21/11/2025
作者◎ #簡彥臻
增補◎ #梁淑慧
【漢羅】
「 #膠彩畫」是用動物、植物提煉出來ê膠做媒介，將天然礦物ê粉末kap水調和做顏料ê創作型式，色水種類華麗豐富，會當呈現特殊ê金屬光彩。1927年日本tī台灣舉辦第一屆ê台灣美術展覽會，kā投稿ê風格分做西洋畫佮東洋畫（也就是咱這馬所講ê膠彩畫），就按呢將膠彩畫ê潮流引進台灣。膠彩畫跳脫中國水墨ê抽象寫意，是一筆仔一筆將目睭所看著ê色彩、線條kap形狀，用寫實ê手路kā畫出來。日本時代以來，有真濟台灣本土藝術家利用膠彩畫來創作，成做in表達性命力kap美感ê媒介，對台灣美術領域ê發展有真重要ê意義！
【Pe̍h-ōe-jī】
“Ka-chhái-ōe” sī iōng tōng-bu̍t, si̍t-bu̍t thê-liān--chhut-lâi ê ka chò mûi-kài, chiong thian-jiân khòng-bu̍t ê hún-boa̍h kap chúi tiâu-hô chò gân-liāu ê chhòng-chok hêng-sek, sek-chúi chéng-lūi hôa-lē hong-hù, ē-tàng thêng-hiān te̍k-sû ê kim-sio̍k kong-chhái. 1927 nî Ji̍t-pún tī Tâi-oân kí-pān tē-it kài ê Tâi-oân Bí-su̍t Tián-lám-hōe, kā tâu-kó ê hong-keh hun-chò se-iûⁿ-ōe kah tang-iûⁿ-ōe (iā tō sī lán chit-má só͘ kóng ê ka-chhái-ōe), chiū-án-ne chiong ka-chhái-ōe ê tiâu-liû ín-chìn Tâi-oân. Ka-chhái-ōe thiàu-thoat Tiong-kok chúi-ba̍k ê thiu-siōng siá-ì, sī chi̍t-pit-á-chi̍t-pit chiong ba̍k-chiu só͘ khòaⁿ--tio̍h ê sek-chhái, sòaⁿ-tiâu kap hêng-chōng, iōng siá-si̍t ê chhiú-lō͘ kā ōe--chhut-lâi. Ji̍t-pún sî-tāi í-lâi, ū chin chē Tâi-oân pún-thó͘ gē-su̍t-ka lī-iōng ka-chhái-ōe lâi chhòng-chok, chiâⁿ-chò in piáu-ta̍t sèⁿ-miā-la̍t kap bí-kám ê mûi-kài, tùi Tâi-oân bí-su̍t léng-he̍k ê hoat-tián ū chin tiōng-iàu ê ì-gī!
#母語世界
「膠彩畫」是用動物、植物提煉出來ê膠做媒介，將天然礦物ê粉末kap水調和做顏料ê創作型式，色水種類華麗豐富，會當呈現特殊ê金屬光彩。1927年日本tī台灣舉辦第一屆ê台灣美術展覽會，kā投稿ê風格分做西洋畫佮東洋畫（.....
