14/06/2026
استنبول سے قونیہ بُلٹ ٹرین میں یہ میرا پہلا سفر تھا اور تجربہ واقعی بہت شاندار رہا۔ اب بات کرتے ہیں کہ اس کی ٹکٹ آپ کیسے خرید سکتے ہیں۔ ترکی میں آپ پلے اسٹور یا ایپ اسٹور سے TCDD کی ایپ ڈاؤن لوڈ کر کے اپنی مرضی کی ٹکٹ چند منٹوں میں آن لائن بک کر سکتے ہیں، طریقہ بہت آسان اور سہل ہے۔
اگر آپ آن لائن بکنگ نہیں کرنا چاہتے تو استنبول کے اسٹیشنز سے بھی ٹکٹ حاصل کر سکتے ہیں۔ یورپی سائیڈ پر ہالکالی اور سرکجی جبکہ ایشیائی سائیڈ پر پینڈک اور سوغوتلو چشمے اہم اسٹیشنز ہیں۔
اب بات کرتے ہیں اس سفر کے اسٹاپس کی۔ استنبول سے روانگی کے بعد پہلا اہم اسٹاپ گیبزے آتا ہے، پھر ازمیت، عارفیے اور اس کے بعد ہم سب کا پسندیدہ شہر بلیجک۔ یہی وہ علاقہ ہے جہاں ارطغرل غازیؒ کا مزار اور تاریخی ہانلی بازار موجود ہے، اور آپ چاہیں تو استنبول سے بُلٹ ٹرین کے ذریعے یہاں بھی آ سکتے ہیں۔ اس کے بعد ایسکی شہر آتا ہے جو مجھے ذاتی طور پر بہت پسند ہے، اور پھر آخر میں قونیہ جہاں مجھے حضرت مولانا جلال الدین رومیؒ کے مزار پر حاضری کی سعادت ملی۔
اگر ٹرین کی سروسز کی بات کی جائے تو وہ واقعی قابلِ تعریف ہیں۔ ٹرین میں ایک ریسٹورنٹ بھی موجود ہوتا ہے جہاں مختلف ترک کھانے دستیاب ہوتے ہیں۔ اسی طرح پاکستان کی طرح یہاں بھی عملہ پوری ٹرین میں آ کر ایک ایک مسافر کی ٹکٹ چیک کرتا ہے۔
اس بُلٹ ٹرین کی زیادہ سے زیادہ رفتار تقریباً 255 کلومیٹر فی گھنٹہ تک پہنچ جاتی ہے۔ صفائی ستھرائی کا معیار بھی انتہائی شاندار ہے۔ اگر آپ بزنس کلاس میں سفر کریں تو یقین مانیں، کئی دوسری ٹرینوں کا تصور بھی ذہن سے نکل جائے گا۔ واش رومز سے لے کر ہر بوگی تک سب کچھ انتہائی صاف ستھرا اور منظم نظر آتا ہے۔
اور ایک بات جس نے سب سے زیادہ متاثر کیا، وہ یہ کہ ٹرین میں صرف اتنے ہی مسافر ہوتے ہیں جتنی نشستیں موجود ہوں۔ نہ اضافی رش، نہ راہداریوں میں کھڑے لوگ، نہ چلنے پھرنے میں دشواری۔ جبکہ ہمارے ہاں بعض اوقات نشستوں سے کہیں زیادہ لوگ سوار ہوتے ہیں اور ایک بوگی سے دوسری بوگی تک جانا بھی مشکل ہو جاتا ہے۔
آخر ہم کب اس بات کو سمجھیں گے کہ آرام دہ سفر صرف نئی ٹرینوں سے نہیں بلکہ نظم و ضبط، قوانین پر عمل اور اجتماعی شعور سے بھی ممکن ہوتا ہے؟ یا پھر ہم واقعی کبھی نہیں بدل سکتے؟
