เว็บไซต์คืออะไร?

Bagan News TV, BKK (2025)

14/07/2025

မော်ချီးဒေသကို စစ်ကောင်စီဗုံးကြဲ အရပ်သား ၅ ဦး သေဆုံး (Podcast)

ဇူလိူင် ၁၄ / Bagan News

- ကရင်နီပြည်နယ်၊ ဒီးမော့ဆိုနဲ့ မော်ချီးဒေသကို စစ်ကောင်စီ လေကြောင်းက ဗုံးကြဲပြီး
အရပ်သား ၅ ဦးသေဆုံး

- ညောင်ဦးမြို့နယ်မှာ ဧရာဝတီမြစ်ရေ မြင့်တက်မှုကြောင့် အမှတ် ၅ ရပ်ကွက်၊ သီလရင်စုရပ်ကွက် မှာ ရေဝင်ရောက်

- မိုးကုတ်မြို့ကို စစ်ကောင်စီ လေကြောင်းတိုက်ခိုက်ခဲ့ပြီး ကလေးငယ် (၂)ဦးအပါ အရပ်သား ၆ ဦး ထိခိုက်ဒဏ်ရာရ

- ကရင်ပြည်နယ် ၊ ကော့ကရိတ် မြို့နယ် ဥကရစ်ထ စစ်ကောင်စီတပ်စခန်းအား သိမ်းပိုက်စတဲ့ သတင်းတွေကြည့်ရူနိုင်ပါတယ်။

#နေ့စဉ်သတင်း

14/07/2025

မိုးကုတ်မြို့ကို စစ်ကောင်စီ ဗုံးကြဲ အရပ်သား ၆ ဦး ထိခိုက်

ဇူလိူင် ၁၄ / Bagan News

မန္တလေးတိုင်း ၊ မိုးကုတ်မြို့ကို စစ်ကောင်စီက လေကြောင်းနဲ့ ဗုံးကြဲတိုက်ခိုက်ခဲ့ပြီး ကလေးငယ် (၂)ဦးအပါအဝင် အရပ်သား ၆ ဦး ထိခိုက်ဒဏ်ရာရခဲ့တယ်လို့ TNLA ကထုတ်ပြန်ပါတယ်။

မနေ့ည ဇူလိူင် ၁၄ ရက်နေ့ ည ၁ဝ နာရီခွဲခန့်မှာ စစ်ကောင်စီ ဂျက်ဖိုက်တာက ပန်းမထိပ်အနီးကို ပေါင် (၅ဝဝ) ဗုံး (၁)လုံး ကြဲချတိုက်ခိုက်ခဲ့တယ်လို့ သိရပါတယ်။

ဗုံးကျရောက်ပေါက်ကွဲမှုကြောင့် အရပ်သား ၆ ဦး ထိခိုက်ခဲ့ပြီး နေအိမ် (၆)လုံး ဗုံးစထိမှန်ပျက်စီးခဲ့တယ်လို့ ထုတ်ပြန်ထားပါတယ်။

စစ်ကောင်စီဟာ ဇူလိူင် ၁၃ ရက်နေ့ကလည်း ကျောက်မဲမြို့ကို လေကြောင်းနဲ့ ဗုံး (၄)လုံး ကြဲချတိုက်ခိုက်ခဲ့ပြီး အမျိုးသမီး (၁)ဦး ထိခိုက်ဒဏ်ရာရခဲ့ပါတယ်။

စစ်ကောင်စီတပ်ဟာ ဇွန်လ (၂၉)ရက်နေ့ကနေ ဇူလိုင်လ (၁၃)ရက်နေ့ အတွင်း ကျောက်မဲ၊ နောင်ချို၊ မိုးကုတ်နဲ့ သီပေါမြို့နယ်တွေကို ဗုံးကြဲတိုက်ခိုက်ခဲ့တာကြောင့် ကလေးငယ်တွေအပါ (၇)ဦး သေဆုံးခဲ့ပြီး
(၃၄)ဦး ထိခိုက်ဒဏ်ရာရရှိခဲ့တယ်လို့ TNLA ကထုတ်ပြန်ပါတယ်။

