RtiMyanmar, 55, Pei-an Road, Taipei (2025)

27/12/2025

ဟွန်ဒူးရပ်စ်နိုင်ငံတွင် ထိုင်ဝမ်ကို လိုလားသော သမ္မတသစ်ကို ရွေးကောက်တင်မြှောက်၊ ဟွန်ဒူးရပ်စ်ပြည်သူများ၏ ဒီမိုကရေစီနည်းကျ ရွေးချယ်မှုကို လေးစားကြောင်း ထိုင်ဝမ်နိုင်ငံခြားရေးဝန်ကြီးဌာနမှ ပြောကြား

အမေရိကတိုက် အလယ်ပိုင်းရှိ ဟွန်ဒူးရပ်စ်နိုင်ငံရဲ့ သမ္မတရွေးကောက်ပွဲရလဒ်ဟာ ပြီးခဲ့တဲ့ (၂၄) ရက်နေ့တုန်းက ထွက်ပေါ်လာခဲ့ပါပြီ။ အဆိုပါ ရွေးကောက်ပွဲမှာ ထိုင်ဝမ်နဲ့ သံတမန် ဆက်ဆံရေးပြန်လည်ထူထောင်လိုတဲ့ ဟွန်ဒူးရပ်စ် နေရှင်နယ်ပါတီ (Partido Nacional，PN) မှ ကိုယ်စားလှယ် နာဆရီ အက်စ်ဖူရာ (Nasry Asfura) က အနိုင်ရရှိခဲ့ပါတယ်။ အသက် ၆၇ နှစ်အရွယ်ရှိပြီဖြစ်တဲ့ ဝါရင့်နိုင်ငံရေးသမား အက်စ်ဖူရာက ဟွန်ဒူးရပ်စ်နဲ့ ထိုင်ဝမ် နှစ်နိုင်ငံ သံတမန်ဆက်ဆံရေးရှိခဲ့စဉ်တုန်းက အခြေအနေမှာ "ယခုထက် အဆတစ်ရာပိုကောင်းခဲ့ပါတယ်" ဆိုပြီး ရွေးကောက်ပွဲမတိုင်မီက ပွင့်ပွင့်လင်းလင်း ပြောကြားခဲ့ပြီး အကယ်လို့ သူသာ ဒီရွေးကောက်ပွဲမှာ အနိုင်ရရှိခဲ့ပါက ထိုင်ဝမ်နဲ့ သံတမန်ဆက်ဆံရေး ပြန်လည်ထူထောင်မယ်ဆိုပြီး ကတိပြုထားသူပဲ ဖြစ်ပါတယ်။

ထိုင်ဝမ်နိုင်ငံခြားရေးဝန်ကြီးဌာနမှ ပြီးခဲ့တဲ့ ၂၅ ရက်နေ့က မီဒီယာတွေရဲ့ မေးမြန်းမှုကို ဖြေကြားရာမှာ ဟွန်ဒူးရပ်စ်ပြည်သူတွေရဲ့ ဖွဲ့စည်းပုံအခြေခံဥပဒေနဲ့အညီ ဒီမိုကရေစီနည်းကျ ရွေးချယ်တင်မြှောက်လိုက်တဲ့ ခေါင်းဆောင်သစ်ကို လေးစားကြောင်း ပြောကြားခဲ့ပါတယ်။ တစ်ချိန်တည်းမှာပဲ ဟွန်ဒူးရပ်စ်သမ္မတသစ်အနေနဲ့ ပြည်သူကို ဗဟိုပြုပြီး ဟွန်ဒူးရပ်စ်ပြည်သူတွေအတွက် အကျိုးရှိစေမယ့် မူဝါဒသစ်တွေကို ဖော်ဆောင်ဖို့လည်း တိုက်တွန်းခဲ့ပါတယ်။

ဟွန်ဒူးရပ်စ်ရွေးကောက်ပွဲရဲ့ မဲရေတွက်မှုဖြစ်စဉ်မှာ အခက်အခဲတချို့ ရှိခဲ့ပေမယ့် အမေရိကန် နိုင်ငံခြားရေးဝန်ကြီး မာကို ရူဘီယို (Marco Rubio) မှ အက်စ်ဖူရာ အနိုင်ရရှိမှုကို အသိအမှတ်ပြုခဲ့ပြီး ရွေးကောက်ပွဲရလဒ်ကို လေးစားကြရန် အဘက်ဘက်ကို တိုက်တွန်းခဲ့ပါတယ်။

ဟွန်ဒူးရပ်စ်ရဲ့ အနိုင်ရရှိတဲ့အဖွဲ့နဲ့ ထိုင်ဝမ်အစိုးရတို့အကြား ဆက်သွယ်ဆောင်ရွက်မှု အခြေအနေ၊ ရွေးကောက်ပွဲအပြီး နှစ်နိုင်ငံဆက်ဆံရေး တိုးတက်လာနိုင်မှုအပေါ် မီဒီယာတွေမှ စိတ်ဝင်တစား မေးမြန်းကြခဲ့ပေမယ့် ထိုင်ဝမ်နိုင်ငံခြားရေးဝန်ကြီးဌာနမှ ပွင့်လင်းမြင်သာပြီး လက်တွေ့ကျတဲ့ ရပ်တည်ချက်နဲ့သာ ရှုမြင်သွားမှာဖြစ်ကြောင်း၊ လက်ရှိအချိန်မှာ အခြားမှတ်ချက်ပေးစရာမရှိကြောင်း ဆိုပြီးသာ ဖြေကြားခဲ့ပါတယ်။

ထိုင်ဝမ်နိုင်ငံခြားရေးဝန်ကြီးဌာနမှ ဒီဇင်ဘာလအစောပိုင်းကလည်း မိမိတို့ရဲ့ နိုင်ငံခြားဆက်ဆံရေးမှာ အမြဲတမ်း ရိုးသားပွင့်လင်းမှုရှိကြောင်း၊ မည်သည့်ကြိုတင်ကန့်သတ်ချက်မှမထားဘဲ နိုင်ငံတကာနဲ့ တက်ကြွစွာ ဆက်ဆံလိုကြောင်း၊ နိုင်ငံတော်အကျိုးစီးပွားအတွက် အထောက်အကူဖြစ်စေမယ့် ကိစ္စရပ်တွေကို အလေးအနက်ထား ဆောင်ရွက်သွားမှာဖြစ်ကြောင်းဆိုပြီး ပြောကြားခဲ့ဖူးပါတယ်။

အက်စ်ဖူရာဟာ ၂၀၂၁ ခုနှစ် ရွေးကောက်ပွဲတုန်းကလည်း ဝင်ရောက်ယှဉ်ပြိုင်ခဲ့ဖူးပြီး အဲဒီအခါတုန်းက "နေရှင်နယ်ပါတီ" မှာ အာဏာရပါတီဖြစ်ပေမယ့်လည်း အတိုက်အခံ "လစ်ဘရေးပါတီ" (LIBRE) မှ ကိုယ်စားလှယ် ကက်စထရို (Xiomara Castro) ကို ရှုံးနိမ့်ခဲ့ပါတယ်။ ကက်စထရိုဟာ အာဏာရပြီး တစ်နှစ်ကျော်အကြာ ၂၀၂၃ ခုနှစ် မတ်လလောက်မှာ ထိုင်ဝမ်နဲ့ သံတမန်ဆက်ဆံရေး ဖြတ်တောက်ကြောင်း ကြေညာခဲ့ပါတယ်။ ဒီတစ်ခေါက်မှာ အက်စ်ဖူရာဟာ သမ္မတအဖြစ် ပြန်လည်ရွေးချယ်ခံရတာ ဖြစ်ပြီး သူရဲ့ "နေရှင်နယ်ပါတီ" ဟာလည်း ယခုအကြိမ် လွှတ်တော်ရွေးကောက်ပွဲအပြီးမှာ အကြီးဆုံးပါတီ ဖြစ်လာတော့မှာပဲ ဖြစ်ပါတယ်။

