Yangon Nation, Chiang Mai (2026)

05/06/2026

❝ ဧရာဝတီတိုင်း တစ်ပတ်စာ မိုးလေဝသခန့်မှန်းချက်နှင့် အကြံပြုချက် ❞

လာမည့် ၇ ရက် (ဇွန်လ ၄ ရက်နေ့မှ ၁၀ ရက်နေ့အထိ) ဧရာဝတီတိုင်းဒေသကြီးအတွင်း မြို့နယ်နှင့် ခရိုင်များအလိုက် ဖြစ်ပေါ်လာနိုင်သည့် မိုးလေဝသအခြေအနေများ - ဘင်္ဂလားပင်လယ်အော်အလယ်ပိုင်းနှင့် ကပ္ပလီပင်လယ်ပြင်တို့တွင် အနောက်တောင်မုတ်သုံလေ စီးကြောင်း ပိုမိုအားကောင်းလာမှုကြောင့် ဧရာဝတီတိုင်းအတွင်း မိုးရွာသွန်းမှု သိသိသာသာ မြင့်တက်လာမည့် အလားအလာကို တွေ့ရှိရပါသည်။

မိုးအလွန်များပြားနိုင်သည့် ကမ်းရိုးတန်းနှင့် ပင်လယ်ဝဇုန် (ပုသိမ်၊ ငပုတော၊ လပွတ္တာ၊ ဖျာပုံ) - မုတ်သုံလေစီးကြောင်းနှင့် ပထမဆုံးထိတွေ့ရမည့် တိုင်းဒေသကြီး၏ တောင်ဘက်နှင့် အနောက်ဘက် ကမ်းရိုးတန်းအစွန်းပိုင်း မြို့နယ်များတွင် ပထမ ၄၈ နာရီအတွင်း မိုးအသင့်အတင့် စတင်ရွာသွန်းမည်ဖြစ်ပြီး၊ ၇၂ နာရီမှ ၁၂၀ နာရီ (ဇွန်လ ၇ ရက် ဝန်းကျင်) ကျော်လာသည်နှင့်အမျှ မိုးတိမ်တိုက်များ အဆက်မပြတ် ဝင်ရောက်ကာ ကောင်းကင်တစ်ခုလုံး တိမ်ထူထပ်နေပါမည်။ ၁၆၈ နာရီ (၇ ရက်) စုစုပေါင်း ခန့်မှန်းချက်မြေပုံအရ 250 mm မှ 350 mm (၁၀ လက်မမှ ၁၄ လက်မခန့်) အထိ မိုးအလွန်များပြားနိုင်သော အခြေအနေရှိပါသည်။

မိုးများနိုင်သည့် တိုင်းအလယ်ပိုင်း မြစ်ဝကျွန်းပေါ်ဇုန် (မြောင်းမြ၊ ဝါးခယ်မ၊ မအူပင်၊ ပန်းတနော်) - ကုန်းတွင်းပိုင်း မြစ်ဝကျွန်းပေါ်ဒေသများတွင် လာမည့် ၅ ရက်မှ ၇ ရက်အတွင်း မိုးရေချိန် ဆက်တိုက် စုဆောင်းရရှိမှု ကောင်းမွန်မည် ဖြစ်ပါသည်။ ၇ ရက်စာ စုစုပေါင်း မိုးရေချိန်သည် 140 mm မှ 275 mm ဝန်းကျင်အထိ ရှိနိုင်ပြီး နေရာအနှံ့အပြား မိုးရွာသွန်းမှု အားကောင်းပါမည်။

မိုးသင့်တင့်မှ မိုးများနိုင်သည့် တိုင်းအထက်ပိုင်းဇုန် (ဟင်္သာတ၊ ဇလွန်၊ မြန်အောင်၊ ကြံခင်း) - တိုင်းအထက်ပိုင်း ဧရာဝတီမြစ်ဝှမ်းတစ်လျှောက် မြို့နယ်များတွင် ပထမ ၃ ရက် (၇၂ နာရီ) အတွင်း မိုးရွာသွန်းမှု အနည်းငယ် ကျဲနိုင်သော်လည်း၊ ၁၂၀ နာရီမှ ၁၆၈ နာရီအတွင်း (သီတင်းပတ်ကုန်ပိုင်း) ၌ မုတ်သုံလေ ရေငွေ့များ ကုန်းတွင်းပိုင်းသို့ ပိုမိုဝင်ရောက်လာမှုကြောင့် ၇ ရက်စာ စုစုပေါင်း မိုးရေချိန် ၇၅ မီလီမီတာမှ ၁၅၀ မီလီမီတာ ခန့်အထိ (အထူးသဖြင့် ဟင်္သာတနှင့်ဇလွန်တစ်ဝိုက်) ရရှိလာနိုင်ပါသည်။

# IMD (အိန္ဒိယမိုးလေဝသဌာန) ၏ တရားဝင်ထုတ်ပြန်ချက်အရ - လာမည့် ၁၆၈ နာရီ (ခုနစ်ရက်) အတွင်း အိန္ဒိယသမုဒ္ဒရာ မြောက်ပိုင်းတစ်ပြင်လုံးတွင် ဆိုင်ကလုန်းမုန်တိုင်းစတင်ဖြစ်ပေါ်နိုင်ခြေ — လေဖိအားနည်းရပ်ဝန်း (Depression) ဖြစ်ပေါ်လာနိုင်ခြေ — သုညရာခိုင်နှုန်းဖြစ်၍ မုန်တိုင်းဖြစ်နိုင်ခြေ လုံးဝ မရှိပါ။ မုန်တိုင်းဖြစ်ပေါ်ရန် ခန့်မှန်းထားခြင်းမရှိသော်လည်း ထင်ရှားသော လေထုလှုပ်ရှားမှုများ ဆက်လက်တည်ရှိနေသည်ကို သတိပြုစောင့်ကြည့်ရပါမည်။

ဘင်္ဂလားပင်လယ်အော်အရှေ့မြောက်ပိုင်းနှင့် ယင်းနှင့်ဆက်စပ်နေသော အလယ်ပိုင်း-အရှေ့ပိုင်းတို့တွင် တည်ရှိခဲ့သည့် အထက်လေပွေလှိုင်းသည် ၂၀၂၆ ခုနှစ် ဇွန်လ ၃ ရက် UTC ၀၃:၀၀ နာရီတွင် အားလျော့သွားခဲ့ပြီးဖြစ်ပါသည်။ ကပ္ပလီပင်လယ်မြောက်ပိုင်းတွင် အထက်လေပွေလှိုင်းအသစ်တစ်ခုထပ်မံဖြစ်ပေါ်နေပြီး ပင်လယ်ရေမျက်နှာပြင်အထက် ၃.၁ ကီလိုမီတာမှ ၇.၆ ကီလိုမီတာအကြားတွင်တည်ရှိနေပါသည်။

