RtiMyanmar, 55, Pei-an Road, Taipei (2026)

03/09/2026

SEMICON Taiwan 2026 ပွဲကို စတင်ကျင်းပ

SEMICON Taiwan 2026 နိုင်ငံတကာ ဆီမီးကွန်ဒက်တာပြပွဲကို စက်တင်ဘာလ ၂ ရက်နေ့မှာ စတင်ကျင်းပခဲ့ပြီး အုပ်ချုပ်ရေးဝန်ကြီးဌာန ဝန်ကြီးချုပ် ကျော်ရုံထိုက် (卓榮泰) က ထိုင်ဝမ်ရဲ့ ဆီမီးကွန်ဒက်တာလုပ်ငန်းတွေနဲ့ နိုင်ငံတကာကုမ္ပဏီကြီးတွေ ထိုင်ဝမ်မှာ ရင်းနှီးမြှုပ်နှံမှုတွေ ဆက်လက်တိုးမြှင့်နေခြင်းဟာ ကမ္ဘာ့ထောက်ပံ့ရေးကွင်းဆက်မှာ ထိုင်ဝမ်ရဲ့ အဓိကအခန်းကဏ္ဍကို ပိုမိုခိုင်မာစေတယ်လို့ ပြောကြားခဲ့ပါတယ်။

ကမ္ဘာ့ဆီမီးကွန်ဒက်တာကုန်သွယ်မှု စာရင်းအင်းအဖွဲ့ (WSTS) ရဲ့ ခန့်မှန်းချက်အရ ယခုနှစ် ကမ္ဘာ့ဆီမီးကွန်ဒက်တာဈေးကွက်ပမာဏဟာ အမေရိကန်ဒေါ်လာ ၁.၆၅၅ ထရီလီယံအထိ ရောက်ရှိမယ်လို့ ခန့်မှန်းထားပါတယ်။ ထိုင်ဝမ်ရဲ့ ဆီမီးကွန်ဒက်တာလုပ်ငန်းကတော့ ၂၀၂၅ ခုနှစ်မှာ စုစုပေါင်းထုတ်လုပ်မှုတန်ဖိုး အမေရိကန်ဒေါ်လာ ၂၀၉.၁ ဘီလီယံအထိ ရှိခဲ့ပြီး တိုးတက်မှုနှုန်း ၂၂.၇ ရာခိုင်နှုန်း ရှိခဲ့တာဖြစ်ပါတယ်။

ကျော်ရုံထိုက်က ဆီမီးကွန်ဒက်တာလုပ်ငန်းဟာ ကမ္ဘာလုံးဆိုင်ရာ ပူးပေါင်းဆောင်ရွက်မှုအပေါ် အလွန်မှီခိုနေတဲ့ လုပ်ငန်းတစ်ခုဖြစ်ပြီး နိုင်ငံအသီးသီးနဲ့ ဒေသအသီးသီးက ထောက်ပံ့ရေးကွင်းဆက်ရဲ့ မတူညီတဲ့ကဏ္ဍတွေမှာ မိမိတို့ရဲ့ အားသာချက်တွေကို အသုံးချကာ ပိုမိုကျွမ်းကျင်တဲ့ လုပ်ငန်းခွဲဝေမှုနဲ့ နိုင်ငံတကာပူးပေါင်းဆောင်ရွက်မှုတွေ ပြုလုပ်မှသာ တစ်ဖက်နဲ့တစ်ဖက် အားသာချက်တွေကို ဖြည့်ဆည်းပေးနိုင်မယ်လို့ ပြောကြားခဲ့ပါတယ်။

TSMC နဲ့ နိုင်ငံတကာကုမ္ပဏီကြီးအများအပြားဟာ ထိုင်ဝမ်မှာ ရင်းနှီးမြှုပ်နှံမှုတွေ ဆက်လက်တိုးမြှင့်နေပြီး အဆင့်မြင့်ထုပ်ပိုးမှု (Advanced Packaging)၊ မန်မိုရီ (Memory)၊ စက်ပစ္စည်းနဲ့ ကုန်ကြမ်းပစ္စည်း စတဲ့ ထောက်ပံ့ရေးကွင်းဆက်ကဏ္ဍတွေမှာ အရေးကြီးတဲ့ ရင်းနှီးမြှုပ်နှံမှုတွေ ပြုလုပ်နေပါတယ်။ ဒါဟာ ကမ္ဘာ့ထုတ်လုပ်မှုနဲ့ ထောက်ပံ့ရေးကွင်းဆက်မှာ ထိုင်ဝမ်ရဲ့ အရေးပါတဲ့ အခန်းကဏ္ဍကို ပိုမိုကျယ်ပြန့်စေတယ်လို့ ကျော်ရုံထိုက်က ဆိုပါတယ်။