ဓာတ်ပုံ - 圖取自facebook.com/papialaorden

25/12/2025

ယနေ့ ဒီဇင်ဘာလ ၂၅ ရက်နေ့ကတော့ စာဖတ်သူတွေအားလုံးနဲ့ ရင်းနှင်းပြီးသားဖြစ်တဲ့ ခရစ္စမတ်ပွဲတော်နေ့လေး ဖြစ်ပါတယ်။ ခရစ္စမတ်ပွဲတော်နေ့ကို ခရစ်ယာန်ဘာသာဝင်တွေဟာ ယေရှုခရစ်တော် ဖွားမြင်တဲ့နေ့ကို အထိမ်းအမှတ် ပြုလုပ်ကျင်းပတဲ့ နေ့ထူးနေ့မြတ်တစ်ခု ဖြစ်ပါတယ်။ ဒါပေမယ့် ယခုအခါမှာတော့ ခရစ္စမတ်ပွဲတော်ဟာ ခရစ်ယာန်ဘာသာဝင်တွေသာ ဆင်နွှဲကြတဲ့ ပွဲတော်တစ်ခုမဟုတ်တော့ဘဲ ထိုင်ဝမ်အပါအဝင် နိုင်ငံအတော်များများမှာပါ နှစ်စဥ် ဒီဇင်ဘာလရောက်တိုင်း ခရစ်ယာန်ဘာသာဝင်တွေနဲ့အတူ ပျော်ပွဲရွှင်ပွဲတွေကို အတူတကွ ကျင်းပလာကြပါတယ်။

ခရစ္စမတ်ပွဲတော်ရဲ့ ဓလေ့ထုံးစံတွေဟာလည်း ဘာသာရေး ပွဲတော်သက်သက်အဖြစ်ကနေ တဖြည်းဖြည်း ပြောင်းလဲပြီး မိရိုးဖလာ အယူဝါဒ၊ အမျိုးသားရေး စတဲ့ လောကီဓလေ့တွေ ပါဝင်လာတဲ့ပွဲတော် တစ်ခု ဖြစ်လို့လာပါတယ်။ ခရစ်ယာန်နိုင်ငံအသီးသီးမှာ ခရစ္စမတ်ပွဲတော်ကို ကျင်းပတဲ့အခါ မိမိတို့နိုင်ငံ မိမိတို့လူမျိုးနဲ့ပတ်သက်တဲ့ ဓလေ့ထုံးစံတွေအတိုင်း ကျင်းပလာပြီး ပျော်ပွဲရွှင်ပွဲ စားသောက်ပွဲတွေကို မိသားစု၊ သူငယ်ချင်းတွေနဲ့အတူ တခမ်းတနား ဆင်နွှဲလာကြတဲ့ ချစ်စရာကောင်းတဲ့ ပွဲတော်လေးတစ်ခုလည်း ဖြစ်လို့လာပါတယ်။ ဒီလို ချစ်စရာကောင်းတဲ့ ပွဲတော်နေ့လေးမှာ စာဖတ်သူတွေအားလုံးလည်း ပျော်ရွှင်ကြပါစေလို့ Rti Myanmar အဖွဲ့သူအဖွဲ့သားတွေက ဆုတောင်းပေးလိုက်ပါတယ်ခင်ဗျာ။

20/12/2025

ရုံးပိတ်ရက်မှာ လိမ္မော်ခြံသို့သွားပြီး လိမ္မော်သီးများ ခူးကြရအောင်

ဆောင်းရာသီသည် လိမ္မော်သီးထွက်ချိန် ဖြစ်သည်။ လိမ္မော်သီးများစားချင်ပါက ဈေးများနှင့် အသီးဆိုင်များတွင် အလွယ်တကူ ဝယ်ယူနိုင်သလို ကိုယ်တိုင်လည်း ခြံထဲသို့ သွားခူးနိုင်သည်။ ထိုင်ဝမ်တွင် လိမ္မော်သီးအဓိကထွက်ရာသည် အလယ်ပိုင်းနှင့် တောင်ပိုင်းဒေသများ ဖြစ်သည်။ မြောက်ပိုင်းဒေသဆိုလျှင် ရှင်းကျူတွင် ထွက်သည်။

လာမည့်လဆိုလျှင် ဆောင်းရာသီကျောင်းပိတ်ရက်၊ နောက်တစ်လဆိုလျှင် တရုတ်နှစ်သစ်ကူး ရုံးပိတ်ရက်ရှည် စတော့မည်။ ကျောင်းပိတ်၊ ရုံးပိတ်တုန်းလေး ကလေးများနှင့် လိမ္မော်သီးခြံများသို့ သွား၍ လိမ္မော်သီးများ သွားခူးနိုင်သည်။ ထိုင်ဝမ်၏ စိုက်ပျိုးရေးခြံများသည် ရောင်းရန်အသီးများစိုက်ရာနှင့် စားသုံးသူများ လာရောက်ခူးယူနိုင်ရန် စိုက်ပျိုးရာ ဟူ၍ ခွဲထားသည်။ စားသုံးသူများ လာရောက်ခူးယူရန် စိုက်ပျိုးရာတွင် ဓာတ်ပုံအလှရိုက်နိုင်ရန် အသီးများ ပြွတ်နေအောင် သီးသည့်အပင်များရှိရာနှင့် အသီးခူးနိုင်ရာဟူ၍ ခွဲပြန်သည်။ အသီးများ ခူးနိုင်ရာတွင် မတူသည့်မျိုးကွဲများ အစုံရှိအောင် စိုက်ပျိုးပေးထားတတ်သေးသည်။ လိမ္မော်သီးဆိုလျှင် ဖုန့်ကမ်သီး၊ ထုံကမ် အစရှိသည်ဖြင့် မတူသည့်အမျိုးများကို တစ်နေရာတည်းတွင်ပင် ခံစားနိုင်ရန် စိုက်ပျိုးပေးထားတတ်သည်။

စားသုံးသူများအနေဖြင့် အသီးသွားခူးမည်ဆိုပါက ဝင်ကြေးပေးရသည်။ ဝင်ကြေးသည် ထိုင်ဝမ်ဒေါ်လာ တစ်ရာဝန်းကျင်ခန့်သာ ရှိပြီး အချို့ခြံများဆိုလျှင် ပစ္စည်းများဝယ်ယူချိန်တွင် လက်မှတ်ဖိုးကို ပြန်နုတ်၍ ရသည်။ အသီးခြံသို့ ရောက်လျှင် ဓာတ်ပုံအလှရိုက်ရာနေရာတွင် အလှဓာတ်ပုံများအရင်ရိုက် ပြီးမှ အသီးများခူးစားနိုင်သည့်နေရာတွင် မိမိအကြိုက်လိမ္မော်သီးကို ရွေးခူးပြီး အဝစားနိုင်ပါပြီ။ လိမ္မော်သီးခြံများတွင် အများအားဖြင့် စားပါက အဝစားနိုင်ပြီး အပြင်သို့ သယ်မည်ဆိုပါက အလေးချိန်အလိုက် ချိန်ပြီး ပိုက်ဆံပေးရသည်။ အချို့ခြံများဆိုလျှင် အများကြီးဝယ်သူများအတွက် ကယ်ရီပို့သည့်ဝန်ဆောင်မှုပင် ရှိသေးသည်။ ခြံထဲတွင်သာ အဝစားပြီး အိမ်ပြန်ရန်ကိုတော့ သယ်ရန်မလိုကြောင်း အကြံပြုလိုပါသည်။ ခြံများတွင် ခူးသည့်အသီးများ၏ဈေးနှုန်းသည် ဈေးကွက်ထက်ပိုများတတ်သည်။ ပိုများသည့်အပြင် သယ်လည်းသယ်ရသေးသည်။ ထို့ကြောင့် ဈေးကွက်ထက်ပိုစားကောင်းသည်ထင်မှ ဝယ်ကြပါ။ မဟုတ်လျှင် နေရာတွင်ပင် စားပြီး ခူးသည့်ပျော်ရွှင်မှုကို အဝခံစားခဲ့ရုံနှင့် ရပါပြီ။