Win Naing
Administration Team,
MMWEATHER

05/06/2026

❝ အီရန်စစ်ပွဲ တစ်လအတွင်းမှာတင် နှစ်ကြိမ် ပစ်ချတာ ခံခဲ့ရတဲ့ အမေရိကန် တိုက်လေယာဉ်မှူး ❞

အီရန်နဲ့ စစ်ရေးပဋိပက္ခ ပြင်းထန်နေချိန် အတောအတွင်း အီရန်ပိုင်နက်ထဲမှာ ပစ်ချခံခဲ့ရလို့ ရှာဖွေ ကယ်ဆယ်ခဲ့ရတဲ့ အမေရိကန် တိုက်လေယာဉ်မှူးဟာ အီရန်စစ်ပွဲမှာ ဒုတိယအကြိမ် လေယာဉ်ပစ်ချခံခဲ့ရတာဆိုတဲ့ သတင်းတွေ ထွက်ပေါ်လာပါတယ်။

အီရန်နဲ့ အမေရိကန်တို့ အပစ်ရပ် သဘောတူညီမှု မရခင် ၅ ရက်အလို ဧပြီ ၃ ရက်နေ့မှာ အီရန်ရဲ့ မြေပြင်အခြေစိုက် လေကြောင်းကာကွယ်ရေး စနစ်တွေဟာ နိုင်ငံအနောက်တောင်ပိုင်းမှာ အမေရိကန်ရဲ့ F-15E တိုက်လေယာဉ် တစ်စီးကို ပစ်ချခဲ့ပါတယ်။ အဲဒီ ဖြစ်စဉ်မှာ F-15Eရဲ့ လေယာဉ်မှူးရော၊ လက်နက်ထိန်းချုပ်ရေး အရာရှိဖြစ်တဲ့ တွဲဖက် လေယာဉ်မှူးပါ လေထီးနဲ့ ခုန်ထွက်ပြီး လွတ်မြောက်ခဲ့ပါတယ်။

အမေရိကန် စစ်တပ်ဟာ လေယာဉ်မှူးကို F-15E ပစ်ချခံရပြီး နာရီပိုင်း အတွင်းမှာတင် ရှာဖွေ ကယ်ဆယ်နိုင်ခဲ့ပါတယ်။ တွဲဖက် လေယာဉ်မှူးကတော့ ရန်သူ့နယ်မြေထဲမှာ ၂ ရက်လောက် ခြေရာဖျောက် ပုန်းအောင်းနေခဲ့ပြီး အဆုံးသတ်မှာတော့ တစ်ကမ္ဘာလုံး အာရုံစိုက်ရတဲ့ စစ်ဆင်ရေးကြီး တစ်ခုနဲ့ အမေရိကန်က အောင်အောင်မြင်မြင် ကယ်ထုတ်နိုင်ခဲ့ပါတယ်။

အမေရိကန်ရဲ့ အမျိုးသားလုံခြုံရေးဆိုင်ရာ သတင်းထောက် တစ်ဦးဖြစ်တဲ့ ရှောင်နေလော်က အဲဒီဖြစ်စဉ်မှာ အရင်ဆုံး ကယ်တင်ခံခဲ့ရသူ တိုက်လေယာဉ်မှူးဟာ အီရန်စစ်ပွဲအတွင်း ဒုတိယအကြိမ်မြောက် လေယာဉ်ပစ်ချ ခံရမှုနဲ့ ကြုံခဲ့တာလို့ သူ့ရဲ့ The High Sideဆိုတဲ့ သတင်းကြေညာမှု အစီအစဉ်မှာ စတင် ဖော်ပြခဲ့ပါတယ်။

ပထမ တစ်ကြိမ် ပစ်ချခံရမှုကတော့ အဲဒီဖြစ်ရက်မတိုင်ခင် သီတင်းငါးပတ်လောက်အကြာ မတ်လ ၁ ရက်နေ့တုန်းက ကူဝိတ် လေပိုင်နက်ထဲမှာ ကြုံခဲ့တာပါ။ အမေရိကန်နဲ့ အစ္စရေးတို့က အီရန်ကို တိုက်ခိုက်ခဲ့တဲ့အခါ အီရန်ကလည်း ကူဝိတ် အပါအဝင် အရှေ့အလယ်ပိုင်း ဒေသတွင်းက အမေရိကန် မဟာမိတ် နိုင်ငံတွေကို ဒုံးကျည်တွေ၊ ဒရုန်းတွေနဲ့ တုံ့ပြန် ပစ်ခတ်ခဲ့ပါတယ်။

မတ်လဆန်းတုန်းက အမေရိကန်နဲ့ ကူဝိတ် တိုက်လေယာဉ်တွေဟာ အီရန်ရဲ့ ဒရုန်းနဲ့ ဒုံးကျည်တွေကို ကြားဖြတ် တားဆီးနေရင်း ကူဝိတ်ရဲ့ F/A-18C တစ်စီးဟာ အမေရိကန် F-15E တိုက်လေယာဉ် သုံးစီးကို အချင်းချင်း မှားယွင်း ပစ်ချမိခဲ့ပါတယ်။ ပျက်ကျသွားတဲ့ F-15E တိုက်လေယာဉ်တွေထဲက လေယာဉ်မှူးနဲ့ တွဲဖက်လေယာဉ်မှူး စုစုပေါင်း ၆ ဦးက လေထီးနဲ့ ခုန်ထွက်ပြီး အသက်ဘေးက လွတ်မြောက်ခဲ့ကြပါတယ်။ နောက်ပိုင်းမှာ အီရန်ရဲ့ ပစ်ချမှုကို ခံခဲ့ရတဲ့ လေယာဉ်မှူးဟာ အဲဒီ ၆ ဦးထဲမှာ ပါဝင်ခဲ့တယ်လို့ နေလော်က ပြောပါတယ်။

အမည်ဖော်မပြထားတဲ့ အဲဒီ လေယာဉ်မှူးဟာ ဗီယက်နမ် စစ်ပွဲနောက်ပိုင်းမှာ စစ်ရေးပဋိပက္ခ တစ်ခုအတွင်း နှစ်ကြိမ်တိုင် ပစ်ချခံရတဲ့ ပထမဆုံး တိုက်လေယာဉ်မှူး အနေနဲ့လည်း မှတ်တမ်းဝင်ခဲ့ပါတယ်။ နှစ်ကြိမ်စလုံးမှာ သူဟာ ဒဏ်ရာ ကြီးကြီးမားမား မရခဲ့ပေမယ့် တွဲဖက် လေယာဉ်မှူးတွေကတော့ သူ့လောက် ကံမကောင်းခဲ့ကြပါဘူး။ ကူဝိတ်က ဖြစ်စဉ်မှာ တွဲဖက်လေယာဉ်မှူးဟာ လေထီးမှာ ပြဿနာဖြစ်လို့ အကျကြမ်းခဲ့ပြီး ဒဏ်ရာအတော်ပြင်းပြင်း ရခဲ့သလို အီရန်က ဖြစ်ရပ်မှာလည်း တွဲဖက်လေယာဉ်မှူးဟာ ရန်သူ့နယ်မြေထဲမှာ ဒဏ်ရာတွေနဲ့ ၂ ရက်လောက် ပုန်းအောင်းနေခဲ့ရပါတယ်။

