16/06/2024
|| Hanoin, Hahalok & Hakerek Rasik || Obrigadu Reitor UNTL
AAE-FEST, UNTL - Magnífiku Reitor Universidade Nacional Timor Lorosa'e (UNTL) João Soares Martins lansa ofisialmente boletim assosiasaun akadémika estudantil UNTL periodu 2022-2024 ne'ebe hakerek husi assosiasaun fakuldade engenharia siénsia no teknolojia.
Hafoin halo lansamentu liu husi ko'a fita, Magnífiku Reitor UNTL agradese no fo parabens ba eskritor tanba bele hakerek jornada naruk ne'e ho volume ne'ebe boot no rai ba senadu foun sira.
"Parabens ba ita boot, agradese tanba bele hola inisiativa hodi hakerek boletim ne'e, parabens dala ida tan". Dehan Magnífiku Reitor UNTL João Soares Martins ba eskritor iha Kampus Sentral UNTL, 14/06/2024.
Iha diskursu, Eis Senadu Fect-Untl Periodu 2022-2024 Sergio Alves da Costa haktuir boletim ne'ebe hakerek ne'e akumula husi programa sira hotu ne'ebe assosiasaun akadémika estudantil UNTL durante tinan 2 nia laran inklui komunikadu imprensa sira.
Boletim assosiasaun akadémika estudantil UNTL periodu 2022-2024 refere ho lema jeral katak Hanoin, Hahalok no Hakerek Rasik.
"Assosiasaun estudantil FEST-UNTL deside halo boletim ida, boletim ne'e ho lema jeral 'Hanoin, Hahalok & Hakerek Rasik', boletim ne'e introduz husi programa hotu ne'ebe assosiasaun estudantil UNTL halo durante tinan 2".
"Tansa mak ita deside hakerek ? Ita hanoin, ko'alia, halo no hakerek rasik, tanba wainhira ita ko'alia, liafuan ne'e anin ne'ebe semo aas no lakon maibe wainhira ita hakerek ne'e hela ba permanente, tempu no espasu bele muda, maibe saida mak ita hakerek ne'e sei la muda pontuasaun nein letra ida husi tinan ba tinan". Tenik Eskritor, Eis Senadu FEST Sergio Alves
Eis Senadu ne'e husu ba senadu foun sira atu hanoin, ko'alia no halo, hafoin halo bele hakaas an hodi hakerek saida mak halo tanba hakerek ne'e importante tebes kompara ho ko'alia ka halo diskursu deit.
"Husu imi hotu atu hanoin, ko'alia, halo maibe hakerek atu bele rai".
Foto : Média AAE-FEST UNTL
