เว็บไซต์คืออะไร?

https://www.youtube.com/channel/UC43OopGtLMANHZvgTslLnPQ?view_as=subscriber

Tai TV Online ငဝ်းႁၢင်ႈသဵင်တႆး, 105, Chiang Mai (2025)

29/10/2025

သိုၵ်းလွႆ TNLA လႄႈတင်း ၶွင်ႇသီႇသိုၵ်းမၢၼ်ႈ SAC လူင်းလၢႆးမိုဝ်း ၵိုတ်းပၢင်တိုၵ်းတေႃႇၵၼ်
29/ 10/ 2025

ၽၢႆႇပွင်ႇၶၢဝ်ႇသိုၵ်းလွႆ PSLF/TNLA ပိုၼ်ၽၢဝ်ႇဝႃႈ တပ့်သိုၵ်းၶဝ် လႆႈလူင်းလၢႆးမိုဝ်း ၵိုတ်းပၢင်တိုၵ်းတေႃႇၵၼ်တင်းသိုၵ်းမၢၼ်ႈ ဝၢႆးလင်ပၢင်ႁူပ့်ထူပ်းဢုပ်ႇၵၼ် ပွၵ်ႈၵမ်းထီႈ ( 9 ) တီႈမိူင်းၶႄႇ ၼႆယဝ့် ။

ၼႂ်းၶေႃႈပိုၼ်ၽၢဝ်ႇတႅမ်ႈဝႃႈ - ၸုမ်းၽူႈတၢင်တူဝ် တပ့်သိုၵ်းလွႆ PSLF/TNLA ဢၼ်ၵႅမ်ၸွမ်သိုၵ်းလူင်တႃ့ၵျူၵ့်ၵျႃး ဢွၼ်ႁူဝ် လႄႈတင်း ၽူႈတၢင်တူဝ် ၽၢႆႇငမ်းယဵၼ်မိူင်းႁူမ်ႈတုမ် ၶွင်ႇသီႇတပ့်သိုၵ်း NSPNC ဢၼ်ၵႅမ်ၸွမ်သိုၵ်းလူင် ၵူဝ်ႇၵူဝ်ႇဢူး ဢွၼ်ႁူဝ်ၼႆ့ လႆႈႁူပ့်ထူပ်းဢုပ်ႇၵုမ်ၵၼ် ပွၵ်ႈၵမ်းထီႈ 9 တီႈဝဵင်းၶုၼ်မိင် ၼႂ်းဝၼ်းထီႈ 27- 28/ 10 / 2025 ယဝ့်တူဝ်ႈလီယၢမ်း ။

တီႈပၢင်ၵုမ်ၼၼ့် ၸွမ်းၼင်ႇ ၽူႈတၢင်တူဝ်မိူင်းၶႄႇ မိတ့်သ်တိူဝ်ႇ တဵင့်သျီႇၵျွၼ်း ၶဝ်ႈၵႄႈၵၢင် ငူပ့်ငိပၼ်လႄႈ သွင်ၽၢႆႇလႆႈၸႂ်ၽွမ့်ၵၼ် လူင်းလၢႆးမိုဝ်းလိၵ်ႈႁူမ်ႈမၢႆ ဝႃႈ ၽၢႆႇတပ့်သိုၵ်းလွႆ တေႁူၼ်လင်ပၼ်တီႈ မိူင်းမိတ်ႈ လႄႈတင်း မိူင်းၵုတ်ႈ ။

ၽၢႆႇတပ့်သိုၵ်းမၢၼ်ႈၼႆၵေႃႈ တေဢမ်ႇထူဝ်းသိုၵ်း တေဢမ်ႇဢဝ်ႁိူဝ်းမိၼ်မႃးပွႆႇမၢၵ်ႇ ။

တင်ႈတႄႇဢဝ် ဝၼ်းထီႈ 29/ 10/ 2025 ယၢမ်းၼႂ် ( 00 :00 ) မူင်းၼႆ့ၵႂႃႇ တပ့်သွင်ၽၢႆႇ ႁႂ်ႈၵိုတ်းယင့်ဝႆ့ တီႈဢၼ်ၽႅဝ်ထိုင်ဝႆ့ၼၼ့်သေ ႁႂ်ႈၵိုတ်းယိုဝ်း / ၵိုတ်းပၢင်တိုၵ်းတေႃးတေႃႇၵၼ် ၼႆယဝ့် ။

Source # PSLF/ TNLA

29/10/2025

ၶၢဝ်ႇဝၼ်းထီႈ 29/10/2025 #ငဝ်းႁၢင်ႊသဵင်တႆး #ၶၢဝ်ႇၶွပ်ႈႁွပ်ႈဝၼ်း #ပႃႈၼၢင်းဢၢၼ်ႇၶၢဝ်ႇ

29/10/2025

#ၶၢဝ်ႇၾူၼ်လူမ်း #ငဝ်းႁၢင်ႊသဵင်တႆး #သႅင်မွၼ်းၶိူဝ်း

28/10/2025

ႁႅင်းၵၢၼ်ယိင်းၵေႃႉၼိုင်ႈ ၺႃးဢဝ်မိတ်ႈပၢတ်ႇၶေႃး ၼႂ်းႁွင်ႈၼမ်ႉတီႈမႄႈသွတ်ႇ
28/ 10/ 2025

ဝၼ်းထီႈ 27/ 10/ 2025 မိူဝ်ႈဝႃးၼႆႉ ယိင်းသၢဝ်ႁႅင်းၵၢၼ်မၢၼ်ႈၵေႃႉၼိုင်ႈ ၺႃးၵူၼ်းႁၢႆႉဢဝ်မိတ်ႈပၢတ်ႇ ၶေႃး တီႈၼႂ်းႁွင်ႈၼမ်ႉ ( ထၢင်ၽၢႆႈ ) ၼႂ်းဝၢင်းလုမ်း ၽွင်းငၢမ်းၸေႊဝဵင်းမႄႈသွတ်ႇ ၸေႊတွၼ်ႈတၢၵ်ႇ မိူင်းထႆး ၼႆယဝ်ႉ ။

ၶၢဝ်ႇထႆး MGROnline တႅမ်ႈမွၵ်ႇၵႂႃႇဝႃႈ မိူဝ်ႈဝႃး ယၢမ်းၵၢင်ၼႂ်မွၵ်ႈ 11 မူင်း မီးယိင်းသၢဝ်မၢၼ်ႈၵေႃႉၼိုင်ႈ ၺႃးၵူၼ်းႁၢႆႉ ဢဝ်မိတ်ႈပၢတ်ႇၶေႃးၼႂ်းႁွင်ႈၼမ်ႉႄလႈ မၼ်းၼၢင်းလႅၼ်ႈဢွၵ်ႇမႃးၼိူဝ်တၢင်း ။ လိူတ်ႈဢွၵ်ႇ ၼမ်ၼႃႇလႄႈ ဢဝ်လူမ်ႉၵႂႃႇသေ ၵူၼ်းၸိူဝ်းယူႇၸမ် ဢွၼ်ၵၼ်ႁၢမ်ဢဝ်ၵႂႃႇတၢင်ႇႁူင်းယႃ ။ ၽၢႆႇၼိုင်ႈ ၵေႃႈ ၵပ်းသိုပ်ႇၸူးပလိၵ်ႈႁၢၼ်ၶဝ် ။

