هاو الصحيح

31/07/2025

في أقل من 3 سنين ميلوني عملت 3 زيارات رسمية للتونس. يعني أكثر حاكم أجنبي جاء للتونس السنوات الأخيرة.
واضح أن مصلحة إيطاليا كبيرة في تونس خاصة بعد الإتفاقية المذلة المبرمة في جويلية 2023 و الي بالكاشف عطات نتائج تزيد من شعبية ميلوني في إيطاليا. (إنخفاض الهجرة الغير الشرعية ب80%)
#تونس #قيسسعيد

تؤدي السيدة جورجيا ميلوني، رئيسة مجلس الوزراء بالجمهورية الإيطالية، اليوم الخميس 31 جويلية الجاري، زيارة عمل إلى تونس.

16/07/2025

تأكيد لما تم نشره سابقا علي الصفحة من تقارير حول الإتفاقية المبرمة بين تونس و إيطاليا.

28/06/2025

عام 2025 الدول تقدم تصورات إقتصادية، أرقام و توقعات. و نحنا مازلنا في اللغة العقيمة و الشعرات الفضفاضة.
الناس تحكي علي الرقمنة، الذكاء الإصطناعي و الطاقات المتجددة... و نحنا مازلنا في "اللوبيات"، حرب التحرير و التٱمر.
للأسف في 6 سنين، الرئاسة ما طرحت حتي مرة تصورات جديدة و جدية للإقتصاد التونسي.
كل بيان يشبه الي قبلوا و خالي من أي معلومة قيمة.
كل بيان يدور في نفس المعجم متع التخوين، الحرب و نظريات المؤامرة السخيفة (أهمها مسرحية الطرد المسموم).
نتمني نهار، الرئاسة تقدم فكرة جدية مدعمة بأرقام، توقعات و تقييم كامل للإنعكاساتها.
6 سنين و "الثورة التشريعية" تستعمل في كل بيان و هي أهم ثورة تشريعية تجم تصير في تونس هي رقمنة الإدارة و تسهيل الخدمات للمواطن. الي حسب البنك الدولي، تجم تربح البلدان النامية نقطة نمو كاملة سنويا (للتذكير نسبة نمو تونس في 2024 في حدود 1%).
لكن للأسف، مفاهيم القرن 21 بعيدة كل البعد علي الرئاسة و محيطها الي تصوراتها حدها القرن الأول الهجري مع شوية أفكار "ماركسية لينينية". هالخليط ما يجم يكون نتاجه كان مشاريع سخيفة كيما الشركات الأهلية الي تذكرنا بالجماهرية الليبية و القذافي.
و في الأخر كان تونس ولات "ضيعة أو بستانا كما يتصوّر ذلك البعض" راكم توما أول مسؤولين عالشيء هذا بالهذيان و سوء التصرف متاعكم.
تحيا تونس 🇹🇳

26/06/2025

🔴 في هذا اللقاء رفض زين العابدين بن علي طلب كوناايزا رايس بإنشاء قاعدة عسكرية أمريكية في تونس 🇹🇳 … تم تأكيد هذا الرفض عبر برقيات ويكيليكس (خاصة برقية 08TUNIS153 المرسلة من السفارة الأمريكية في تونس).
⬅️ هذا لا يعني أن بن علي لم يتعاون أمنيا و عسكريا مع الولايات المتحدة لكن لطالما كان التواجد العسكري الأجنبي المباشر خطّا أحمر بالنسبة له ! 🚩

26/06/2025

لافتة تنشر في شوارع تل أبيب منذ البارحة بعنوان "إتفقيات إبراهيم : حان الوقت للشرق أوسط جديد"
يبرز فيها أهم القادة "العرب" الي إعترفوا بالكيان أو بصدد الإعتراف و التطبيع.
من اليمين الي اليسار :
محمد السادس 🇲🇦
حمد ابن عيسى 🇧🇭
هيثم بن طارق 🇴🇲
محمد بن زايد 🇦🇪
الملك سلمان 🇸🇦
عبد الفتاح السيسي 🇪🇬
محمود عباس 🇵🇸
أحمد الشرع 🇸🇾
عبدالله الثاني 🇯🇴

23/03/2025

الفيديو الكامل :
https://www.facebook.com/share/r/16119bzpqH/

18/05/2024

في 2011 جات هستيريا القصبة :
كلها ولات تحب على مجلس تأسيسي و نظام برلماني. كان تقول كلمة ضد التيار تولي زلم، تجمعي و محسوب عالنظام البائد. تقولوا إيجا نعملوا لجنة خبراء فيها عياض بن عاشور و الصادق بلعيد توا يعملوا في أشهرة دستور.
لا إنت تحب تلتف حول أهداف الثورة و تدافع على منظومة التهميش.
3 سنين مبعد حضر دستور كان المطلوب يتعمل في عام. دستور تكلف مليارات و ساهموا في كتابتو ناس ما عندها حتى علاقة بالسياسة ولا القانون كيما سنية بن تومية وغيرها... الدستور هذا جاب معاه نظام فايت البرلماني و فيه تشتيت كبير للسلط ما تجم تعدي بيه حتي إصلاحات جذرية.
7 سنين مبعد، أي 10 سنة مبعد 2011. الصادق بلعيد يتكفل بمهمة إعداد دستور. في أقل من عام تحضر نسخة جديدة و تعاود تكرس للنظام رئاسي بإمتياز.

