24/11/2025
ဂျပန်ဝန်ကြီးချုပ်သစ်အတွက် ခပ်မြန်မြန် ပြီးဆုံးသွားတဲ့ ပျားရည်ဆမ်း နေ့ရက်များ
သမိုင်းတလျှောက် ပထမဆုံး အမျိုးသမီး ဂျပန်ဝန်ကြီးချုပ်ဆိုတဲ့ ဂုဏ်ပုဒ်ဟာ စာနအဲ တကအိချိအတွက် အင်မတန် ဂုဏ်ယူစရာ ဖြစ်ခဲ့မယ်ဆိုတာ သံသယရှိဖို့ မလိုပါဘူး။ ဒါပေမဲ့ သူ့ရဲ့ ဝန်ကြီးချုပ် ဘဝအစ ပျော်ရွှင်စရာ ပျားရည်ဆမ်း နေ့ရက်တွေကတော့ တရုတ်နဲ့ ရုတ်တရက် ခါးသီးသွားတဲ့ ဆက်ဆံရေးနဲ့အတူ ခပ်မြန်မြန်ပဲ ကျော်လွန်သွားခဲ့ပါတယ်။
ပြဿနာတွေဟာ နိုဝင်ဘာ ၇ ရက်နေ့မှာ တကအိချိ ပြောဆိုခဲ့တဲ့ စကားတစ်ခွန်းကနေ မြစ်ဖျားခံလာခဲ့ပါတယ်။ အဲဒီစကားဟာ တရုတ်ကို မပြီးနိုင် မစီးနိုင် ဒေါသအိုး ပေါက်ကွဲဖို့ ဆွပေးသလို ဖြစ်သွားရာက နှစ်ဖက် ဆက်ဆံရေး ရုတ်တရက် စိုက်ဆင်းသွားခဲ့ပါတော့တယ်။ တရုတ်ဟာ ဒီကိစ္စနဲ့ ပတ်သက်လို့ တကအိချိကို စကားလုံးတွေနဲ့ ဆက်တိုက် ထိုးနှက်ရုံသာ မကဘဲ ဂျပန်ရဲ့ စီးပွားရေးကို အထိနာစေမယ့် အစီအမံတွေနဲ့ပါ တုံ့ပြန်နေတာ ဖြစ်ပါတယ်။
လွှတ်တော်ထဲမှာ အတိုက်အခံ အမတ်တစ်ဦးက တကယ်လို့ တရုတ်သာ ထိုင်ဝမ်ကို ကျူးကျော် တိုက်ခိုက်ခဲ့မယ်ဆိုရင် ဂျပန် အစိုးရ အနေနဲ့ ဘာလုပ်မလဲလို့ မေးတဲ့အခါ တကအိချိက ရှင်သန်ရပ်တည်မှုကို ခြိမ်းခြောက် ခံရခြင်းအဖြစ် ယူဆပြီး တုံ့ပြန်မယ်လို့ ဖြေကြားခဲ့ပါတယ်။ ဂျပန်ရဲ့ ဖွဲ့စည်းပုံ ဥပဒေမှာ ပြဋ္ဌာန်းထားတဲ့ အဲဒီစကားလုံးရဲ့ အဓိပ်ပါယျက ဂျပန်နဲ့ မဟာမိတ်တွေကို ပြင်ပကနေ စစ်ပြု တိုက်ခိုက်လာမှုကို ဆိုလိုပါတယ်။ အဲဒီအခါ ဂျပန်စစ်တပ်ဖြစ်တဲ့ ပြည်စောင့်တပ်ကို ဖြန့်ကျက် အသုံးပြုရမှာပါ။ ဒီတော့ တကအိချိရဲ့ စကားက ထိုင်ဝမ်ကို တရုတ်က ဝင်ရောက်တိုက်ခိုက်ရင် ဂျပန်က တရုတ်ကို စစ်တိုက်မယ် ဆိုတဲ့ အဓိပ်ပါယျ ဖြစ်သွားပါတယ်။