မိူဝ်ႈၸဝ်ႈၼႃႈတီႈမႃးထိုင်ၸိုင် လႆႈႁၼ်ႁွႆးလိူတ်ႈလႆယၢဝ်း လုၵ်ႉတီႈၼႂ်းႁွင်ႈၼမ်ႉထိုင်မႃး ၼိူဝ်တၢင်း ႁိမ်းလၢၼ်ႉၶၢႆၶူဝ်းၼႂ်းလုမ်းၸေႊဝဵင်း ။ ၵူၼ်းႁိမ်းႁွမ်းလၢတ်ႈဝႃႈ ၼၢင်းယိင်းဢၼ်ၺႃးၵေႃႇ ၵၢၼ်ႁၢႆႉၼၼ်ႉ ၸိုဝ်ႈႁွင်ႉ ဢီႉဢီႉၽဵဝ်း ( ဢႃယု 21 ပီႊ ) ပဵၼ်ၵူၼ်းႁၢင်ႈလီ မႃးႁဵတ်းၵၢၼ် ၼႂ်းလၢၼ်ႉၵေႃႇၾီႇ ဢၼ်မီးႁိမ်းၼၼ်ႉယင်းပႆႇႁိုင် တိုၵ်ႉလႆႈမွၵ်ႈ 1 လိူၼ်ၵွၺ်း ၼႆယဝ်ႉ ။

မိူဝ်ႈၽုၺ်ႇတူၺ်းၵွင်ႈဝူင်းၸွၼ်း သီႇသီႇၶႅမ်ႇမရႃႇၸိုင် လႆႈႁၼ်ၸၢႆးၵေႃႉၼိုင်ႈ ၼုင်ႈသိူဝ်ႈသီလမ် ၊ ၵူၼ်ပွတ်းလမ် တိုဝ်းမၢၵ်ႇႁူဝ်ၵႅပ်ႉသေ ၸွမ်းငွႆးယိင်း ၵေႃႉၼၼ်ႉ ။ ၽွင်းမၼ်းၼၢင်းၶဝ်ႈၵႂႃႇၼႂ်းႁွင်ႈၼမ်ႉ မၼ်းၵေႃႈၶဝ်ႈၵႂႃႇၸွမ်း ။ ယူႇၵမ်းၼိုင်ႈ ၶိုၼ်းလႅၼ်ႈ ဢွၵ်ႇမႃးသေ ပၢႆႈပႅတ်ႈတၢင်ႇတီႈ ။

ၸဝ်ႈၼႃႈတီႈၶဝ် လမ်းသွၵ်ႈႁႃမၼ်းတင်းၶိုၼ်း ၊ ၵူၼ်းမိူင်းမႄႈသွတ်ႇၶဝ်ၵေႃႈ ဢွၼ်ၵၼ်ၵူဝ်ႁႄသေ ၼႅတ်ႈႁပ်းၽၵ်းတူႁိူၼ်းၽႂ်မၼ်း ။ ထိုင်မႃးယၢမ်းတဵင်ႈၶိုၼ်းၸၢႆႉ ယဵပ်ႇၶဝ်ႈဝၼ်းထီႈ 28 ၼႂ်ၸဝ်ႉ ၸဝ်ႈၼႃႈတီႈၶဝ်ၸင်ႇၵႂႃႇတီႉၺွပ်းလႆႈႁိမ်းတိူၵ်ႈဢေႇတီႇဢႅမ်ႇ ၼႂ်းပၢမ်ႉၼမ်ႉမၼ်း ဢၼ်မီးတီႈ သၢပ်ႇဝဵင်းမႄႈသွတ်ႇ ။ ၵႂႃႇသိမ်းလႆႈပႃးတင်း မိတ်ႈပၢႆလႅမ်ဢၼ်မၼ်းၸၢႆးထိုမ်ႈတူၵ်းၼႂ်းထၢင်ၽၢႆႈ ။

မၼ်းၸၢႆးၼၼ်ႉ ၸိုဝ်ႈႁွင်ႉ ၼၢႆႊထမၽတ်းသ် ဢႃႇယု 28 ပီႊ ပဵၼ်ၵူၼ်းထႆး ယူႇဝၢၼ်ႈ မႄႈဢူးသု ၸေႊဝဵင်း တႃႈသွင်ယၢင်း ။ မၼ်းၸၢႆးယွမ်းႁပ်ႉဝႃႈ - ဢၢင်ႈ ဢၢၼ်းၵၼ်ႉၸၼ်လူလၢႆ မၼ်းၼၢင်းသေ ၸင်ႇၶဝ်ႈ ၵႂႃႇၸွမ်းၼႂ်းထၢင် ၊ ၵူၺ်းၵႃႈ မၼ်းၼၢင်းသမ်ႉတဵၼ်ႈတဵၼ်ႈတူင်ႉတူင်ႉသေ မင်သႂ်ႇမၼ်းၶိုၼ်းလႄႈ မၼ်းၸင်ႇဢဝ်မိတ်ႈပၢႆလႅမ် ၸီႉသႂ်ႇၶေႃးမၼ်းၼၢင်း ၼႆယဝ်ႉ ။

မိူဝ်ႈၶူၼ်ႉသွၵ်ႈၶိုၼ်းပိုၼ်းၵဝ်ႇမၼ်းၸၢႆးၸိုင် ပူၼ်ႉမႃးမိူဝ်ႈ 6 ပီႊ မၼ်းၸၢႆးယၢမ်ႈမီးတၢင်းၽိတ်း ၵၼ်ႉ ၸၼ်ၼၢင်းယိင်း ၊ ၸၵ်ႉၶုတ်ႈႁိမ်ၶူဝ်းပိူၼ်ႈသေ တိုၵ်ႉႁႃ ဢွၵ်ႇၶွၵ်ႈမႃးၶိုၼ်း ၼႂ်းဝၼ်းၼၼ်ႉၵွၺ်း ။ ၸင်ႇသမ်ႉမႃး ၵေႃႇၵၢႆႇၵၢၼ်ႁၢႆႉထႅင်ႈ ၸိူင်ႉၼင်ႇၼႆ ၼႆယဝ်ႉ ။

ဝၼ်းထီႈ 28/ 10/ 2025 ၼႆႉ ၸဝ်ႈၼႃႈတီႈၶဝ် ၸႂ်ႉမၼ်းၸၢႆးၵႂႃႇၸီႉႄၼၶိုၼ်း ပိူင်ၾၢင်ႁၢင်ႈ ဢၼ်မၼ်းလႆႈပူၼ်ႉပႅၼ်ႇတေႃႇၼၢင်းယိင်းၵေႃႉၼၼ်ႉသေ တေဢဝ်တၢင်းၽိတ်းၼၵ်းၼၵ်းၵႂႃႇ ၼႆယဝ်ႈ။

