06/07/2025
လိပ်ခေါင်းရောဂါရှင်များအတွက် အစားအသောက်လမ်းညွှန်
-----------
လိပ်ခေါင်းရောဂါဆိုတာ စအိုနဲ့ စအိုဝမှာ ရှိနေတဲ့ သွေးပြန်ကြောတွေ ရောင်ရမ်းဖောင်းပွလာတာပါ။ ဝမ်းချုပ်လို့၊ အိမ်သာအကြာကြီးတက်လို့၊ အဝလွန်လို့၊ ကိုယ်ဝန်ရှိလို့၊ စအိုနဲ့ လိင်ဆက်ဆံလို့ အမျှင်ဓာတ်စားသုံးခြင်းနည်းလို့ စတဲ့အချက်တွေကြောင့် လိပ်ခေါင်းရောဂါ ဖြစ်တတ်ပါတယ်။
လိပ်ခေါင်းမှာ အပြင်လိပ်နဲ့ အတွင်းလိပ်ဆိုပြီး ရှိပါတယ်။ အတွင်းလိပ်ဟာ စအိုလမ်းကြောင်းအတွင်း စအိုဝကနေ ၂-၃ စင်တီမီတာအထက်မှာ ဖြစ်ပေါ်လာတဲ့ လိပ်ခေါင်း ဖြစ်ပါတယ်။ များသောအားဖြင့် မနာတတ်ပါဘူး။ ဘာကြောင့်လဲဆိုတော့ စအိုလမ်းကြောင်းအထက် ပိုင်းမှာ နာကျင်မှုကို ခံစားသိရှိတဲ့ အာရုံကြောတွေ မရှိတာကြောင့်ဖြစ်ပါတယ်။ အတွင်းလိပ်တွေကို အဆင့်လေးဆင့် ခွဲခြားထားပါတယ်။ အဆင့် ၁ကအဖြစ်များပါတယ်။ စအိုလမ်းကြောင်းထဲမှာ အလုံးသေးသေးလေး သာသာလောက်ပဲ ရှိပါတယ်။ စအိုရဲ့အပြင်ကနေ စမ်းလို့ မရပါဘူး။ အဆင့် ၂ ကတော့ ပိုကြီးလာပြီး အိမ်သာသွားတဲ့အခါ လိပ်ခေါင်းဟာ အပြင်ကို နည်းနည်းထွက်လာပြီး ပြန်ဝင်သွားပါတယ်။ အဆင့် ၃ မှာတော့ အိမ်သာသွားတိုင်း စအိုအပြင်ကို ထွက်ထွက်လာသလို အလုံးငယ်လေးတွေကိုလည်း စမ်းမိတတ်ပါတယ်။ လက်နဲ့တွန်းပြီးတော့ စအိုထဲကို ပြန်ထည့်လို့ ရပါသေးတယ်။ အဆင့် ၄ မှာဆိုရင် လိပ်ခေါင်းက အပြင်အမြဲထွက်နေပြီး အထဲကိုလက်နဲ့ ပြန်ထည့် လို့ မရတော့ပါဘူး။
ရောဂါလက္ခဏာတွေအနေနဲ့ နေရထိုင်ရခက်ခဲခြင်း၊ စအိုတစ်ဝိုက် ယားယံခြင်း၊ တစ်ခါတစ်ရံ သွေးထွက်ခြင်း၊ အလွန်အမင်းနာကျင်ခြင်းများ ဖြစ်တတ်ပါတယ်။
မဖြစ်အောင် တားဆီးနိုင်မယ့် နည်းလမ်း
ဝမ်းချုပ်ခြင်းကြောင့် ဖြစ်တဲ့လိပ်ခေါင်းဆိုရင် ဝမ်းမချုပ်အောင် အမျှင်ဓာတ်များများ စားပေးရမှာ ဖြစ်ပါတယ်။ ဝမ်းချုပ်ရခြင်းအကြောင်းရင်းကလည်း အမျှင်ဓာတ်စားသုံးမှု လျော့နည်းတာကြောင့် အဓိက အကြောင်းအချက်တစ်ရပ်ပဲဖြစ်ပါတယ်။ အဝလွန်ခြင်းကြောင့်ဖြစ်ရင်တော့ ဝိတ်ချဖို့ လိုအပသလို စအိုနဲ့ လိင်ဆက်ဆံတဲ့အလေ့အထရှိသူတွေလည်း အဲဒါကို ပြုပြင်ဖို့ လိုအပ်ပါတယ်။
သင်ဟာ အမျှင်ဓာတ်စားသုံးမှု လျော့နည်းသူဆိုရင်တော့ အဲဒီအကျင့်ကို ချက်ချင်းပြင်သင့်ပါပြီ။ အမျှင်ဓာတ်ပြည့်ဝမှသာ သင့်ရဲ့ အစာခြေစနစ်ကို ကောင်းကောင်းအလုပ်လုပ်စေမှာ ဖြစ်တာ ကြောင့်ပါပဲ။