ဒီစကားကို တရုတ်က ဆတ်ဆတ်ခါ နာသွားတော့တာပါပဲ။ တရုတ်ဟာ ထိုင်ဝမ်ကျွန်းကို ပိုင်နက်နယ်မြေ တစ်ခုအဖြစ် သတ်မှတ်ထားပြီး လိုအပ်လာရင် စစ်ရေးအရ တိုက်ခိုက် သိမ်းယူမယ်လို့ အတိအလင်း ခြိမ်းခြောက်ထားပါတယ်။ ထိုင်ဝမ်ကတော့ သီးခြားလွတ်လပ်တဲ့ ကိုယ်ပိုင်ဒီမိုကရေစီနဲ့ ရပ်တည်ရေးကိုပဲ ပိုပြီး လိုလားပါတယ်။ ဒါကြောင့် တရုတ်က ထိုင်ဝမ် အစိုးရကို ခွဲထွက်ရေး ဝါဒီတွေလို့ စွပ်စွဲလေ့ ရှိပါတယ်။ တရုတ်ရဲ့ ဆိုလိုရင်းက နိုင်ငံပိုင်နက်ထဲက ထောင်ထားခြားနားသူ ခွဲထွက်ရေး ဝါဒီတွေကို တိုက်ခိုက်မယ့် ကိစ္စမှာ ဂျပန်က စစ်ရေးအရ ပါဝင်လာမယ်ဆိုရင် တရုတ် ပြည်တွင်းရေးကို စွက်ဖက်တာနဲ့ တူတူပဲ ဆိုတာမျိုးပါ။
တရုတ်ဟာ ထိုင်ဝမ်ကိစ္စနဲ့ ပတ်သက်လို့ နိုင်ငံတကာ ပွတ်တိုက်မှု တစ်ခုခု ရှိလာတိုင်း အကဲဆတ်ပါတယ်။ ဒါမှမဟုတ် တမင်တကာ အကဲဆတ်ပြပါတယ်။ ဒါပေမဲ့ လက်ရှိ ဂျပန်နဲ့ ပြဿနာမှာတော့ လွန်လွန်ကဲကဲ ဖြစ်လွန်းနေတယ်လို့ လေ့လာသူတွေက သုံးသပ်ကြပါတယ်။ တကယ်တော့ ထိုင်ဝမ်သာ စစ်ပြုခံရရင် စစ်ရေးအရ ပါဝင်ကူညီဖို့ စဉ်းစားမယ်ဆိုတဲ့ စကားမျိုးကို အမေရိကန် သမ္မတ တချို့လည်း ပြောဖူးပေမယ့် ပြဿနာက ဒီလောက် မကြီးခဲ့ပါဘူး။
ဒီလို စကားမျိုးကို ဂျပန်က ပြောတဲ့အခါမှာတော့ နှစ်နိုင်ငံကြားက အကျည်းတန်ခဲ့တဲ့ သမိုင်းကြောင်းတွေကိုလည်း ပြန်ပြီး အစဆွဲထုတ်ဖို့ ဖြစ်လာပါတယ်။ တရုတ်နဲ့ ဂျပန်တို့ရဲ့ ရာစုနှစ်တွေနဲ့ချီ ကြာမြင့်ခဲ့တဲ့ ဆက်ဆံရေးမှာ စစ်ပွဲတွေ၊ ပဋိပက္ခတွေဟာ ကြီးမားတဲ့ အစိတ်အပိုင်းမျိုးကနေ ပါဝင်ခဲ့ပါတယ်။ ဂျပန်ဟာ တရုတ်ကို ကျူးကျော်စစ်တွေ ဆင်နွှဲခဲ့ဖူးသလို ဒုတိယ ကမ္ဘာစစ်အတွင်းမှာလည်း တရုတ်ပြည်သူတွေနဲ့ တော်လှန်ရေး အင်အားစုတွေအပေါ် ရက်ရက်စက်စက် ဖိနှိပ်မှုတွေ ကျူးလွန်ခဲ့ပြန်ပါတယ်။ ဒီတော့ ထိုင်ဝမ် အရေးနဲ့ ပတ်သက်လို့ ဂျပန်က စစ်တပ်တွေ စေလွှတ်မယ်ဆိုရင် ထိုင်ဝမ်ကို ကာကွယ်ဖို့ထက် တရုတ်ကို နောက်တစ်ကြိမ် ရန်လို ကျူးကျော်မှုသာ ဖြစ်လာမယ်လို့ တရုတ်က ရှုမြင်တယ်။ ဒါမှမဟုတ်လည်း အဲဒီအဓိပ်ပါယျ ဖြစ်လာအောင် ပုံဖော်ယူနေပါတယ်။