ဒါ့အပြင် နေအိမ် (၅၂)အိမ်၊ စာသင်ကျောင်း (၁)ကျောင်းနဲ့ ဘုန်းကြီးကျောင်း (၄)ကျောင်းလည်း ဗုံးစထိမှန်ပျက်စီးခဲ့တယ်လို့ သိရပါတယ်။

#မိုးကုတ်
#လေကြောင်းတိုက်ခိုက်

14/07/2025

ဒီးမော့ဆိုနဲ့ မော်ချီးကို စစ်ကောင်စီလေကြောင်းတိုက်ခိုက် အရပ်သား ၅ ဦး သေဆုံး

ဇူလိူင် ၁၄ / Bagan News

ကရင်နီပြည်နယ်၊ ဒီးမော့ဆိုနဲ့ မော်ချီးဒေသကို စစ်ကောင်စီက လေကြောင်းက ဗုံးကြဲတိုက်ခိုက်ခဲ့ပြီး
အရပ်သား ၅ ဦးသေဆုံးခဲ့တယ်လို့ CTER-Karenni အဖွဲ့ကထုတ်ပြန်ပါတယ်။

ဒီကနေ့ ဇူလိူင်လ ၁၄ ရက်နေ့ မနက်အစောပိုင်း ၁ နာရီခန့်မှာ စစ်ကောင်စီက ဒီးမော့ဆိုမြို့နယ်ကို လေကြောင်းက ဗုံးကြဲတိုက်ခိုက်ခဲ့ပြီး ဒေသခံ ၂ ဦးထိခိုက်ကာ ဆေးခန်းတစ်ခန်း အဆောက်အအုံ ၂ လုံးနဲ့ ယာဉ်တစ်စီးပျက်စီးခဲ့တယ်လို့ သိရပါတယ်။

ဒေသခံတွေအဆိုအရ စစ်ကောင်စီဟာ ပေါင် ၂ဝဝ ဗုံးအသုံးပြုပြီး ၃ နေရာကိုကြဲချတိုက်ခိုက်ခဲ့တာပါ။

ဒီကနေ့ မွန်းလွဲ ၂ နာရီခန့်မှာလည်း မော်ချီးဒေသက နေအိမ်တွေကို စစ်ကောင်စီက လေကြောင်းတိုက်ခိုက်ခဲ့တာကြောင့် အရပ်သား ၅ ဦးသေဆုံးခဲ့တယ်လို့ သိရပါတယ်။

ပြီးခဲ့တဲ့ ဇူလိုင်လ ၉ ရက်နေ့ ညကလည်း စစ်ကောင်စီဟာ မော်ချီးဒေသ ကျေးရွာတစ်ရွာကို လေကြောင်းတိုက်ခိုက် ပြုလုပ်ခဲ့တာကြောင့် အရပ်သား ၅ ဦး သေဆုံးခဲ့ပါတယ်။

လေကြောင်း တိုက်ခိုက်မှုကြောင့် သင်းအုပ်ဆရာရဲ့နေအိမ်နဲ့ ဘုရားကျောင်းအပါအဝင် အရပ်သားနေအိမ် ၆ လုံးကျော် ပျက်စီးခဲ့ပါတယ်။

ဒါ့အပြင် ပြီးခဲ့တဲ့ ဇွန်လ ၂၅ ရက်နေ့ကလည်း စစ်ကောင်စီတပ်က မော်ချီးဒေသကို လေကြောင်းတိုက်ခိုက်ခဲ့တာကြောင့် အရပ်သား ၈ ဦး သေဆုံးပြီး ၇ ဦး ဒဏ်ရာရရှိခဲ့ပါတယ်။

#ဒီးမော့ဆို
#မော်ချီး

14/07/2025

ညောင်ဦးမြို့ ရပ်ကွက်အချို့ ရေဝင် ယာယီ ရေဘေးရှောင်စခန်းတွေဖွင့်

ဇူလိူင် ၁၄ / Bagan News

မန္တလေးတိုင်း ၊ ညောင်ဦးမြို့နယ်မှာ ဧရာဝတီမြစ်ရေ မြင့်တက်မှုကြောင့် အမှတ် ၅ ရပ်ကွက်၊ သီလရင်စုရပ်ကွက်မှာ ရေဝင်ရောက်နေတယ်လို့ ဒေသခံတွေကပြောပါတယ်။

