08/06/2026
(၃၂) ဗိုၚ်ဍုၚ်အဝ
အခိၚ်နူဂယး ကၠာဗၟံက်ဟွံဗုက္ဍၚ် အဃောပိုဲ မတိက်ဒၟံၚ်ဂှ် ရမျှာင်သေနာတ်နူကဵုဒပ်ကၚ်တေအ် ဗြုတိုန်ကၠုၚ် ရ၊၊ ပိုဲတအ်ဂှ် ဒှ်ကောန်ပၞာန် မၞုံပ္ဍဲမုက်ပၞာန်မွဲရ၊၊
ၜိုန်ရ ဖျေဟ်ပခိုၚ်လဝ် ကၚ် ထပ်ကဵုထပ်ကီုလေဝ် သတိက်ပိုဲတအ်ဂှ် ညံၚ်ကဵုမတ်စာၚ်၊ သၠိၚ်မွဲလစုတ် ၚုဟ်မွဲလစုတ်၊၊ မိၚ်ဗရုသေနာတ်ဗက်ဂှ် ပိုဲတအ်ဓလိုက်ကတိုန်တုဲ ရပ်ကေတ် သေနာတ် မၞုံပ္ဍဲဗ္ဒါဲဇကုတုဲ ဒြေပ်တိတ်ကၠုၚ် ဒၞာဲမဒုၚ်မုက်ပၞာန်ရ၊၊ သၞတအ်ဂှ် ကြပ်ကၠုၚ် ကွေဟ်ဟ်ရ၊၊ ကောန်ကၚ်တအ်ဂှ် ဒြေပ်လုပ်ကၠုၚ် ပ္ဍဲပိုဲရ၊၊ သၞတအ်လေဝ် နကဵုမွဲအသိၚ် မဍိုက်ကၠုၚ် ကဵုချေဟ်
မဒြေပ်ကၠုၚ် နကဵုဇိုၚ်ဂှ် ဒြေပ်လုပ်ကၠုၚ်ဒၟံၚ်ရ၊၊ ပိုဲတအ် ဂွံညာတ်အာဒၟံၚ်ဆဓယောမ်ဓယောမ်ဟေၚ်ရ၊၊ ပ္ဍဲလစံက်ဓယောက် မဒြေပ်လုပ်ကၠုၚ်ဂှ် ပိုဲ တအ်ဖ္ဍာံဏာတုဲ ပန်ဏာရ၊၊ သၞတအ်လေဝ် ဟိန်မဒြေပ်ကၠုၚ်ဂှ် ပန်နၚ် ကဵုသေနာတ်ဂၠံၚ်ပိုဲမၞုံကီုရ၊၊ သၞတအ်လေဝ် ဒြေပ်ကၠုၚ်ဒၟံၚ်ဖိုဟ်ရ၊၊ ကြပ်ကၠုၚ် ကဵုပိုဲကွေဟ်ဟ်ရ၊၊ပိုဲတအ် ၜေါတ်ဇြၚ်တုဲ လုပ်ဗါ်သၞတအ်ရ၊၊ သၞတအ် ဒြဟတ်ဍိုန်စှ်ေတုဲဆုတ်တိတ်အာရ၊၊ သၞတအ် ဗွဲမဂၠိုၚ် မဒးချိုတ်အာ ပ္ဍဲဂှ်ရ၊၊ သၞတအ် ကလေၚ်ဒြေပ်လုပ်အာ ဍုၚ်အဝပၠန်ရ၊၊
