04/10/2026
احنا تلامذة في معهد وسط البلاد، حبينا نحكيو على حاجة قاعدة تصيرلنا و تعبتنا برشا.
لينا 3 جمعات ملي بدينا نقراو، كل مرة المدير يجي يبدل فينا من قسم لقسم بلا حتى علم و بلا سابق إنذار، تلميذ تلقاه كاتب دروسو، مستنس بريتم معين مع صحابو و أساتذتو، فجأة يلقى روحو في قسم آخر!
و كي مشينا حكينا معاه بكل احترام، قالنا "برا انقلو من عند صحابكم"! كأنو الموضوع لعبة!
بجاه ربي كيفاش تحبونا نقراو و احنا موش مرتاحين في اقسامنا؟ كيفاش تلميذ باش يركز و هو بعدتوه على صحابو و على الجو الي مستنس بيه؟ و زيد جمعة جاية عنا الدفوارات! لا خمم في نفسيتنا لا في معنوياتنا.
و موش كان هذا، هذي ثالث مرة يبدللنا الجدول! امس يعطينا جدول جديد، اليوم يقولنا لا ارجعو للقديم! ولينا داخلين بعضنا، معادش فاهمين شي لا وقتاه نقراو لا وقتاه نروحو.
و زيد المعاملة... والله ألفاظ سوقية ما تتقالش من مدير معهد، ما يحترمناش جملة. يمنع التدخين علينا و هو يدور بالـ v**e في الكولوار و يتكيف في وجوهنا!
رانا تلامذة نحبو نقراو و نحبو معهدنا، ما طلبنا شي، طلبنا كان شوية احترام و شوية نظام. راهو المعهد موش سجن، و التلميذ عندو حق باش يقرا مرتاح.
ان شاء الله صوتنا يوصل.