အစိုးရရဲ့ ပံ့ပိုးကူညီမှုအနေနဲ့ ပြည်တွင်းနဲ့ နိုင်ငံတကာကုမ္ပဏီကြီးတွေ ထိုင်ဝမ်မှာ ရင်းနှီးမြှုပ်နှံဖို့ လိုအပ်တဲ့ မြေနေရာ၊ စွမ်းအင်၊ လူသားအရင်းအမြစ်၊ လုပ်သားအင်အားနဲ့ ဘဏ္ဍာရေးဆိုင်ရာ ပံ့ပိုးမှုတွေကို ကြိုတင်ပြင်ဆင်ပေးသွားမှာ ဖြစ်ပါတယ်။ မြေနေရာအပိုင်းမှာလည်း ရှိပြီးသား သိပ္ပံဥယျာဉ်၊ စက်မှုဇုန်နဲ့ စက်မှုလုပ်ငန်းဥယျာဉ်တွေအပြင် စီးပွားရေးဝန်ကြီးဌာနနဲ့ အမျိုးသားသိပ္ပံနှင့်နည်းပညာကောင်စီတို့ကို သင့်တော်တဲ့ မြေနေရာတွေ ဆက်လက်ရှာဖွေဖို့ ညွှန်ကြားထားပြီး ကုမ္ပဏီတွေ စက်ရုံတည်ဆောက်ကာ အမြန်ဆုံး ဝင်ရောက်လုပ်ကိုင်နိုင်အောင် ဆောင်ရွက်ပေးသွားမှာ ဖြစ်ပါတယ်။

စွမ်းအင်အပိုင်းမှာတော့ AI နည်းပညာဖွံ့ဖြိုးတိုးတက်မှုကြောင့် အနာဂတ်မှာ တိုးလာမယ့် စွမ်းအင်လိုအပ်ချက်ကို ပိုမိုတိကျစွာ တွက်ချက်ပြီး လုပ်ငန်းကဏ္ဍရဲ့ လိုအပ်ချက်ကို ဖြည့်ဆည်းနိုင်အောင် စွမ်းအင်ထောက်ပံ့မှုကို လိုအပ်သလို တိုးမြှင့်ပေးသွားမှာ ဖြစ်ပါတယ်။ ဒါ့အပြင် အစိုးရက မြေနေရာ၊ စွမ်းအင်၊ လူသားအရင်းအမြစ်၊ လုပ်သားအင်အားနဲ့ ဘဏ္ဍာရေး စတဲ့ ကဏ္ဍအသီးသီးမှာ ကြိုတင်ပြင်ဆင်ထားပြီး ပြည်တွင်းနဲ့ နိုင်ငံတကာကုမ္ပဏီကြီးတွေရဲ့ ထိုင်ဝမ်မှာ ရင်းနှီးမြှုပ်နှံဖို့ လိုအပ်ချက်တွေကို ပံ့ပိုးပေးသွားမှာဖြစ်ကြောင်း ကျော်ရုံထိုက်က ပြောကြားခဲ့တာပါ။

Photo: Rti
3 Sep 2026

Photo :Rti
3 Sep 2026

03/09/2026

စက်တင်ဘာလ ၃ ရက်နေ့ ထိုင်ဝမ်၏ တပ်မတော်နေ့

စက်တင်ဘာလ ၃ ရက်နေ့သည် ထိုင်ဝမ်၏ တပ်မတော်နေ့ (軍人節) ဖြစ်သည်။ ယနေ့မနက်တွင် အမျိုးသားတော်လှန်ရေးအာဇာနည်ဗိမာန် (國民革命忠烈祠) ၌ ကျင်းပသည့် “တရုတ်သမ္မတနိုင်ငံ ၁၁၅ ခုနှစ် ဆောင်းဦးရာသီ အာဇာနည်နှင့် တာဝန်ထမ်းဆောင်ရင်း ကျဆုံးသူများအား ဂုဏ်ပြုအောက်မေ့သည့်အခမ်းအနား” (中華民國115年秋祭忠烈殉職人員典禮) သို့ လိုက်ချင်းတယ်သမ္မတ (賴清德總統) တက်ရောက်ကျင်းပခဲ့သည်။