ၼၢင်းယိင်းၵေႃႉဢၼ်ၺႃးပၢတ်ႇၶေႃးၼၼ်ႉ တႄႉ တေႃႇထိုင်ယၢမ်းလဵဝ်တိုၵ်ႉလႆႈယူႇဝႆႉၼႂ်းႁွင်ႈၽႃႇတတ်း ႁွင်ႈ ICU တီႈႁူင်းယႃသေ လူဝ်ႇလိူတ်ႈဝႆႉတင်းၼမ် ၼႆယဝ်ႉ ။

Source # Daily News / MGROnline
Photo # Crd Thai News

28/10/2025

ၶၢဝ်ႇ 28/10/2025 #ၶၢဝ်ႇၶွပ်ႈႁွပ်ႈဝၼ်း #ငဝ်းႁၢင်ႊသဵင်တႆး #ပႃႈၼၢင်းဢၢၼ်ႇၶၢဝ်ႇ

28/10/2025

ႁိူၼ်းႁဵတ်းမူၵ်ႇတႅၵ်ႇ တူၼ်ႈတီး တႅၵ်ႇၽူင့်ပဵၼ်ၾႆး မီးၵူၼ်းလုတၢႆ 1 မၢတ်ႇၸဵပ်း 2 ၵေႃ့
28/ 10/ 2025

တီႈဢိူင်ႇၽႃမိုၼ်ႈ ၸေႊဝဵင်းတူၼ်ႈတီး မိူင်းတႆးပွတ်းၸၢၼ်းၼၼ့် ႁိူၼ်းလင်ၼိုင်ႈတိုၵ့်ႁဵတ်းမူၵ်ႇတႅၵ်ႇမူၵ်ႇၾႆးယူႇ သမ့်ပဵၼ်ၽေးၵိုင့်ၵၢင့် တႅၵ်ႇၽူင့်သႂ်ႇၶဝ်လႄႈ မီးၵူၼ်းလုတၢႆ 1 ၵေႃ့ မၢတ်ႇၸဵပ်း 2 ၵေႃ့ ၼႆယဝ့် ။

ၵူၼ်းပိုၼ့်တီႈ လၢတ်ႈတီႈၽူႈသိုဝ်ႇၶၢဝ်ႇဝႃႈ မိူဝ်ႈၼႆ့ ဝၼ်းထီႈ 28/ 10/ 2025 ယၢမ်းၵၢင်ၼႂ် မွၵ်ႈ 9 မူင်း တီႈဝၢၼ်ႈၵွင်ယွေး ဢိူင်ႇၽႃမိုၼ်ႈ ၸေႊဝဵင်းတူၼ်ႈတီးၼၼ့် ပဵၼ်လွင်ႈတႅၵ်ႇၽူင့်သေ ဢဝ်ၾႆးမႆႈႁိူၼ်း ။ ၼၢင်းယိင်းၵေႃ့ၼိုင်ႈ လႆႈလုတၢႆထင်တီႈသေ ၽူႈၸၢႆး 2 ၵေႃ့ လႆႈတိူဝ့်မၢတ်ႇၸဵပ်းၵႂႃႇ ၼႆယဝ့် ။

ၽၢႆႇၸွႆႈၵူၼ်းထူပ်းၽေးၵေႃ့ၼိုင်ႈလၢတ်ႈဝႃႈ - ” ၶဝ်တိုၵ့်ႁဵတ်းမူၵ်ႇၾႆးမူၵ်ႇတႅၵ်ႇယူႇသေ ဢဝ်တႅၵ်ႇၽူင့်ပဵၼ်ၾႆးလုၵ့်မႆႈဢေႃႈ ။ ၾႆးလုၵ့်မႆႈႁႅင်းၼႃႇလႄႈ ၵေႃ့ပဵၼ်ၼၢင်းယိင်းၼၼ့် လႆႈလုတၢႆပႃးၵႂႃႇၼႂ်းၾႆး ။ ႁဵတ်းမူၵ်ႇတႅၵ်ႇမူၵ်ႇၾႆးၼႆ့ ၸၢင်ႈပဵၼ်ၽေးၼႃႇၶႃႈ ။ ၽိတ်းဢိတ့်ၼိုင်ႈၵွၺ်းၵေႃႈ ၸၢင်ႈပဵၼ်ၾႆးၽူင့်တႅၵ်ႇဢေႃႈ ွ ဢမ်ႇလီဝႆ့မဝ်မၢင်ၶႃႈ ” ၼႆယဝ့် ။

တီႈဢၼ်ၾႆးမႆႈၼၼ့် လူတ့်ၵႃးၶႄမွတ်ႇၾႆး 3 လမ်း မႃးၸွႆႈႁူတ်းၼမ့်ၶႄၾႆး ။ ၵူၼ်းလုတၢႆမၢတ်ႇၸဵပ်းၶဝ်တႄ့ ၸုမ်းၶွႆႇၶႃပေလႅင်ၶဝ် ဢဝ်ၵႃးတၢင်ႇၵူၼ်းပဵၼ် သူင်ႇၵႂႃႇတီႈႁူင်းယႃလူင်ၸဝ်ႈၸၢမ်ႇထုၼ်း ၼႆယဝ့် ။

မိူဝ်ႈပီႊၵၢႆ 2024 ၵေႃႈ တီႈဝဵင်းၵၢတ်ႇလေႃ့ မိူင်းတႆးပွတ်းၸၢၼ်း ၽွင်းတိုၵ့်ႁဵတ်းမူၵ်ႇတႅၵ်ႇမူၵ်ႇၾႆး တႃႇတေပွႆႇႁူင်းၾႆးမိၼ်တီႈၵျွင်းမုၼ်ၸဝ်ႈဝၢၼ်ႈမႂ်ႇ ပွၵ့် 3 ယူႇၼၼ့် ဢဝ်ယၢမ်းတႅၵ်ႇၽူင့်ပဵၼ်ၾႆးသေ သင်ႇၶႃႇၸဝ်ႈ 2 ပႃး လႄႈ ၵူၼ်း ႁိူၼ်း 3 ၵေႃ့ လႆႈတိူဝ့်မၢတ်ႇၸဵပ်းၵႂႃႇ ၼႆယဝ့် ။

တီႈမႃးၶၢဝ်ႇ Source # DVB
Photo Credit # Pa-O's Supporter Group / FB Social Media

27/10/2025

ၶႃႈဝၢၼ်ႈၵူၼ်းမိူင်း ၶဝ်ႈႁူမ်ႈၵႃႇရဝၼပ်ႉယမ် ၸႃႇပၼၸဝ်ႈမႄႈၶုၼ်ႁေႃၶမ်းထႆး
27/ 10/ 2025

