11/06/2025
ເມືອງຫີນບູນເປີດການສອບເສັງຈົບຊັ້ນມັດທະຍົມຕົ້ນ ປະຈໍາສົກຮຽນ 2024 – 2025
…………………………………
ພິທີເປີດການສອບເສັງຈົບຊັ້ນມັດທະຍົມຕົ້ນ ມ4 ປະຈໍາສົກຮຽນ 2024 - 2025 ໄດ້ຈັດຂຶ້ນໃນວັນທີ 11 ມິຖຸນາ 2025 ຢູ່ທີ່ໂຮງຮຽນມັດທະຍົມສົມບູນຫີນບູນ ບ້ານຄຳແກ້ວ ເມືອງຫີນບູນ ແຂວງຄຳມ່ວນ ເປັນກຽດເຂົ້າຮ່ວມມີທ່ານ ນິກອນ ຄຸດມະນີ ຮອງເຈົ້າເມືອງໆຫີນບູນ, ທ່ານ ຄໍາຫຼາວ ໄຊໂກສີ ຫົວໜ້າຫ້ອງການສຶກສາທິການ ແລະ ກິລາ ເມືອງ, ມີບັນດາຄູ, ອາຈານ, ຄະນະຊີ້ນຳ, ຄະນະກໍາມະການສອບເສັງ, ນ້ອງນັກຮຽນ ແລະ ແຂກທີ່ຖືກເຊີນເຂົ້າຮ່ວມ. ໃນພິທີແມ່ນໄດ້ຮັບຟັງການລາຍງານການກຽມຄວາມພ້ອມສອບເສງຈົບຊັ້ນມັດທະຍົມສຶກສາຕອນຕົ້ນ ມ4 ສົກຮຽນ 2024 – 2025. ເມືອງຫີນບູນ ມີໂຮງຮຽນທັງໝົດ 133 ແຫ່ງ, ໂຮງຮຽນອະນຸບານ 35 ແຫ່ງ, ປະຖົມ 93 ແຫ່ງ, ມັດທະຍົມສົມບູນ 6 ແຫ່ງ, ມັດທະຍົມຕົ້ນ 9 ແຫ່ງ. ໃນນັ້ນມີນັກຮຽນຊັ້ນ ມ4 ທັງໝົດ 393 ຄົນ, ຍິງ 221 ຄົນ, ໄດ້ແບ່ງສູນສອບເສງອອກເປັນ 4 ແຫ່ງ ຄື: ສູນ ມສ ຫີນບູນໄຕ້ ມີໂຮງຮຽນ 3 ແຫ່ງ ມີ ໂຮງຮຽນ ມສ ຫີນບູນໄຕ້, ມສ ໄຊສົມບູນ, ມສ ທ່າໝີ, ມີ 6 ຫ້ອງສອບ, ມີນັກຮຽນສອບ 111 ຄົນ, ຍິງ 59 ຄົນ. ສູນ ມສ ຫີນບູນ ມີໂຮງຮຽນ 4 ແຫ່ງ, ມີ ໂຮງຮຽນ ມສ ຫີນບູນ, ມຕ ນາໂນ, ມຕ ສຶກສາສົງ, ມສ ບ້ານຫາດ, ມີ 6 ຫ້ອງສອບ, ມີນັກສອບທັງໝົດ 128 ຄົນ, ຍິງ 69 ຄົນ. ສູນ ມສ ບ້ານພົງ ມີໂຮງຮຽນ 4 ແຫ່ງ, ມີໂຮງຮຽນ ມສ ວຽງທອງ, ມສ ບ້ານພົງ, ມສ ປຸ່ງເໜືອ, ມຕ ປາກທຶກ, ມີ 4 ຫ້ອງສອບ, ມີນັກສອບ 75 ຄົນ, ຍິງ 48 ຄົນ. ສູນ ມສ ມ່ວງໄຂ່ ມີໂຮງຮຽນ 4 ແຫ່ງ, ມີ ໂຮງຮຽນ ມສ ມ່ວງໄຂ່, ມຕ ຫົວນາ, ມຕ ບໍ່ແໜ່ງ, ມຕ ໜອງຊື່ນ, ມີ 4 ຫ້ອງສອບ, ມີນັກສອບ 79 ຄົນ, ຍິງ 45 ຄົນ, ມີກໍາມະການຍາມຫ້ອງສອບເສັງ 40 ທ່ານ, ພະນັກງານແພດ 8 ທ່ານ ແລະ ພະນັກງານປ້ອງກັນຄວາມສະຫງົບ 8 ທ່ານ. ສໍາລັບການສອບເສັງປະກອບມີ 5 ວິຊາຄື: ວິຊາພາສາລາວ - ວັນນະຄະດີ, ວິຊາວິທະຍາສາດ - ສັງຄົມ, ວິທະຍາສາດ - ທໍາມະຊາດ, ຄະນິດສາດ ແລະ ວິຊາພາສາອັງກິດ. ໃນພິທີທ່ານ ນິກອນ ຄຸດມະນີ ຍັງໄດ້ມີຄໍາເຫັນໂອລົມ, ພ້ອມທັງກ່າວເປີດພິທີ ເຊິ່ງກ່ອນອື່ນທ່ານໄດ້ຮຽກຮ້ອງມາຍັງຄະນະກໍາມະການ, ຄູອາຈານທຸກພາກສ່ວນ, ຕະຫຼອດຮອດນ້ອງນັກຮຽນ ຈົ່ງພ້ອມກັນເອົາໃຈໃສ່ປະຕິບັດກົດລະບຽບໃນການສອບເສັງຢ່າງເຂັ່ມງວດ ເພື່ອເຮັດໃຫ້ການສອບເສັງໃນຄັ້ງນີ້ມີປະສິດຕິພາບ, ປະສິຕິຜົນບັນລຸຜົນສໍາເລັດຕາມຄາດໝາຍທີ່ວາງໄວ້. ການສອບແມ່ນຈະໄດ້ດຳເນີນເປັນເວລາ 3 ວັນ ເລີ່ມແຕ່ວັນທີ 11- 13 ມິຖຸນາ 2025 ຈຶ່ງຈະສໍາເລັດ.