CBS သတင်းဌာနက အီရန်စစ်ပွဲမှာ တိုက်လေယာဉ်မှူး တစ်ဦးဟာ နှစ်ကြိမ်တိုင် ပစ်ချခံရတဲ့ ဖြစ်စဉ်တွေ ကြုံခဲ့တယ်ဆိုတဲ့ ကိစ္စကို အမေရိကန်ရဲ့ ပင်တဂွန် စစ်ဌာနချုပ်ဆီ ဆက်သွယ် မေးမြန်းခဲ့ပေမယ့် တိုက်ရိုက် မဖြေဘဲ အမေရိကန် စစ်ရေးကွပ်ကဲမှုဌာန (CENTCOM)ဆီ ဆက်သွယ်မေးမြန်းဖို့ပဲ အကြောင်းပြန်ခဲ့ပါတယ်။

လေတပ်ရဲ့ အငြိမ်းစား ဒုတိယ ဗိုလ်ချုပ်ကြီး ဒေးဗစ် ဒက်ပ်တူလာက စစ်ပွဲတစ်ခုတည်းမှာတင် လေယာဉ်မှူးတစ်ဦးက နှစ်ကြိမ်တိုင် ပစ်ချတာ ခံရတယ် ဆိုတာက အတော်ကြီး ရှားပါးကြောင်း၊ လူတစ်ယောက်တည်း နှစ်ခါ မိုးကြိုးပစ်ခံရဖူးတာနဲ့ တူနေကြောင်း မှတ်ချက်ပေးသွားပါတယ်။

ကိုးကား: CBS
ဓာတ်ပုံ - Getty Images

05/06/2026

❝ကြည့်မြင်တိုင်ရှိ Yangon River View Condo basement ကားပါကင်တွင်မိုးများပြီ ရေများဝင်ရောက် ❞

၅.၆.၂၀၂၆ ရက်နေ့၊ မနက်၆နာရီ ၂၂ မိနစ်အချိန်၊ ရန်ကုန်တိုင်းဒေသကြီး၊ ကြည့်မြင်တိုင်မြို့နယ်၊ ဆေးရိုးတန်းနှင့် ငြိမ်းချမ်းရေးရပ်ကွက်၊ ကမ်းနားလမ်းနှင့် ပျဉ်းမပင်လမ်းထောင့်ရှိ Yangon River View Condo basement ကားပါကင်တွင်မိုးများပြီ ရေများဝင်ရောက်ခဲ့ပါတယ်။

အခင်းဖြစ်ရာသို့ ကြည့်မြင်တိုင်မြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များဖြင့် ရေစုပ်ရန် သွားရောက် ကူညီခဲ့တယ်လို့သိရပါတယ်။

MFSD

05/06/2026

❝ ပျဥ်းမနား၊ ရွှေချီ ရပ်ကွက် ၊၉လမ်းမှာမီးလောင် ❞

၄.၆.၂၀၂၆ ရက် ည ၁၁နာရီ အချိန်ခန့်တွင်နေပြည်တော် ပျဥ်းမနားမြို့ ရွှေချီ ရပ်ကွက် ၊၉လမ်း၊ စဥ့်အိုးဘို ဘုန်းကြီးကျောင်း ရှေ့တွင် မီးလောင်မှု ဖြစ်ပွားခဲ့တာပါ။

မီးလောင်ရာသို့ ပျဥ်းမနားမြို့နယ် မီးသတ်စခန်း မှ
မီးငြှိိမ်းသတ်ယာဥ် ၃ စီး၊မီးသတ်ရေသယ်ယာဥ် ၂ စီး၊ ရွာကောက်မီးသတ်စခန်းမှ မီးငြှိမ်းသတ်ယာဥ် ၁ စီး၊ ဘောဂဝတီမီးသတ်စခန်းမှ မီးငြှိမ်းသတ်ယာဥ် ၁ စီး၊ပျဥ်းမနားအရန်မီးသတ် KoHein Team ရေသယ်ယာဥ် ၁ စီး တို့ဖြင့် ထွက်ခွာ ငြှိမ်းသတ်ခဲ့ကြပါတယ်။

ဘ ၁၁နာရီ၁၇မိနစ် အချိန် မီးထိန်းနိုင်ခဲ့ပြီး ၁၁နာရီ ၁၉
မိနစ်မှာ အချိန် မီးငြိမ်း ခဲ့ပါတယ်။

မီးလောင်မှုကြောင့် ဆိုင်ခန်း ၅ ခန်း မီးလောင်ဆုံးရှုံးခဲ့တယ်လို့သိရပါတယ်
E-Bike အားသွင်းရာမှ အပူလွန်ကဲ၍ စတင်လောင်ကျွမ်းခဲ့ခြင်းဖြစ်ပါတယ်။

Credit- ကိုဟိန်းTeam
(ပျဥ်းမနားအရန်မီးသတ်)

05/06/2026

❝ အနောက်တောင်မုတ်သုံလေ ဝင်ရောက်မှုအခြေအနေ ❞

( ဆက်စပ်ဖြစ်ပေါ်လာမည့် မိုးလေဝသအခြေအနေခန့်မှန်းချက်များ)

(ဇွန်လ ၄ ရက် ၊ ညနေ ၄ နာရီ)

အနောက်တောင်မုတ်သုံလေဝင်ရောက်သည့် အခြေအနေ - အနောက်တောင်မုတ်သုံလေသည် တနိုင်ငံလုံးသို့ဝင်ရောက်ပြီးဖြစ်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန (မိုးဇလ - DMH) မှ ဇွန်လ ၄ ရက်နေ့ တရားဝင်ထုတ်ပြန်ထားပါသည်။
အိန္ဒိယမိုးလေဝသဌာနထုတ်ပြန်ချက်တွင် မြန်မာတနိုင်ငံလုံးသို့ အနောက်တောင်မုတ်သုံလေဝင်ရောက်ခြင်းမရှိသေးပဲ အထက်ပိုင်းဒေသများဖြစ်သည့် မန္တလေးတိုင်း၊ စစ်ကိုင်းတိုင်းဒေသများအထိ ရောက်ရှိနေပြီဖြစ်ကြောင်း ထုတ်ပြန်ထားသဖြင့် ကွာဟချက်အနည်းငယ်ရှိကြောင်း တွေ့ရပါသည်။