တကအိချိက သူ့စကားဟာ တရုတ်ကို ရန်စတာ မဟုတ်ခဲ့ဘဲ ဂျပန်ရဲ့ သတ်မှတ်ထားတဲ့ ဖွဲ့စည်းပုံ ဥပဒေပါ သဘောထားအတိုင်း ပေးခဲ့တဲ့ မှတ်ချက်ဖြစ်တယ်လို့ ပြောပါတယ်။ ဒါပေမဲ့ နောက်ဆိုရင်တော့ ဒီလို ကိစ္စမျိုးတွေမှာ တိုက်ရိုက်ကျကျ စကားလုံးတွေ မသုံးဖို့ သူသင်ခန်းစာ ရသွားတယ်လို့ ဝန်ကြီးချုပ်က ဆိုပါတယ်။ သူက ပြဿနာကို ပြေငြိမ်းစေလိုတဲ့ သဘောထားမျိုး ပြနေပေမယ့် တရုတ်ကတော့ ရေဆူမှတ် ကျော်တဲ့ထိ ဆက်ပြီး မီးစာဖြည့်နေပါတယ်။ အိုဆာကာမြို့မှာ အခြေစိုက်တဲ့ တရုတ် ကောင်စစ်ဝန်က တရုတ်အတွက် အန္တရာယ်ကြီးတဲ့ သဘောထား ဝါဒတွေကို ကြီးထွားမလာခင် အပြတ်ရှင်းဖို့ လိုတယ်လို့ လူမှုကွန်ရက်ပေါ် ရေးသားခဲ့ရာမှာ တကအိချိရဲ့ ခေါင်းကို ဖြတ်သင့်တယ်လို့ အဓိပ်ပါယျ နှစ်ခွထွက်တဲ့ ဆိုရိုးကို ကိုးကားခဲ့တာကြောင့် ပြဿနာတွေက ပိုပြီး ရှုပ်ထွေးကုန်ပါတယ်။
တရုတ်ဟာ တကအိချိရဲ့ စကားကို တရားဝင် ကန့်ကွက်ဖို့အတွက် ဂျပန်သံအမတ်ကိုပါ ဆင့်ခေါ်ခဲ့ပါတယ်။ ဒါဟာ ၂ နှစ်အတွင်းမှာ ပထမဆုံး အကြိမ်အဖြစ် တရုတ် နိုင်ငံခြားရေး ဝန်ကြီးဌာနက ဂျပန်သံအမတ်ကို ဆင့်ခေါ်မှု ဖြစ်လာပါတယ်။ နောက်ဆုံးအကြိမ် ဆင့်ခေါ်ခဲ့တဲ့ ကိစ္စကတော့ ငလျင်နဲ့ ဆူနာမီ ရေလှိုင်းတွေကြောင့် ပျက်စီးခဲ့တဲ့ ဖူကူရှီးမားဒိုင်ချီ နျူကလီးယား ဓာတ်အားပေး စက်ရုံထဲက ဓာတ်ပေါင်းဖိုကို အအေးပေးထားတဲ့ ရေတွေ သန့်စင်ပြီး ပစိဖိတ် သမုဒ္ဒရာထဲ ပြန်လည် ဖောက်ချခဲ့ချိန်တုန်းက ဖြစ်ပါတယ်။
