04/08/2025
مسّيكم بالخير❤️
#الخبر 18 معدّل باك علوم ما توصّلش للطبّ🤔
#التّعليق
الكلّ مدّت وجوهها يا عاملة فيديوهات يا كاتبة تدوينات تستنكر و تندّد رغم إنّو مازلنا ما فهمناش الخطأ وين🤔
المصيبة إنّا ولّينا نطالبو بإلّي المفروض طبيعي و نستنكرو في أفعال إلّي المفروض كيف تصير الدّولة تعتذر عليها و تعاقب المتسبّب فيها و الأهمّ تفهم إلّي السّيستام غاااااالط و قاعدة الخطأ بشري ما تنطبقش على ها الحالات لكن لأنّو هذا ما يصيرش فولّينا نحكمو على الخطأ و الصّواب بنفس الحكم و نڤولو مباشرة خطأ باش نكونو في صفوف المندّدين الأبطال
الغلطة إلي صارت ("هذا إذا صارت لأنّو ما عنديش حيثيات و لا تفاصيل")
صار قبلها آلاف الغلطات الثّابتة إلّي غيّرت مجرى حياة ناس و حكمت في مصيرهم خطأ طبّي كتحديد موعد متأخّر أو عدم توفّر الأجهزة في المستشفيات الحكومية كيف السّكانار أو عدم توفّر سرير ....دمّر بني آدم
خطأ في الإجراءات دمّر سمعة ناس خطأ في تشييد عمارات خنڤت أحياء و دمّرت نفسيّة النّاس إلي عايشة في الغابات الإسمنتيّة.... خطأ في إنارة شوارع تسبّب في حوادث قاتلة خطأ في تكليف أو تعيين دمّر إدارة و عطى فرصة للاّ كفاءات تتحكّم في مستقبل مواطن خطأ في تقييم دمّر مستقبل خرّيج عندو سنوات يستنّى في فرصتو باش يفيد البلاد خطأ في دعوة نكرات و قاذورات للبلاطوات و تقديمهم كقُدْوات...خطأ في التّرويج لكلمات نابية و هابطة... على إنّها فنّ خطأ في الدّفاع على الغالط لمجرّد إنّو زميل خطأ في عدم نفضان الزّربية و الإكتفاء بمسحانها من فوڤ لفوڤ
خطأ يجرّ خطأ و الخطأ الأكبر إنّا نتكلّمو على الخطأ كحدث مش كظاهرة
السّيستام غالط والخطأ ظاهرة و مقولة زكرة بريّك في بلاصتها
#عربيّة