IMD နှင့် DMH တို့အကြား Onset ရက်စွဲ ကွာဟရခြင်းမှာ "အကြီးစား ဇလဗေဒစနစ် (Large-scale circulation)" နှင့် "ဒေသတွင်း ကုန်းတွင်းပိုင်း မိုးရွာသွန်းမှု စရိုက်လက္ခဏာ (Local rainfall criteria)" အပေါ် အခြေခံသည့် သတ်မှတ်ချက် ကွာခြားမှုကြောင့် ဖြစ်ပါသည်။ Large-scale circulation (အကြီးစား လေထုလှည့်ပတ်မှုစနစ်) ဆိုသည်မှာ ကမ္ဘာ့အဆင့် သို့မဟုတ် ဒေသတွင်းအဆင့် (Regional level) ကီလိုမီတာ ထောင်ပေါင်းများစွာ ကျယ်ဝန်းသည့် ဧရိယာအနှံ့ လေထုနှင့် အစိုဓာတ် စီးဆင်းလှည့်ပတ်နေသည့် စနစ်ကြီးတစ်ခုလုံးကို ဆိုလိုခြင်း ဖြစ်ပါသည်။

မြန်မာနိုင်ငံနှင့် အင်ဒိုချိုင်းနားဒေသတွင် ဖြစ်ပေါ်နေသော မိုးလေဝသဖြစ်စဉ်များ (မုတ်သုံဝင်ရောက်မှု နောက်ကျခြင်း၊ မိုးရွာသွန်းမှုအားနည်းခြင်း) သည် စတင်ဖြစ်ပေါ်နေသော “အားပျော့နေဆဲအယ်လ်နီညို - El Niño” ထက်စာလျှင် MJO (Madden-Julian Oscillation) ၏ လက်ရှိရောက်ရှိနေသော Phase နှင့် ယင်းကြောင့် ဖြစ်ပေါ်လာသည့် အဆိုပါဒေသရှိ OLR (Outgoing Longwave Radiation) တန်ဖိုးများနှင့် ပိုမိုတိုက်ရိုက် သက်ဆိုင်မှုရှိနေပါသည်။

ယခုရက်ပိုင်းအတွင်း ရုတ်တရက် မုတ်သုံဝင်ရောက်မှုအားလျော့ကျ/နောက်ကျခြင်း၊ လေဖိအားနည်းရပ်ဝန်းများ ဖြစ်ပေါ်မှုမရှိခြင်းနှင့် လတ်တလော ခြောက်သွေ့ပူပြင်းနေဆဲဖြစ်ခြင်းတို့သည် ရေတိုကာလ (Sub-seasonal) တွန်းအားများဖြစ်သော MJO ၏ လက်ရှိ Phase (Phase 8 & 1) နှင့် ၎င်းကြောင့်ဖြစ်လာသော OLR Positive Anomaly တို့က တိုက်ရိုက်လွှမ်းမိုးသက်ရောက်နေခြင်း ကြောင့်ဖြစ်ကြောင်း သုံးသပ်ရပါသည်။

မိုးရွာသွန်းနိုင်သည့် အခြေအနေခန့်မှန်းချက်
ဇွန်လ ၅ ရက်မှ ဇွန်လ ၁၁ ရက်အထိ ထွက်ရှိလာသော စုစုပေါင်းမိုးရေချိန်ခန့်မှန်းချက် (Accumulated Precipitation) မြေပုံအညွှန်းကိန်းများအရ မြန်မာနိုင်ငံတစ်ဝှမ်းလုံးတွင် ဖြစ်ပေါ်လာမည့် မိုးလေဝသ Dynamic နှင့် ပြည်နယ်/တိုင်းဒေသကြီးအလိုက် မိုးရွာသွန်းမှု အခြေအနေများ -

၁။ ပြည်နယ်နှင့် တိုင်းဒေသကြီးအလိုက် စုစုပေါင်းမိုးရေချိန် အနည်း/အများ ဇယား (ဇွန် ၅ - ၁၁) ** ဇယားပုံတွင်ကြည့်ပါ **

၂။ ရက်အလိုက် မိုးရေချိန်ရရှိမှု နည်းလား/များလား နှိုင်းယှဉ်ချက် (Temporal Trend Analysis)
ဇွန်လ ၅ - ၇ ရက် (မုတ်သုံလေ အရှိန်ကောင်းပြီး ကုန်းတွင်းပိုင်းသို့ အစိုဓာတ်စိမ့်ဝင်မှု တည်ငြိမ်ခြင်း) - ဇွန် ၇ ရက်" အထိ ပြကွက်များအရ ကမ်းရိုးတန်းနှင့် မြစ်ဝကျွန်းပေါ်ဒေသများတွင် ရင့်ထူသော ခရမ်းရောင်ပြကွက်များဖြင့် မိုးရေချိန်စုဆောင်းမှု စောစီးစွာ အရှိန်ရနေပါသည်။ ကုန်းတွင်းပိုင်း အလယ်ပိုင်းမြေပြန့်ဒေသ (Dry Zone) တစ်ခွင်တွင်မူ ကနဦးရက်များ၌ မိုးရေချိန်ရရှိမှု နည်းပါးနေဦးမည် ဖြစ်သည်။

ဇွန်လ ၈ - ၉ ရက် (နိုင်ငံအလယ်ပိုင်းနှင့် မြောက်ပိုင်းတွင် မိုးရေချိန် သိသိသာသာ များပြားလာခြင်း) - မုတ်သုံလေအားမြင့်တက်လာမှု (Monsoon Surge) ကြောင့် အစိုဓာတ်လမ်းကြောင်းသည် နိုင်ငံအလယ်ပိုင်းနှင့် ရှမ်းကုန်းမြင့်၊ စစ်ကိုင်းတိုင်းဒေသကြီးများအထိ ကျယ်ပြန့်စွာ တွန်းတင်ခြင်း ခံရသည်။ နေပြည်တော်၊ မန္တလေးနှင့် ရှမ်းမြောက်/ရှမ်းတောင်တစ်ခွင်တွင် မိုးရေချိန် (၇၀ - ၁၆၀ mm) အထိ လျင်မြန်စွာ ဖြစ်ထွန်းလာပြီး၊ ရက်အလိုက် မိုးရေချိန်ရရှိမှု အဟုန်ပြင်းစွာ တိုးတက်များပြားလာသည် ကို တွေ့ရသည်။

ဇွန်လ ၁၀ - ၁၁ ရက် (ဒေသအလိုက် မိုးရေချိန်အများဆုံးရောက်ရှိလာမည့်ကာလ) - မြန်မာနိုင်ငံတစ်ခုလုံးတွင် မိုးတိမ်တိုက်များ အလွန်ထူထပ်စွာ စုဆောင်းမိသွားသည်။ ကမ်းရိုးတန်းဒေသများတွင် ၃၀၀ mm မှ ၆၀၀ mm ကျော် အထိ နှင့် အနိမ့်ဆုံး ၈၀ mm မှ ၁၆၀ mm ကျော် (၃ လက်မမှ ၆ လက်မခွဲခန့်) အထိ မိုးရေချိန် တိုးတက်စုဆောင်းမိသွားပြီး သီတင်းပတ်၏ မိုးအပြင်းထန်ဆုံး Pattern သို့ ရောက်ရှိသွားပါသည်။

