10/06/2026
#رسايلكم راني مقنوطة على ولادي وحد القنطة متأمنوش رحت قبيلا نشوف ماما مريضة لقيتها لازم تروح لطبيب و أنا معايا بنتي سبع سنين و ولدي عام و ربع شهر
قلت لبنتي خوك راقد جمعي حداه و قعدي تفرجي و درتلها قرعة حليب قلتلها ادا ناض عطيهاله و لعبي معاه
و قلت لمرت خويا عينك عليهم حمبوك و مخممتش بسك طبيب بعيد على دارنا زوج دقايق مشي
فوتت ماما و شرينا دوا و ولينا لقيت ولدي راقد و يشهق في رقاده شغل رقد يبكي و بنتي مقروصة غي قلتلها مالكي تطرطق شيرة تبكي قاتلي ادم ضرباته طاطا
انا تم قعدت نغلييييييي نغلي انا ولادي جااامي ضربتهم لا انا لا بوهم مكبروش على صوط و بنتي لي كبيرة عاقلة و متوصلش روحها وين نعمى و نضربها و ولدي يا بردي فتاتة شنضرب فيه و ماما تقولي غي على وجهي فوتيها راها اصلا مع خوك في مشاكل صحا صرطتها قلت بلاك ضرباته في يده و لا حتى دروك جيت نبدله نلقاه فخاذه مقرووووووص زرق و حمر نخلعت يا شيرات فوادي تسيق قعدت نندب بلاما نعبى تنوض بنتي تبكي قاتلي طاطا ضرباته في وجهه هو يبكي و هي تضرب و قعدت توري فيا قاتلي كي زيراته من فخاذه قعد يبكي و حال فمه (معرفاش حتى تسمي فحمة بسك جامي فحملي من قبل) خليت ولدي و رحتلها نيشان قلتلها عيب عليك تضربي غريان مكملش عام نص قاتلي كنت ندبخ فيه مضربتهش و مين عينك تحاسبيني متزيديش تخليلي ولادك قلتلها انا وينتا خليتلك ولادي غي تقدرت عليا ماما مريضة و باه توصلي تصفعي بز حتى يفحم و يقرصيه من فخاذه كارثة و قاتلي ديهم و قودي تم صح حكمتها و درتها تحتي بردت جنوني
جا خويا للكوزينة مورا لي تفكينا قتله رواح شوف مرتك كيدارت لولدي لقاه زرق من فخاده قالها يا ر%&ك نتي مهبولة مريضة مطلقتيني انا مطلقتي ولادك مطلقتي ولاد ناس و قعد يقولي دروك نديك لطبيب شرعي ديري سرتافيكا و شكي بيها و هي تعاير فيه و فيا راح هو لملها قشها و قالها دروك داركم
راني شادة ولدي و نبكي غايضني دا صوطة و هو مولا عام مسكين و بنتي تصدمت في خوها راهي كي بيبي هي تاني باغية تسامي خوها في حجري 💔💔💔 قاتلي قعدت غي نقولها لا طاطا لا متضربيش خويا و هي تضرب اقسم بالله احساس بشع و حاسة بالفشلة حتى كون نبات نضرب فيه منبردش حسيت مكنتش مع ولادي وقت الصح