ဝၼ်းထီႈ 27/ 10/ 2025 မိူဝ်ႈၼႆႉ ႄတႇဢဝ်ယၢမ်းၼႂ် ၵူၼ်းဝၢၼ်ႈၵူၼ်းမိူင်း ဢွၼ်ၵၼ်ၵႂႃႇၵႃႇရဝၼပ်ႉယမ် ၸႃႇပၼ ၸဝ်ႈမႄႈၶုၼ်ႁေႃၶမ်းထႆး ၽရၽၼ်ႊပီႊလူင် ၸဝ်ႈၼၢင်းသီရိၵိတ်ႇ ( ဢႃယု 93 ပီႊ ) တီႈဝၢင်းႁေႃၶမ်း ဢၼ်မီးၼႂ်းပွၵ်ႉၽရၼၶွၼ်ႊ ဝဵင်းၵုင်းထဵပ်ႈမိူင်းထႆး ၼႆယဝ်ႉ ။

ၶၢဝ်ႇထႆးလၢႆဢွင်ႈ ဢွၵ်ႇဝႆႉဝႃႈ ၸႃႇပၼၸဝ်ႈမႄႈၶုၼ်ႁေႃၶမ်းထႆး ၽရၽၼ်ႊပီႊလူင်ၼၼ်ႉ တင်ႈယူႇဝႆႉတီႈ သႃလႃးသႁႃထႆးသမႃးၶူမ်ႊ - ဝၢင်းႁေႃၶမ်း ဝဵင်းပၢင်ၵွၵ်ႇၵုင်းထဵပ်ႈ ။ ၶႃႈဝၢၼ်ႈၵူၼ်းမိူင်းတင်းလၢႆ ဢွၼ်ၵၼ်ၵႂႃႇ ၵႃႇရဝ ၼပ်ႉယမ်လႆႈ ႄတႇဢဝ်ၵၢင်ၼႂ် 8 မူင်း ထိုင် ႁူဝ်ၶမ်ႈ 4 မူင်း ၵူႊမိုဝ်ႉဝၼ်း ၊ တေဝႆႉဝၢင်းႁိုင်ထိုင် 1 ပီႊ ။

ၽၵ်းတူတၢင်းၶဝ်ႈ မီးဝႆႉ 2 တီႈ ။ ပဵၼ်တီႈ တေႃႇၼႃႈၸၼ်ႉၸွမ်ထမသၢတ်ႇ ႄလႈတင်း တီႈဢူးမင်ႇၽရႃႉရၢမ်ႊ ။ ၸဝ်ႈၼႃႈတီႈၼႂ်းဝၢင်းႁေႃၶမ်း ယွၼ်းႁႂ်ႈ ဢွၼ်ၵၼ်ၼုင်ႈၶူဝ်း ဢၼ်ၵိုင်ႇလႅပ်ႈတင်း ၸႃႇပၼၶိူဝ်းၸဝ်ႈၶိူဝ်းၶုၼ် ။ ၼၢင်းယိင်း ႁႂ်ႈၼုင်ႈသိၼ်ႈ ဢမ်ႇၼၼ် ၵၢပ်ႇပူင်းယၢဝ်းပူၼ်ႉႁူဝ်ၶဝ်ႇလူင်းတႂ်ႈ ၊ ငိူင်ႉဝႄႈ ၼၢင်းယိင်းၼုင်ႈၵူၼ် ။ သင်ဝႃႈ ဢမ်ႇလႆႈၼုင်ႈသိၼ်ႈမႃးၸိုင် တင်းၸဝ်ႈၼႃႈတီႈၶဝ် မီးဝႆႉသိၼ်ႈတူင်ႇသီလမ် တႃႇပၼ်ယိမ်ၼုင်ႈ ၼႆယဝ်ႉ ။

ၽၢႆႇၼႂ်းပၢင်ၸႃႇပၼ တေမီးဝႆႉဢွင်ႈတီႈ တႅမ်ႈတၢင်ႇမၢႆတွင်းထိုင် ၸဝ်ႈမႄႈၶုၼ် ႁေႃၶမ်း ၊ ႁွင်ႈၼႄပိုၼ်း ၸဝ်ႈမႄႈၶုၼ်ႁေႃၶမ်း ၊ ဢွင်ႈတီႈၸႅၵ်ႇၼမ်ႉၵိၼ်လႄႈ လဵင်ႉလူၶၢမ်ႇၶႅၵ်ႇ ၊ ဢွင်ႈတီႈလုမ်းလႃးပၢႆးယူႇလီ ၸဵမ်ၸိူဝ်းၼၼ်ႉ ၼႆယဝ်ႉ ။
ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈ ( 10 ) ၼႆၵေႃႈ ပူင်ၵႂၢမ်းဝႆႉဝႃႈ ႁႂ်ႈၸတ်းပၢင်ၸႃႇပၼႃႉ ၸဝ်ႈမႄႈ ၸွမ်းၼင်ႇၾိင်ႈထုင်းၼႂ်းႁၢင်ႈၼႂ်းႁေႃ ႁႂ်ႈယိုင်ႈယႂ်ႇၶိုၵ်ႉတွၼ်းထီႉသုတ်း ။

တႃႇတေႁၢင်ႈၶိူင်ႈတူၵ်းတႅင်ႇ တၢင်းႁၢင်ႈလီပၢင်ၸႃႇပၼ ၼၼ်ႉ ယူႇတီႈထၢၼ်ၽွင်းလူင်ၽၢႆႇယဵၼ်ႇငႄႈပၢႆးမွၼ်း ဢဝ်ပုၼ်ႈၽွၼ်းသေ ၽိတ်ႈမွၵ်ႇပႃးတင်းၽူႈလူင်ႉလႅၼ်ႇ ၽၢႆႇပၢၼ်းသီ ၊ ပၢၼ်းပွတ်ႈ ၊ ပၢၼ်းပူး ၸိူဝ်းၼၼ်ႉယဝ်ႉ တေၶိုင်ပွင်ႁဵတ်းသၢင်ႈၵႂႃႇ ႁႂ်ႈပေႃးၶိုၵ်ႉတွၼ်းထီႉသုတ်း ၼႆယဝ်ႉ ။