၃။ အနောက်တောင်မုတ်သုံလေ ဝင်ရောက်မှုအပေါ် မိုးလေဝသအခြေအနေ သုံးသပ်ချက်
(က) အနောက်တောင်မုတ်သုံလေ အခြေအနေ - မော်ဒယ်မြေပုံများ၏ ဖြန့်ကြက်ပုံ Dynamic အရ အနောက်တောင်မုတ်သုံလေသည် မြန်မာနိုင်ငံတစ်ဝှမ်းလုံးသို့ အပြည့်အဝ ဝင်ရောက်ကြီးစိုးထားပြီးဖြစ်ကာ အရှိန်အဟုန် အလွန်အားကောင်းနေသည် ကို ဆက်လက်ပြသနေသည်။ ကပ္ပလီပင်လယ်ပြင်နှင့် ဘင်္ဂလားပင်လယ်အော်တောင်ပိုင်း/အလယ်ပိုင်းတို့မှ တွန်းတင်လာသော Low-Level Jet (မုတ်သုံလေနိမ့်စီးကြောင်း) သည် ကုန်းတွင်းပိုင်းတစ်ခွင်လုံးသို့ အစိုဓာတ်များကို စဉ်ဆက်မပြတ် ပံ့ပိုးပေးထားသည်။

(ခ) ရာသီမိုးစစ်စစ်ဖြင့် အဆက်မပြတ် ရွာသွန်းခြင်း - မိုးဦးကျ ကနဦးကာလများကဲ့သို့ ရုတ်တရက် တက်လာတတ်သည့် မိုးသက်လေပြင်းနှင့် မိုးကြိုးပစ်ခြင်း ဖြစ်စဉ်များ (Convective Activity) လျော့နည်းသွားပြီး၊ လေထုစိုထိုင်းဆ မြင့်မားစွာဖြင့် တစ်နိုင်ငံလုံးတွင် နေ့စဉ်ရက်ဆက် ပုံမှန်အေးမြစိုစွတ်စွာ ရွာသွန်းသော ရာသီမိုးစစ်စစ် (Continuous Stratiform Monsoon Rains) အဖြစ်သို့ လုံးဝကူးပြောင်းသွားပြီ ဖြစ်သည်။

(ဂ) သဘာဝဘေးအန္တရာယ်နှင့် စိုက်ပျိုးရေး သတိပေးချက် (Operational Guidance) -
• Hydrological Hazards (ရေကြီး/မြေပြို အထူးသတိပြုရန်ဇုန်) - တနင်္သာရီတိုင်း၊ မွန်ပြည်နယ်၊ ကရင်ပြည်နယ်၊ ရခိုင်တောင်ပိုင်းနှင့် ချင်းပြည်နယ်တို့တွင် ၇ ရက်တာအတွင်း စုစုပေါင်းမိုးရေချိန်သည် ၃၅၀ mm မှ ၆၅၀ mm ကျော် အထိ လွန်ကဲစွာ စုဆောင်းမိနိုင်ကြောင်း မြေပုံ Patterns အားလုံးက ပြသနေသည်။ ရက်ဆက်မိုးသည်းထန်ခြင်းကြောင့် ဖြစ်ပေါ်လာမည့် လျှပ်တစ်ပြက်ရေကြီးခြင်း (Flash Floods) ၊ မြစ်ရေ/ချောင်းရေလျှံခြင်းနှင့် တောင်ခြေ/တောင်ပေါ်ဒေသများတွင် မြေပြိုခြင်း (Landslides) ဘေးအန္တရာယ်များကို အထူးသတိပြု စောင့်ကြည့်ရပါမည်။

လယ်ယာစိုက်ပျိုးရေး (Agromet Outlook) - မြစ်ဝကျွန်းပေါ်ဒေသများနှင့် ပဲခူးတိုင်း၊ နေပြည်တော်၊ မန္တလေးတိုင်း၊ မကွေးတိုင်းတို့တွင် ယခုရက်သတ္တပတ်အတွင်း ရရှိလာမည့် မိုးဦးကျမိုးရေချိန်သည် မြေဆီလွှာအစိုဓာတ် (Soil Moisture) ကို အကောင်းဆုံး ဖြည့်တင်းပေးမည် ဖြစ်သည်။ ထို့ကြောင့် မိုးစပါး ပျိုးထောင်ခြင်း၊ မိုးဦးသီးနှံများ (နှမ်း၊ မြေပဲ၊ ပဲမျိုးစုံ) အတွက် လယ်ယာမြေပြုပြင်ခြင်းနှင့် မျိုးစေ့ချခြင်း လုပ်ငန်းစဉ်များကို အရှိန်အဟုန်မြှင့်၍ စတင်ဆောင်ရွက်နိုင်ပြီ ဖြစ်ပါကြောင်း သုံးသပ်ခန့်မှန်းလိုက်ပါသည်။

Credit - U Win Naing

05/06/2026

❝ လေဆိပ် တိုက်ခိုက်ခံရမှုအတွက် အီရန်ကို ကူဝိတ် ရှုတ်ချ ❞

လေဆိပ်ကို ဒရုန်းနဲ့ တိုက်ခိုက်ခဲ့တဲ့ အီရန်ရဲ့ လုပ်ရပ်ကို ရာဇဝတ်မှုမြောက်တဲ့ ရန်လိုမှု တစ်ခုအဖြစ် ကူဝိတ်က စွပ်စွဲ ရှုတ်ချခဲ့ပါတယ်။

ဇွန်လ ၃ ရက်နေ့တုန်းက ကူဝိတ်စီးတီးမှာရှိတဲ့ ကူဝိတ်နိုင်ငံတကာ လေဆိပ်ကို အီရန်က ဒရုန်းတွေနဲ့ တိုက်ခိုက်ခဲ့တာကြောင့် လူ ၁ ဦးသေပြီး ၆၀ ကျော် ဒဏ်ရာရခဲ့ပါတယ်။ အီရန်ရဲ့ တိုက်ခိုက်မှုတွေအတွင်း ကူဝိတ်မှာရှိတဲ့ သံတမန်ရေးရာ အဆောက်အအုံ တချို့လည်း ထိခိုက်ပျက်စီးခဲ့တယ်လို့ ဆိုပါတယ်။

နာရီပိုင်းလောက် အကြာမှာတော့ အီရန်ရဲ့ အင်အားအကြီးဆုံး လက်နက်ကိုင် တပ်ဖွဲ့ဖြစ်ပြီး နိုင်ငံရဲ့ ဒုံးကျည်စီမံကိန်းတွေကို ထိန်းချုပ်ထားတဲ့ အစ္စလာမ်မစ် တော်လှန်ရေး အစောင့်တပ် (IRGC)က ကူဝိတ်လေဆိပ်ကို တိုက်ခိုက်ခဲ့ကြောင်း သတင်းတွေကို ငြင်းဆိုခဲ့ပါတယ်။ လေဆိပ်ရဲ့ ခရီးသည် အဝင်အထွက်လုပ်ရာ terminal တစ်ခုကို ထိမှန်ခဲ့တာဟာ ချွတ်ယွင်းပြီး ပျက်ကျတဲ့ အမေရိကန် လေကြောင်းကာကွယ်ရေး ဒုံးကျည်တစ်ခုသာ ဖြစ်တယ်လို့ အီရန်က တုံ့ပြန်ပါတယ်။ IRGCဟာ အစောပိုင်းတုန်းက ဒေသတွင်းမှာရှိတဲ့ အာရပ်နိုင်ငံတွေထဲက အမေရိကန် စစ်စခန်းတွေကို ပစ်မှတ်ထား တိုက်ခိုက်ခဲ့ကြောင်း ပြောကြားဖူးပါတယ်။

ကူဝိတ် ကာကွယ်ရေး ဝန်ကြီးဌာနကတော့ အခု တိုက်ခိုက်မှုမျိုးဟာ ဘာဆင်ခြေမှ ပေးလို့မရတဲ့ ရာဇဝတ်မှုမြောက်တဲ့ အတိအလင်း ရန်လိုမှုမျိုးအဖြစ် ရှုတ်ချခဲ့ပါတယ်။ နိုင်ငံခြားရေး ဝန်ကြီးကလည်း အီရန် သံအရာရှိ ၂ ဦးကို ၂၄ နာရီအတွင်း နိုင်ငံကနေ ထွက်ခွာဖို့ ညွှန်ကြားခဲ့ပြီး အီရန်သံရုံး အကြီးအကဲကိုလည်း ဆင့်ခေါ်ပြီး ကန့်ကွက်ခဲ့ပါတယ်။

ကူဝိတ်လေဆိပ်ကို ထိမှန်တာဟာ အမေရိကန်ရဲ့ လေကြောင်းကာကွယ်ရေး ဒုံးကျည်တစ်စင်းသာ ဖြစ်တယ်ဆိုတဲ့ IRGC စွပ်စွဲချက်ကို အမေရိကန် စစ်ရေး ကွပ်ကဲမှု ဗဟိုဌာန (CENTCOM)က ပယ်ချခဲ့ပြီး အရပ်သား ပစ်မှတ် တစ်ခုဖြစ်တဲ့ လေဆိပ်ကို အီရန်က ရည်ရွယ်ချက်ရှိရှိ သေချာ တွက်ဆပြီး တိုက်ခိုက်ခဲ့တာလို့ ပြောပါတယ်။

အခုသီတင်းပတ်ထဲမှာ အမေရိကန်က အီရန်ရေနံတင် သင်္ဘောတစ်စီးနဲ့ အီရန်ပိုင် ကက်ရှမ်ကျွန်းကို တိုက်ခိုက်ခဲ့တဲ့အတွက် ပင်လယ်ကွေ့ ဒေသထဲက အမေရိကန် စစ်စခန်းတွေကို ပစ်မှတ်ထား လက်တုံ့ပြန်ခဲ့ကြောင်း အီရန်က ကြေညာထားပါသေးတယ်။ အမေရိကန်ကလည်း ကိုယ့်ကိုယ်ကိုယ် ကာကွယ်ဖို့ ရည်ရွယ်ချက်နဲ့ အီရန်ပိုင်နက်ထဲမှာ တိုက်ခိုက်မှုတချို့ လုပ်ဆောင်ခဲ့သလို ကူဝိတ်နဲ့ ဘာရိန်းနိုင်ငံ ပိုင်နက်တွေဆီ ဦးတည်ပျံသန်းခဲ့တဲ့ အီရန် ဒုံးကျည်တွေကို ကြားဖြတ် ပစ်ချခဲ့ကြောင်း ထုတ်ပြန်ခဲ့ပါတယ်။

အီရန်က ဇွန်လ ၃ ရက်နေ့မှာ အိုမန် ပင်လယ်ကွေ့ထဲက အမေရိကန် ရေတပ်သင်္ဘောတစ်စီးကို ပစ်မှတ်ထား တိုက်ခိုက်ခဲ့တယ်လို့လည်း ပြောပေမယ့် CENTCOMက ငြင်းဆိုထားပါတယ်။

နှစ်ဖက်ကြား တိုက်ခိုက်မှုတွေ ရှိနေပေမယ့်လည်း ဧပြီလ ၈ ရက်နေ့ ကတည်းက ရယူထားတဲ့ အပစ်ရပ် သဘောတူညီမှုကိုတော့ အီရန်ရော၊ အမေရိကန်ပါ ဆက်လက် ထိန်းသိမ်းထားဆဲ ဖြစ်ပါတယ်။

လေဆိပ် တိုက်ခိုက်ခံရမှုအတွင်း သေဆုံးသူဟာ အိန္ဒိယ နိုင်ငံသား တစ်ဦးဖြစ်ပြီး အိန္ဒိယ နိုင်ငံခြားရေး ဝန်ကြီးဌာနက အဲဒီ တိုက်ခိုက်မှုအပေါ် ရှုတ်ချကြောင်း ကြေညာခဲ့ပါတယ်။ ဒါ့အပြင် အိန္ဒိယ နိုင်ငံသား ခရီးသည်တချို့ပါ ဒဏ်ရာတွေ ရခဲ့တယ်လို့ ဆိုပါတယ်။ ဘယ်အစုအဖွဲ့အဆို အခုလို တိုက်ခိုက်မှုမျိုး မလုပ်ဖို့ ထပ်လောင်း တောင်းဆိုကြောင်း အိန္ဒိယ နိုင်ငံခြားရေး ဝန်ကြီးဌာနက ထုတ်ပြန်သွားပါတယ်။

အီရန်နဲ့ အမေရိကန်တို့ဟာ လက်ရှိ အပစ်ရပ် ကာလအတွင်း စစ်ပြေငြိမ်းရေးကိစ္စကို ဆက်လက် ညှိနှိုင်း ဆွေးနွေးနေပေမယ့် တိုးတက်မှုတွေကတော့ နှေးကွေးနေဆဲ ဖြစ်ပါတယ်။