မနေ့က ဇူလိူင်လ ၁၃ ရက်နေ့ မနက်ပိုင်းမှာ ရေဝင်ရောက်နေတာကြောင့် သီလရင်စုရပ်အတွင်းက အိမ်ထောင်စု ၃ စုရှိ လူဦးရေ ၁၆ ဦးနဲ့ အသုံးအဆောင်ပစ္စည်းတွေကို မြသိန်းတန်ဘုရား ယာယီရေဘေးရှောင်စခန်းကို ကူညီရွှေ့ပြောင်းပေးခဲ့တယ်လို့ ညောင်ဦးမြို့နယ်မီးသတ်တပ်ဖွဲ့ကထုတ်ပြန်ပါတယ်။

ဒီကနေ့ နေ့လည်ပိုင်းမှာတော့ ဧရာဝတီမြစ်ရေဟာ ညောင်ဦးမြို့ရဲ့ စိုးရိမ်ရေမှတ်ကို ရောက်ရှိဖို့
2 cm သာလိုတော့ပြီး မြေနိမ့်ပိုင်းနေထိုင်သူတွေကို ယာယီရေဘေးရှောင်စခန်းတွေကို ကူညီရွှေ့ပြောင်းပို့ဆောင်ပေးနေတယ်လို့ သိရပါတယ်။

မိုးဇလဌာနရဲ့ထုတ်ပြန်ချက်အရတော့ ညောင်ဦး၊ချောက်၊ပခုက္ကူ၊ဆိပ်သာနဲ့ဟင်္သာတမြို့နယ်တွေမှာ
လာမယ့် ၁ ရက်ကနေ ၃ ရက်အတွင်းစိုးရမ်ရေမှတ်တွေကို ရောက်ရှိနိုင်ပါတယ်။

မနက်ဖြန် မနက်အထိ နေပြည်တော်၊ မန္တလေး မကွေး ကရင်ပြည်နယ်တွေမှာ နေရာအနှံ့အပြား မိုးထစ်ချုန်းရွာပြီး ပဲခူး စစ်ကိုင်းအထက်ပိုင်း၊ တနင်္သာရီ ၊ ကချင်နဲ့ ရခိုင်ပြည်တွေမှာ နေရာကွက်ပြီး မိုးကြီးနိုင်တယ်လို့ သိရပါတယ်။

#ညောင်ဦး
#ရေကြီး

12/07/2025

အရပ်သား ၂၉ဝဝ နီးပါးကို စစ်မှုထမ်းရန် စစ်ကောင်စီ ဖမ်းဆီး (Podcast)

ဇူလိူင် ၁၂ / Bagan News

- စစ်မှုထမ်းဥပဒေပြဌာန်းပြီးနောက်ပြည်တွင်းမှာ ၆ လတွင်း ဖမ်းဆီးခံရတဲ့ အရပ်သား အရေအတွက် ၂,၈၇၆ ဦးရှိ

- စစ်ကိုင်းမြို့နယ်ထဲက လင်းတလူးကျေးရွာ ဘုန်းတော်ကြီးကျောင်းကို စစ်ကောင်စီ လေကြောင်းတိုက်ခိုက်ခဲ့တာကြောင့် ကလေးငယ် ၃ ဦး အပါအဝင် အရပ်သား ပြည်သူ ၂၂ ဦးသေဆုံး

- မန္တလေးမြို့ မြို့ရဲ့ (၅) မိုင်ခန့်အကွာမှာ ငလျင်လှုပ်

- ဇူလိုင် ၁၀ ရက်နေ့အတွင်း အရပ်သားတွေကို ပစ်မှတ်ထားတဲ့ စစ်ကောင်စီ လေကြောင်းတိုက်ခိုက်မှု အနည်းဆုံး (၃၀)ထက်မနည်းရှိ စတဲ့ သတင်းတွေကြည့်ရူနိုင်ပါတယ်။