လိုက်သမ္မတနှင့်အတူ ဒုသမ္မတ ရှောင်းမေချင် (副總統蕭美琴)၊ ဝန်ကြီးချုပ် ကျော်ရုံထိုက် (行政院長卓榮泰) နှင့် စာမေးပွဲ ဝန်ကြီးချုပ် ကျိုးဟုန်ရှင့် (考試院長周弘憲) တို့လည်း တက်ရောက်ခဲ့သည်။ လိုက်သမ္မတအပါအဝင် အခမ်းအနားတက်ရောက်သူများအားလုံး နေရာယူပြီးနောက် ထိုင်ဝမ်နိုင်ငံတော်သီချင်းကို တီးမှုတ်ခဲ့သည်။ ထို့နောက် လိုက်သမ္မတမှ ကျဆုံးအာဇာနည်သူရဲကောင်းများ၏ ဗိမာန်တွင် ပန်းခွေဆက်ကပ်ခဲ့ပြီး ဂုဏ်ပြုစာတမ်းဖတ်ကြားကာ တက်ရောက်လာသူများနှင့်အတူ သုံးကြိမ်ဦးညွှတ်အလေးပြုခဲ့သည်။ အခမ်းအနားအပြီးတွင် လိုက်သမ္မတသည် ကျဆုံးသူများ၏ ကျန်ရစ်သူမိသားစုဝင်များကို လက်ဆွဲနှုတ်ဆက်၍ ဂါဝရပြုခဲ့သည်။

လိုက်သမ္မတက ၎င်း၏ ဖေ့စ်ဘွတ်မှတဆင့် တပ်မတော်သားအားလုံးကို အလေးအနက်ဂါဝရပြုကြောင်းနှင့် ၎င်းတို့၏နောက်ကွယ်မှ အစဉ်အမြဲ ပံ့ပိုးပေးနေသည့် တပ်မတော်သားမိသားစုဝင်များကိုလည်း ကျေးဇူးတင်ကြောင်း ရေးသားခဲ့သည်။ လိုက်သမ္မတက နိုင်ငံတော်ကာကွယ်ရေးစွမ်းအား၏ အဓိကသည် လူဖြစ်ကြောင်း၊ အစိုးရက နိုင်ငံတော်ကာကွယ်ရေးကို ထောက်ခံပံ့ပိုးသကဲ့သို့ တပ်မတော်သားများ၏ လူနေမှုဘဝနှင့် အကျိုးခံစားခွင့်များကိုလည်း ကြည့်ရှုစောင့်ရှောက်သွားမည်ဖြစ်ကြောင်း ပြောကြားခဲ့သည်။ သမ္မတဟောင်း ချိုက်ရင်းဝင် (前總統蔡英文) လက်ထက်မှစ၍ လိုက်သမ္မတတာဝန်ယူပြီးနောက်အထိ အစိုးရသည် တပ်မတော်သားများ၏ လစာနှင့် ထောက်ပံ့ကြေးများကို အဆက်မပြတ် တိုးမြှင့်ပေးခဲ့သည်။ ပြီးခဲ့သည့်နှစ်တွင် ဆန္ဒအလျောက် စစ်မှုထမ်းသူများ၊ တိုက်ခိုက်ရေးတပ်ဖွဲ့များ၊ လေကြောင်းထိန်းချုပ်ရေး၊ အီလက်ထရွန်နစ်ထောက်လှမ်းရေးနှင့် ကွန်ရက်စစ်ဆင်ရေးဆိုင်ရာ ထောက်ပံ့ကြေးများကို တိုးမြှင့်ခဲ့သည်။