ထိုင်ဝမ်ကလေးများအတွက် အသီးကို ကိုယ်တိုင်ခူးခွင့်သည် ရခဲသည့် အတွေ့အကြုံ ဖြစ်သည်။ အထူးသဖြင့် မြို့ကြီးကလေးများဆိုလျှင် ပို၍ဆိုးသည်။ ထို့ကြောင့် လိမ္မော်သီးလေးများထွက်ချိန်ဖြစ်စေ၊ စတော်ဘယ်ရီသီးများထွက်ချိန်ဖြစ်စေ မိဘများက ခူး၍ရသည့်ခြံများသို့ သွားပြီးကလေးများအား အသီးခူးသည့်ပျော်ရွှင်မှုကို ပေးကြသည်။ ထိုင်‌ပေအနီးအနားတစ်ဝိုက်တွင် သွားမည်ဆိုပါက လွန်ခဲ့သည့်နှစ်တွင် ကျွန်မတို့သွားခူးဖူးသည့် ချိန်ရှမ်းစိန်းလင်(橙香森林)ဆိုသည့် လိမ္မော်သီးခြုံကို သွားနိုင်ပါသည်။ ချိန်ရှမ်လိမ္မော်သီးခြုံတွင် အသီးခူးနိုင်သလို ကလေးများအား လိမ္မော်သီးဆိုင်ရာထုတ်ကုန်များ ပြုလုပ်သည့်အတန်းများလည်း ရှိသည်။ ဥပမာ။ ။ လိမ္မော်သီးပေါင်မုန့်များ ပြုလုပ်ခြင်း သို့မဟုတ် လိမ္မော်သီးဆပ်ပြာများ ပြုလုပ်ခြင်းတို့ကို ပြုလုပ်နိုင်သည်။ မိသားစုလိုက် လိမ္မော်သီးခြံသို့သွားပြီး ကလေးများ အသီးခူးပြီး ပျော်နိုင်သလို လူကြီးများကလည်း သာယာလှပသည့်ပတ်ဝန်းကျင်တွင် အေးအေးဆေးဆေး ကော်ဖီသောက်ပြီး လိမ္မော်သီးနှံ့‌လေး မွှေး‌မွှေးလေးရှိသည့် ကိတ်လေးဖြစ်စေ၊ ပေါင်မုန့်ဖြစ်စေ တွဲစားနိုင်ပါသည်။

မနောကြည်မှ ရေးသားတင်ပြသည်။
ဓာတ်ပုံ။ ။ မနောကြည်

20/12/2025

松山奉天宮-စုန်းစမ်းဖုန့်ထျန်းကုန်း

၁၉၅၃ ခုနှစ်တွင်စုန်းစမ်းဒေသရှိ ရပ်မိရပ်ဖများဖြစ်ကြသော ဝမ်ကျင်းပိုး နှင့် လျိူယုံဟောက် တို့သည် ရန်ပုံငွေ စုဆောင်းကာ ဝါးအိမ်လေးတစ်လုံးကို တည်ဆောက်ပြီးထိုနေရာတွင် 玉皇大帝Jade Emperor (သိကြားမင်း) ကို အဓိကနတ်မင်းအဖြစ် ကိုးကွယ်ပူဇော်ခဲ့ကြပြီး Songshan Fengtian Temple စုန်းစမ်းဖုန့်ထျန်းကျောင်းဟု အမည်ပေးခဲ့ကြပါတယ်။
၁၉၅၉ ခုနှစ် မှာတော့ တွင် ယုံကြည်လမ်း(永吉路)ရှိ ခိုင်အန်းဘုရားကျောင်းမှ Five-Year Senators五年千歲 - နတ်မင်းငါးပါးကို ပင့်ဆောင်ပူဇော်ခဲ့သည်။ ထိုနတ်မင်းများအား ကိုးကွယ်သူ အလွန်များပြားစည်ကားလာသဖြင့် ဒေသခံများက ဘုရားကျောင်းနှစ်ခုကို ပေါင်းစည်းရန် ဆုံးဖြတ်ခဲ့ကြပြီး ယခုလက်ရှိနေရာတွင် ဘုရားကျောင်းကို တိုးချဲ့တည်ဆောက်ခဲ့ကတြာပဲဖြစ်ပါတယ်ရှင်။
အဓိကကိုးကွယ်မှုကတော့ 玉皇大帝Jade Emperor ဖြစ်ပြီး ထိုင်ဝမ်မှာကိုးကွယ်လေ့ရှိတဲ့ အခြားနတ်မင်းများအစုံအလင်ကို ဖုန့်ထျန်းကုန်းမှာထည့်သွင်းကိုးကွယ်ထားတာတွေ့ရပါတယ်။

20/12/2025

ထိုင်ပေမြို့တွင် အကြမ်းဖက်တိုက်ခိုက်မှုဖြစ်ပွါး

ဒီဇင်ဘာလ ၁၉ ရက်နေ့ ညနေ ၅ နာရီကျော် ရုံးဆင်းချိန်တွင် ထိုင်ပေဘူတာ၏ M7 ထွက်ပေါက်တွင် ၂၇ နှစ်အရွယ် ကျန်းဝင်(張文)ဆိုသည့်အမျိုးသားသည် မီးခိုးလက်ပစ်ဗုံးများ ပစ်ဖောက်ခဲ့သည်။ ကျန်းဝင်မှ မီးခိုးလက်ပစ်ဗုံးပစ်ဗောက်နေစဉ် ၅၇ နှစ်အရွယ် လမ်းသွားသူယွီ(余）မျိုးရိုးအမည်ရှိ အမျိုးသားတစ်ဦးက သွားရောက်တားဆီးခဲ့သည်။ မစ္စတာယွီသည် ကျောမှဓားခုတ်ခံရမှုကြောင့် အရေးပေါ် ဆေးရုံသို့ပို့ဆောင်ကယ်ဆယ်ခဲ့သော်လည်း နောက်ဆုံးမှာ သေဆုံးသွားသည်။ ထိုင်ပေဘူတာတွင် မစ္စတာယွီအပြင် အသက် ၅၄ နှစ်အရွယ် အမျိုးသားတစ်ဦးက မီးငြိမ်းရာမှ မီးခိုးငွေ့များ ရှူမိပြီး ဆေးရုံသို့ ပို့ဆောင်ကုသခဲ့သည်။

ထိုင်ပေဘူတာတွင် ပြစ်မှုကျူးလွန်ပြီးသည့် ကျန်းဝင်သည် ညနေ ၆ နာရီခွဲခန့်တွင် လူသွားလူလာများသည့် ကျုံးစန်းဘူတာ(中山站）တွင် မီးခိုးလက်ပစ်ဗုံးများ ထပ်ပစ်ပြန်သည်။ ထိုချိန်က ကျုံးစန်းဈေးကွက်သည် လမ်းသွားလမ်းလာသူများဖြင့် စည်ကားနေသည်။ မီးခိုးလက်ပစ်ဗုံး ပစ်ပြီးနောက် လူများရုန်းရင်းဆန်ခပ်ဖြစ်နေချိန်တွင် ကျန်းဝင်သည် လမ်းသွားလမ်းလာသူများကို ဓားရှည်ဖြင့် လိုက်ခုတ်တော့သည်။ လမ်းဘေးမှ ကုန်တိုက်တွင်းသို့ တလျှောက်လုံး တွေ့ရာလူကို တိုက်ခိုက်သည်။ ထိုကုန်တိုက်အတွင်း စုစုပေါင်း လူ ၁၀ ဦးကို တိုက်ခိုက်ခဲ့သည်။ ထိုအထဲတွင် ၃၇ နှစ်ရှိသည့် မစ္စတာဝမ်(王နှင့် အသက် ၃၀ အရွယ်ရှိသည့် မစ္စတာရှောင်း(蕭）တို့သည့် ရရှိဒဏ်ရာဖြင့် သေဆုံးသွားသည်။ အခြား ၈ ယောက်တွင် ပြင်းထန်ဒဏ်ရာရသူတစ်ဦး ရှိသေးသည်။ ကျန်းဝင်သည် ကုန်တိုက်အတွင်း ရဲများ၏ ဝိုင်းဝန်းဖမ်းဆီးခြင်းကြောင့် တိုက်ပေါ်မှခုန်ချပြီး နောက်ဆုံးမှာ သေဆုံးသွားသည်။