#နေ့စဉ်သတင်း

12/07/2025

အရပ်သား ၂၉ဝဝ နီးပါးကို စစ်မှုထမ်းရန် စစ်ကောင်စီ ဖမ်းဆီးခဲ့

ဇူလိူင် ၁၂ / Bagan News

ပြည်သူ့စစ်မှုထမ်းဥပဒေပြဌာန်းပြီးနောက်ပြည်တွင်းမှာ ဖမ်းဆီးခံရတဲ့ အရပ်သား အရေအတွက် ၂,၈၇၆ ဦးရှိတယ်လို့ စစ်ရာဇဝတ်မှုတွေကို မှတ်တမ်းတင်နေတဲ့ Spring Revolution Database - SRD အဖွဲ့ကထုတ်ပြန်ပါတယ်။

စစ်ကောင်စီဟာ ၂၀၂၅ ခုနှစ် ဇန်နဝါရီလကနေ ဇွန်လအတွင်း ကျေးရွာတွေမှာ ၁,၃၀၆ ဦး၊ မြို့ပြမှာ ၁,၂၉၈ ဦး၊ လမ်းခရီးတွေမှာ ၂၆ဝ ဦးကို ဖမ်းဆီးခဲ့ပြီး ပေါ်တာဆွဲခံရသူ ၁၂ ဦး ရှိတယ်လို့ သိရပါတယ်။

စစ်ကောင်စီတပ်ဟာ နေ့ခင်းအချိန်မှာ အရပ်သား ၂,၆၃၃ ဦးနဲ့ ညအချိန်မှာ ၂၄၃ ဦးကို ဖမ်းဆီးခဲ့ တယ်လို့ SRD အဖွဲ့ကဆိုပါတယ်။

ဒါ့အပြင် ၂၀၂၅ ခုနှစ် ၆ လတာ အတွင်းမှာ စစ်ကောင်စီရဲ့ စစ်မှုထမ်းဥပဒေကို ‌ရှောင်တိမ်းရင်း အလုပ်အကိုင်ရှာဖွေဖို့ တရားမဝင်နယ်စပ်ဖြတ်ကျော်ခဲ့တဲ့ မြန်မာနိုင်ငံသား ၆,၁၇၅ ဦး ပြည်ပနိုင်ငံတွေမှာဖမ်းဆီးခံခဲ့ရ တယ်လို့ SRD အဖွဲ့ရဲ့စာရင်းအရ သိရပါတယ်။

၂၀၂၅ ခုနှစ်၊ ပထမ(၆)လတာအတွင်း တရုတ်နိုင်ငံမှာ မြန်မာနိုင်ငံသား (၁) ဦး၊ ထိုင်းနိုင်ငံမှာ (၃,၁၇၇) ဦး၊ မလေးရှားနိုင်ငံမှာ (၂,၉၄၄)ဦး၊ အိန္ဒိယနိုင်ငံမှာ (၅၃) ဦး ဖမ်းဆီးခံခဲ့ရတယ်လို့ သိရပါတယ်။

#စစ်မှုထမ်းဥပဒေ
#ပေါ်တာဆွဲ

12/07/2025

စစ်ကိုင်းမြို့ ဘုန်းကြီးကျောင်းကို စစ်ကောင်စီ လေကြောင်းတိုက်ခိုက်တာကြောင့် အရပ်သား၂၂ ဦးသေဆုံး

ဇူလိူင် ၁၂ / Bagan News

စစ်ကိုင်းတိုင်း၊ စစ်ကိုင်းမြို့နယ်ထဲက စစ်ဘေးရှောင်တွေခိုလှုံနေတဲ့ လင်းတလူးကျေးရွာ ဘုန်းတော်ကြီးကျောင်းကို စစ်ကောင်စီက လေကြောင်းကနေ တိုက်ခိုက်ခဲ့တာကြောင့် ကလေးငယ် ၃ ဦး အပါအဝင် အရပ်သား ပြည်သူ ၂၂ ဦးသေဆုံးခဲ့ပြီး အယောက် ၅၀ ကျော်ဒဏ်ရာရခဲ့တယ်လို့ NUG ကဒီကနေ့ထုတ်ပြန်ပါတယ်။