ယခုနှစ် ဖေဖော်ဝါရီလတွင် မောင်းသူမဲ့လေယာဉ်တပ်ဖွဲ့များကို တိုက်ခိုက်ရေးတပ်ဖွဲ့ထောက်ပံ့ကြေး ခံစားခွင့်တွင် ထည့်သွင်းခဲ့ပြီး ဇူလိုင်လမှစ၍ တတိယအမျိုးအစား တိုက်ခိုက်ရေးတပ်ဖွဲ့ထောက်ပံ့ကြေးကို အသစ်တိုးချဲ့ပေးခဲ့သည်။ ထို့ကြောင့် တပ်မဟာအဆင့်နှင့်အောက် တိုက်ပွဲများ ဆက်လက်ဆောင်ရွက်နိုင်ရန် တာဝန်ထမ်းဆောင်နေသည့် တပ်ဖွဲ့ဝင်များသည် တစ်လလျှင် ထိုင်ဝမ်ဒေါ်လာ ၄,၀၀၀ ထပ်မံရရှိပြီး တိုက်ခိုက်ရေးတပ်ဖွဲ့များတွင် တာဝန်ထမ်းဆောင်နေသည့် မဖြစ်မနေစစ်မှုထမ်းများလည်း တူညီစွာ ခံစားခွင့်ရရှိသည်။ ယခုနှစ် ဇူလိုင်လမှစ၍ စစ်တပ်၊ အစိုးရဝန်ထမ်းနှင့် ဆရာ၊ ဆရာမများ၏ ကျွမ်းကျင်မှုဆိုင်ရာ ထောက်ပံ့ကြေးနှင့် ကြီးကြပ်ရေးတာဝန် ထောက်ပံ့ကြေးတို့ကိုလည်း တစ်မျိုးလျှင် ထိုင်ဝမ်ဒေါ်လာ ၂,၀၀၀ စီ တိုးမြှင့်ပေးခဲ့သည်။ လာမည့် ၂၀၂၇ ခုနှစ် ဇန်နဝါရီလမှစ၍ စစ်တပ်၊ အစိုးရဝန်ထမ်းနှင့် ဆရာ၊ ဆရာမများ၏ လစာကို ၄ ရာခိုင်နှုန်း ထပ်မံတိုးမြှင့်ပေးသွားမည်ဖြစ်ပြီး ယင်းသည် လွန်ခဲ့သည့် ၁၀ နှစ်အတွင်း အစိုးရက စစ်တပ်၊ အစိုးရဝန်ထမ်းနှင့် ဆရာ၊ ဆရာမများ၏ လစာကို ၅ ကြိမ်မြောက် တိုးမြှင့်ပေးခြင်း ဖြစ်သည်။

ထို့အပြင် အစိုးရသည် တပ်မတော်သားများ၏ နေထိုင်မှုနှင့် လေ့ကျင့်ရေးပတ်ဝန်းကျင်ကို ဆက်လက်မြှင့်တင်ပေးနေသကဲ့သို့ ကလေးပြုစုစောင့်ရှောက်ရေးနှင့် မိသားစုဆိုင်ရာ ပံ့ပိုးကူညီမှုများကိုလည်း အားဖြည့်ပေး၍ တပ်မတော်သားများ စိတ်အေးချမ်းသာစွာ တာဝန်ထမ်းဆောင်နိုင်ရန် ဆောင်ရွက်ပေးလျက်ရှိသည်။ လာမည့် ၂၀၂၇ ခုနှစ်တွင် ထိုင်ဝမ်၏ အလုံးစုံနိုင်ငံတော်ကာကွယ်ရေးဘတ်ဂျက်သည် ပထမဦးဆုံးအကြိမ် ထိုင်ဝမ်ဒေါ်လာ ၁ ထရီလီယံကျော်အထိ ရှိလာမည်ဖြစ်ပြီး စုစုပေါင်း ထိုင်ဝမ်ဒေါ်လာ ၁ ထရီလီယံ ၁၂၂.၅ ဘီလီယံ ရှိမည်ဖြစ်သည်။ ယင်းပမာဏသည် ထိုင်ဝမ် GDP ၏ ၃ ရာခိုင်နှုန်းကျော်ရှိသည်။ လိုက်သမ္မတမှ နိုင်ငံတစ်နိုင်ငံ၏ စစ်မှန်သောအင်အားသည် ခေတ်မီကောင်းမွန်သည့် စစ်လက်နက်ပစ္စည်းများနှင့် ခိုင်မာသည့် နိုင်ငံတော်ကာကွယ်ရေးစွမ်းအားရှိရုံသာမက စိန်ခေါ်မှုများကို ရင်ဆိုင်ရာတွင် ပြည်သူတစ်ရပ်လုံး အတူတကွ ရပ်တည်နိုင်ခြင်းနှင့် စည်းလုံးညီညွတ်မှုရှိခြင်းအပေါ်တွင်လည်း မူတည်ကြောင်း ပြောကြားခဲ့သည်။ “တပ်မတော်သားများက နိုင်ငံတော်ကို ကာကွယ်စောင့်ရှောက်ခြင်း၊ အစိုးရက တပ်မတော်ကို ကြည့်ရှုစောင့်ရှောက်ခြင်း၊ လူမှုအသိုင်းအဝိုင်းက တပ်မတော်ကို အတူတကွ ထောက်ခံခြင်းနှင့် ပြည်သူများက ဒီမိုကရေစီနှင့် လွတ်လပ်မှုကို မြတ်နိုးတန်ဖိုးထားခြင်း” ဟူသည့် အင်အားများ ပေါင်းစည်းနိုင်မှသာ စိန်ခေါ်မှုအမျိုးမျိုးကို ရင်ဆိုင်နိုင်ပြီး နိုင်ငံတော်လုံခြုံရေး၊ ဒီမိုကရေစီ၊ လွတ်လပ်မှုနှင့် ငြိမ်းချမ်းရေးတို့ကို ကာကွယ်နိုင်မည်ဖြစ်ကြောင်း လိုက်သမ္မတမှ ပြောကြားခဲ့သည်။