နူကဵုမုက်ဆောဝ်ပေါဝ်တေအ်လေဝ် တၠညးအံၚ်ဇေယျ ဗလးနၚ် ဒေအ်ညးသတိုးသိၚ်္ခသူ နဒဒှ် သၟိၚ်ပၞာန် မွဲဟာန် ကေုာံ ဒပ်ပၞာန် ထပှ်ဒပ်၊ မၞုံကဵုချေဟ်ဒစာံကၠံ၊ အမၠံက်ၜါစှော်၊ သေနာတ်မသုန်လ္ၚီ၊ ကောန်ပၞာန်မွဲလက်ရ၊၊ ဒပ်ပၞာန်ဂှ်ဇက်စိုပ် ဍုၚ်ကျောက်မြောၚ်း တုဲ လုပ်သီကေတ်ဍုၚ်ဂှ်ရ၊၊ ဂၠုၚ်ၜိုတ်မၞုံ ပ္ဍဲကျောက်မြောၚ်း ဂှ် ဒပ်ပၞာန်ဂှ် ဗက်သီကေတ် ဂွံဂၠုၚ်ပၞာန် ၜါဖ္ဍိုက် ဂၠုၚ်ဍောတ်တ်ၜါဖ္ဍိုက်ရ၊၊
ဒပ်ပၞာန်ဍာ်ဗၟာ သေနာတ်ဝန်မၚ်းလှမၚ်းခေါၚ်ကျော် အာဗတိုက် ဒပ်သကိုပ်ပၞာန်တၠဗာန် မဒုၚ်စဵုဒၞာလဝ် ပ္ဍဲစဉ့်ကူး ညံၚ်ပၞာန် နူမုက်ဆောဝ်ပေါဝ် ဟွံဂွံစှ်ေကၠုၚ် အဝဂှ်ရ၊၊ ဒပ်ဂၠုၚ်သေနာတ်ဝန်ဂှ် ညံၚ်လ္ၚဴမလုပ်ဓဝုတ်ကီု လုပ်စိုပ်ကၠုၚ်ဗက်ဂှ် ဒးလှေက်လှံၚ်အာရ၊၊ ကောန်ပၞာန်ဗၟာတအ် ဒးဒြေပ်တိုန်သြၚ် ဂွံဗၠးဘဲလမျီု၊၊ ဂၠုၚ်ဗၟာမၚ်းခေါၚ်ကျော်၊ မၚ်းကျော်တမွတ်၊ ရာဇကုမ္ဘဏ် ပိဂၠုၚ်တအ်ဂှ်သီုဟွံဂံၚ် လုပ်ဗတိုက် ဒးပဲါတိတ်အာရ၊၊သေနာတ်ဝန် ကလေၚ်ပကောံမၞိဟ် ဂွံမၞိဟ်ၜိုတ် ပန်လ္ၚီတုဲ မၞိဟ်တအ်ဂှ်ကဵုပကောံ ဒက်ပခိုၚ်လဝ်ဒပ် ပ္ဍဲဍုၚ်သကိုၚ် မဒှ်ဍုၚ်သြၚ်ၜဳမွဲလပါ် ကုဍုၚ်အဝရ၊၊တုဲဂှ် သေနာတ်ဝန်ဂှ် အာဂရၚ်ဗတီ တၠညးအံၚ်ဇေယျ “ဒပ်ဒေအ်တၠညးဟံသာဝတဳ ဒပ်သကိုပ်ပၞာန်ဗညာဒလဂှ် နွံ ၁၁ ဒပ် ကဵု ဒပ်မဟာဥပ္ပရာဇာ ကဵုဒပ်စောဗြတအ် သီုဖအိုတ် ၂၁ ဒပ်ဂှ် ယဝ်ရ လုပ်ဗတိုက် ဒပ်ပၞာန်ဗၟာပိုဲ မနွံပ္ဍဲမူးဝရွာထောၚ်ဂှ်မ္ဂး ဒပ်ပိုဲ ဒးလီုဟေၚ်ရ၊၊ ဒပ်ဍာ်ဥပ္ပရာဇာ ၂၁ ဒပ်ဂှ် စိုပ်ခရမ်းပေါက်တုဲ ပံၚ်ကဵု ဒပ်ဗညာဒလ ၁၁ ဒပ် မ္ဂး ဒပ်သတိုးမၚ်းစော မမၚ်ဒၟံၚ် အဝဂှ်ဗီုလဵုလေဝ် ဒပ်ပိုဲ ပ္ဍဲအဝဂှ် ဂွံဒုၚ်ဒဝ်မာန် ဟွံသေၚ်၊၊ အဝ စိုပ်အာ သၟဝ်တဲ ဟံသာဝတဳတုဲမ္ဂး မုက်ဆောဝ်ပေါဝ် ပိုဲ ဏအ်လေဝ် ဂွံဒုၚ်ဒဝ်မာန်ဂှ် ဟွံလောဲသွာရ”၊၊