မနေ့က ဇူလိုင်(၁၁) ရက်နေ့ မနက်အစောပိုင်းမှာ စစ်ကောင်စီရဲ့ စစ်လေယာဉ်ဟာ တံတားဦးလေဆိပ်ကနေ ပျံသန်းပြီး လင်းတလူးကျေးရွာ ဘုန်းတော်ကြီးကျောင်းကို ဗုံးကြဲတိုက်ခိုက်ခဲ့တာပါ။

စစ်ကိုင်းမြို့နယ်အနီးမှာ ပြီးခဲ့တဲ့ ဇွန်လ ၁၇ ရက်နေ့ကတည်းက စစ်ကောင်စီတပ်တွေနဲ့ ဒေသကာကွယ်ရေးတပ်တွေအကြား ထိတွေ့တိုက်ပွဲတွေ ဖြစ်ပွားနေပါတယ်။

တိုက်ပွဲတွေကြောင့် ကျေးရွာ (၇)ရွာက ပြည်သူ တစ်သောင်းကျော်ဟာ ဘေးလွတ်ရာတိမ်းရှောင်နေကြရပါတယ်။

အဲ့ဒီထဲက စစ်ဘေးရှောင်အယောက် ၂ဝဝ လောက်ဟာ လင်းတလူးရွာ မဟာသစ္စဝါဒီ ကျောင်းတိုက်မှာ စစ်ဘေးရှောင်ရင်း ခိုလှုံနေချိန် ခုလိုဗုံးကြဲတိုက်ခိုက် ခံခဲ့ရတာပါ။

လင်းတလူးကျေးရွာ ဘုန်းတော်ကြီးကျောင်းကို စစ်ကောင်စီက လေကြောင်း တိုက်ခိုက်ခဲ့တာကြောင့်
သေဆုံးသူတွေလည်း ထပ်မံတိုးလာနိုင်ဖွယ်ရှိနေပါတယ်။

ဗုဒ္ဓဘာသာ မြန်မာလူမျိုးတွေရဲ့ကောင်းမှုကုသိုလ်ပြုရာ အချိန်ကာလဖြစ်တဲ့ ဝါတွင်းကာလကိုပါ မရှောင်ပဲ စစ်တပ်ဟာ အကြမ်းဖက်တိုက်ခိုက်မှုတွေဆက်တိုက်ပြုလုပ်နေတယ်လို့ NUG လူ့အခွင့်အရေးဆိုင်ရာဝန်ကြီးဌာနကထုတ်ပြန်ပါတယ်။

ဓာတ်ပုံ - စစ်ဘေးရှောင်တွေခိုလှုံနေတဲ့ လင်းတလူးကျေးရွာ ဘုန်းတော်ကြီးကျောင်းကို စစ်ကောင်စီက လေကြောင်းကနေ တိုက်ခိုက်ခဲ့သည့်မြင်ကွင်း။

#လင်းတလူးကျေးရွာ
#စစ်ကိုင်းမြို့

11/07/2025

စစ်ကိုင်းမြို့ နယ် ဘုန်းကြီးကျောင်းကို စစ်ကောင်စီဗုံးကြဲ စစ်ရှောင် ၃ဝ ခန့်သေဆုံး (Podcast)

ဇူလိူင် ၁၁ / Bagan News

- စစ်ကိုင်းမြို့နယ် လင်းတလူးကျေးရွာမှာ စစ်ဘေးရှောင်တွေနေထိုင်နေတဲ့ သစ္စဝါဒီဘုန်းကြီးကျောင်းကို စစ်ကောင်စီက လေကြောင်းနဲ့ ဗုံးကြဲချ တိုက်ခိုက်ခဲ့တာကြောင့် စစ်ဘေးရှောင် ၃ဝ ခန့်သေဆုံး

- စစ်ကိုင်းတိုင်း ဝက်လက်မြို့နယ်နဲ့ ရှမ်းပြည်နယ် ကျောက်မဲမြို့နယ်ကို စစ်ကောင်စီက လေကြောင်းကနေ ဗုံးကြဲ အရပ်သား ၂ ဦး သေဆုံး

- မကွေးတိုင်း ပခုက္ကူခရိုင် မြိုင်မြို့နယ်ရှိ စစ်ကောင်စီစခန်းကို တိုက်ခိုက်သိမ်းပိုက်ခဲ့ပြီး စစ်သုံပန်း ၁၂ ဦး ဖမ်းမိ စတဲ့ သတင်းတွေကြည့်ရူနိုင်ပါတယ်။