ဤအကြမ်းဖက်တိုက်ခိုက်မှုတွင် ရာဇဝတ်မှု ကျူးလွန်သူ ကျန်းဝင်အပါအဝင် လူ ၄ ဦးသေဆုံးပြီး ထိခိုက်ဒဏ်ရာရရှိသူပေါင်း ၉ ယောက် ရှိသည်။ လမ်းသွားလမ်းလာသူများ ရိုက်ကူးထားသည့် ဗီဒီယိုမှကြည့်လျှင် ဖြစ်စဉ်နှစ်ခု၏ရာဇဝတ်မှု ကျူးလွန်သူ၏ ဝတ်စားဆင်ယဉ်ပုံသည် မတူသဖြင့် လူများက မတူသည့်သူများလားဟု စိုးရိမ်နေကြသည်။ ည ၈ နာရီကျော်ချိန်တွင် ဝန်ကြီးချုပ် ကျော်ယုံထိုက်（卓榮泰）က လောလောဆယ် စစ်ဆေးတွေ့ရှိချက်များအရ နှစ်နေရာလုံး၏ ပြစ်မှုကျူးလွန်သူသည် သေဆုံးသွားသည့်ကျန်းဝင်သာဖြစ်ကြောင်း ပြောကြားသွားသည်။ ကျန်းဝင်သည် စစ်မှုထမ်းတိမ်းရှောင်နေသည့် ဝရမ်းပြေးတစ်ဦးဖြစ်ကြောင်းလည်း ပြောကြားသွားသည်။ ဝန်ကြီးချုပ်က ရာဇဝတ်မှု ကျူးလွန်သူ သေဆုံးသွားသည့်တိုင်အောင် ၎င်းပြစ်မှုကျူးလွန်သည့် အကြောင်းရင်းကို ဆက်လက်စုံစမ်းသွားရန် ညွှန်ကြားသွားသည်။

မနောကြည်မှ ရေးသားတင်ပြသည်။
ဓာတ်ပုံ။ Rti (其他)

19/12/2025

ပါဝင်ဆင်နွှဲထိုင်ပေ101ခရစ္စမတ်ပွဲ

19/12/2025

ထိုင်ဝမ်တွင် အတွေ့များသည့် လိမ္မော်သီးမျိုးကွဲနှစ်မျိုး

လိမ္မော်သီးသည် ‌ဆောင်းရာသီချိန်ခါထွက်သစ်သီးတစ်မျိုး ဖြစ်သည်။ ဆောင်းရာသီ၏ သစ်သီးဘုရင်(冬季水果王)ဟုပင် တင်စားခေါ်ဝေါ်ကြသည်။ ဆောင်းရာသီရောက်လျှင် ထိုင်ဝမ်၏မနက်ဈေး၊ ညနေဈေး၊ သစ်သီးဆိုင်တိုင်းတွင် အပုံလိုက်အပုံလိုက်သော လိမ္မော်သီးပုံများကို တွေ့ရသည်။

ထိုင်ဝမ်၏လယ်ယာစိုက်ပျိုးရေးလုပ်ငန်းသည် အလွန်တိုးတက်ပြီး အရည်အသွေးကောင်းသလို အမျိုးပေါင်းများစွာ ရှိသည်။ ထိုင်ဝမ်၏လိမ္မော်သီးထွက်ချိန်သည် အောက်တိုဘာလမှ နောက်တစ်နှစ်၏ မတ်လထိ ဖြစ်သည်။ ထွက်ချိန်ကြာသလို မတူသည့်အချိန်တွင် မတူသည့်လိမ္မော်သီးမျိုးကွဲများ ထွက်သည်။ ထိုင်ဝမ်တွင် လိမ္မော်သီးအမျိုးအစားကို ကျူကျည်(橘子)ဟု ခေါ်သည့်အပြင် 柑仔(Kam-á)ဟုလည်း ခေါ်သည်။ လိမ္မော်အမျိုးအစားများကို ကမ်ကျူအမျိုးအစားများ(柑橘類)ဟု ခေါ်ကြသည်။ ယနေ့ စာဖတ်မိတ်ဆွေများနှင့် ထိုင်ဝမ်ရှိ လိမ္မော်သီးမျိုးကွဲနှစ်မျိုးကို ရေးသားမျှဝေပေးသွားမည်။ လက်ရှိဈေးကွက်များတွင် အများဆုံးတွေ့ရသည့် လိမ္မော်သီးအမျိုးအစားမှာ ဖုန့်ကမ်(椪柑Citrus deliciosa)ဟုခေါ်သည့် အမျိုးအစား ဖြစ်သည်။ ဖုန့်ကမ်ဟုခေါ်ရခြင်းမှာ ထိပ်ဖူးနားတွင် ထိုးတက်နေသည့် ဖောင်းဖောင်းလေးပါသဖြင့် ဖောင်းဖွခြင်းဆိုသည့် မင်နင်ဘာသာစကား၏ အသံထွက်သည် ဖုန့်ဖြစ်၍ ထိုမှတဆင့် ဖုန့်ကမ်ဟု အမည်တွင်လာခြင်း ဖြစ်သည်။

ဖုန့်အမ်လိမ္မော်သီးသည် ထိပ်နားတွင် ဖောင်းဖောင်းလေးပါသလို အတွင်းပိုင်းတွင်လည်း အခေါင်းပေါက်လေးပါသည်။ အခွံသည် နည်းနည်းကြမ်းပြီး အစိမ်းရောင်ဖြစ်သည်။ ခွာရလွယ်ပြီး ချိုချဥ်အာရသာလေးဖြင့် စား၍ အလွန်ကောင်းပါသည်။ ဖုန့်ကမ်၏ထွက်ချိန်သည် အောက်တိုဘာလမှ ဒီဇင်ဘာလအတွင်း ဖြစ်သည်။ ထိုင်ဝမ်တွင် နောက်အတွေ့များသည့် လိမ္မော်သီးမျိုးမှာ ထုံကမ်(桶柑Citrus tankan)ဟု ခေါ်သည် လိမ္မော်သီးမျိုး ဖြစ်သည်။ ထုံကမ်၏အမည်ဖြစ်ပေါ်လာပုံမှာ သယ်ယူချိန်တွင် ပုံး(桶)များဖြင့် ပုံးလိုက်ပုံးလိုက်သယ်ကြရာမှ ထုံကမ်ဟုခေါ်ခြင်း ဖြစ်သည်။ ထုံကမ်၏ထွက်ချိန်သည် နိုဝင်ဘာလ မှ ဇန်နဝါရီလထိ ဖြစ်သည်။ ထုံကမ်ကို တရုတ်နှစ်သစ်ကူးချိန်ခါတွင် အသုံးများသဖြင့် နင်ကမ်(年柑)ဟုလည်း ခေါ်ကြသည်။ ထုံကမ်ခေါ် နင်ကမ်သည် အခွံပါးပြီး ချောသည်။ အရောင်မှာ လိမ္မော်ရောင်ဝင်းဝင်း‌လေးဖြစ်သဖြင့် အလွန်လှသည်။ ထို့အပြင် ကျူကျည်၏အသံထွက်သည် ကံကောင်းခြင်း(大吉大利‌)နှင့် အသံနီးစပ်သဖြင့် နှစ်သစ်ကူးချိန်ခါတွင် အနီရောင်စာလေးများကပ်ပြီး လပ်ကီးအသုံးအဆောင်တစ်ခုအဖြစ် သုံးကြသည်။ ထုံကမ်နှင့် ဖုန့်ကမ်၏ အဓိကကွာခြားချက်မှာ အရောင်အပြင် ခွာသည့်နေရာတွင်လည်း ကွာသည်။ ဖုန့်ကမ်က ခွာရလွယ်သလောက် ထုံကမ်မှာ ခွာရခက်သည်။ ထုံကမ်သည် အရည်ပိုရွှမ်းပြီး ချိုသည်။ ခွာရမလွယ်သဖြင့် ကာပလာသီးစားသလို အမြောင်းလိုက်လှီးပြီးစားပါက အဆင်ပြေသည်။

လိမ္မော်သီးသည် အခွံမှအစ အသုံးဝင်သည်။ အသီးအဖြစ် စားသုံးနိုင်သည့်အပြင် အခြောက်လန်း၍လည်း စားနိုင်သည်။ ယိုထိုး၍လည်း စားနိုင်သည်။ ဟင်းများ၊ ‌ပေါင်မုန့်များ၊ ကိတ်မုန့်များတွင်လည်း ထည့်နိုင်သည်။ လိမ္မော်ခွံဆိုလျှင် အမွှေးနှံ့သာအဖြစ် သုံးနိုင်သလို လက်ဆေးရည်၊ ပန်းကန်ဆေးရည်အဖြစ်လည်း ထုတ်လုပ်နိုင်သည်။ လိမ္မော်သီးကို မင်နန်ဘာသာစကားဖြင့် အမ်အ(Kam-á)ဟုခေါ်ပြီး ကမ်အတင်မ်(柑仔店)သည် ထိုင်ဝမ်တွင် ကုန်စုံဆိုင်ဟု ခေါ်သည်။ ကမ်(柑)သည် အဓိပ္ပာယ်နှစ်မျိုး ရှိသည်။ ပထမတစ်မျိုးမှာ လိမ္မော်သီးဖြစ်ပြီး နောက်တစ်မျိုးအဓိပ္ပာယ်မှာ ဝါးဖြင့်ပြုလုပ်သည့်တောင်းနှင့်ခြင်းများဟု အဓိပ္ပာယ်ရသည်။ ရှေးတုန်းက ကုန်စုံဆိုင်များသည် ဝါးခြင်း၊ ဝါးတောင်းများဖြင့် ပစ္စည်းထည့်ရောင်းကြသဖြင့် ကုန်စုံဆိုင်ကို ကမ်အတင်မ်ဟု ခေါ်ဆိုလာကြခြင်း ဖြစ်သည်။