တၠညးအံၚ်ဇေယျ ဂွံတီကေတ် ပရူဒဒှ် ဒြဟတ်ပၞာန်မန်တုဲ အလဵုဇကုညးဂှ်ဇက်ကၠုၚ် စဵုကဵုစိုပ် ဍုၚ်ကျောက်မြောၚ်း ရ၊၊ သွက်ဂွံစဳရေၚ်ပၞာန်ဂှ် ထပ်ဗပေၚ်စုတ်ဒြဟတ် ဒပ်ပၞာန်ပိဒပ် သီုဖအိုတ် ချေဟ်ပိကၠံ၊ သေနာတ်ပိလ္ၚီ၊ မၞိဟ်တြဴလ္ၚီတုဲဗလးဏာမၚ်းလှမၚ်းခေါၚ်ကျော် ကဵုဒှ်သၟိၚ်ဗိုလ် ကဵုဇက်အာ ဂၠံၚ်ဍုၚ်သကိုၚ် ရ။မၚ်းလှမၚ်းခေါၚ်ကျော် ဖျေဟ်လဝ်ဒပ် ပ္ဍဲပေါၚ်းဖက်တည်တုဲ ဖန်ဇန်ပြေၚ်ဒၟံၚ်ပၞာန်ရ။ သွက်ဒပ်ပၞာန်ဍာ်ဂှ် ကဵုသေနာတ်ဝန် ဒှ်သၟိၚ်ဗိုလ်တုဲ ရုဲစှ်ကေတ်သရာဲခိုဟ် ၁၅၀၀ ဗလးဏာဂၠုၚ်ဇၞော် မကော်ဂးမှိုၚ်းသဲသဲ သီုကဵုဂၠုၚ်ပၞာန် ၃၆မတုဲ ဇက်စှ်ေအာရ၊၊ လပါ်ပၞာန်တိုက်ပၠန် ချေဟ်ပိကၠံ ၊ သေနာတ်ပိကၠံ၊ တ္ၚပိကၠံ၊ကောန်ပၞာန်တိုက် ပိလ္ၚီဂှ် နူကျောက်မြောၚ်း ကၠောအ်အာ ဂၠံၚ်ဗၟံက်တုဲ အာမံၚ်ဒၟံၚ် ပ္ဍဲကိုၚ်းတော၊၊ ဂၠံၚ်သြၚ် လပါ်ပလိုတ်ဂှ်လေဝ် ချေဟ်ပိကၠံ၊ ကောန်ပၞာန်မွဲလ္ၚီဂှ် ကဵုမၚ်ဒၟံၚ်ရ၊၊ကြဴနူ ဒပ်ပၞာန်ဗၟာ နူအဝ တိတ်ဗတိုက်လဝ် ဒပ်ပၞာန်ၜါတ္ၚဲတုဲဂှ် ၜိုန်ရညးတအ် မဒးဒုၚ်ဆောမ်လေၚ်အာလဝ် ဗွဲမဇၞော် ကဵုဒြဟတ်ကီုလေဝ် တ္ၚဲဏအ်ညးတအ် တိတ်ကၠုၚ်ဗတိုက် ပ္ဍဲဒၞာဲဒပ် ဥပ္ပရာဇာပၠန် ရ၊၊ လုပ်ဗတိုက် အလန်ဏအ်ဂှ် ညးတအ် ဟွံဒုၚ်ဗတိုက် လအ်လအ် ဗတိုက်ဂွံ မွဲလစုတ်တုဲ ညးတအ်ကလေၚ်ဒြေပ်လုပ် ဍုၚ်အဝပၠန်ရ၊၊ ဟိုတ်နူဗၟာတအ် မတိတ်ဗတိုက်ဒၟံၚ် အဆက်ဆက် ဗီုဏအ်တုဲ သွက်ဒပ်ပၞာန်မန်ပိုဲ ဂွံဆိၚ်ကေတ် ဒြဟတ်ပၞာန်ဗၟာ ပ္ဍဲအဝမၞုံဂလိုၚ်လဵုဂှ် တော်ဆိၚ်စဝါတ်တုဲ ဟွံဂံၚ်လုပ် ကြပ်ပ် ကဵုဍုၚ်အဝရ၊၊ အခိၚ်လေဝ်စိုပ်ဒၟံၚ် ဂိတုပသာ်ရ၊၊ သၟုဟ်ဗြဲမုန်သုန်လေဝ် ကြပ်ကၠုၚ်ရ၊၊ ယဝ်ရ မၚ်လဇဒၟံၚ်လအ် စိုပ်ဂိတုဇှ်ေ ဗြဲကျာထတ်ကၠုၚ်မ္ဂး ဒပ်ပၞာန်ဍာ်မန်တအ်ဂှ် အလဵုအလဵု ဒးလီုအာမာန်ရ၊၊နူဒပ်သကိုပ်ပၞာန်တၠဗာန် ဂွံတီကေတ် ဒဒှ်ရ ဒပ်အရီု တၠညးအံၚ်ဇေယျမစိုပ်ကၠုၚ် ပ္ဍဲကျောက်မြောၚ်း ဂှ်တုဲ ဗလးဏာ ပိဒပ် မၞုံကဵု ဂၠုၚ်ဗတိုက်ဇၞော် ၜါကၠံကဵုအာမံၚ်ဒၟံၚ် ဗၟံက်ကျောက်မြောၚ်း ရ၊၊ ပိဒပ်ပၠန် မၞုံကဵုဂၠုၚ်ဗတိုက်ဇၞော် ၜါကၠံပၠန်ဂှ်ကဵုအာမံၚ်ဒၟံၚ် လပါ်ပလိုတ်ကျောက်မြောၚ်း ပၠန်ရ၊၊ အလဵုဇကု သကိုပ်ပၞာန်တၠဗာန်ဂှ် ပၞာန်ဂၠုၚ်ဗၟာ နူလတူတေအ် စှ်ေကၠု ၚ်မ္ဂး သွက်ဂွံဒုၚ်ဗတိုက်ဂှ် မၚ်ဒၟံၚ်လဒေါဝ်ဂှ်ရ၊၊
တၠညးအံၚ်ဇေယျလေဝ် ရံၚ်ကေတ် အကာဲအရာ ဒပ်ပၞာန်မန်တအ်မကြပ်ကၠုၚ်ကီု အခိၚ်လေဝ် ဂိတုဇှ်ေမံက် ရမျှာင်ဓဂဵုလေဝ် ဗြုကဓဵုဒၟံၚ် ဂြိၚ်ဂြိၚ်၊ကျာဗြဲဂှ်လေဝ် က ဗိုက်ကဝဲ၊ ဗြဲဂှ်လေဝ် ဂူရိပ်ကၠုၚ် ရတုဲ ပ္ဍဲသၞာံ ၁၁၁၆ ဂိတုဇှ်ေပိမံက်ဂှ် သကိုပ်ပၞာန်ဇၞော်သေနာတ်ဝန် လ္ၚောဝ်ကလအ် တၠညးအံၚ်ဇေယျပိတဲတုဲ တိုန်ဍိုက်ကေတ် က္ၜၚ်ဇၞော်မှိုၚ်းသဲသဲတုဲ ဗရုတိုန် မံၚ် ထဗိုၚ် မဇက်ကၠုၚ်ပၞာန် သွက်ဂွံစှ်ေအာဗတိုက် ဒပ်ဍာ်မန်ရ၊၊ ဒပ်ပၞာန်တိတအ်လေဝ် နူလပါ်သြၚ်ၜါလပါ်ဂှ် ဇက်တိတ်အာကီုရ၊၊ က္ၜၚ်ဇၞော်မှိုၚ်းသဲသဲဂှ် စုက်ကဵုဒပ်ဍာ်မန်ဂတဂှ်တုဲ ဂၠုၚ်ဗတိုက် ဗၟာ ပိစှော် တိတ်ကၠုၚ် ဗတိုက် ဒပ်မန် ရ၊၊ ဂၠုၚ်မန် ကဵု ဗၟာ ဒှ်ဗတိုက်ရေၚ်သကအ်ဂှ် ကေတ်ဇၞး ရေၚ်သကအ် ဟွံဂွံ၊၊ ဆဂး ပၞာန်တိုက်ဗၟာနူသြၚ်ၜါလပါ်ဂှ် ပန်ကဵုသေနာတ် ကဵုလဴတုဲ ဒပ်ဍာ်မန် ဒးဆိၚ်မံၚ် လဒေါဝ်ၜဳရ၊၊
ဆဂး ဟိုတ်နူ အသိၚ်ဗြဲကျာ ဍာ်ဟွံညိၚ် ထိ ၚ်လဝ် ဂၠုၚ်လဒေါဝ်ၜဳ ဟွံဂွံ၊၊ဒးဒုၚ်ပန်ကဵု ပၞာန်တိုက်ဂၠိုၚ်တုဲ ဒပ်ဍာ်လီု ကောန်ပၞာန် ၜါလ္ၚီပြၚ်ၚ် ဒးဒုၚ်ချိုတ်အာ
ပ္ဍဲလဒေါဝ်ၜဳဂှ်ရ၊၊ မၞိဟ်မဒြေပ်တိုန် သြၚ်တအ်ဂှ်လေဝ် ဒးဒုၚ်ရပ် ကဵုပၞာန်ဗၟာဗွဲမဂၠိုၚ်ကီုရ၊၊ သကိုပ်ပၞာန်တၠဗာန် ဂွံညာတ်ကေတ် ဒပ်ပၞာန်ဇကု မလီုဂှ် ၜိုန်ရ
ကၠုၚ်ရီုကီုလေဝ် ဗီုလဵုလေဝ် ရီုဟွံမာန် ဒးဆုတ်ကလေၚ်တိတ်အာရ၊၊ ဒပ်မန်ပိဒပ် မၞုံလပါ်ပလိုတ်တေအ်ဂှ် ဂွံညာတ်ကေတ် သကိုပ်ပၞာန်တၠဗာန် မဆုတ်
တိတ်တုဲ ဟွံဂံၚ်ဗက်ကၠုၚ် ဆုတ်တိတ်အာကီုရ၊၊ ပ္ဍဲပေဲါဗတိုက်ဏအ်ဂှ် ဇွောအ်မ၊သ္ၚု၊ သြောအ်ကီု သီုကဵု ကပေါတ်လွဟ်လက်နက် အမၠံက် ဗွဲမဂၠိုၚ် ဗၟာတအ်သီဂွံအာရ၊၊
ဒပ်ပၞာန်ဗၟာတအ် ကလိဂွံဇမၞး ပ္ဍဲဒၞာဲဂှ်တုဲ ဆက်ဗတိုက် စှ်ေကၠုၚ်ပၠန်ဂှ်စိုပ်ဒပ်ဍာ် ဒဴဇဲယစက်၊၊ သကိုပ်ပၞာန် ဒဴဇဲယစက် ကဵု သကိုပ်ပၞာန် တၠဗာန်တအ်လေဝ် ဒုၚ်ဒဝ် မုက်ပၞာန်ဂၠုၚ်ဗၟာ ဟွံမာန် ဒပ်ပြးတုဲ ဗၟာတအ် သီဂွံအာ ဂၠုၚ်၊သေနာတ်၊ အမၠံက် ဗွဲမဂၠိုၚ်ပၠန် ရ၊၊ ကောန်ပၞာန်မန်တအ်လေဝ် ချိုတ်ဗွဲမဂၠိုၚ်ဂၠေၚ်ဇွကောန်ပၞာန်မန် ကောန်ပၞာန်ဗၟာတအ် ဟဳပေၚ်ဒၟံၚ် ၜဳဨရာဝတဳမွဲရ၊၊သကိုပ်ပၞာန်တၠဗာန်၊ သကိုပ်ပၞာန်ဒဴဇဲယစက်တအ် ဆုတ်စှ်ေအာပံၚ်ကဵု ဒပ်တၠညးဥပ္ပရာဇာရ၊၊
ဒပ်ဍာ်ဓမာန်တၠညး စောဗြ မဒက်လဝ်ဒပ် ပ္ဍဲနွားချေးကွျန်း၊ သံလွၚ်ဖြူ၊ၚါးထပ်ကြီးတေအ်ဂှ်လေဝ် ဒှ်ဒၟံၚ်ပေဲါဗတိုက် ကုဒပ်ပၞာန်ဍာ် ကောန်တၠညးအံၚ်ဇေယျသတိုးဓမ္မရာဇာ မဇက်စှ်ေကၠုၚ် ဂၠံၚ် သကိုၚ်ဂှ်တုဲ ဟိုတ်နူ မုက်ပၞာန်ဗွဲလတူတေအ် မဒးဒုၚ်ကျလဝ်တုဲ ဟွံဂံၚ် ဒုၚ်မုက်ပၞာန်ကွေဟ်ဟ် ရ၊၊ ဒပ်ဂှ်ဆိၚ်ပြံၚ်ကၠုၚ် ပကောံလဝ် ကရောမ်ဒပ် တၠညးဥပ္ပရာဇာရ၊၊ ဇှ်ေပိမံက် ဒပ်ဍာ်မန် ဒးဒုၚ်ကျအာတုဲ ဇှ်ေပန်မံက်ဂှ် ဒပ်တိုက်ဗၟာ မၞုံပ္ဍဲသြၚ်လပါ်ပလိုတ် ၜဳဨရာဝတဳဂှ် ဇက်အာစိုပ် ဍုၚ် သကိုၚ်ရ၊၊ ဒပ်ပၞာန်ဗၟာ မမၚ်ဒၟံၚ်ပ္ဍဲဍုၚ်အဝတေအ်လေဝ် ဂွံတီကေတ် ဒဒှ်ရ ဒပ်ဍာ်မန် လီုအာတုဲရတုဲ တိတ်နူဍုၚ်အဝတုဲ တိတ်ဗတိုက် ဒပ်ပၞာန်မန် ညးမဗိုၚ်လဝ် ဍုၚ်အဝ ပိ ဒပ် ဒပ်ဗညာအေဉ်၊ ဒပ်ဗညာကျေဉ်၊ ဒပ်ဗညာ ရက္ခိုက်ဂှ် ဒပ်ပၞာန်မန်တအ် ဒုၚ်ဒဝ်ဟွံမာန် သီုပိဒပ်ဂှ် ဒးလီု ဒးထကးပြးအာကီုရ၊၊ ဟိုတ်နူ ရာသဳဥတုလေဝ်သကာတ်မြဟ်၊ ဒြဟတ်ပၞာန်ဇကုလေဝ် အောန်စှ်ေအာ၊ သၞတအ်လေဝ် သီဂွံကပေါတ်အရပ်အရာပၞာန် နူဇကု တၟာဂလိုၚ်ရတုဲ သကိုပ်ဗိုလ်ပၞာန်မန်တအ်
ချပ်ရေၚ်သကအ်တုဲ ပိုက်မုက်ပၞာန် ကလေၚ်စဴကၠုၚ် ဟံသာဝတဳအိုတ်ရ၊၊
#ဟံသာဝတဳဂြးစပ် #ဟံသာဝတဳ Banyar Monchanmon