#နေ့စဉ်သတင်း

11/07/2025

မြိုင်မြို့တွင် စစ်ကောင်စီစခန်းကိုသိမ်းပိုက် စစ်သုံပန်း ၁၂ ဦး ဖမ်းမိ

ဇူလိူင် ၁၁ / Bagan News

မကွေးတိုင်း ပခုက္ကူခရိုင် မြိုင်မြို့နယ်ရှိ စစ်ကောင်စီစခန်းကို တိုက်ခိုက်သိမ်းပိုက်ခဲ့ပြီး စစ်သုံပန်း ၁၂ ဦး ဖမ်းမိခဲ့တယ်လို့ မြိုင် ပြည်သူ့ကာကွယ်ရေးအဖွဲ့- မြိုင် ပကဖ ကထုတ်ပြန်ပါတယ်။

မြိုင်မြို့နယ်က တိုက်ခိုက်ရေးအဖွဲ့တွေ ပူးပေါင်းပြီး ဇူလိူင်လ ၉ ရက်နေ့ မနက် ၄ နာရီခွဲခန့်မှာ မြိုင်မြို့- ပခုက္ကူသွားလမ်း အရှေ့ဖျားမှာရှိတဲ့ စီမံကိန်းရုံးမှာ အထိုင်ချထားတဲ့ စစ်တပ်စခန်းကို တိုက်ခိုက်ခဲ့ကြတာပါ။

စခန်းကို ဝင်ရောက်စီးနင်ခဲရာမှာ စစ်ကောင်စီဘက်က ထိခိုက်ကျဆုံးမှုရှိပြီး သုံပန်းအရှင် ၁၂ ဦး ဖမ်းမိ
ခဲ့တယ်လို့သိရပါတယ်။

အဲ့ဒီတိုက်ပွဲမှာ စစ်ကောင်စီဘက်က ပစ်ခတ်ခဲ့တာကြောင့်ကြောင့် ရဲဘော်တစ်ဦး ကျဆုံးခဲ့ပြီး ရဲဘော် ၆ ဦး ဒဏ်ရာအသီးသီး ရရှိခဲ့တယ်လို့ မြိုင် ပကဖ ကထုတ်ပြန်ပါတယ်။

တိုက်ပွဲဖြစ်ပွားနေချိန်မှာ မြိုင်မြို့မရဲစခန်းက စစ်ကူ ၃ ကြီမ်စေလွတ်ခဲ့ပေမယ့်လည်း ဖြတ်တောက်တိုက်ခိုက်နိုင်ခဲ့တယ်လို့ တော်လှန်ရေတပ်ဖွဲ့တွေကပြောပါတယ်။

စစ်ကောင်စီက လေကြောင်းတိုက်ခိုက်မှုတွေပြုလုပ်ခဲ့ပေမယ့်လည်း ည ၇ နာရီခန့်မှာ စစ်တပ်စခန်းကို အပြီးတိုင် သိမ်းပိုက်ရရှိခဲ့ပြီး လက်နက်ခဲယမ်းအမြောက်အများ ရရှိခဲ့တယ်လို့ သိရပါတယ်။

စစ်ကောင်စီက မြိုင်မြို့နယ် သနပ်ရင်း ကျေးရွာကို လေကြောင်းတိုက်ခိုက်မှုတွေပြုလုပ်ခဲ့တာကြောင့် အရပ်သား ၁ ဦး နဲ့ လသားအရွယ် ကလေးငယ် ၁ ဦး သေဆုံးခဲ့တယ်လို့ သိရပါတယ်။

မြိုင်မြို့နယ်မှာ မေလကုန်ကစပြီး ပခုက္ကူ တပ်မ ၁ဝ၁ က အင်အား ၁ဝဝဝ ကျော်ပါတဲ့ စစ်ကြောင်း ထိုးနေတာကြောင့် တိုက်ပွဲတွေဖြစ်ပွားနေပြီး လေကြောင်းတိုက်ခိုက်မှု၊ မြေပြင်ထိတွေ့မှုတွေကို ပြည်သူတွေ သတိပြုသင့်တယ်လို့ တော်လှန်ရေးအဖွဲ့တွေက ထုတ်ပြန်ထားပါတယ်။