မနောကြည်မှ ရေးသားတင်ပြသည်။
ဓာတ်ပုံ။ ။ မနောကြည်

18/12/2025

熱蘭遮城遺跡（အန်းဖင်ခံတပ်ရဲ့ ရှေးဟောင်းအဆောက်အဦးအကြွင်းကျန်များ)

18/12/2025

ထိုင်ဝမ်ကျွန်းပတ်ရထား(環島之星)စီးသင့်သည့် အကြောင်းအရာများ

ထိုင်ဝမ်၏ လမ်းပန်းဆက်သွယ်‌ရေးသည် လွယ်ကူပြီး အဆင်ပြေလှသည်။ သွားချင်သည့်နေရာများကို မတူသည့် ခရီးစီးယာဥ်များဖြင့် သွားနိုင်သည်။ ထိုအထဲတွင် ထိုင်ဝမ်မီးရထား(台鐵)နှင့် ezTravel (易遊網)တို့ ပူးပေါင်းလုပ်ဆောင်သည့် ထိုင်ဝမ်ကျွန်းပတ်ရထား(環島之星)သည် တစ်မူထူးခြားနေသည်။

ကျွန်းပတ်စတားဟု အမည်ရသည့် ထိုင်ဝမ်ကျွန်းပတ်ရထားသည် ခရီးသွားဝန်ဆောင်မှုနှင့် တွဲဖက်လုပ်ဆောင်သည့် ရထားတစ်စီး ဖြစ်သည်။ နေ့စဥ်ပြေးဆွဲခြင်း မဟုတ်ဘဲ သောကြာ၊ စနေ၊ တနင်္ဂနွေနေ့နှင့် တနင်္လာနေ့များတွင်သာ ပြေးဆွဲသည့်ရထား ဖြစ်သည်။ သို့သော် ဆောင်းရာသီးကျောင်းပိတ်ရက်အတွင်းဖြစ်သည့် ဇန်နဝါရီလ ၂၃ ရက်နေ့မှ ဖေဖော်ဝါရီလ ၂၃ ရက်နေ့အထိ တစ်လတာကာလအတွင်းတော့ နေ့စဥ် ပြေးဆွဲသွားမည် ဖြစ်သည်။ ထိုင်ဝမ်ကျွန်းပတ်ရထား၏လက်မှတ်သည် သာမန်ရထားလက်မှတ်ထက် နည်းနည်းပိုပေးရသော်လည်း သူ၏ထူးခြားမှုကြောင့် ပြေးဆွဲတိုင်းလည်း တွဲတိုင်းနီးပါး လူအပြည့် ရှိသည်။ ထိုင်ဝမ်ကျွန်းပတ်ရထားကို စီးမည်ဆိုပါက မတူသည့်ခရီးစဥ်များ ရွေးချယ်နိုင်သည်။ ရထားပေါ်ရှိ အပြင်အဆင်များနှင့် ထိုင်ဝမ်၏ သဘာဝရှုခင်းအလှတရားများကို တစ်ရက်တည်းတွင်သာ ခံစားချင်သူများအတွက် တစ်နေ့တာရထားစီးလက်မှတ်ကို ဝယ်ယူနိုင်ပြီး၊ ရထားလက်မှတ်အပြင် တည်းခိုရေးနှင့်လည်ပတ်ရေးတို့ကို တွဲပြီးလည်း ဝယ်နိုင်ပါသည်။

တစ်နေ့တာရထားစီးခရီးစဥ်ကို ထိုင်ဝမ်သို့လာရောက်လည်ပတ်သည့် ခရီးသွားများသွားသင့်သလို အကြောင်းအမျိုးမျိုးကြောင့် စိတ်ဖိစီးမှုများစွာရှိပြီး ဘာမှမစဥ်းစားဘဲ တစ်ယောက်ထဲ အေးအေးဆေးဆေး အချိန်ကုန်ချင်သူများ သွားရန် သင့်တော်သည်။ ထိုင်ဝမ်သို့လာရောက်လည်ပတ်သည့် ကမ္ဘာ့ခရီးသွားများအနေဖြင့် တစ်နေ့တာခရီးစီစဥ်ခြင်းဖြင့် ထိုင်ဝမ်၏ အရှေ့ဘက်နှင့် အနောက်ဘက်ရှိ သဘာဝအလှတရားများကို တစ်နေ့တည်းတွင်ပင် ခံစားနိုင်သည့်အပြင် ရထားပေါ်တွင်ပင် ထိုင်ဝမ်၏ အထင်ကရ အစားအစာအချို့ကိုလည်း ခံစားနိုင်သည်။ တစ်နေ့တာရထားခရီးစဥ်၏ ကြာချိန်သည် ၁၃ နာရီကျော်ရှိပြီး နာရီလက်တံအတိုင်း လက်ယာရစ်ပုံစံဖြင့် ပတ်သည့်ရထားနှင့် နာရီလက်တံပြောင်းပြန်အတိုင်း လက်ဝဲရစ်ပုံစံဖြင့် ပတ်သည့်ရထားဟူ၍ နှစ်မျိုးခွဲထားသည်။ လက်ယာရစ်ရထားသည် မနက် ၈ နာရီကျော်တွင် ထိုင်ပေဘူတာမှ စတင်ထွက်ခွာပြီး ထိုင်ဝမ်၏ အရှေ့ဘက်ခြမ်းမှ အနောက်ဘက်ခြမ်းသို့ တစ်ပတ်ပတ်ပြီး နောက်ဆုံး ည ၉ နာရီကျော်မှ ထိုင်ပေဘူတာသို့ ပြန်ရောက်သည့်ရထား ဖြစ်သည်။ လက်ဝဲရစ်ရထားကတော့ မနက် ၆ နာရီကျော်မှ ည ၇ နာရီကျော်ထိ ပြေးဆွဲသည့်ရထားဖြစ်ပြီး ထိုင်ဝမ်၏ အနောက်ဘက်ခြမ်းမှ အရှေ့ဘက်ခြမ်းသို့ ပြေးဆွဲသည့်ရထား ဖြစ်သည်။ ခရီးသွားများအနေဖြင့် မိမိစီးချင်သည့်အချိန်အရ ရွေးချယ်နိုင်သည်။

ထိုင်ဝမ်ကျွန်းပတ်ရထားစီးခြင်း၏ နောက်ကောင်းကွက်တစ်ခုမှာ ထိုင်ဝမ်၏ အထင်ကရအစားအစာအချို့ကို ရထားပေါ်တွင် စားသုံးနိုင်ခြင်းပင် ဖြစ်သည်။ အစားအစာများသည် တစ်ချိန်နှင့်တစ်ချိန်မတူရအောင် ပြောင်းလဲကျွေးတတ်သည်။ ရထားပေါ်တွင် တစ်ရက်သုံးနှပ်အပြင် ကြားတွင် မုန့်သားရေစာနှင့် အအေး၊ ကော်ဖီများကို ပေးဝေသေးသည်။ လက်ရှိချိန်တွင် မနက်စာကို ၁၉၄၇ ခုနှစ်တွင်ပင် စတင်တည်ထောင်ခဲ့သည့် ထိုင်ဝမ်အသားညှပ်ပေါင်မုန့်ဆိုင် ဟုန်၍ကျိန်း(洪瑞珍三明治)ကို ကျွေးခြင်းဖြစ်ပြီး ထမင်းဗူးမှအစ အအေးခွက်၊ ကော်ဖီခွက်များမှာ SANRIO ကာတွန်းရုပ်များပါသည့် ချစ်စဖွယ်ဗူးနှင့်ခွက်များ ဖြစ်သည်။ နေ့လည်စာကို ထိုင်ဝမ်ကျားယိကြက်သားထမင်း(嘉義雞肉飯)ကို ကျွေးသည်။ ညနေစာသည် ၉ ကွက်ထမင်းဗူးတွင် အသားနှင့်ဟင်းများကို ထိုင်ဝမ်ဌာနေတိုင်းရင်းသားများ၏ ဝါးထမင်း(竹筒飯)နှင့် တွဲကျွေးသည်။ ဝါးထမင်းသည် ကျွန်မတို့မြန်မာနိုင်ငံတွင် ပေါင်းတင်းခေါ်ကောက်ညှင်းကျည်ထောက်ပင် ဖြစ်သည်။