ကိုးကား: BBC
ဓာတ်ပုံ - Reuters

05/06/2026

❝ ဂျာမနီ ဖရန့်ဖတ်လေဆိပ်မှာ ဘိုးအင်း ၇၈၇ လေယာဉ် ရှေ့ဘီးကျိုးကျ၊ ဒဏ်ရာရသူတွေရှိ ❞

ဂျာမနီနိုင်ငံ၊ ဖရန့်ဖတ် (Frankfurt) လေဆိပ်မှာ ဆိုက်ရောက်ရပ်နားတဲ့ Boeing 787 ခရီးသည်တင်လေယာဉ်ကြီးတစ်စင်းဟာ ဇွန်လ ၄ ရက်၊ ဒီကနေ့ ရှေ့ဘီး (Nose gear) မမျှော်လင့်ဘဲ ကျိုးကျသွားခဲ့တာကြောင့် လေယာဉ်အမှုထမ်းတချို့ ဒဏ်ရာရရှိသွားခဲ့တယ်လို့ လူဖ်သန်ဆာ (Lufthansa) လေကြောင်းလိုင်းက ကြေညာခဲ့ပါတယ်။

"အဲဒီအချိန်မှာ ခရီးသည်တွေ လေယာဉ်ပေါ် မတက်ရသေးပါဘူး" လို့ အဆိုပါလေကြောင်းလိုင်းကုမ္ပဏီ ပြောရေးဆိုခွင့်ရှိသူတစ်ဦးက အီးမေးလ်မှတဆင့် သတင်းထုတ်ပြန်ချက်ထဲမှာ ပြောကြားခဲ့ပါတယ်။
အခင်းဖြစ်ပွားချိန်မှာ လေယာဉ်အမှုထမ်းတွေနဲ့ မြေပြင်ဝန်ထမ်းတွေပဲ လေယာဉ်ပေါ်မှာ ရှိနေခဲ့တာဖြစ်ကြောင်း သူက ထည့်သွင်းပြောကြားခဲ့ပါတယ်။ ဒီသတင်းကို Bloomberg News သတင်းဌာနက ပထမဆုံး သတင်းဖော်ပြခဲ့တာဖြစ်ပါတယ်။

ဒါ့အပြင် "လေယာဉ်အမှုထမ်းတချို့ ဒဏ်ရာရရှိခဲ့လို့ လက်ရှိမှာ ဆေးကုသမှု ခံယူနေရပါတယ်" လို့လည်း ကုမ္ပဏီဘက်က ဆက်လက်ပြောကြားခဲ့ပါတယ်။
“အင်ဂျင်နှစ်လုံးတပ် ကိုယ်ထည်ကျယ် အကြီးစားလေယာဉ်ရဲ့ ရှေ့ပိုင်းဟာ မြေပြင်နဲ့ ထိကပ်နေပြီး လေယာဉ်ဘေးပတ်လည်မှာ အရေးပေါ်ကယ်ဆယ်ရေးယာဉ်အမြောက်အမြား ဝိုင်းရံထားတာကို တွေ့ရတယ်”လို့ ရိုက်တာဓာတ်ပုံသတင်းထောက်တစ်ဦးရဲ့ အဆိုအရ သိရပါတယ်။

“ဒီဖြစ်စဉ်ဟာ ဒီကနေ့ ဒေသစံတော်ချိန် နေ့လယ် ၁၂ နာရီ ၄၅ မိနစ်မှာ ဖြစ်ပွားခဲ့ကြောင်း၊ အဆိုပါလေယာဉ်ဟာ အမေရိကန်နိုင်ငံ၊ လော့စ်အင်ဂျလိစ်မြို့ကို လေကြောင်းခရီးစဉ်အမှတ် LH450 အဖြစ် ပျံသန်းဖို့ စီစဉ်ထားတာဖြစ်ကြောင်း” လူဖ်သန်ဆာလေကြောင်းလိုင်းက ပြောပါတယ်။

"လက်ရှိမှာတော့ ဖြစ်ပွားရတဲ့အခြေအနေမှန်ကို သိရဖို့ သက်ဆိုင်ရာအာဏာပိုင်တွေနဲ့အတူ စုံစမ်းစစ်ဆေးနေပါတယ်" လို့ ကုမ္ပဏီက ထပ်လောင်းပြောကြားခဲ့ပါတယ်။

လူဖ်သန်ဆာလေကြောင်းလိုင်းဟာ Boeing 787 အမျိုးအစားထဲကမှ 787-9 ဗားရှင်းကို အသုံးပြုပြေးဆွဲနေတာဖြစ်ပြီး အဆိုပါလေယာဉ်တွေဟာ ကုမ္ပဏီအတွက် အသစ်စက်စက် အားဖြည့်ထားတဲ့ လေယာဉ်အမျိုးအစားတွေ ဖြစ်ပါတယ်။

05/06/2026

❝ ပုဂံကို ပုဂံဒေသပေါက်ပင်တွေနဲ့ စိမ်းလန်းလာအောင် အပူသက်သာအောင် လုပ်ဖို့လိုတယ် ❞

Conservation ဆိုတာ ရှေးဟောင်းအဆောက်ဦ/အဆောက်အုံတစ်ခုတည်းကို ကွက်လုပ်တာထက် Cultural Landscape တစ်ခုလုံးကို ထိန်းသိမ်းရေးလုပ်ရတာ။

အပင်တွေ သစ်ပင်သစ်တောတွေကို ထိန်းသိမ်းရေးလုပ်တာကလည်း သဘာဝတရားကို ထိန်းသိမ်းကူညီတဲ့ conservation အလုပ်ကို လုပ်တာပါဘဲ။

ဒါပေမယ့် ပုဂံဆိုတာ ပုဂံနဲ့တူဖို့လိုတယ်။ ကျောက်စာတွေထဲမှာ ရေးထားတဲ့ ပုဂံဒေသ သဘာဝပေါက်ပင် တွေကို ဦးစားပေးထိန်းသိမ်းဖို့လိုလာတယ်။

အပင်စိုက်တာ ကောင်းပါတယ်။ ကမ္ဘာကြီးအတွက် အကျိုးဖြစ်တယ်။ ဒါပေမယ့် ပုဂံကို ပုဂံဒေသပေါက် ပင်တွေနဲ့ စိမ်းလန်းလာအောင် အပူသက်သာအောင် လုပ်ဖို့လိုတယ်။

ရှေးနှစ်ပေါင်း ၉၀၀-၁၀၀၀ လောက်ကနေ 1960 ဝန်းကျင်အထိ ပုဂံမှာ ထန်းစိုက်တဲ့အလေ့ထရှိတယ်။
ပုဂံခေတ် ကျောက်စာတွေမှာ ထန်းပင်တွေ ရာထောင် ချီစိုက်ကြတယ်။ နောက်မျိုးဆစ်သစ်တွေ အတွက် ထားရစ်ခဲ့ကြတယ်။

အခုပြန်စိုက်ကြမယ်ဆိုရင် ထန်းပင်ဟာ အသင့်တော်ဆုံးအပင်တွေထဲက တစ်မျိုးဖြစ်တယ်။ ထန်းပြန်စိုက်တဲ့ အလေ့ထကို ပြန်စ ကြရင်ကောင်းမယ်။

ပုဂံကို ပုဂံနဲ့တူလာအောင် ထိန်းသိမ်းကြရအောင်။
ပုံက ကိုရှိုန်းကို ညောင်ဦး (Shein Ko) ဆီကယူလာတယ်။ လိုဂိုလေးပါတယ်။

Credit - Zay Myo Lin

04/06/2026

မင်္ဂလာနံနက်ခင်းပါ .....
ကောင်းကျိုးလိုရာ ဆန္ဒပြည့်ဝကြပါစေ .....