တကအိချိဟာ ဂျပန်ရဲ့ သဘောထား အတင်းမာဆုံး ကွန်ဆာဗေးတစ် တစ်ဦး ဖြစ်ပါတယ်။ သူဟာ ကွယ်လွန်သူ ဝန်ကြီးချုပ်ဟောင်း ရှင်ဇိုအဘေးရဲ့ လက်ရင်းတပည့် တစ်ဦး ဖြစ်ခဲ့ဖူးပါတယ်။ ပြီးတော့ ဒုတိယ ကမ္ဘာစစ်နောက်ပိုင်း စစ်ဆန့်ကျင်ရေး နိုင်ငံအဖြစ် အစဉ်တစိုက် ရပ်တည်ခဲ့မှုကို ပယ်ဖျက်ပြီး ဂျပန်ကို လက်နက်အင်အား ပြန်လည်တိုးချဲ့ တပ်ဆင်ခဲ့တဲ့ အဘေးရဲ့ မူဝါဒတွေကို ထောက်ခံခဲ့တယ်။ ပြီးတော့ ဂျပန်ဟာ ကိုယ့်အားကိုယ်ကိုး ကာကွယ်ရပ်တည်နိုင်တဲ့ စစ်အင်အားမျိုး ပြန်လည် ပိုင်ဆိုင်လာအောင် ကြိုးစားသွားမယ်လို့လည်း တကအိချိက ပြောထားဖူးပါတယ်။ ဒီတော့ တရုတ်က လက်ရှိ ပဋိပက္ခမှာ အခွင့်အရေးရတုန်း တကအိချိကို ဦးချိုးထားချင်တာလည်း ဖြစ်နိုင်ပါတယ်။
ပြီးခဲ့တဲ့ လကုန်ပိုင်းတုန်းက တကအိချိဟာ အမေရိကန် သမ္မတ ဒေါ်နယ်လ်ထရမ့်ကို ဧည့်ခံခဲ့တယ်။ တရုတ် သမ္မတ ရှီကျင့်ဖျင်နဲ့လည်း တွေ့ဆုံပြီး နှစ်နိုင်ငံကြားက တင်းမာမှုတွေကို လျှော့ချကြဖို့ ပြေပြေလည်လည် ဆွေးနွေးနိုင်ခဲ့ပါတယ်။ ကမ္ဘာ့ အင်အားကြီး စူပါပါဝါ နှစ်နိုင်ငံရဲ့ ခေါင်းဆောင်တွေနဲ့ တွေ့ဆုံမှုတွေမှာ တကအိချိ ကိုင်တွယ်ခဲ့ပုံတွေက ချီးကျူးစရာ ဖြစ်ခဲ့ပေမယ့် ရက်ပိုင်းအကြာမှာပဲ အခြေအနေတွေက ဂျွမ်းထိုးမှောက်ခုံ ပြောင်းလဲကုန်တာ ဖြစ်ပါတယ်။
ဂျပန်ကတော့ ကြီးတဲ့အမှု ငယ်စေလိုတဲ့ သဘောထားမျိုးနဲ့ တရုတ်ဆီ ကိုယ်စားလှယ် အဖွဲ့ပါ စေလွှတ်ပြီး ဆွေးနွေး ညှိနှိုင်းဖို့ ကြိုးစားခဲ့ပါတယ်။ ဒါပေမဲ့ တရုတ်ကတော့ ဆန့်ကျင်ဘက် သဘောထားမျိုး ရှိတယ်ဆိုတာ ထင်ထင်ရှားရှား ပြသနေပါတယ်။ ဂျပန်က နျူကလီးယား စွမ်းအင်သုံး ရေငုပ်သင်္ဘောတွေ ပိုင်ဆိုင်ဖို့ ကြိုးစားနေတဲ့ ကိစ္စမျိုးကိုပါ လက်ရှိ ပြဿနာနဲ့ ဆွဲချိတ်ပြီး တကအိချိဟာ တရုတ်အပေါ် အင်မတန် ရန်လိုနေတယ် ဆိုတာမျိုး ပုံဖော်တယ်။ တရုတ် အစိုးရ မီဒီယာတွေက တကအိချိဟာ ဒုတိယ ကမ္ဘာစစ်တုန်းက စက်ဆုပ်စရာ နာမည်ဆိုးနဲ့ ကျော်ကြားခဲ့တဲ့ ဂျပန်ရဲ့ စစ်မိစ္ဆာ ဝါဒကို ပြန်အသက်သွင်းဖို့ တာဆူနေပြီလို့ စကားလုံး အကြီးကြီးတွေနဲ့ စွပ်စွဲပါတယ်။ လူမှုကွန်ရက် မီဒီယာတွေမှာလည်း တရုတ် အစိုးရက ကျောထောက်နောက်ခံ ပေးထားတဲ့ အကောင့်တွေနဲ့ စာမျက်နှာတွေက တကအိချိကို ပုဂ္ဂိုလ်ရေး ဆန်ဆန်ရော၊ ဝါဒဖြန့်မှု အနေနဲ့ပါ ထိုးနှက်တဲ့ ပို့စ်တွေကို ဖောဖောသီသီ မျှဝေလာကြပါတယ်။
ဂျပန်အတွက် ပိုပြီး အထိနာစေတာက တရုတ်ဟာ စီးပွားရေး အရပါ ဂျပန်ကို တိုက်စစ်ဆင်လာနေတာ ဖြစ်ပါတယ်။ တရုတ် နိုင်ငံခြားရေး ဝန်ကြီးဌာနက ဂျပန် ဝန်ကြီးချုပ်ရဲ့ ထိုင်ဝမ်နဲ့ ပတ်သက်တဲ့ မှတ်ချက်စကားတွေဟာ လက်ခံနိုင်စရာ မရှိသလို တရုတ်အပေါ် ရန်လိုမှုကို ပြသနေတဲ့အတွက် တရုတ်နိုင်ငံသားတွေ လတ်တလော ဂျပန်ကို မသွားသင့်ဘူးလို့ ကြေညာခဲ့ပါတယ်။ တရုတ် လေကြောင်းလိုင်း တော်တော်များများကလည်း ဂျပန်ဆီ အလည်အပတ် သွားရောက်မယ့် ခရီးစဉ်တွေ ဖျက်သိမ်းမယ့် နိုင်ငံသားတွေကို ငွေအပြည့် ပြန်အမ်းတာ၊ ဒါမှမဟုတ် ရက်ရွှေ့ပေးတာတွေကို အဆင်ပြေပြေ လုပ်ဆောင်နိုင်အောင် ကမ်းလှမ်းခဲ့တယ်။
ဒီကိစ္စဟာ ဂျပန်ရဲ့ ကမ္ဘာလှည့် ခရီးသွား လုပ်ငန်းအပေါ် ပြင်းပြင်းထန်ထန် သက်ရောက်စေပါတယ်။ အခုနှစ် ပထမ ၉ လမှာ ဂျပန်ကို ဝင်ရောက်လာခဲ့တဲ့ ပြည်ပဧည့်သည် စုစုပေါင်းရဲ့ လေးပုံတစ်ပုံဟာ တရုတ်နိုင်ငံသားတွေ ဖြစ်ပါတယ်။ တရုတ်နဲ့ တင်းမာမှုအပေါ် ရင်းနှီးမြှုပ်နှံသူတွေက စိုးရိမ်လို့ ဂျပန် လုပ်ငန်းစုကြီးတွေရဲ့ ရှယ်ယာတန်ဖိုးတွေလည်း ကျဆင်းကုန်ပါတယ်။ တရုတ်မှာ ဂျပန်ရုပ်ရှင်တွေရဲ့ ရုံတင်ရက်တွေကို ဆိုင်းငံ့ထားလိုက်ရပါတယ်။ ဒါတင် မကသေးဘဲ တရုတ်ဆီ ဂျပန်က အဓိက တင်ပို့တဲ့ ပို့ကုန်တစ်ခုဖြစ်တဲ့ ပင်လယ်စာတွေနဲ့ ပတ်သက်ပြီးလည်း တရုတ်ဖက်က ခြိမ်းခြောက်တဲ့သဘော ပြောဆိုလာပါတယ်။ ဂျပန်အနေနဲ့ ပင်လယ်စာတွေကို တရုတ်ရဲ့ ဘယ်စျေးထဲမှာမှ ရောင်းမရတာမျိုး ဖြစ်သွားနိုင်တယ် ဆိုတာမျိုး တရုတ်က လေသံပစ်လာပါတယ်။
