22/05/2024
စင်္ကာပူလေကြောင်းလိုင်းက ဘိုးအင်း 777 လေယာဉ်တစီး မြန်မာပြည် လေပိုင်နက် ဘင်္ဂလားပင်လယ်အော် ပေါ် ဖြတ်ပြန်နေတုန်း လေမငြိမ် လေဝဲကယက်ထဲရောက်ပြီး ပေ သုံးသောင်းခုနှစ်ထောင်ကနေ ပေလေးရာလောက်အပေါ်တက်လိုက်၊ ပေ ၇၀ လောက်အောက်ပြုတ်ကျလိုက်နဲ့ ၅ မိနစ်အလူးအလဲခံလိုက်ရတယ်။ နောက်ဆုံး ပေ သုံးသောင်းတထောင်အထိ ဆင်းသွားတာတွေ့ရတယ်။ ဇီးဖြူသီး စကောထဲ ထည့်လှိမ့်လိုက်သလို အတော်ခံလိုက်ရတယ်။ အဲ့ဒီလိုမဖြစ်ခင် ရာသီဥတုက ကောင်းနေလို့ လေယာဉ်မယ်တွေက ခရီးသည်တွေကို နံနက်စာကျွေးနေတဲ့အချိန် ဖြစ်သွားတာတဲ့။
အကျိုးကတော့ ၇၃ နှစ်အရွယ် ဗြိတိသျှ နိုင်ငံသားတယောက် သေတယ်။ နှလုံးရောဂါနဲ့လား လန့်ပြီးသေသလားမသိ။လူ ၇၀ ထိခိုက်တယ်၊ ခရီးသည် ၁၈ ယောက်ဆေးရုံရောက်တယ်။ လူ ခုနှစ်ယောက် ကတော့ အတော်ဆိုးတယ်တဲ့။ လေယာဉ်မယ်တွေတောင် သွေးသံတရဲရဲ ဖူးယောင်ပြီး လေယာဉ်အတွင်းပိုင်းကတော့ လေဆင်နှာမောင်းအတိုက်ခံထားရသလို ပန်းကန်တွေကွဲ၊ ခွက်တွေကွဲ၊ အောက်စီဂျင်ခွက်တွေပြုတ်ကျ နဲ့ အတွင်းပိုင်းတခုလုံး ကျိုးပဲ့ပြီး ရစရာမရှိဘူး။ ခါးပတ်ပတ်မထားတဲ့သူတွေ လေယာဉ်အောက်ပြုတ်ကျချိန် ခေါင်းပေါ်ကလက်ဆွဲအိပ်တွေထည့်တဲ့အံဆွဲတွေကို ခေါင်းနဲ့ပြေးဆောင့်တာ၊ မျက်နှာကျက်တွေတောင် အက်ကွဲကုန်တယ်။ လူတော့ ဘယ်လောက်ခံရမလဲမသိ။ အခန့်မသင့် ဇက်ကျိုးနိုင်တယ်။
ကမ္ဘာ့ရာသီပြောင်းလဲလာတာတော့ မြန်မာတွေကိုအထူးပြောစရာမလို၊ ဒီနှစ် ပူလိုက်တာ ကြွက်ကြွက်ဆူလို့။ ရာသီသိပ်ပူတော့ အောက်က လေပူတွေက အပေါ်တက်၊ အပေါ်ကလေအေးနဲ့တွေ့၊ လေဝဲတွေထတယ်။ အဲ့လို လေဝဲတွေဟာ အလျားလိုက် ရှိနေတတ်တယ်။ တော်နေဒိုး လေဝဲကြီးတွေ အလျားလိုက် လွင့်နေသလိုပေါ့။ လေကမငြိမ်တော့ လေယာဉ်တွေက တလှုပ်လှုပ် နဲ့ ပြုတ်ပြုတ်ကျ၊ ဒီရက်ပိုင်း ဘင်္ဂလားပင်လယ်အော်ပေါ်မှာ မုန်တိုင်းငယ်တလုံး ပေါ်လာဖို့ တာစူနေတယ် ဖတ်ရတယ်။ ကမ္ဘာ့ရာသီဥတုပြောင်းလာတာနဲ့အညီ၊ လေယာဉ်တွေပျံသန်းနေတဲ့ ပေ ၁၈၀၀၀ ကနေ ၃၇၀၀၀ ကြား လေထုဟာ ဟိုးအယင်ကထက် ပိုပြီး မတည်မငြိမ် ဖြစ်လာတယ်။ လေယာဉ်တွေဟာ turbulence ခေါ်တဲ့ လေပူလေအေးဆုံတဲ့ လေဝဲတွေ ကို ကြံ့ကြံ့ခံနိုင်အောင်တည်ဆောက်ထားပါတယ်၊ ဒါပေမယ့် မတော်တဆ လေဝဲနဲ့ကြုံရင် အတွင်းထဲက လူတွေကတော့ လေဝဲနဲ့ကြုံချိန် သူတို့ ထိုင်နေ၊ ထနေသလားအပေါ် မူတည်ပြီး လွင့်စင် ထိခိုက်ခံရနိုင်ပါတယ်။
ကမ္ဘာ့ရာသီပြောင်းလာတာနဲ့အမျှ ဒီလို လေယာဉ်ခါယမ်း ပြုတ်ကျတွေအဖြစ်များလာပါတယ်။လေယာဉ်တွေကိုပိုပြီး ကြံ့ကြံ့ခံနိုင်အောင် တည်ဆောက်လာရတယ်။