#မြိုင်မြို့
#မကွေးတိုင်း

11/07/2025

စစ်ကိုင်းမြို့ စစ်ရှောင်ဘုန်းကြီးကျောင်းကို စစ်ကောင်စီဗုံးကြဲ စစ်ရှောင် ၃ဝ ခန့်သေဆုံး

ဇူလိူင် ၁၁ / Bagan News

စစ်ကိုင်းတိုင်း စစ်ကိုင်းမြို့နယ် လင်းတလူးကျေးရွာမှာ စစ်ဘေးရှောင်တွေနေထိုင်နေတဲ့ သစ္စဝါဒီဘုန်းကြီးကျောင်းကို စစ်ကောင်စီက လေကြောင်းနဲ့ ဗုံးကြဲချ တိုက်ခိုက်ခဲ့တာကြောင့် စစ်ဘေးရှောင် ၃ဝ ခန့်သေဆုံးခဲ့တယ်လို့ ဒေသခံတွေကပြောပါတယ်။

စစ်ဘေးရှောင်တွေနေထိုင်နေတဲ့ ဘုန်းကြီးကျောင်းကို စစ်ကောင်စီက ဒီကနေ့ ဇူလိူင်လ ၁၁ ရက်နေ့ မနက်အစောပိုင်း ၁ နာရီခန့်မှာ လေကြောင်းကနေ ဗုံး ၂ ကြိမ်ကြဲချခဲ့တာကြောင့် စစ်ဘေးရှောင်အများအပြားသေဆုံးပြီး ၁၅ ဦးထက်မနည်း ထိခိုက်ဒဏ်ရာပြင်းထန်တယ်လို့ သိရပါတယ်။

လင်းတလူးရွာဟာ စစ်ကိုင်း- ရွှေဘိုလမ်းပိုင်းမှာရှိပြီး ဒီလမ်းပိုင်းကို စစ်ကောင်စီစစ်ကြောင်းက ဇူလိုင် ၇ ရက်က စတင်ပြီး တင့်ကားတွေပါ သုံးကာ စစ်ကြောင်းထိုးနေတယ်လို့ ဒေသခံတွေကပြောပါတယ်။

အုန်းတောမှာရှိတဲ့ တင့်ကားတပ်ရင်း(၆ဝဝ၅)စစ်ကြောင်းကြောင့် ကျော်ဇေယျာ၊သစ်ချိုကုန်း ရုံးပင်ကန် စတဲ့ ကျေးရွာ ၁ဝ ရွာကျော်က စစ်ဘေးရှောင် ၁ဝဝ ကျော်ဟာ လင်းတလူးကျေးရွာ ဘုန်းကြီးကျောင်းမှာ ယာယီခိုလှုံနေကြတာ ဒေသခံတွေကနေ သိရပါတယ်။

#စစ်ကိုင်းမြို့
#လင်းတလူး

11/07/2025

ဝက်လက်နဲ့ ကျောက်မဲကို စစ်ကောင်စီလေကြောင်းတိုက်ခိုက် ၂ ဦးသေဆုံး

ဇူလိူင် ၁၁ / Bagan News

စစ်ကိုင်းတိုင်း ဝက်လက်မြို့နယ်နဲ့ ရှမ်းပြည်နယ် ကျောက်မဲမြို့နယ်ကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၂ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

ဝက်လက်မြို့နယ် အရှေ့ခြမ်းက ရေလည်မော်ရွာကို စစ်ကောင်စီ ဂျက်ဖိုက်တာ ၁ စီးက ဒီကနေ့ မနက် ၉ နာရီခန့်မှာ ဗုံးကြဲတိုက်ခိုက်ခဲ့တာကြောင့် အရပ်သား ၅ ဦးထိခိုက်ခဲ့ပြီး အသက်၅ဝ အရွယ် အမျိုးသား ၁ ဦး သေဆုံးခဲ့တယ်လို့ Wetlet Informational Network ကထုတ်ပြန်ပါတယ်။