في 2012 جات هستيريا النهضة :
كلها ولات تحب عالإسلام السياسي. كان تقول كلمة ضد التيار تولي كافر و تحارب في الإسلام. تقولوا راهم الناس هاذم ما تنجمش تسير البلاد، إتاجر بالدين و قاعدة تنشر في فكر خطير.
لا إنت تصدق في إعلام العار و تدافع على مشروع علماني متطرف.
3 سنين مبعد، تونس تكون تعادات بأسوأ سنواتها، إرهاب ،إغتيالات سياسية، قانون تعويضات فرغ ميزانية الدولة، وظيفة عمومية تغرق تحت حجم الإنتدابات و الدولة تدخل تحت سقف الاقتراض من البنك الدولي بعد ما خرجت منو في التسعينات.
6 سنين مبعد، أي 10 سنة مبعد 2012. حركة النهضة يتجمد نشاطها و أغلب قيادتها تمنع من ممارسة السياسة.

في 2024 جات هستيريا جديدة :
كلها ولات تحب على "التنظيف". كان تقول كلمة ضد التيار تولي فاسد، عميل الخارج و خائن للوطن. تقولوا راهو الوضع الإقتصادي كارثي. نسبة نمو ضعيفة خاطر المستثمرين قاعدين يهربوا علينا و الدولة ماعندها حتي سياسة إقتصادية.
لا هاذوكم فاسدين، يخدموا في مصالح الخارج. باش نعملوا على أرواحنا و نحققوا الاكتفاء الذاتي.
تقولوا المرسوم 54 خطر على المكسب الوحيد اللي بقالنا و عباد قاعدة تشد الحبس على أي نقد.
لا عملاء هاذوكم و كان ما عملوا شيء تو يروحوا.
تقولوا راهو إنعزلنا، عمروا ما صارلنا أزمات دبلوماسية قد السنين هاذي و خرجنا عالحياد المعتاد متاعنا.
لا هذا تدخل خارجي و السيادة الوطنية خط أحمر.

في الحقيقة :
- تونس في عامين تخسر 4 نقاط في مؤشر مدركات الفساد في و توخر ب 10 مراتب في الشفافية.
- تونس في 2024 فاتها الآجل في تقديم مطلب إسترجاع الأموال المنهوبة بالخارج (39 مليار دولار بمعدل خسارة 3659 دولار لكل تونسي).
- تونس في 2024 طلعت بأداة جديدة وغير تقليدية لتمويل العجز متاعها: البرلمان صادق على تعديل يسمح تمويل الميزانية مباشرة من البنك المركزي و هكا تمحي استقلاليته.
- تونس في 2024 تسجل نمو ب 0.2% في الثلاثية الأولى في حين بلدان إفريقية نعتبروها "فقيرة" تسجل في نمو 15 مرة قدنا.
- تونس في 2024 تسجل تضخم ب 9.79% أي تقريب 3 مرات نسبة التضخم عام 2016.
- تونس في 2024 شوية ما تحرمت من علمها في الألعاب الأولمبية خاطر الحكومة عندها مشكلة واضحة مع أي آجال و مش قادرة تحترمهم.
- تونس في 2024 منعت 21 ألف مهاجر من الوصول إلى السواحل الإيطالية في ظرف 4 أشهر فقط . وقت حدودنا البرية مسيبة و مانعرفوا شيء على محتوى هالمفاهمة مع إيطاليا.

متأكد أن تونس باش يجي نهار،و تتجاوز هالهستيريا.
لكن السؤال قداه بش تتكلفلنا المرة هاذي ؟ 10 سنين أخرين و معاهم مئات المليارات ؟
متأكد أن تونس باش تتجاوز هالهستيريا خاطر في المراحل الكل وقفوا ناس وطنيين و لبوا نداء الواجب. ناس ماعندها ولاء كان للتونس مش إيديولوجيات وأشخاص.
متأكد أن تونس باش تتجاوز هالهستيريا خاطر بلادنا تستحق خير برشا.
كفاءاتنا بالداخل والخارج يشهدلها العالم الكل.
ناس تخدم و تجتهد في أفكار القرن 21 من رقمنة، من ذكاء إصطناعي و من طاقات متجددة...
ناس قادرة باش تلقى حلول بعيدا عن مصطلحات القرن 1 الهجري، بعيدا عن مسرحيات "الطرد المسموم" و بعيدا عن "الصواريخ الدستورية" و "التنظيف" الوهمي.

تحيا تونس 🇹🇳