မနောကြည်မှ ရေးသားတင်ပြသည်။
ဓာတ်ပုံ။ ။ လိုက်သမ္မတဖေ့စ်ဘွတ်

03/09/2026

မြန်မာနိုင်ငံအခြေစိုက် ထိုင်ပေစီးပွားရေးနှင့် ယဉ်ကျေးမှုရုံးမှ မြန်မာနိုင်ငံ ကြက်ခြေနီအသင်းထံသို့ စုစုပေါင်း ၅ မက်ထရစ်တန် အလေးချိန်ရှိ အရေးပေါ် စားနပ်ရိက္ခာအထုပ် ၁,၀၀၀ လှူဒါန်း

မြန်မာနိုင်ငံတွင် မကြာသေးမီက ဖြစ်ပွားခဲ့သည့် ပြင်းထန်သော ရေကြီးရေလျှံမှုများကြောင့် ထိခိုက်ခံစားနေရသော ပြည်သူများအား ကူညီကယ်ဆယ်နိုင်ရန်အတွက် မြန်မာနိုင်ငံအခြေစိုက် ထိုင်ပေ စီးပွားရေးနှင့် ယဉ်ကျေးမှုရုံးမှ ကိုယ်စားလှယ် မစ္စတာ လူးဝစ်ဟွမ် (Mr. Louis Huang) သည် ဩဂုတ်လ ၂၄ ရက် မွန်းလွဲပိုင်းတွင် ရန်ကုန်မြို့ရှိ မြန်မာနိုင်ငံကြက်ခြေနီအသင်းသို့ သွားရောက်ကာ အရေးပေါ်စားနပ်ရိက္ခာ ကယ်ဆယ်ရေးအထုပ် ၁,၀၀၀ ကို လှူဒါန်းခဲ့ပါသည်။ အဆိုပါအကူအညီသည် ရေဘေးသင့်မိသားစု ၁,၀၀၀ အနေဖြင့် လတ်တလောအခက်အခဲများကို ယာယီကျော်လွှားနိုင်ရန် အထောက်အပံ့ဖြစ်စေမည်ဖြစ်ပါသည်။ လှူဒါန်းမှုကို မြန်မာနိုင်ငံကြက်ခြေနီအသင်း ဥက္ကဋ္ဌ ဒေါက်တာမျိုးညွန့်က ကိုယ်စားလက်ခံရယူပြီး ကျေးဇူးတင်လွှာပေးအပ်ခဲ့ပါသည်။

