04/06/2026
بسم الله الرحمن الرحيم
وَإِذَا قِيلَ لَهُ اتَّقِ اللَّهَ أَخَذَتْهُ الْعِزَّةُ بِالْإِثْمِ فَحَسْبُهُ جَهَنَّمُ وَلَبِئْسَ الْمِهَادُ
صدق الله العظيم
الآية هذي تنطبق على برشا من شعبنا تقلهم إتقوا الله ما يجيش تضربوا و تحرضوا على الإغتصاب و الإعتداء على الأفارقة و راهم عباد الله كيفهم كيفكم مانا زايدين عليهم بشيء و راهم هاربين مالحروبات و يحبوا يحرقوا و بلادنا مسكرة عليهم خاطر عاميلين إتفاقية مع إيطاليا و أوروبا
يخرجولك ناس يقلك توطين و يحبوا يحتلونا و يبرروا قتلهم و إغتصاب نسائهم لين وصلنا كيما البارح شفنا توانسة يغتصبوا في إمرأة من الدول الإفريقية جنوب الصحراء و هي حبلة قدام راجلها و عايلتها و شادين عليهم السكاكن و الحديد و لا حول و لا قوة إلا بالله
إتقوا الله و ما تاخذكمش العزة بالإثم راهو عقاب ربي شديد و راكم مسلمين و رانا في أشهر حرم و لا فرق بين عربي أو أعجمي إلا بالتقوى
الشيء إلي صار راهو كبير برشا و التبرير ليه راو أكبر و أعظم و كان ما تراجعوش رواحكم و توبوا عالشيء هذا راو باش يجيكم سخط و غضب من الله و ماهوش دوركم باش تخرجوهم، الدولة هي الطرف الوحيد إلي يتحمل المسؤولية هذي و في رقبتها.
يا رئيس الجمهورية، يا حكومة و يا مسؤولين شوفولنا حل للموضوع هذا راكم باش تتسببوا في كارثة سببها الأوروبيين حطوها في بلادنا و ماكمش قدها .. عندنا عدد كبير متاع توانسة في الخارج و راو بالشيء إلي صاير باش تضروهم و باش تشوهولنا الصورة متاعنا في الخارج و عادي يصير فيهم نفس الشيء إلي يعملوا فيه ولاد بلادنا في المهاجرين
و قد أعذر من أنذر..
