01/10/2025
ဖားကန့်ဒေသမှ မြစ်ကြီးနားဘက်ကို အလံဖြူထောင် တိမ်းရှောင်လာသည့် စစ်ရှောင်များ စကားသံ
ပါဂျောင်မီဒီယာ
၁ရက်၊ အောက်တိုဘာ၊ ၂၀၂၅။
ဖားကန့်မြို့နယ်အတွင်း ယခုရက်ပိုင်း တိုက်ပွဲဖြစ်ပွားခြင်းမရှိဘဲ စစ်ကော်မရှင်ဘက်မှ လက်နက်ကြီးများကို နေ့စဉ်ပစ်ခတ်နေသောကြောင့် အရပ်သားပြည်သူများ ထိခိုက်၊သေဆုံးသူ များပြားနေသလို၊ စစ်ကောင်စီတပ် စစ်ကြောင်းများမှာ လက်ရှိ ဖားကန့်ဗျူဟာ၊ လုံးခင်းမိုင်းချက်စက်ရုံတို့အပြင် မော်ဝမ်းလေး၊ မော်ဝမ်းကြီး၊ မော်မောင်းလျှံ၊ အမှိုက်ပုံ၊ တောင်ပြို၊ ရှရော်ခ၊ မှော်တောင်း၊ ဆန်းကြွယ်နှင့် ယူမာကျေးရွာ၊ လုံးခင်းနှစ်မျက်နှာဘုရား၊ လယ်ပြင်စာသင်ကျောင်း၊ မှော်စီစာဘုရားကုန်း၊ မရှီကထောင်ရေအေးချောင်းထိပ်မှ ရောင်ခြည်ဦးသီလရှင်ကုန်း နေရာများထိ နေရာယူထားကြောင်း သိရသည်။
ထို့ကြောင့် လက်ရှိ ဖားကန့်ဒေသ အခြေအနေမှာ ပြည်သူများ အချိန်မရွေး ဖမ်းဆီးသတ်ဖြတ်ခံရနိုင်သလို စစ်ကော်မရှင်၏ လက်နက်ကြီး၊ ဗုံးသီးရန်များကြောင့် လူသေဆုံးမှု ဆက်တိုက်ဖြစ်နေပြီး နှစ်ဖက်လက်နက်ကိုင်များ နေရာယူထားသည့် အနီးဝန်းကျင် ပြည်သူများနေထိုင်ရန် မသင့်တော့ကြောင်း ဖားကန့်ဒေသခံများက ပြောသည်။
ဖားကန့်မြို့ပေါ်ရပ်ကွက်များအပါအဝင် ဖားကန့်-လုံးခင်း လမ်းမကြီးတစ်လျှောက် စစ်ကော်မရှင်တပ်များ ဖြန့်ကျက်ထားပြီး စစ်ဆေးမှုများ ပြုလုပ်နေခြင်းကြောင့် ကားအသွားအလာရှင်းနေပြီး ဖားကန့်မှ ပြည်သူများလည်း အလံဖြူထောင်၍ ဟိုပင်၊ မိုးညှင်း၊ မိုးကောင်း၊ မြစ်ကြီးနားနားဘက်သို့ ရှောင်တိမ်းသွားခဲ့ကြသဖြင့် အရေးကြီးကိစ္စမရှိရင် ဖားကန့်ကိုမလာကြဖို့ ဒေသခံများက သတိပေးပြောဆိုထားသည်။
စစ်ကော်မရှင်မှ အကြောင်းမဲ့ ရမ်းသမ်းပစ်ခတ်မှုကြောင့် အရပ်သားပြည်သူ (၁၆)ဦးထက်မနည်း သေဆုံးပြီး (၂၀)ဦးထက်မနည်း ဒါဏ်ရာရရှိခဲ့ပြီးဖြစ်သည့်အပြင် သေဆုံးသူများထဲတွင် အသက် ၁၈နှစ်အောက်ကလေး (၃)ဦးလည်း ပါဝင်ကြောင်း ဖားကန့်ဒေသမှ အလံဖြူထောင်ကာ စစ်ဘေးတိမ်းရှောင်လာသော စစ်ရှောင်များထံ မေးမြန်းတင်ဆက်ထားခြင်း ဖြစ်သည်။