တရုတ်နဲ့ ဂျပန်တို့ဟာ ကိုယ်ပေါင်းစိတ်ခွာ ဆက်ဆံရေးမျိုးကို ထိန်းသိမ်းထားခဲ့ကြပေမယ့် လက်ရှိမှာတော့ တရုတ်ဟာ သံတမန်ဆန်ဆန် စကားတွေတောင် ပြောမနေတော့ဘဲ တကအိချိကို ပေါ်ပေါ်ထင်ထင် ထိုးနှက်နေတာ ဖြစ်ပါတယ်။ ဂျပန်ရဲ့ စီးပွားရေးဟာ တရုတ်နဲ့ ကုန်သွယ်မှုကိုလည်း ကြီးကြီးမားမား မှီခိုနေရဆဲ ဖြစ်တာကြောင့် တကအိချိ လက်ရှိ ကြုံနေတဲ့ အနေအထားက တကယ့်ကို ဘေးကျပ်နံကျပ်လို့ ဆိုရမှာပါ။ ဂျပန်အတွက် လိုအပ်တဲ့ မြေရှားသတ္တု ၆၀ ရာခိုင်နှုန်းလောက်ကို တရုတ်ဆီက တင်သွင်းနေရဆဲ ဖြစ်ပါတယ်။ တရုတ်ဟာ မူဝါဒရေးရာ ဖိအားပေးဖို့အတွက် အဲဒီသတ္တုတွေကို ကုန်သွယ်ဖက် နိုင်ငံတွေဆီ တင်ပို့ခွင့် ပိတ်ပင်တာမျိုးတွေ အရင်ကလည်း လုပ်ဖူးတာကြောင့် လက်ရှိ ကိစ္စမှာလည်း ဒီဝှက်ဖဲကို ထုတ်သုံးလာနိုင်ပါသေးတယ်။ ၂၀၁၂ တုန်းက ဒီထက်ပိုပြီး ကြမ်းတမ်းတဲ့ တရုတ်ရဲ့ စီးပွားရေးအရ ဆန့်ကျင် အရေးယူမှုတွေကြောင့် ဂျပန်ရဲ့ တစ်နှစ်စာ GDPမှာ ၁ ရာခိုင်နှုန်းလောက်တောင် ထိခိုက် ကျဆင်းခဲ့ဖူးပါတယ်။
နောက်ပြီး တရုတ်စစ်တပ်ကလည်း တစ်စခန်းထပြီး ဂျပန်အနေနဲ့ တရုတ်ကို စစ်တိုက်ဖို့ ယောင်လို့တောင် စိတ်မကူးသင့်ကြောင်း၊ တကယ်တမ်း စစ်ဖြစ်လာမယ်ဆိုရင် ဂျပန်ပြည်စောင့်တပ်ဟာ စိတ်ဓာတ်ခိုင်မာ အားကောင်းတဲ့ တရုတ် ပြည်သူ့ လွတ်မြောက်ရေးတပ်ရဲ့ ချေမှုန်းမှုအောက်မှာ ဆိုးဆိုးရွားရွား ပြိုကွဲ ပျက်စီးသွားမှာဖြစ်ကြောင်း ကြုံးဝါးခဲ့ပါသေးတယ်။