04/06/2026

❝ ထိုင်ဝမ်ရဲ့ ကျွန်းတွေမှာ ကင်းလှည့်စေဖို့ ရည်ရွယ်ထားတဲ့ ခွေးစက်ရုပ်တွေကို မိတ်ဆက်ပြသ ❞

တောင်တရုတ်ပင်လယ်ထဲက ကျွန်းငယ်တွေမှာ ကင်းလှည့်တာဝန်ယူဖို့ ရည်ရွယ်တည်ဆောက်ထားတဲ့ စက်ရုပ်ခွေးတွေကို ထိုင်ဝမ်စစ်တပ်က မိတ်ဆက် ပြသခဲ့ပါတယ်။

ထိုင်ဝမ် အစိုးရက ပိုင်ဆိုင်တဲ့ လက်နက် ထုတ်လုပ်ရေး ထိပ်တန်း လုပ်ငန်းစုကြီး ချန်ရှန်း အမျိုးသား သိပ္ပံနဲ့ နည်းပညာ ဌာနက ဇွန်လ ၂ ရက်နေ့က မီဒီယာ မိတ်ဆက်ပွဲ အခမ်းအနား တစ်ခုမှာ စက်ရုပ်ခွေးတွေအဖြစ် တည်ဆောက်ထားတဲ့ ဒရုန်းသုံးခုကို ထုတ်ပြခဲ့တာ ဖြစ်ပါတယ်။

လက်ရှိမှာ အဆင့်မြှင့်တင် မွမ်းမံတည်ဆောက်နေဆဲ ဖြစ်ပေမယ့် အဲဒီ စက်ရုပ်ခွေးတွေဟာ ရေပိုင်နက် အငြင်းပွားမှုတွေ ရှိနေတဲ့ တောင်တရုတ်ပင်လယ်ထဲက ထိုင်ဝမ်ပိုင် ကျွန်းတွေကို ကင်းလှည့်စောင့်ကြပ်ပေးဖို့ အနာဂတ်မှာ တာဝန်ယူလာနိုင်တယ်လို့ အဲဒီဌာနက ပြောပါတယ်။

စက်ရုပ်ခွေးတွေကိုတော့ အမေရိကန်ရဲ့ ခြေလေးချောင်းထောက် စက်ရုပ်ဒရုန်းတွေ တည်ဆောက်တဲ့ Ghost Robotics ကုမ္ပဏီရဲ့ နည်းပညာ အကူအညီနဲ့ ဖန်တီးထားတာလို့ ဆိုပါတယ်။ ကင်းလှည့်မှု၊ ထောက်လှမ်းရေးနဲ့ တိုက်ခိုက်ရေးအတွက် ကွဲပြားတဲ့ ကိရိယာတွေ၊ လက်နက်တွေကို စက်ရုပ်ခွေးတွေမှာ တပ်ဆင်ထားပါတယ်။ အောက်ခံ ပလက်ဖောင်းဖြစ်တဲ့ ခြေလေးချောင်းထောက် ဒရုန်းတွေကို Ghost Roboticsက အဓိက တည်ဆောက်ပြီး တွဲဖက်ပေးထားတဲ့ စနစ်တွေကတော့ ထိုင်ဝမ်ရဲ့ ပြည်တွင်းဖြစ် နည်းပညာတွေကို အသုံးပြုထားပါတယ်။

ထိုင်ဝမ်မှာ ကမ်းခြေစောင့် တပ်ဖွဲ့တွေနဲ့ မရိန်းတပ်သားတွေ ရှိပေမယ့်လည်း ကျယ်ပြန့်တဲ့ ကမ်းရိုးတန်းနဲ့ ကျွန်းတွေကို အချိန်ပြည့် စောင့်ကြည့်ဖို့ကတော့ ခက်ခဲကြောင်း၊ ထိုင်ဝမ်စစ်တပ်ဟာ တရားဝင် မမှာယူသေးပေမယ့် အခု စက်ရုပ်ခွေးလို တီထွင်မှုတွေကို အမှန်တကယ် လိုအပ်ကြောင်း ဌာနရဲ့ ဒုံးကျည် သုတေသန ယူနစ် ဒုတိယ အကြီးအကဲ ချန်ကောင်ကောင်းက ပြောကြားခဲ့ပါတယ်။

တောင်တရုတ်ပင်လယ်ထဲက ရေပိုင်နက် အငြင်းပွားသံတွေ အကျယ်လောင်ဆုံး သတင်းကြားရတဲ့ စပရတ်လေ ကျွန်းစုမှာ ထိုင်ဝမ်က ထိန်းချုပ်ထားတဲ့ အဓိက ကျွန်းတစ်ခု ရှိနေပါတယ်။ အဲဒီကျွန်းကို အစ်တူအဘာလို့ခေါ်ပြီး မဟာဗျူဟာအရ အချက်အခြာကျတဲ့ နေရာမှာ ရှိနေပါတယ်။ ကျွန်းပေါ်မှာ လူမနေဘဲ ကမ်းခြေစောင့် တပ်ဖွဲ့တစ်ခုသာ အခြေစိုက်ထားပါတယ်။

တရုတ်ဟာ တောင်တရုတ်ပင်လယ် ရေပြင်ဧရိယာ တစ်ခုလုံးနီးပါးကို ပိုင်နက်နယ်မြေအဖြစ် သိမ်းသွင်း သတ်မှတ်ထားတာကြောင့် ထိုင်ဝမ် အပါအဝင် ဒေသတွင်း နိုင်ငံတွေနဲ့လည်း အငြင်းပွားမှုတွေ ရှိနေပါတယ်။ ပြီးခဲ့တဲ့ နှစ်ပိုင်းတွေအတွင်း အစ်တူအဘာနဲ့ အနီးတဝိုက်မှာ တရုတ် ကင်းလှည့်ရေယာဉ်တွေရဲ့ ခုတ်မောင်းမှုတွေ ပိုမို များပြားလာတဲ့ အပေါ်မှာလည်း ထိုင်ဝမ်က ကန့်ကွက်ထားပါတယ်။

ကိုးကား: Reuters
ဓာတ်ပုံ - Reuters

Yangon Nation

05/06/2026

05/06/2026

05/06/2026

05/06/2026

05/06/2026

05/06/2026

05/06/2026

05/06/2026

04/06/2026

04/06/2026

ที่อยู่

เบอร์โทรศัพท์

เว็บไซต์

แจ้งเตือน

ทางลัด

แชร์

ประเภท