Samar's kitchen

11/08/2025

07/08/2025

خميسكم وين 😍

05/08/2025

سر الفتوش الطيب ينعمل بخضرة بلدية بندورة حورانية وزيت زيتون بانياسي والبقدونس من سكوبات الجارة .. وينسكب بصحون أمي ويتاكل ع برندة اهلي هيك بيكون فتوش عالمي طعمه مابينتسى
الصورة من ذكريات نزلتي ع سوريا ايام حجر كورونا

04/08/2025

مقلاية البيض هي موجودة بكل بيت سوري وماطيب البيض الا فيها .. طبعا الفطور بالضيعه مختلف عن أي فطور بأي مكان تاني اله نكهة خاصة
الصورة من ذكريات نزلتي ع سوريا ❤️

02/08/2025

مافينك تكوني من الساحل ومابتعرفي تعملي كبيبات
ومافينك ماتحبيا بكل تتبيلاتها بدبس الرمان او بالطحينه او بدبس الفليفلة والتوم
ستي الله يرحمها كانت كتير شاطرة فيها وعماتي كمان
الصورة من ذكريات نزلتي ع سوريا عزمتني عمتي ع اطيب كبيبات ❤️

01/08/2025

هي الصورة بآخر يوم الي بسوريا كان احلى مشوار بالقيمرية في سحر بالشام بيداوي جروح القلب والروح
انا قلبي للشام مشتاق ❤️

01/08/2025

1 آب اللهاب جاهزين 🥵
هي الصورة من ذكريات نزلتي ع سوريا كاسة شاي ساخنه بعز البرد مع غصن ورد وجمال بانياس وغلاوتها ❤️

31/07/2025

بتطبخو يوم الخميس ولا اجازة ؟
اكتبولي شو طابخين ❤️
الصورة من بيت اهلي بس انا اللي طبخت 🥹

31/07/2025

من ذكريات سوريا مشوار مع بابا ع الموتور وبوظة طيبة ع كورنيش جبلة ❤️
مين معي انه المشوار ع الموتور احلى من احلى سيارة 😍

30/07/2025

#ياترى....
شو شعور البنات يلي بينطروا نهاية الأسبوع مشان يروحوا لعند اهلهم من الصبح ويشربو القهوة مع امهم وابوهم وبيفطرو فطور من تحت ايدين ست الحبايب امهم؟؟!
شو شعورون لما ينعزمو لبيت اهلهم هنن وولادهم ؟؟!
شو شعورن لما تضيق فيهم الدنيا يحملو حالهم ويروحو عند امهم ويرتمو بحضنها ويشكولها أو حتى بس يشوفوها مشان يرتاح قلبهم ؟؟!
طيب وسهرة الخميس ولمة الجمعة والكل مجموع يضحك ويحكي حتى الأكل بيبقى طعمو غييير كيف بيكون احساسهم ؟؟!
شو شعور البنت لما بكون عندها مشوار بتحط ولادها عند امها وبتروح؟؟؟
شو شعور البنت لما بكون عندها عزيمة بتجي امها وبتساعدها؟؟؟

شو شعور البنات يلي اذا مرضو بروحو بيرتاحو ببيت اهلهم وامهم بتنتبه ع الاولاد؟؟؟

شو شعور البنات لما يجي العيد وأبوها وأخواتها يروحو عليها يعايدوها ؟؟!
طب شو شعورهم لما يشوفو ولادهم مبسوطين بحضن جدهم وستهم وغرقانين بدلالهم ؟؟!
ولا شعور البنات اللي لما تشتاق لابوها وأمها واخواتها بتروح بتشوفهم ؟؟!
يارب تفرجا علينا .. 😥

29/07/2025

من ذكريات نزلتنا ع سوريا اول فطور ببيت حماي الله يرحمك يامرت عمي ويجعل الجنه مثواك 🥹💔

22/07/2025

صوص شوكولا بطعم غني
بالخلاط:
نص كوب سكر
نص كوب حليب بودرة
نص كوب كاكاو خام
نص كوب مي
نص كوب زيت
معلقة صغيرة نسكافيه ونخلط بعدين بنضيف
علبة قشطة
فانيليا
٣ ملاعق كريمه شانتيه ونخلط حتى تتجانس المكونات ❤️