တကအိချိကတော့ ပြေရာပြေကြောင်း ဆွေးနွေးလိုပေမယ့် တရုတ်ရဲ့ အဓိက လိုလားချက်ကိုတော့ ဖြည့်မပေးနိုင်ဘဲ ဖြစ်နေပါတယ်။ အဲဒါကတော့ ဂျပန် ဝန်ကြီးချုပ် အနေနဲ့ သူပြောခဲ့တဲ့ မှတ်ချက်စကားကို လူသိရှင်ကြား ပြန်ရုပ်သိမ်းပေးဖို့ ဆိုတာပါ။ ဒါကို တကအိချိ အနေနဲ့ မလုပ်နိုင်ပါဘူး။ လုပ်လို့လည်း မရပါဘူး။ ဝန်ကြီးချုပ်ရဲ့ စကားဟာ အသုံးအနှုန်းအားဖြင့် အငြင်းပွားစရာ ဖြစ်နေခဲ့မယ် ဆိုရင်တောင်မှ မူအားဖြင့် မမှားဘူးလို့ ဂျပန်အစိုးရက ယူဆထားပါတယ်။ ဒါပေမဲ့ တရုတ်ကတော့ ဂျပန်ဟာ ထိုင်ဝမ်နဲ့ အလွတ်သဘော ဆက်ဆံမှုတွေ ရှိနေတဲ့တိုင် သံတမန် ဆက်ဆံရေး ထူထောင်မထားသလို ထိုင်ဝမ်ကိုလည်း တရားဝင် အသိအမှတ် ပြုမထားတာကြောင့် တကအိချိရဲ့ မှတ်ချက်ဟာ ထိုင်ဝမ် ပြဿနာကို အသုံးချပြီး တရုတ်ကို ရန်လိုကြောင်း ပြသမှု သက်သက်ပဲ ဖြစ်တယ်လို့ ယူဆထားပါတယ်။ နိုင်ငံခေါင်းဆောင် တစ်ဦးဖြစ်တဲ့ တကအိချိဟာ ထွက်ပြီးဆင်စွယ် ပြန်ဝင်လို့ မရသလိုပဲ သူ့စကားကို ပယ်နုတ်ဖို့ မဖြစ်နိုင်မှန်း တရုတ်က သိပေမယ့် ဆက်ပြီး တင်းတင်းမာမာ ဖိအားပေးနေပါတယ်။
ပြည်တွင်းမှာတော့ ဒီကိစ္စကြောင့် ဂယက်ရိုက်နေတယ် ဆိုပေမယ့် ဝန်ကြီးချုပ်သစ်အပေါ် လူထုထောက်ခံမှုအပေါ် ထိခိုက်တာမျိုး မရှိသလောက်ပဲလို့ လေ့လာသူတွေက ပြောပါတယ်။ စစ်တမ်းတွေ အရလည်း ဂျပန်ပြည်သူတွေဟာ တကအိချိကို ဆက်ပြီး ထောက်ခံနေကြောင်းပဲ ရလဒ်တွေ ထွက်ပေါ်နေပါတယ်။ ဒါပေမဲ့ တရုတ်ဖက်က တစ်ရစ်ပြီးတစ်ရစ် ထပ်တိုးလာမယ့် သံတမန်ရေး၊ စီးပွားရေး၊ ကုန်သွယ်ရေး ဖိအားပေးမှုတွေကို အမြန်ဆုံး မဖြေရှင်းနိုင်ရင်တော့ တကအိချိရဲ့ ရာထူးအပေါ် အနုတ်လက္ခဏာဆန်တဲ့ ရိုက်ခတ်မှုတွေ အနှေးနဲ့အမြန် သက်ရောက်လာပါလိမ့်မယ်။ တကအိချိရဲ့ ဂျပန် ဝန်ကြီးချုပ်ဘဝ အစပိုင်း နေသာတဲ့ နေ့ရက်တွေဟာ ခပ်မြန်မြန် ကုန်ဆုံးသွားပြီး ပြင်းထန်ကြမ်းတမ်းတဲ့ ဆောင်းရာသီက ခပ်မြန်မြန်ပဲ ဆိုက်ရောက်လာပြီ ဖြစ်ပါတယ်။