ရှမ်းပြည်နယ် ကျောက်မဲမြို့ကိုလည်း ဒီကနေ့ မနက် အစောပိုင်း ၃ နာရီခန့်မှာ စစ်ကောင်စီ ဂျက်ဖိုက်တာ ၁ စီးက ကော်လီဟိုတယ်၊ မြိုမရဲစခန်းနဲ့ ခရိုင်ရဲရုံး တွေကို ဗုံး (၃)လုံး ကြဲချတိုက်ခိုက်ခဲ့တယ်လို့ TNLA ကထုတ်ပြန်ပါတယ်။

ဗုံးကျရောက်ပေါက်ကွဲမှုကြောင့် အမျိုးသား (၁)ဦး သေဆုံးခဲ့ပြီး အမျိုးသမီး (၁)ဦးနဲ့ အမျိုးသား (၄)ဦး ထိခိုက်ဒဏ်ရာရရှိကာ နေအိမ် (၄)အိမ် ထိမှန်ပျက်စီးခဲ့တယ်လို့ သိရပါတယ်။

TNLA ထုတ်ပြန်ချက်အရ စစ်ကောင်စီတပ်ရဲ့ (၂)ပတ်အတွင်း လေကြောင်းတိုက်ခိုက်မှုတွေကြောင့်
ကျောက်မဲ ၊ နောင်ချို ၊ မိုးကုတ်၊ သီပေါမြို့တွေမှာ ကလေးငယ်တွေအပါအဝင် အရပ်သား (၆)ဦး သေဆုံးခဲ့ပြီး (၂၈)ဦး ထိခိုက်ဒဏ်ရာရရှိခဲ့ပါတယ်။

#ဝက်လက်
#ကျောက်မဲ

10/07/2025

စစ်ကောင်စီ လေကြောင်းတိုက်ခိုက်ခဲ့တာကြောင့် အမျိုးသမီး ၃၄ ဦး သေဆုံး (Podcast)

ဇူလိူင် ၁ဝ / Bagan News

- ပြီးခဲ့တဲ့ဇွန်လထဲမှာ စစ်ကောင်စီက လေကြောင်းတိုက်ခိုက်ခဲ့တာကြောင့် အမျိုးသမီး (၃၄) ဦး သေဆုံးခဲ့ပြီး ၄၉ ဦးထိခိုက်ဒဏ်ရာ ရခဲ့တယ်လို့ မြန်မာ့အမျိုးသမီး သမဂ္ဂက- BWU ထုတ်ပြန်

- TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့နယ် ပန်မထိပ် ကျေးရွာကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် ကလေး (၂)ယောက် သေဆုံး

-၂ဝ၂၅ ခုနှစ် ဇွန်လအတွင်းမှာ စစ်အုပ်စုကျူးလွန်ခဲ့တဲ့ လူ့အခွင့်အရေးချိုးဖောက်မှု စုစုပေါင်း ၅၃၂ မှုရှိခဲ့တယ်လို့ အမျိုးသားညီညွတ်ရေးအစိုးရ၊ လူ့အခွင့်အရေးဆိုင်ရာဝန်ကြီးဌာန ထုတ်ပြန်

- တကသကျောင်းသားဟောင်းများ အင်အားစုရဲ့ အဖွဲ့ဝင် ကိုပိုင်ဖြိုးမင်း (ခ) ဒီရေ နဲ့ ဒဂုံတက္ကသိုလ်ကျောင်းသားများသမဂ္ဂ အလုပ်အမှုဆောင်ဟောင်း ကိုရှိန်းဝေအောင် တို့ကို စစ်ကောင်စီက ထောင်ဒဏ် နှစ် ၂ဝ အထိ ပြစ်ဒဏ်ချမှတ် စတဲ့ သတင်းတွေကြည့်ရူနိုင်ပါတယ်။

#နေ့စဉ်သတင်း

Bagan News TV

14/07/2025

14/07/2025

14/07/2025

14/07/2025

12/07/2025

12/07/2025

12/07/2025

11/07/2025

11/07/2025

11/07/2025

11/07/2025

10/07/2025

ที่อยู่

เว็บไซต์

แจ้งเตือน

ติดต่อ ธุรกิจของเรา

ทางลัด

แชร์

ประเภท