စစ်ရှောင် (၁)။ ။ “စစ်ကော်မရှင်ဘက်ကနေ ကင်းထောက်ဒရုန်းနဲ့ အဆက်မပြတ်ကင်းလှည့်နေတာမို့ ပြည်သူတွေနဲ့ နီးတဲ့နေရာမှာ(K-PDF)တွေကို ထောက်လှမ်းမိရင် သူတို့က ပြည်သူထိထိ/ မထိထိ ဂရုမစိုက်ဘူး ဒရုန်းဗုံးသီးချတော့တာ၊ ဒီရက်ပိုင်းဆို ဒရုန်းဗုံးသီးကြောင့် အရပ်သားရော (K-PDF )ရော အထိအခိုက်များတယ်။ သတင်းမှာ တက်လာရင် ဘယ်သူဘဲထိထိ အရပ်သားဆိုပြီး ရေးနေကြတာကို ကြည့်ပြီး တော်တော်လေးစိတ်ပျက်မိတယ်၊ နှစ်ဖက်လက်နက်ကိုင် အထက်အရာရှိတွေက ကောင်းစားနေပြီး၊ မြေပြင်ကအခြေအနေက တော်တော်လေးဆိုးဝါးတယ်၊ ဆေးကုဖို့တောင် ဆေး ကောင်းကောင်းမရှိ ဖြစ်နေတယ်။"
စစ်ရှောင် (၂)။ ။ "ဖားကန့်လမ်း ဘယ်နေရာမှ မပိတ်ပါဘူး။ မန္တလေးကားများ၊ အောက်ပိုင်းကားတွေ ဖားကန့်ကို လာလို့ရပါတယ်။ ဒါပေမယ့် အောက်ပိုင်းကနေလာရင် အင်းတော်မြို့ကို မရောက်ခင်အထိ လမ်းတွေ၊ မထင်ရင်မထင်သလို တိုက်ပွဲအခြေအနေအရ တစ်ရက်ကနေ နှစ်ရက်အထိ ပိတ်ထားတတ်တယ်၊ တချို့ကားသမားတွေ လမ်းမှာ(၄)ညလောက် အိပ်ခဲ့ရတဲ့ အခေါက်တွေတောင်ရှိတယ်”။
စစ်ရှောင် (၃)။ ။ "ဖားကန့်မြို့အဝင်အထွက်တွေကို တားဆီးစစ်ဆေးမှုတွေ လုပ်နေပါတယ်။ တစ်ချို့လမ်းတွေကို ယာယီပိတ်ထားတာမျိုးတွေရှိတော့ လူသွားလူလာ ရှင်းပါတယ်၊ ဘယ်နားမိုင်းကွဲ၊ ဗုံးကွဲ၊ စစ်သားတွေကျတယ်၊ ပြည်သူဘယ်နှစ်ယောက် သေသွားတယ်၊ ဒဏ်ရာရသွားတယ်ဆိုတဲ့ တိကျသေချာရေရာမှုမရှိတဲ့ ကောလဟလ သတင်းမျိုးစုံလည်း ကြားနေရတယ်”။
စစ်ရှောင် (၄)။ ။ "ဖုန်းအင်တာနက်တွေ ဖြတ်တောက်ထားလို့ လူအများစုက ဖုန်းသတင်းတွေနဲ့ ထင်ရာမြင်ရာ ပြောဆိုရေးသားမှုတွေ ရှိနေတာကြောင့် ကောလဟလ သတင်းတွေဖောင်းပွနေတယ်၊ ကောလဟလလို့ ထင်ထားတဲ့သတင်းတွေကလည်း သတင်းမှန်တွေ ဖြစ်နေတတ်ပြန်တယ်၊ ဖေ့ဘုတ်ပေါ်တွေ့တိုင်း သတင်းမဟုတ်ဖူးလို့လည်း ပြောလို့မရဘူး။ ဒီအချိန်ဟာ အင်တာနက်ဆက်သွယ်ရေး အခက်အခဲတွေကြောင့် သတင်းမှန်သိရဖို့ အခက်အခဲတွေရှိနေကြပါတယ်”။
Vox pop သတင်း - ကချင်ပြည်သား
=============================================================
လူကြီးမင်းတို့ရဲ့ အမြင်တွေ၊ သုံးသပ်ချက်တွေ၊ သတင်းဖြစ်စဉ်အကြောင်းအရာတွေနဲ့ ထူးခြားဖြစ်စဉ် ဆောင်းပါးတွေကို ပေးပို့ချင်တယ်ဆိုရင် Pajau Media Channel ဖေ့ဘုတ် မက်ဆင်ဂျာမှဖြစ်စေ၊ [email protected] မှဖြစ်စေ ပေးပို့နိုင်သလို၊ ပါဂျောင်မီဒီယာသတင်းဌာနမှ နေ့စဉ်တင်ဆက်သည့် သတင်းများကိုလည်း အောက်ပါလင့်များတွင် ဝင်ရောက်ဖတ်ရှု့ လေ့လာနိုင်ပါသည်။
Telegram Link;-https://t.me/pajaumediachannelgenuinenews2023/9321
Website Link; https://www.pajau.net
