30/07/2025
Lesoni 5 Kuata 3, 2025
Pāsová pe Laka atú
pea mo Faifekau Taniela Katoa, 'Eleta Vunivesi Taione, & 'Eleta Siua Fevaleaki
Veesi Laulotó: “Pea ‘e hoko ‘o pehē, ‘oka fehu’i ho’omou fānaú kiate kimoutolu, ‘Ko e hā hono ‘uhinga ‘o e ngāué ni?’ Te mou pehē: ‘Ko e feilaulau ia ‘o e Lakaatu ‘a Sihová, ‘a ia na’á ne laka atu ‘i he ngaahi fale ‘o e fānau ‘a ‘Isilelí ‘i ‘Isipite, i he’ene taa’i ‘a e kakai ‘Isipité, ‘o ne fakamo’ui homau falé.’ ” (‘Ekisōtosi 12:26, 27).
Ko e mala’ia hono hongofulú mo e mala’ia faka’osí ‘oku fekau’aki ia mo e hingá. Ko e fakatokanga faka’osí kuo ‘omi ia; ko e tu’utu’uni aofangatuku ia kuo faí. Ko hono mo’oní ko e me’a ia ki he mo’uí pe maté. ‘Oku ‘ikai ko e mo’uí fakafo’ituituí pē, ka ko e tu’umālie ‘a e ngaahi fāmilí mo e fonuá fakakātoa.
‘E tokanga’i ‘e Felo mo ‘ene kau takí ‘a e tufakanga ‘o e kakai tokolahi, pe ko ’enau mo’ui pe mate. Ko ‘ene fakakaukau ki he ‘Otua mo’ui ‘o ‘Isilelí ‘e fakapapau’i ai ‘o ‘ikai ki hono kaha’ú pē ka ki hono fonuá.
‘Oku anga fēfē ‘etau ongo’í, pea ko e hā e me’a ‘oku tau faí, ko e taimi ‘oku mamafa hifo ai ‘a e fakalilifu ‘o e ngaahi me’á ‘iate kitautolú, pea kuo pau ke tau fai ai ha fili ki he lākanga hokó mo e tu’utu’uní, ko ha fili ‘e lava ‘o fepaki lahi mo e ngaahi mo’ui ‘a e ni’ihi kehé kae’uma’ā foki kitautolu?
‘Oku loto fiemālie ange ‘a e ‘Otuá ia ke Ne ‘omai kiate kitautolu ‘a e poto, mahino mo e mālohi ke fai ‘a e me’a ‘oku totonú (1 Kolinitō 1:30, Filipai 2:13).
Ko e palopalemá, kaekehe, ‘oku, ‘i hotau loto fefeká, ‘oku ‘ikai ke tau fiema’u ma’u pē ke fai ‘a e me’a ‘oku totonú. ‘Oku tau ‘ilo pē ia, ka ‘oku tau fakafisi ke fai ia.
‘I he fakamatala ‘o e ‘Ekisōtosí, ko e fakafisi ‘a e tokotaha ke tukulolo ki he ‘Otuá, a’u pē ki he fehangahangai mo e me’a ‘okú ne lōmekina iá, ‘omai ‘a e fakamamahi ki he ni’ihi kehe tokolahi kae’uma’ā ia, ‘a ia ko e me’a ia ‘oku fa’a hoko ma’u pē.