ထိုင်ဝမ်ကျွန်းပတ်ရထားပေါ်ရှိ အစားအစာများ စားကောင်းသည့်အပြင် ၁၃ နာရီလုံးလုံး ရထားပေါ်တွင် ပါလာသည်ဖြစ်၍ သဘာဝရှုခင်းများကို ခဏတာငေးကြည့်ခြင်း၊ ပျင်းလျှင် ကာရာအိုကေတွဲသို့သွားပြီး သီချင်းများဟစ်ခြင်း၊ အချိန်အလိုက်စီစဥ်ပေးထားသည့် အစီအစဥ်များကို သွားရောက်ခံစားခြင်းဖြင့် မိမိ၏တစ်နေ့တာကို အေးအေးဆေးဆေးဖြတ်သန်းနိုင်ပါသည်။ ဤခရီးစဥ်ကို စိတ်ဝင်စားပါက ထိုင်ဝမ်မီးရထားဝဘ်ဆိုက် https://www.railway.gov.tw/tra-tip-web/tip/tip00N/tipN01/around/index?lang=zh_TW တွင် သွားရောက်ကြည့်ရှုနိုင်ပါသည်။

မနောကြည်မှ ရေးသားတင်ပြသည်။
ဓာတ်ပုံ။ ။ ထိုင်ဝမ်မီးရထားဝဘ်ဆိုက်၊ မနောကြည်

17/12/2025

ဟွားလျင်မြို့ရောက်လျှင် မဝယ်မဖြစ် အိမ်ပြန်လက်‌‌‌ဆောင်-ပဲငံပြာရည်စိမ် ငရုတ်သီး

ခရီးသွားဖူးသူတိုင်း အိမ်ပြန်လက်ဆောင်များ ဝယ်ဖူးကြလိမ့်မည်။ ခရီးစဉ်မလိုက်နိုင်သည့် မိသားစုဝင် သို့မဟုတ် မိတ်ဆွေသူငယ်ချင်းများအတွက် အိမ်ပြန်လက်ဆောင်ဝယ်ပေးခြင်းသည် ခရီးထွက်ခြင်း၏ လုပ်နေကြလုပ်ငန်းဆောင်တာတစ်ခုလိုပင် ဖြစ်နေပါပြီ။

မတူသည့်နေရာ‌ဒေသအလိုက် မတူသည့် အထင်ကရပစ္စည်းများ ရှိသည်။ ဥပမာ။ ။ ရုရှားရောက်လျှင် ရုရှားအရုပ်များကို ဝယ်ကြသလို ထိုင်ဝမ်၏မြို့အသီးသီးတွင်လည်း မတူသည့် အိမ်ပြန်အမှတ်တရပစ္စည်းနှင့် အစားအစာများ ရှိသည်။ ယနေ့စာဖတ်မိတ်ဆွေများနှင့် ဟွားလျင်ရောက်လျှင် ဝယ်သင့်သည့် အစားအစာတစ်ခုဖြစ်သည့် ပဲငံပြာရည်စိမ် ငရုတ်သီး(剝皮辣椒)အကြောင်းကို ရေးသားမျှဝေပေးလိုပါသည်။ ဟွားလျင်‌ရောက်လျှင် နေရာတော်တော်များများတွင် အခွံချွတ်ပြီးသားငရုတ်သီးဟု အဓိပ္ပာယ်ရသည့် ပဲငံပြာရည်စိမ် ငရုတ်သီးများရောင်းကြောင်းတွေ့ရသည်။

ဟွားလျင်‌သည် ဌာနေတိုင်းရင်းသားအမြောက်အများနေထိုင်သည့်နေရာဖြစ်၍ အစပိုင်းတွင် ကျွန်မက ထိုပဲငံပြာရည်စိမ် ငရုတ်သီးသည် ဌာနေတိုင်းရင်းသားများ၏ အစားအစာလားဟု ထင်ထားသည်။ သို့သော် မေးကြည့်မှ ထိုပဲငံပြာရည်စိမ် ငရုတ်သီးကို ချိန်ချုပ်ကျင်း(陳秋金)ဆိုသူက ၁၉၉၃ ခုနှစ်တွင် စတင်လုပ်ခဲ့သည့် အစားအစာတစ်ခုဖြစ်ကြောင်း သိရသည်။ ထို့အပြင် ပဲငံပြာရည်စိမ် ငရုတ်သီးသည် ဟွားလျင်ဖုန့်လင်(花蓮鳳林)ရွာမှ စတင်ဖြစ်ပေါ်လာသည့် ဟာကာ(客家)အစားအစာတစ်မျိုးလည်း ဖြစ်သည်။ ထိုမှတဆင့် ဟွားလျင်ဖုန့်လင်ရွာသည် ထိုင်ဝမ်တွင် ဟာကာလူမျိုးအများဆုံးရှိသည့် နေရာဖြစ်ကြောင်းလည်း သိခဲ့ရသည်။ ပဲငံပြာရည်စိမ် ငရုတ်သီးဖြစ်ပေါ်လာပုံမှာ လွန်ခဲ့သည့် နှစ် ၃၀ ကျော်ခန့်တွင် ဟွားလျင်၌ ထိုင်ဖုန်းကျရောက်ပြီး ရုပ်သိမ်းထားသည့် ငရုတ်သီးအစိမ်းအမြောက်အများ မပုတ်မသိုးအောင် ထားနိုင်ရန် ကြံစည်ရာမှ ဖြစ်ပေါ်လာသည့်အစားအစာတစ်မျိုး ဖြစ်ကြောင်း သိရသည်။ မစ်စတာချိန်သည် ငရုတ်သီးစိမ်းများ အထားခံနိုင်ရန် ငရုတ်သီးများကို ဆီဖြင့်အရင်လော်ပြီး ငရုတ်သီးအခွံကိုချွတ်၊ အစေ့ဖယ် ပြီးလျှင် ပဲငံပြာရည် သကြားအနည်းငယ်ဖြင့် စိမ်ထားသည့်နည်းကို သုံးခဲ့သည်။ ထိုသို့ စိမ်ထားသည့် ငရုတ်သီးသည် ကြွတ်ကြွတ်စပ်စပ်ဖြင့် စား၍အလွန်ကောင်းသည်။ ထို့ကြောင့်လည်း ထိုင်ဝမ်အနှံ့ စားကြသည့်အစားအစာတစ်မျိုး ဖြစ်လာသည်။

ဟက်ကာလူမျိုးများ မနက်စာစားချိန်တွင် စွပ်ပြုတ်ဖြူနှင့်အတူ ပဲငံပြာရည်စိမ် ငရုတ်သီးကို တွဲစားတတ်ကြသည်။ အချိုအစပ်အသင့်တင့်ဖြင့် အာရသာရှိသည့်အပြင် အအီလည်းပြေစေသည်။ ပဲငံပြာရည်စိမ် ငရုတ်သီးသည် ဟာကာလူမျိုးများသာမက ဌာနေတိုင်းရင်းသားများ၏ အစားအစာများတွင်လည်း သုံးတတ်ကြသည်။ နှပ်ထားသည့်ဝက်သားကို ပဲငံပြာရည်စိမ် ငရုတ်သီးလေးနှင့် တွဲကြော်လိုက်သည်နှင့် အလွန်စားကောင်းသည့် ဟင်းတစ်ပွဲ ထွက်လာသည်။ ကြက်ပြုတ်ဟင်းရည်ဖြစ်စေ၊ ဝက်ပေါက်ရိုးပြုတ်ဟင်းရည်ဖြစ်စေ ပဲငံပြာရည်စိမ် ငရုတ်သီးလေး ထည့်ပြုတ်လိုက်သည်နှင့် အာရသာမှာ လုံးဝကို စားကောင်းသွားသည်။ ပဲငံပြာရည်စိမ် ငရုတ်သီးသည် ဟွားလျင်၏ အစားအစားတစ်ခုဟုတ်သလို ထိုင်ဝမ်ဟာကာလူမျိုးများ၏ အစားအစာဟုလည်း ဆိုနိုင်သည်။ ဟွားလျင်သို့ ရောက်ပါက အိမ်ပြန်လက်‌ဆောင်အဖြစ် တစ်ဗူးနှစ်ဗူးဝယ်နိုင်ပါကြောင်း သတင်းစကားပါးလိုက်ပါသည်။

