/07/2025

တံတားပျက်စီးမှုကြောင့် ခရီးသွားလာရေး ခက်ခဲနေတာ ၃ ပတ်နီးပါးရှိလာတဲ့ ထမံသီ-လေရှီး လမ်း

ဇူလိုင်လ ၂၄ ရက် ၂၀၂၅
Naga News

မိုးစဝင်ကတည်းက လမ်း၊ တံတား ပျက်စီးမှုတွေရှိတဲ့ လေရှီး-ထမံသီ လမ်း ဆက်သွယ်သွားလာရေး ခက်ခဲနေပြီး၊ တံတားမျောပါသွားတာကြောင့် ခရီးသွားလာရေး ပိုမိုခက်ခဲနေတာ ၃ ပတ်နီးပါး ကြာမြင့် လာပြီဖြစ်ပါတယ်။ အချို့လမ်းပိုင်းကိုတော့ ယာယီသွားလာရေး အဆင်ပြေစေဖို့ ပြုပြင်ထားပေမယ့် အဆိုးရွားဆုံး ပျက်စီးမှု ဖြစ်ခဲ့တဲ့ ၁၈ မိုင် ကျွန်းတစ်ပင်ချောင်း တံတားနေရာတွင် ယာယီသစ်တံတားဆောက်လုပ်မှု ကြန့်ကြာနေတယ် လို့ ဒေသပြည်သူများက ပြောဆိုပါတယ်။ လမ်းလုပ်ငန်းတာဝန်ရှိသူများရဲ့ ကြီးကြပ် လုပ်ဆောင်မှု အားနည်းနေတာတွေကြောင့်လည်း ဖြစ်တယ် လို့ ဒေသခံ တစ်ဦးက Naga News ကို ပြောပါတယ်။

“တံတားမှာ ပို့ထားတဲ့ သူတို့လုပ်သားတွေက ဆီပေပါပဲ ကဲ့ နေကြတာလေ။ ဆီ တစ်ပေပါ ဆိုရင် ၁ သောင်း ရနေတော့ သူတို့ လုပ်အားခထက် အဆင်ပြေတာပေါ့။ လုပ်အားခက တစ်ရက် ၁ သောင်းကျော်လောက် ရှိတာ။ နာရီဝက်လောက်နဲ့ ဆီပေပါ ၄၀ လောက် ကဲ့ရင် ၄ - ၅ သိန်းလောက် ရနေတာ။ ဆီပေပါ ဖက် အာရုံ ရောက်နေတော့ တံတားက မပြီးတော့ဘူး။ သစ်မရှိတာလည်း ဟုတ်တယ်၊ ကြီးကြပ်တာလည်း အားနည်းတာ။ ဆီသမားတွေကလည်း မနားကြဘူး။ သယ်နေတာ” လို့ ပြောပါတယ်။

မိုးရာသီကာလ ဖြစ်တာကြောင့် သစ်ရရှိဖို့ ခဲယဉ်းပြီး၊ သယ်ယူပို့ဆောင်ဖို့လည်း စိန်ခေါ်မှု ရှိနေတာ ဖြစ်ပါတယ်။ လတ်တလော အများပြည်သူသွားလာရေးနဲ့ ကုန်စည်တင်ပို့ရေးခက်ခဲမှုကို ကူညီဖြေရှင်းဖို့ ယာယီသစ်တံတားဆောက်လုပ်မှုမှာ လိုအပ်ချက်တစိတ်တပိုင်း ဖြစ်တဲ့ သစ်စုဆောင်းရေး၊ ပို့ဆောင်ရေးကို ဒေသခံ ယာဉ်အသင်းအဖွဲ့များ၊ သစ်ဖြတ်လုပ်ငန်း လုပ်ကိုင်သူများနဲ့ လုပ်ငန်းရှင်အချို့တို့ ပူးပေါင်းကာ တစ်ရက်တာ လုပ်အားပါဝင် လုပ်ဆောင်ခဲ့တယ် လို့လည်း ယာဉ်အသင်းအဖွဲ့မှ ယာဉ်ပိုင်တစ်ဦးက အခုလို ပြောပါတယ်။

“တစ်ရက် လုပ်အား ပါဝင်ကြတာပါ။ သစ်တိုက်အဖွဲ့ပါတယ်။ ကားအသင်းအဖွဲ့ပါနဲ့ လုပ်ငန်းရှင်တချို့ ကိုယ့်အစီအစဉ်နဲ့ကိုယ် ကူကြတာပါ” လို့ ဆိုပါတယ်။

လက်ရှိ ယာယီတံတား ပြီးစီးပါက ခရီးသွားလာရေး အဆင်ပြေသွားမယ် လို့လည်း သိရပါတယ်။

Photo credit

Naga News

08/08/2025

06/08/2025

06/08/2025

05/08/2025

05/08/2025

02/08/2025

31/07/2025

31/07/2025

29/07/2025

28/07/2025

26/07/2025

24/07/2025

ที่อยู่

เบอร์โทรศัพท์

เว็บไซต์

แจ้งเตือน

ติดต่อ ธุรกิจของเรา

ทางลัด

แชร์

ประเภท