13/12/2025
მინდა გულითადი და უღრმესი მადლობა გადავუხადო ექიმ ალერგოლოგ ქეთი ალავიძეს — პირველ რიგში, როგორც ღვთისნიერ, კეთილ და ნამდვილ ადამიანს. ადამიანს, რომელიც ადამიანის ჯანმრთელობას ფულით არ ზომავს და ექიმობას მხოლოდ პროფესიად კი არა, მისწრაფებად და მისიად აღიქვამს.
2025 წლის 11 აგვისტოს ავერსის კლინიკაში მივედით ჩემს შვილთან ერთად. მას უკვე რამდენიმე თვე ალერგია აწუხებდა. ქეთი ექიმმა ისეთი სითბოთი, ყურადღებით და გულწრფელი ღიმილით მიგვიღო, თითქოს დიდი ხნის ნაცნობები ვიყავით. დაგვკითხა ყველაფერი ძირფესვიანად, არ გამოგვრჩენია არც ერთი დეტალი, დაგვინიშნა მკურნალობა და იმედით სავსეები წამოვედით.
მე და ჩემი შვილი მთელი გზა ქეთი ექიმზე ვსაუბრობდით და გაკვირვებულები ვამბობდით — ნუთუ დღესაც არსებობენ ასეთი თბილი, ყურადღებიანი და ადამიანური ექიმები?
ნოემბერში, სამწუხაროდ, ჩემს შვილს ისევ დაემართა ალერგიული რეაქცია. ალკოჰოლი ჰქონდა მიღებული, სასწრაფო გამოვიძახეთ და კლინიკაში გადაიყვანეს. ემერჯენსის ექიმს მდგომარეობა ვკითხე და მითხრა: „არ ინერვიულოთ, ნელ-ნელა აულაგდებაო“. ტონი ისეთი ცივი და უხეში ჰქონდა, რომ ძლივს ვიკავებდი თავს.
იქ ყოფნისას განსაკუთრებით დამამძიმა ერთმა სურათმა — ფოიეში იჯდა მარტოხელა მოხუცი ქალბატონი, რომელსაც არავინ ელოდა. როგორ უხეშად ექცეოდნენ მას ექიმებიც და ექთნებიც… გვერდით კი მეორე ქალბატონს „კარგად“ ექცეოდნენ მხოლოდ იმიტომ, რომ ფოიეში შვილები და შვილიშვილები ელოდნენ — მშრალი, მოჩვენებითი ღიმილით.
გადასხმის დასრულების შემდეგ ემერჯენსის ექიმმა მითხრა, დანიშნულებას დაგიწერთ, თუ გინდათ, ოღონდ 50 ლარი უნდა გადაიხადოთო. გამიკვირდა… ვფიქრობდი, ნუთუ ექიმს ამის უფლება აქვს? მადლობა გადავუხადე და წამოვედით, მაგრამ ჩემი გული და სული იქ დარჩა — იმ მარტო მყოფ ბებოსთან.
სახლში მოსვლის შემდეგ მივწერე ქეთი ექიმს, გადავუგზავნე ფოტოები, ვაჩვენე ბავშვის მდგომარეობა.
და აქ მოხდა ის, რაც დღეს იშვიათია…
ქეთი ექიმმა დაუყოვნებლივ მიპასუხა, დეტალურად გადაამოწმა ყველაფერი და უანგაროდ, ერთი თეთრიც არ მოუთხოვია, დამიწერა დანიშნულება.
ჰოი, საოცრებავ… გული სითბოთი და სიყვარულით ამევსო. ის, რასაც სხვას ორი წუთი დასჭირდებოდა და 50 ლარად „შეეძლო“ გაეკეთებინა, ქეთი ექიმმა გააკეთა გულით, სიყვარულით და ადამიანურად.
ამიტომ მინდა ხმამაღლა ვთქვა —
მადლობა თქვენ, ქეთი ექიმო, რომ ხართ ასეთი ნიჭიერი, ჭკვიანი, სანდო, თბილი და უანგარო ადამიანი. მადლობა უფალს, რომ გაგაჩინათ ამ ქვეყანაზე. მადლობა, რომ არსებობთ და ადამიანებს იმედს უბრუნებთ.
გისურვებთ დიდხანს იყოთ ამ ქვეყანაზე, ჯანმრთელად, მშვიდად და ბედნიერად — კეთილო ადამიანო. 💙