မနောကြည်မှ ရေးသားတင်ပြသည်။
ဓာတ်ပုံ။ ။ မနောကြည်

17/12/2025

ထိုင်ပေ 101 သွားပြီး Toy Story ဇာတ်လမ်းထဲက Buzz Lightyear ၊ Woody ၊ Alien စတဲ့ ဇာတ်ကောင်လေးတွေနဲ့ ဓာတ်ပုံ ရိုက်ကြရအောင်

စာဖတ်သူတွေထဲမှာ စာရေးသူလို Toy Story ခရေစီလေးတွေ ပါမယ်လို့ ထင်ပါတယ်။ အထူးသဖြင့် ၁၉၉၀ ခုနှစ် နောက်ပိုင်းမှာမွေးတဲ့ 90’s Kids တွေဆိုရင် ၁၉၉၅ ခုနှစ်ကတည်းက စတင်ရိုက်ကူးခဲ့တဲ့ ဒီ အမေရိကန် အန်နီမေးရှင်းဇတ်လမ်းကို မသိတဲ့သူမရှိသလောက်လို့တောင် ပြောရမှာပါ။ စာရေးသူကတော့ Toy Story စီးရီး မှန်သမျှကို မလွတ်တမ်း ကြည့်တဲ့ထဲမှာ ပါပါတယ်။ လာမယ့် ၂၀၂၆ ခုနှစ်မှာလည်း Toy Story 5 ကို ရုံတင်မယ်ဆိုပြီးလည်း ထုတ်လုပ်ရေးကုမ္ပဏီလက်က အတည်ပြုထားတာ တွေ့တော့ အခုကတည်းက ကြည့်ဖို့ ရယ်ဒီဖြစ်နေပြီပဲ ဖြစ်ပါတယ်။

၁၉၉၅ ခုနှစ်ကတည်းက စတင်ရုံတင်ပြသလာတဲ့ Toy Story ဇာတ်လမ်းဟာ လက်ရှိမှာတော့ Toy Story 4 အထိ စုစုပေါင်း စီးရီး ၄ ခု ထွက်ရှိပြီးသား ဖြစ်ပါတယ်။ ကလေးကော လူကြီးပါမကျန် ကြည့်ရတာ သဘောကျကြတဲ့ ဒီအန်နီမေးရှင်းဇာတ်လမ်းက ယခု ၂၀၂၅ ခုနှစ်မှာတော့ နှစ်ပေါင်း ၃၀ ပြည့်လို့ လာခဲ့ပြီပဲ ဖြစ်ပါတယ်။ ဒါကြောင့်လည်း ဇာတ်လမ်းရိုက်ကူးခဲ့တာ နှစ် ၃၀ ပြည့်တဲ့နှစ် အထိမ်းအမှတ်အနေနဲ့ Disney Pixar ရဲ့ Toy Story ဇာတ်ကောင်လေးတွေနဲ့ ခရစ္စမတ်မီးအလှဆင်မှုတစ်ခုကို ထိုင်ဝမ်ရဲ့ အထင်ကရနေရာဖြစ်တဲ့ ထိုင်ပေ ၁၀၁ ဟာ အဆောက်အဦးရဲ့ အပြင်ဘက်မှာ အားလုံးလာရောက်ခံစားလို့ရအောင် ခင်းကျင်းပြသပေးထားပါတယ်။

အကယ်လို့ လာမယ့် ပိတ်ရက်တွေမှာ ဘယ်ကို သွားရမှန်း မသိကြတဲ့ ထိုင်ဝမ်ရောက် စာဖတ်သူတွေအနေနဲ့ ထိုင်ပေ ၁၀၁ မှာ ရှောပင်းထွက်ရင်း Toy Story ဇာတ်လမ်းထဲက Buzz Lightyear ၊ Woody ၊ Alien စတဲ့ ဇာတ်ကောင်လေးတွေနဲ့ အလှဆင်ထားတဲ့ ခရစ္စမတ်မီးလေးတွေနဲ့အတူ ဓာတ်ပုံရိုက်ကြဖို့ အကြံပြုချင်ပါတယ်။ တကယ့်ကို ဇာတ်လမ်းထဲက Toy Story ကမ္ဘာထဲကို ရောက်သွားသလိုမျိုး ခံစားချက်ကို ရရှိစေမှာပဲ ဖြစ်လို့ မဖြစ်မနေ သွားဖို့ တိုက်တွန်းရင်း စာကို အဆုံးသတ်လိုက်ပါတယ်ခင်ဗျာ။ အစဉ်လေးစားလျက်…

ဓာတ်ပုံ - TAIPEI 101 MALL 台北 101 購物中心
Thomas Chen မှ ရေးသားဖော်ပြသည်။ ဆက်လက်ကြိုးစားသွားပါဦးမည်။

17/12/2025

ဂျပန်ဟာ ထိုင်ဝမ်ကို တရုတ်ပြည်သူ့သမ္မတနိုင်ငံ(PRC) တစ်စိတ်တစ်ပိုင်းအဖြစ် ဘယ်တုန်းကမှ အသိအမှတ်မပြုခဲ့ပါဘူးဟု နိုင်ငံရေးဝန်ကြီးဌာနပြောကြား

တရုတ်နဲ့ ဂျပန်ရဲ့ ကုလသမဂ္ဂဆိုင်ရာ သံအမတ်ကြီးတွေဟာ ကုလသမဂ္ဂလုံခြုံရေးကောင်စီမှာ ထိုင်ဝမ်ရေးရာ အငြင်းပွားမှုနဲ့ပတ်သက်ပြီး ထိုင်ဝမ်ရဲ့ အချုပ်အခြာအာဏာ အခြေအနေကို ပြောဆိုခဲ့တဲ့ နောက်ဆုံးဖြစ်ရပ်နဲ့စပ်လျဉ်းပြီး နိုင်ငံခြားရေးဝန်ကြီးဌာန လက်အောက်ရှိ ထိုင်ဝမ်-ဂျပန် ဆက်ဆံရေးအသင်းရဲ့ (台灣日本關係協會)ဒုတိယအတွင်းရေးမှူးချုပ် လင်းယွိဟွေ ့(林郁慧）က ဒီဇင်ဘာလ ၁၆ ရက်နေ့မှာ မီဒီယာရဲ့ မေးမြန်းမှုကို ပြန်လည်ဖြေကြားရာတွင် ထိုင်ဝမ်ဘက်မှ ခိုင်မာပြတ်သားတဲ့ ရပ်တည်ချက်ကို ထပ်လောင်းပြောကြားခဲ့တဲ့အပြင် ဂျပန်အစိုးရရဲ့ ရပ်တည်ချက်ကိုလည်း ရှင်းပြခဲ့ပြီး ဂျပန်နိုင်ငံဟာ ထိုင်ဝမ်ကို တရုတ်ပြည်သူ့သမ္မတနိုင်ငံရဲ့ တစ်စိတ်တစ်ပိုင်းအဖြစ် ဘယ်တုန်းကမှ အသိအမှတ်မပြုခဲ့ပါဘူး လို့ အလေးအနက် ပြောကြားခဲ့ပါတယ်။