မိူဝ်ႈဝႃး ဝၼ်းထီႈ 26/ 10/ 2025 ယၢမ်းႁူဝ်ၶမ်ႈ တူၼ်ၸဝ်ႈၶူးလူင်မႁႃသင်ႇၶ ၼႃႇယၵမိူင်းထႆး ဢွၼ်ႁူဝ် ၼမ်းၼႃႈ ပႃးတင်း ၶုၼ်ႁေႃၶမ်း တူၼ်ထူၼ်ႈ ( 10 ) ႄလႈ ၼၢင်းၶၢင်းႁေႃ ဢိၵ်ႇလူၺ်ႈ လုၵ်ႈလၢၼ်မူႇပီႈၸုမ်းၼွင်ႉ ၶိူဝ်းၸဝ်ႈၶိူဝ်းၶုၼ် ယူႇတီႈႁူင်းယႃလူင် ၸူလႃးလွင်းၵွၼ်ႊသၽႃႊၵႃႊၶျတ်ႉသေ ဢွၼ်ၵၼ် ဢဝ်ၶၢပ်ႈတူဝ် ၸဝ်ႈ မႄႈၼၢင်းႁေႃၶမ်း မႃးဝႆႉဝၢင်းၼိူဝ်တၢင်းၵႄးၼႂ်းဝၢင်းႁေႃၶမ်း ။ ထႅဝ်လူတ်ႉၵႃး ယႆၵၼ်ႁေႃႈမႃး ၶၢဝ်းတၢင်းမွၵ်ႈ 6 လၵ်း ။ မီးၶူးမေႃယႃလူင် မေႃယႃဢွၼ်ႇၶဝ် ၽူႈႁၢပ်ႇၵၢၼ်ၼႂ်းႁူင်းယႃ ၸဝ်ႈၼႃႈတီႈၽၢႆႇႁူမ်ႇလူမ်ႈ ဢိၵ်ႇတင်းၶႃႈဝၢၼ်ႈၵူၼ်းမိူင်းတင်းလၢႆ ၼင်ႈပႂ်ႉသွင်ၾင်ႇၶၢင်ႈတၢင်းသေ ၵႃႇရဝသူင်ႇသင်ႇမၼ်းၸဝ်ႈၼၢင်း ။ မၢင်ၸိူဝ်းၵေႃႈ မွင်ၸႂ်သေလၢႆၼႃႇႄလႈ ထိုင်ပေႃးပဵၼ်ၼမ်ႉႁူၼမ်ႉတႃၸွမ်း ။

ဝိမၢၼ်ႊဢုပ်းၶမ်း တႃႇသႂ်ႇၶၢပ်ႈတူဝ်ၸဝ်ႈမႄႈၼၼ်ႉ ဢဝ်ၸွင်ႈၽိူၵ်ႇ 7 ၸၼ်ႉ ၵင်ႈဝႆႉပႃႈၼိူဝ် ၼႄ လွင်ႈပဵၼ်ၶိူဝ်း ၸဝ်ႈၶိူဝ်းၶုၼ် ဢၼ်သုင်သုတ်း ။ မိူဝ်ႈပႆႇသႂ်ႇၶၢပ်ႈတူဝ်ၼၼ်ႉ မီးပၢင်ႇသွၼ်းၼမ်ႉၶၢပ်ႈတူဝ် ။ လူႇမွၵ်ႇတႆႈတဵၼ်း သူင်ႇသင်ႇမၼ်းၸဝ်ႈၼၢင်း ။ ၽိတ်ႈပၢင်းသင်ႇၶႃႇရႁၢၼ်း 93 တူၼ်သေ လူႇသၢင်ႇၵၢၼ်းယဝ်ႉ ထွမ်ႇတြႃးဢသုၽ ။

ပၢင်ၸႃႇပၼၸဝ်ႈမႄႈၶုၼ်ႁေႃၶမ်း တေဝႆႉဝၢင်းတႃႇၶၢဝ်းတၢင်း 1 ပီႊ ။ တေလူႇတၢၼ်းၵၢပ်ႈသွမ်းသင်ႇၶၸဝ်ႈ တင်းသွမ်းၼႂ် သွမ်းဝၼ်းသေ မီးပၢင်လွတ်ႈဢၢၼ်ႇတြႃးၵူႊၶမ်ႈၶိုၼ်း ၼႆယဝ်ႉ ။

ၸွမ်ၽွင်းလူင်မိူင်းထႆး ၼၢႆႊဢၼုထိၼ်ႊ ၶျၼ်ႊဝီႊရၵုၼ်ႊ ၼႆၵေႃႈ ပူင်ၵႂၢမ်းႁႂ်ႈပူၵ်းၸွမ်ပိဝ်တုင်းၸိူဝ်ႉၸၢတ်ႈ ၶိုင်ႈသဝ် တႃႇၶၢဝ်းတၢင်း 30 ဝၼ်း ။ ၶၢဝ်းယၢမ်းမၢႆတွင်းမွင်ၸႂ် ဝႆႉ 1 ပီႊ ။ ၶႃႈႁၢပ်ႇၵၢၼ်ၶုၼ် ႁႂ်ႈၼုင်ႈဝႆၶူဝ်းလဵင်း သီသဝ်ႈဝဝ်းမွင် တႃႇၶၢဝ်းတၢင်း 1 ပီႊလႄႈ ၶႃႈဝၢၼ်ႈၵူၼ်းမိူင်းၸမ်း ၼုင်ႈဝႆတႃႇ 30 ဝၼ်း ။

ႁဵတ်းပွႆးႁဵတ်းလၢမ်း ႁႂ်ႈၶိုင်ပွင်ႁဵတ်းၵႂႃႇၸွမ်းၼင်ႇဢၼ်ၵိုင်ႇငၢမ်ႇၵၼ်တင်း ယၢမ်းသဝ်ႈဝဝ်းမွင် ၼႆယဝ်ႉ ။

တင်းမိူင်းပတ်းပိုၼ်ႉ မိူၼ်ၼင်ႇ တီႈလုမ်းလူင်ပွင်ၸိုင်ႈသေမဝ်ႇဝႃႈ ၊ ၸွမ်းႁူင်းႁဵၼ်း ၊ ၸွမ်းၸၼ်ႉၸွမ်သေမဝ်ႇဝႃႈ ၊ ၸွမ်းဝတ်ႉၸွမ်းဝႃး ၼႂ်းပွၵ်ႉၼႂ်းဝဵင်းၼႆ ၵေႃႈ ဢွၼ်ၵၼ်ၸတ်းႁဵတ်းပၢင်ၵႃရဝၼပ်ႉယမ် ၼႄလွင်ႈမွင်ၸႂ် တီႈၽႂ်ဢွင်ႈမၼ်းယူႇယဝ်ႉ ။

ၸဝ်ႈမႄႈ ၽရၽၼ်ႊပီႊလူင် သီရိၵိတ်ႇၼႆႉ ပဵၼ်ၼၢင်းၸုမ်ႈၶၢင်းႁေႃ ၸဝ်ႈမုၼ်ယႂ်ႇၶုၼ်ႁေႃၶမ်း တူၼ်ထူၼ်ႈ ( 9 ) ၽူႊမိၽုလ်ဢတုလ်ယၻဵတ်ႇသေ မီးလုၵ်ႈ ၸၢႆးလူင် ( ဢၼ်ပဵၼ်ၶုၼ်ႁေႃၶမ်းတူၼ်ထူၼ်ႈ-10 ) ႄလႈ လုၵ်ႈယိင်း 3 ၸဝ်ႈ ။

မၼ်းၸဝ်ႈၼၢင်းၼၼ်ႉ ၽွင်းတိုၵ်ႉၼုမ်ႇတိုၵ်ႉႁႅင်း ၵႆႉဢွၵ်ႇၶၢဝ်းတၢင်းၸွမ်း ၶုၼ် ႁေႃၶမ်းသေ ႄလႇႁႃသူႇၸႂ်းထိုင် ၶႃႈဝၢၼ်ႈၵူၼ်းမိူင်း ၸဵမ်ဝၢၼ်ႈၼွၵ်ႈၼႂ်းဝဵင်း ။ ပူၵ်းပွင်တူၺ်းထိုင်ၽဝႃႉၵူၼ်းမိူင်း ၸဵမ်ဢဝ်ပၢႆးယူႇလီ ၊ ပၢႆးပၺ်ႇၺႃႇ ၊ ပၢႆးမၢၵ်ႈမီးၸဵမ်ၸိူဝ်းၼၼ်ႉ ။

ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈ ( 9 ) ၽူႊမိၽုလ်ဢတုလ်ယၻဵတ်ႇ ၼၼ်ႉ ပဵၼ်ၶုၼ်ႁေႃၶမ်းဢၼ် လႆႈၼင်ႈႁၢင်ႈႁေႃတေႃၶမ်း ယၢဝ်းၼၢၼ်းထီႉသုတ်း ၼႂ်းလုမ်ႈၾႃႉလႄႈ ၼၢင်းၸုမ်ႈႁေႃၶမ်း ၽရၽၼ်ႊပီႊလူင် သီရိၵိတ်ႇ ၼႆၵေႃႈ လႆႈဝႃႈပဵၼ်ၼၢင်းႁေႃၶမ်း ဢၼ်ၼင်ႈၶၢင်းႁေႃယၢဝ်းၼၢၼ်းထီႉသုတ်း ၼႂ်းလုမ်ႈၾႃႉယူႇယဝ်ႉ ။

Source # Thairath / Khaosod / MCOT News
Photo Credit # Khaosod / Thai News

27/10/2025

မိူင်းမိတ်ႈ ၺႃးဢဝ်ႁိူဝ်းမိၼ်ပွႆႇမၢၵ်ႇထႅင်ႈ ႁိူၼ်းယေးလုၵွႆ
27/ 10/ 2025

တပ့်ၶွင်ႇသီႇသိုၵ်းမၢၼ်ႈ တိုၵ့်ၶိုင်ပွင်တိုၵ်းသိမ်းဢဝ်ၶိုၼ်းဝၢၼ်ႈဝဵင်းၸိူဝ်းဢၼ် တပ့်သိုၵ်းလွႆတဢၢင်းၵုမ်းၵမ်ဝႆ့ၼၼ့်သေ ဢဝ်ႁိူဝ်းမိၼ်ပွႆႇမၢၵ်ႇၶိူဝ်းၶိူဝ်းယႂ်းယႂ်းလႄႈ ႁိူၼ်းယေးၶူဝ်းၶွင်သၢႆၸႂ်ၵူၼ်းမိူင်းၵေႃႈ လႆႈလုလႆႈလႅဝ်ၸွမ်း ။

ဝၼ်းထီႈ 27/ 10/ 2025 မိူဝ်ႈၼႆ့ ယၢမ်းဝၢႆးဝၼ်း 12 မူင်းပၢႆ 23 မဵတ့် ၼႆၵေႃႈ ဢဝ်ႁိူဝ်းမိၼ်မႃးပွႆႇ မၢၵ်ႇသႂ်ႇဝၢၼ်ႈတူၼ်ႈၵႅင်း ၸေႊဝဵင်းမိူင်းမိတ်ႈ မိူင်းတႆးပွတ်းႁွင်ႇ လႄႈ ႁိူၼ်းယေးၵူၼ်းမိူင်း လုၵွႆၵႂႃႇ 1 လင်ၼႆယဝ့် ။

ၵူၼ်းမိူင်းမိတ်ႈၶဝ် တႅမ်ႈတၢင်ႇၼိူဝ်သိုဝ်ႇတူင်ႇဝူင်းၵူၼ်းဝႃႈ မၢၵ်ႇတူၵ်းတႅၵ်ႇသႂ်ႇ ႁိူၼ်း လင်ၼိုင်ႈ ဢၼ်မီးႁိမ်းတပ့်ၶႄမွတ်ႇၾႆး ဝၢၼ်ႈတူၼ်ႈၵႅင်းမိူင်းမိတ်ႈ ႁိူၼ်းယေးလုၵွႆ 1 လင် ။ ၵူၼ်းတိူဝ့်မၢတ်ႇၸဵပ်းတႄ့ဢမ်ႇမီး ၼႆယဝ့် ။

မိူဝ်ႈဝၼ်းထီႈ 25/ 10/ 2025 ၼႆ့ၵေႃႈ တပ့်ၶွင်ႇသီႇသိုၵ်းမၢၼ်ႈ ဢဝ်ၶိူင်ႈတရူၼ်းပွႆႇမၢၵ်ႇသႂ်ႇ မၢၼ်ႈလီႈ ၸေႊဝဵင်းၼမ့်တူႈ မိူင်းတႆးပွတ်းႁွင်ႇလႄႈ ႁိူၼ်းယေးလုၵ့်မႆႈပဵၼ်ၾႆးၵႂႃႇ 1 လင် ။

ၽၢႆႇပွင်ႇၶၢဝ်ႇသိုၵ်းလွႆတဢၢင်း PSLF/TNLA ပိုၼ်ၽၢဝ်ႇဝႃႈ ၼႂ်းဝၼ်းထီႈ 25 ယၢမ်းႁုဝ်ၶမ်ႈ 5 မူင်း တပ့်သိုၵ်း မၢၼ်ႈ ဢဝ်တရူၼ်းပွႆႇမၢၵ်ႈသႂ်ႇ မၢၼ်ႈလီ 5 လုၵ်ႈလႄႈ မၢၵ်ႇတူၵ်းတႅၵ်ႇသႂ်ႇ ႁိူၼ်း လုင်းဢၢႆႈႁုင်း လႄႈ ပႃႈၶမ်းလီၶဝ် ဢဝ်ၾႆးမႆႈပႅတ်ႈၼႆယဝ့် ။ မၢင်ႁိူၼ်းမၢင်လင်ၵေႃႈ ၸၢၵ်ႇမၢၵ်ႇတူၵ်းသဵၼ်သႂ်ႇလႄႈ မီးလွင်ႈလုၵွႆ ၊ ၵူၼ်းဝၢၼ်ႈၶဝ် လႆႈဢွၼ်ၵၼ်ပၢႆႈၽေး ၼႆယဝ့် ။

ၽၢႆႇပွင်ႇၶၢဝ်ႇတဢၢင်းတႅမ်ႈမွၵ်ႇဝႃႈ - ၼႂ်းလိူၼ်ထူၼ်ႈ 10 တႄႇဢဝ် ဝၼ်းထီႈ 1 ထိုင် 26 ၼႆ့ ယွၼ့်ပိူဝ်ႈတပ့်သိုၵ်းမၢၼ်ႈပွႆႇမၢၵ်ႇလႄႈ သင်ႇၶၸဝ်ႈ လႆႈလုလွၼ်ႇ 2 ပႃး ။ လုၵ်ႈဢွၼ်ႇ 10 ၵေႃ့ ၊ ၽူႈၸၢႆး 16 ၵေႃ့ ၊ ၽူႈယိင်း 21 ၵေႃ့ လႆႈလုတၢႆ ။