လတ်ဆတ်တဲ့အသီးအနှံများများစားပါ၊ အခွံမခွာဘဲ ရေစင်အောင် ဆေးပြီးစားပါ။ သစ်သီးတွေကို ကြိတ်ခြေပြီး လတ်လတ်ဆတ်ဆတ် အသီးဖျော်ရည် ဖျော်သောက်ပါ။ ကုလားပဲ၊ ပဲနီလေးတို့ လို ပဲတွေ စားပေးပါ။ ဂျုံကြမ်းနဲ့ လုပ်ထားတဲ့ ပေါင်မုန့်၊ အုတ်ဂျုံတို့ကို မနက်စာအနေနဲ့ စားပေး ပါ။ အသီးအနှံတွေက ဗီတာမင်စီကို ရရှိစေတာမို့ သင့်ကို ဝမ်းချုပ်ခြင်းကနေ ကင်းဝေးစေပါလိမ့် မယ်။ ဒါ့အပြင် အစေ့အဆန်တွေ၊ အခွံမာသီးတွေကလည်း ရှောရှောရှူရှူ ဝမ်းသွားစေပါလိမ့်မယ်။
ဝိတ်ချမယ်ဆိုရင်လည်း BMI ကို တွက်ချက်ပြီး ကစီဓာတ်၊ အသားဓာတ်နဲ့ အသီးအရွက်တွေကို မျှတအောင် စားပေးပါ။ တစ်နေ့ကို အနည်းဆုံး မိနစ် ၂၀ လောက် အချိန်ယူပြီး လေ့ကျင့်ခန်း လုပ်ပါ။
အစားအသောက် လမ်းညွှန်
- ရေများများသောက်ပါ။ တစ်နေ့ကို ၂.၅ လီတာ ပုံမှန် သောက်ပါ။ သင့်ရဲ့ အစာအိမ်အူလမ်း ကြောင်းကို သန့်ရှင်းချောမွေ့စေတဲ့အပြင် အစာခြေနှုန်းလည်း မြန်ဆန်စေပါတယ်။ ရေအစား လက်ဖက်ရည်၊ ကော်ဖီများများသောက်ခြင်းကို ရှောင်ပါ။
- ကုလားပဲနဲ့ တခြားပဲအမျိုးမျိုးကို ဆိုင်ကနေ ဝယ်လာပြီး ရေစိမ်ပြီးမှ ချက်ပြုတ်စားသောက်ပါ။ City Mart တွေမှာ ရနိုင်တဲ့ စည်သွပ်ဘူးထဲ ထည့်ထားတဲ့ ပဲတွေကိုတော့ ဖြစ်နိုင်ရင် မစားပါနဲ့။ အာဟာရပါဝင်မှု လျော့နည်းပြီး တာရှည်ခံဆေးတွေကြောင့် မလိုလားအပ်တဲ့ ကျန်းမာရေးဆိုးကျိုး တွေကို ဖိတ်ခေါ်သလို ဖြစ်နေမှာစိုးလို့ပါ။
အစေ့အဆန်တွေနဲ့ ပြုလုပ်ထားတဲ့ မုန့်
-------------
ပါဝင်ပစ္စည်းတွေက
psyllium husks powder - စားပွဲတင်ဇွန်း ၂ ဇွန်း
ရေ - ၃၅၀ မီလီ
အယ်လ်မွန်စေ့၊ သစ်ကြားစေ့၊ သစ်အယ်သီးစေ့ အရောအနှော - ၂၅၀ ဂရမ်
နေကြာစေ့၊ ဖရုံစေ့အရော - ၂၅၀ ဂရမ်
နှမ်း - ၅၀ ဂရမ်
ဆား - စားပွဲတင်ဇွန်း ၁ ဇွန်း
သံလွင်ဆီ - စားပွဲတင်ဇွန်း ၃ ဇွန်း
လုပ်ရမယ့် နည်းလမ်းက ...
- Oven ကို ၁၈၀ ဒီဂရီအပူေးထားပါ။ ပြီးရင် မုန့်ဗန်းကို ဆီသုတ်ပြီး ပြင်ဆင်ထားပါ။
- အစေ့အဆန်တွေ၊ နှမ်းတွေနဲ့ ပါဝင်ပစ္စည်းတွေကို သေချာပေါင်းစပ်ပါ။
- Blender နဲ့ မညက်တညက်ကြိတ်ပါ။
- ပန်းကန်လုံးထဲ ထည့်ပြီး ဆီထည့်၊ အရသာထည့်ပါ။
- သေချာမွှေပါ။
- မုန့်ဗန်းထဲ ထည့်ပါ။
- မုန့်ဗန်းကို Oven ထဲ ထည့်ပါ။
- အထက်အောက် ၄၅ မိနစ်လောက် ဖုတ်ပါ။
- ရွှေရောင်သမ်းလာပြီဆို ချပြီး အအေးခံပါ။
- ဒိန်ခဲ၊ ခရမ်းချဉ်နှစ်တို့လို အချဉ်အနှစ်ဆမ်းပြီး စားနိုင်သလို တူနာငါး၊ ဆယ်လ်မွန်ငါးတွေနဲ့လည်း အသားညှပ်စားနိုင်ပါတယ်။
#လိပ်ခေါင်းရောဂါအတွက်