ဂျပန်ဝန်ကြီးချုပ် တာကာအိချိ ဆာနာအဲ (Takaichi Sanae) က နိုဝင်ဘာ ၇ ရက်နေ့မှာ လွှတ်တော်ရဲ့ ထိုင်ဝမ်ရေးရာ နှင့်ပတ်သက်ပြီး မေးမြန်းမှုကို ဖြေကြားခဲ့ရာတွင် တရုတ်နိုင်ငံရဲ့ မကျေနပ်မှုကို ဖြစ်ပေါ်စေခဲ့ပြီး တရုတ်-ဂျပန် ဆက်ဆံရေးဟာ တစ်လကျော်ကြာအောင် တင်းမာနေဆဲဖြစ်ပါတယ်။ ဒီဇင်ဘာ ၁၅ ရက်နေ့မှာတော့ တရုတ်နဲ့ ဂျပန်ရဲ့ ကုလသမဂ္ဂဆိုင်ရာ သံအမတ်ကြီးနှစ်ဦးဟာ အဆိုပါကိစ္စနဲ့ ပတ်သက်ပြီး လုံခြုံရေးကောင်စီမှာ အပြန်အလှန် ထိပ်တိုက်ရင်ဆိုင်ခဲ့ကြပြီး ထိုင်ဝမ်ရဲ့ အချုပ်အခြာအာဏာ ကိစ္စကိုလည်း ထိတွေ့ပြောဆိုခဲ့ကြပါတယ်။

ထိုင်ဝမ်-ဂျပန် ဆက်ဆံရေးအသင်းရဲ့ ဒုတိယအတွင်းရေးမှူးချုပ် လင်းယွိဟွေ့က ပြန်လည်ဖြေကြားရာတွင် တရုတ်သမ္မတနိုင်ငံ (ထိုင်ဝမ်) ဟာ အချုပ်အခြာအာဏာပိုင် လွတ်လပ်တဲ့နိုင်ငံဖြစ်ပြီး တရုတ်ပြည်သူ့သမ္မတနိုင်ငံရဲ့လက်အောက်ခံ မဟုတ်ပါဘူး။ တရုတ်ပြည်သူ့သမ္မတနိုင်ငံက ထိုင်ဝမ်ကို ဘယ်တုန်းကမှ အုပ်ချုပ်ခဲ့ခြင်း မရှိပါဘူး။ ဒါဟာ ထိုင်ဝမ်ရေလက်ကြားရဲ့ လက်ရှိ ပကတိအခြေအနေ ဖြစ်ရုံသာမက နိုင်ငံတကာအသိုက်အဝန်းကပါ အသိအမှတ်ပြုထားတဲ့ အချက်ဖြစ်ကြောင်း ထပ်လောင်းပြောကြားခဲ့ပါတယ်။

လင်းယွိဟွေ့ဟာ ထိုင်ဝမ်ရဲ့ အခြေအနေနဲ့ ပတ်သက်တဲ့ ဂျပန်အစိုးရရဲ့ ရပ်တည်ချက်ကို ထပ်မံရှင်းပြခဲ့ပြီး ဂျပန်အစိုးရရဲ့ ရပ်တည်ချက်ဟာ ဘယ်တုန်းကမှ မပြောင်းလဲခဲ့ကြောင်း အလေးအနက် ပြောကြားခဲ့ပါတယ်။ လင်းယွီဟွေမှ ဂျပန်အစိုးရရဲ့ အမြဲတမ်း ရပ်တည်ချက်ကတော့ ၁၉၇၂ ခုနှစ် ဂျပန်-တရုတ် ပူးတွဲကြေညာချက်မှာ တရုတ်နိုင်ငံက ထိုင်ဝမ်ဟာ တရုတ်ပြည်သူ့သမ္မတနိုင်ငံရဲ့ ခွဲထွက်လို့မရတဲ့ နယ်မြေတစ်စိတ်တစ်ပိုင်းဖြစ်ကြောင်း အခိုင်အမာ ပြောဆိုတာကို ဂျပန်က နားလည်ပြီး လေးစားပါတယ်။ ဒါပေမယ့် ထိုင်ဝမ်ကို တရုတ်ပြည်သူ့သမ္မတနိုင်ငံရဲ့ တစ်စိတ်တစ်ပိုင်းအဖြစ် ဘယ်တုန်းကမှ အသိအမှတ်မပြုခဲ့ပါဘူး လို့ ပြောကြားခဲ့ပါတယ်။

ထို့အပြင် ပြင်သစ် စိုက်ပျိုးရေး ထုတ်ကုန်မြှင့်တင်ရေးအသင်း (AVPA) က ရှစ်ကြိမ်မြောက် ကမ္ဘာ့လက်ဖက်ရည် ပြိုင်ပွဲကို ကျင်းပခဲ့ပြီး ဒီဇင်ဘာ ၂ ရက်နေ့မှာ ဆုပေးပွဲ အခမ်းအနားကို ကျင်းပခဲ့ပါတယ်။ ထိုင်ဝမ်မှ လက်ဖက်ရည် လုပ်ငန်းရှင် ၂၉ ဦး ပါဝင်ယှဉ်ပြိုင်ပြီး ဆုတံဆိပ်များစွာ ရရှိခဲ့တာပါ။ အင်တာနက်ပေါ်က ဗီဒီယိုတွေမှာ ထိုင်ဝမ်လက်ဖက်ရည် လုပ်ငန်းရှင်တွေ ဆုရရှိချိန်မှာ လူအချို့က ဆူပူအုံကြွပြီး ထိုင်ဝမ်ရဲ့ အခြေအနေကို လျှော့ချ ပြောဆိုခဲ့ကြတယ်လို့ ဖော်ပြထားပါတယ်။ ထို့အပြင် အမျိုးသားတစ်ဦးက မတ်တပ်ထရပ်ပြီး ထိုင်ဝမ်ဟာ ပြည်နယ်တစ်ခုသာ ဖြစ်တယ် လို့ အော်ဟစ်ခဲ့ကာ နောက်ထပ် အမျိုးသမီးတစ်ဦးကလည်း ထိုင်ဝမ်ဟာ တရုတ်ရဲ့ တစ်စိတ်တစ်ပိုင်း ဖြစ်တယ်လို့ ဆက်လက်ပြောခဲ့ပါတယ်။ ၎င်းကိစ္စနဲ့ ပတ်သက်ပြီး နိုင်ငံခြားရေးဝန်ကြီးဌာနရဲ့ ပြောရေးဆိုခွင့်ရှိသူ ရှောင်းကွမ်းဝေ (蕭光偉က ဒီဇင်ဘာ ၁၆ ရက်နေ့မှာ တရုတ်ပြည်သူတွေကို နိုင်ငံတကာအသိုက်အဝန်းရဲ့ ယဉ်ကျေးမှုနဲ့ ယဉ်ကျေးပျူငှာမှုဆိုင်ရာ ပုံမှန် စည်းမျဉ်းစည်းကမ်းတွေကို လိုက်နာဖို့နဲ့ နိုင်ငံတကာရဲ့ လှောင်ပြောင်မှုရှုံ့ချမှုကိုကို မခံရစေရန်ရှောင်ရှားဖို့ တိုက်တွန်းခဲ့ပါတယ်။

ရှောင်းကွမ်းဝေဟာ ပေကျင်းအာဏာပိုင်တွေကို ထိုင်ဝမ်နဲ့ တန်းတူညီမျှပြီး လေးစားမှုရှိတဲ့ ဆွေးနွေးမှုတွေမှသာလျှင် ထိုင်ဝမ်ရေလက်ကြားရဲ့ အခြေအနေမှန်ကို ဆင်ခြင်တုံတရားနဲ့ ရှုမြင်နိုင်မှာဖြစ်ကြောင်း၊ ထိုင်ဝမ်နဲ့ နိုင်ငံတကာအသိုက်အဝန်းအပေါ် မဆင်မခြင် ဖိအားပေးမှုနဲ့ အနိုင်ကျင့် ခြိမ်းခြောက်မှုတွေကို ရပ်တန့်မှသာ နှစ်ဖက်ဆက်ဆံရေးကို တိုးတက်ကောင်းမွန်လာအောင် လုပ်ဆောင်နိုင်မှာဖြစ်ကြောင်း ထပ်မံတိုက်တွန်းခဲ့တာဖြစ်ပါတယ်ရှင်။

Photo:中央社（路透社）

17 Dec 2025
ဆောင်းပါးဘာသာပြန်-အေးသုမွန်ဟန်

RtiMyanmar

27/12/2025

25/12/2025

20/12/2025

20/12/2025

20/12/2025

19/12/2025

19/12/2025

18/12/2025

18/12/2025

17/12/2025

17/12/2025

17/12/2025

Address

Telephone

Website

Alerts

Shortcuts

Share

Category