ဢၼ်မၢတ်ႇၸဵပ်းၸမ်း မီးသင်ၶ 6 ပႃး ၊ လုၵ်ႈဢွၼ်ႇ 26 ၵေႃ့ ၊ ၽူႈၸၢႆး 20 ၵေႃ့ ၊ ၽူႈယိင်း 19 ၵေႃ့ ၊ ႁိူၼ်းယေး လုၵွႆ 173 လင် ၊ ႁူင်းႁဵၼ်း 5 လင် ၊ ဝတ့်ၵျွင်းမုၼ်ၸဝ်ႈ 7 လင် ၊ ဢွင်ႈလုမ်း 6 လင် ၊ သူၼ်လဵင့်ၵႆႇ 2 တီႈ ၊ လၢၼ့်ၶၢႆၶူဝ်း 5 ႁွင်ႈ ၊ ႁူင်းတၢၵ်ႇၼဵင်ႈႁႅင်ႈ 1 လင် ၊ လူတ့်ၶိူင်ႈ 4 လမ်း လႄႈ ၵႃး 10 လမ်း လႆႈလုၵွႆၵႂႃႇ ၼႆယဝ့် ။

Source # PSLF / TNLA
Photo # PSLF/ TNLA # Crd Local

27/10/2025

ၶၢဝ်ႇဝၼ်းထီႈ 27/10/2025 #ငဝ်းႁၢင်ႊသဵင်တႆး #ပႃႈၼၢင်းဢၢၼ်ႇၶၢဝ်ႇ #ၶၢဝ်ႇၶွပ်ႈႁွပ်ႈဝၼ်း

26/10/2025

သိုၵ်းရၶႅင်ႇၽႅဝ်ႈပႅတ်ႈမၢၵ်ႇမႅင်း 3000 ပၢႆယဝ်ႉသေတႃႉ ၵူၼ်းဝဵင်းတွင်ႇၵူၵ်ႉ တိုၵ်ႉလႆႈမႆႈၸႂ်ၽေးမၢၵ်ႇမႅင်းယူႇ
26/ 10/ 2025

မိူဝ်ႈဝၼ်းထီႈ 24/11/2024 ၼၼ်ႉ တပ်ႉသိုၵ်းရၶႅင်ႇ AA ပိုၼ်ႊၽၢဝ်ႇၵုမ်းလႆႈၶိုၼ်း ဝဵင်းတွင်ႇၵူၵ်ႉယဝ်ႉၼႆ လႆႈႁၼ် သိုၵ်းရၶႅင်ႇ AA ပိုၼ်ႊၽၢဝ်ႇဝႆႉ ၼင်ႇၼႆ။

ဝၢႆးလင်သိုၵ်းရၶႅင်ႇ ၵုမ်းလႆႈၶိုၼ်းၸေႊဝဵင်းယဝ်ႉ ၵူၼ်းမိူင်းရၶႅင်ႇ ၶိုၼ်းၶဝ်ႈမႃးယူႇသဝ်း ၼႂ်းဝဵင်းတွင်ႇၵူၵ်ႉၶိုၼ်း၊ မႃးႁဵတ်းၵိၼ် ၵၢၼ်သူၼ်သွမ်ႈ ၽုၵ်ႇၽၵ်းၶဵဝ်မိူၼ်ၵဝ်ႇ။ ၶဝ်ႈမႃးယူႇၶိုၼ်း ၼႂ်းႁိူၼ်းယေးၸဝ်ႈၵဝ်ႇ သေတႃႉ ၵူၼ်းမိူင်းရၶႅင်ႇ တိုၵ်ႉလႆႈမႆႈၸႂ်ၽေး မၢၵ်ႇမႅင်းၽင်လိၼ်ယူႇ ၼႆယဝ်ႉ။

ယၢမ်းလဵဝ် သိုၵ်းရၶႅင်ႇ မႃးၸွႆႈၽႅဝ်ႈပႅတ်ႈမၢၵ်ႇမႅင်းၽင်လိၼ် မီးၵႂႃႇ 3000 ပၢႆယဝ်ႉသေတႃႉ မၢၵ်ႇဢၼ်ပႆႇတႅၵ်ႇ၊ ၶမ်ဝႆႉၼႂ်းလိၼ် တိုၵ်ႉမီးၼမ်လႄႈ ၽွင်းၵႂႃႇႁဵတ်းသူၼ်ၼၼ်ႉ တိုၵ်ႉလႆႈမႆႈၸႂ်ႁႅင်း။

ၵူၼ်းပိုၼ်ႉတီႈၵေႃႉၼိူင်ႈ လၢတ်ႈဝႃႈ “သင်ဝႃႈၵူၼ်းမိူင်းထူပ်းႁၼ် ထၢင်ႇပိူင်ႈဝႃႈပဵၼ် မၢၵ်ႇမႅင်းၽင်လိၼ်ၼႆ သိုၵ်းရၶႅင်ႇ မႃးၸွႆႈၽႅဝ်ႈပႅတ်ႈ ယူႇဢေႃႈ။ ႁၼ်ၶဝ်ပိုၼ်ႊၽၢဝ်ႇဝႆႉ ၼႂ်းဝဵင်းတႄႉ ၶဝ်ၽႅဝ်ႈပႅတ်ႈမၢၵ်ႇမႅင်းၽင်လိၼ် မီးၵႂႃႇ 3000 ပၢႆယဝ်ႉ ၼႆဢေႃႈ။ ႁဝ်းၶႃႈတႄႉ တေႃႈလဵဝ် တေၵႂႃႇလႂ်၊ ပႆလႂ်ၵေႃႈ လႆႈၾၢင်ႉၵၼ်ႁႅင်းႁႅင်းသေ ၵႂႃႇယူႇၶႃႈ” ၼႆယူႇ။

ၵူၼ်းမိူင်းရၶႅင်ႇၼႆႉ ၵမ်ႊၼမ် ဢွၼ်ၵၼ်ၽုၵ်ႇ မၢၵ်ႇၶိူဝ်၊ တႅင်၊ မၢၵ်ႇၽဵတ်း၊ ၽၵ်းယိူဝ်ႈၼၢင်းၶဵဝ် သေ ႁႃၵိၼ်လဵင်ႉတွင်ႉၵၼ်။ ၽၵ်းယိူဝ်ႈၼၢင်းၶဵဝ်ၸိူဝ်းၼႆႉ ပဵၼ်ၽၵ်းဢၼ်ၵူၼ်းမိူင်းရၶႅင်ႇ ၵိၼ်သေႇသေႇ။ ပၢင်တိုၵ်းယဵၼ်ၵႂႃႇယဝ်ႉသေတႃႉ ပၢႆးမၢၵ်ႈမီးၼႂ်းၸေႊမိူင်းရၶႅင်ႇ ပႆႇပဵၼ်ၵၢၼ်လႄႈ ၵူၼ်းမိူင်း ႁဵတ်းသူၼ်၊ ၽုၵ်ႇၽၵ်းသေ ႁႃၵိၼ်လဵင်ႉတွင်ႉၵႂႃႇ ဝၼ်းလႂ်ဝၼ်းၼၼ်ႉ။

လိူဝ်သေႁဵတ်းၵၢၼ်ၽုၵ်ႇသွမ်ႈယဝ်ႉ ၵူၼ်းဝဵင်းတွင်ႇၵူၵ်ႉၶဝ် ႁႃပႃ၊ ႁဵတ်းၼႃး ၸိူဝ်းၼႆႉပႃး။ မၢင်ႊၸိူဝ်း ဢဝ်ပႃ ဢၼ်မဵတ်းလႆႈမႃးၼၼ်ႉသေ ၶိုၼ်းမႃးလႅၵ်ႈၵိၼ် ၽၵ်းယိူဝ်ႈၼၢင်းၶဵဝ် ၸိူဝ်းၼႆႉၵေႃႈမီး ၼႆယဝ်ႉ။

ယၢမ်းတေႃႈလဵဝ်ၼႆႉ တေၵႂႃႇတၢင်းလႂ်ၵေႃႈ ၵူဝ်ယဵပ်ႇၺႃးမၢၵ်ႇၽင်လိၼ် ဢၼ်ၵိုတ်းၶင်ႉဝႆႉ ၸိူဝ်းၼၼ်ႉလႄႈ ၵူၼ်းမိူင်းတႄႉ ဢွၼ်ၵၼ်မႆႈၸႂ်ၵူဝ်ႁေဝႆႉယူႇ ၼႆယဝ်ႉ။

ဢၢင်ႈဢိင် - MPA
Photo crd - AA info Desk

26/10/2025

ၾႆးမႆႈႁူင်းၵဵပ်းၶူဝ်းၵုၼ်ႇတီႈဝဵင်းမူႇၸေႊ လူႉသုမ်းၵႂႃႇမွၵ်ႈ 94 သႅၼ်ၵျၢပ်ႈ
26/10/2025

မိူဝ်ႈဝႃးဝၼ်းထီႈ 25/10/2025 တၢမ်းၶမ်ႈ 5 မူင်းၶိုင်ႈ ၾႆးမႆႈတီႈႁူင်းၵဵပ်းၶူဝ်းၵုၼ်ႇ တီႈပွၵ်ႉၸွၼ်ၸူဝ်ႇ ဝဵင်းမူႇၸေႊ လႄႈ ၾႆးလုၵ်ႉႁိုၼ်ႇမႆႈၵႂၢၼ်းပေႃးတဵမ်ၵႂႃႇ သဵင်ႈမူတ်း။

လွင်ႈတၢင်းဢၼ်ႁဵတ်းႁႂ်ႈၾႆးမႆႈတႄႉၵေႃႈ ၾႆးမွတ်ႇလႄႈၵိုင်ႉၵၢင်ၵႂႃႇ ၼူဝ်းၸၢၵ်ႈၾႆး၊ သၢႆဝႃႇယႃႇၸၢၵ်ႈၾႆးမႆႈလႄႈ တႄႇမႆႈလၢမ်းၵႂႃႇၼႆ လႆႈႁူႉမႃးၼႂ်းၵူၼ်းပိုၼ်ႉတီႈလႄႈ ၾၢႆႇၶေမွတ်ႇၾႆးဝဵင်းမူႇၸေႊ ၼင်ႇၼႆ။

ဢွင်ႈတီႈဢၼ်ၾႆးမႆႈၵႂႃႇၼႆႉ ပဵၼ်တီႈၵဵပ်းၶူဝ်းၵုၼ်ႇ ၼင်ႇမူၵ်ႇတႅၵ်ႇ၊ မွၵ်ႇၾႆး ၸိူဝ်းၼႆႉၼႆ ၵူၼ်းၸၢႆးၼႂ်းပိုၼ်ႉတီႈၵေႃႉၼိုင်ႈ သိုပ်ႇလၢတ်ႈၼင်ႇၼႆ။

ၵဵဝ်ႇလူၺ်ႈလွင်ႈၾႆးမႆႈၼႆႉသေ ၵူၼ်းတၢႆ ၵူၼ်းမၢတ်ႇၸဵပ်းတႄႉဢမ်ႇမီးသေတႃႉ ၶူဝ်းၶွင်ဢၼ်လူႉသုမ်းၵႂႃႇၸွမ်း ၾႆးတႄႉ မီးမွၵ်ႈ 94 သႅၼ်ၵျၢပ်ႈ၊ ၾႆးမႆႈ လူတ်ႉၵႃးၵႂႃႇ 5 လမ်း ၼႆယဝ်ႉ။

ၵဵဝ်ႇလူၺ်ႈလွင်ႈၾႆးမႆႈၼႆႉသေ ၵႃးၶႄမွတ်ႇၾႆးလၢႆလၢႆတီႈ မႃးၸွႆႈမွတ်ႇၾႆး မီးမွၵ်ႈ 15 လမ်း။ ၾႆးတႄႇမႆႈမိူဝ်ႈ 5 မူင်းၶိုင်ႈ မွၵ်ႈ 6 မူင်း 24 မိၼိတ်ႉၼႆႉ ၾႆးဝွတ်ႈၵႂႃႇ။

ၾၢႆႇၸုမ်းၶႄမွတ်ႇၾႆးၶဝ်တႄႉ ၶၢတ်ႇလၢမ်းဝႃႈ ၶူဝ်းၶွင်လူႉသုမ်းၵႂႃႇၸွမ်းၾႆး မီးမွၵ်ႈ 94 သႅၼ်ၼႆသေတႃႉ ၵူၼ်းမိူင်းၼႂ်းပိုၼ်ႉတီႈ ၶၢတ်ႈလၢမ်းဝႃႈ လႅပ်ႈတေသုမ်းၼမ်လိူဝ်သေၼႆႉ ယူႇဝႃႈၼႆ။

ၸုမ်းၶႄႇမွတ်ႇၾႆးပၼ်ၾၢင်ႉထႅင်ႈဝႃႈ ၽွင်းယၢမ်း ၸုၼ်းယူင်းလႄႈ တႆႈတဵၼ်းၼႂ်းႁိူၼ်း ၸိူဝ်းၼႆႉၵေႃႈ ၵိုင်ႇလီၾၢင်ႉၽေးၽိုၼ်းၽေးၾႆးၵၼ် ၵူႊၵေႃႉ ၼႆယူႇ။

ဢၢင်ႈဢိင် - VOM
Photo Crd

25/10/2025

ၶၢဝ်ႇဝၼ်းထီႈ 25/10/2025 #ငဝ်းႁၢင်ႊသဵင်တႆး #ၶၢဝ်ႇၶွပ်ႈႁွပ်ႈဝၼ်း #ပႃႈၼၢင်းဢၢၼ်ႇၶၢဝ်ႇ

Tai TV Online ငဝ်းႁၢင်ႈသဵင်တႆး

29/10/2025

29/10/2025

29/10/2025

28/10/2025

28/10/2025

28/10/2025

27/10/2025

27/10/2025

27/10/2025

26/10/2025

26/10/2025

25/10/2025

ที่อยู่

เว็บไซต์

แจ้งเตือน

ติดต่อ ธุรกิจของเรา

ทางลัด

แชร์

ประเภท