လှူဒါန်းပွဲအခမ်းအနားတွင် ဥက္ကဋ္ဌဒေါက်တာမျိုးညွန့်မှ မြန်မာနိုင်ငံအခြေစိုက် ထိုင်ပေစီးပွားရေးနှင့် ယဉ်ကျေးမှုရုံး၏ ရက်ရောစွာ လှူဒါန်းကူညီမှုအတွက် အထူးကျေးဇူးတင်ရှိကြောင်း ပြောကြားခဲ့ပါသည်။ ထို့အပြင် ယမန်နှစ် မန္တလေးမြေငလျင်ကြီး ဖြစ်ပွားစဉ်ကလည်း Tzu Chi အဖွဲ့ဝင်များသည် သဘာဝဘေးကယ်ဆယ်ရေးလုပ်ငန်းများတွင် တက်ကြွစွာပူးပေါင်းပါဝင်ကူညီခဲ့ကြောင်း ဖော်ပြခဲ့ပြီး ထိုင်ဝမ်သည် ခေတ်မီနည်းပညာများ ပိုင်ဆိုင်ရုံသာမက မေတ္တာနှင့် စေတနာပြည့်ဝသည့် နိုင်ငံတစ်နိုင်ငံဖြစ်ကြောင်း ချီးကျူးပြောကြားခဲ့ပါသည်။ ကိုယ်စားလှယ်မစ္စတာဟွမ်မှလည်း မြန်မာနိုင်ငံရှိ ထိုင်ဝမ်စီးပွားရေးလုပ်ငန်းရှင်များ အသင်းချုပ်သည် ထိုင်ဝမ်အသိုင်းအဝိုင်း၏ သဘာဝဘေးကယ်ဆယ်ရေးလုပ်ငန်းများကို အစဉ်တစိုက် တက်ကြွစွာ ညှိနှိုင်းပူးပေါင်းဆောင်ရွက်ပေးလျက်ရှိကြောင်း၊ ထို့အပြင် မိဘမဲ့ဂေဟာများသို့လည်း မကြာခဏ သွားရောက်ကာ စောင့်ရှောက်မှုနှင့် ကူညီထောက်ပံ့မှုများ ပေးအပ်လျက်ရှိကြောင်း ပြောကြားခဲ့ပါသည်။ ထိုင်ဝမ်အစိုးရနှင့် ပြည်သူများထံမှ ထွက်ပေါ်လာသည့် မေတ္တာနှင့် စေတနာများကို အခြေခံ၍ မြန်မာပြည်သူများ၏ လူမှုဘဝနှင့် အကျိုးစီးပွား တိုးတက်ကောင်းမွန်ရေးအတွက် လူသားချင်းစာနာထောက်ထားမှုဆိုင်ရာ အကူအညီများကို အနာဂတ်တွင်လည်း အစွမ်းကုန် ဆက်လက်ပေးအပ်သွားမည်ဖြစ်ကြောင်း ပြောကြားခဲ့ပါသည်။

မြန်မာနိုင်ငံတွင် မကြာသေးမီက မိုးရာသီကာလအတွင်း ဧရာဝတီ၊ မန္တလေး၊ စစ်ကိုင်း၊ ကရင်နှင့် ရခိုင်တို့အပါအဝင် တိုင်းဒေသကြီးနှင့် ပြည်နယ်များတွင် ပြင်းထန်သော ရေကြီးရေလျှံမှုများ ဖြစ်ပွားခဲ့ရာ လူဦးရေ ၆ သိန်းကျော် ထိခိုက်ခံစားခဲ့ရပြီး ကံမကောင်းစွာဖြင့် လူ ၃၂ ဦး သေဆုံးခဲ့ပါသည်။ ရေဘေးသင့်ပြည်သူများအား အရေးပေါ်ကူညီကယ်ဆယ်နိုင်ရန်အတွက် မြန်မာနိုင်ငံအခြေစိုက် ထိုင်ပေစီးပွားရေးနှင့် ယဉ်ကျေးမှုရုံးမှ အရေးပေါ်စားနပ်ရိက္ခာ ကယ်ဆယ်ရေးအထုပ်များကို လှူဒါန်းခဲ့ပြီး၊ ဧရာဝတီတိုင်းဒေသကြီး၊ လေးမျက်နှာမြို့နယ်ရှိ ရေဘေးသင့်ပြည်သူများထံသို့ ဖြန့်ဝေပေးရန် မြန်မာနိုင်ငံကြက်ခြေနီအသင်းအား အကူအညီတောင်းခံခဲ့ပါသည်။

01/09/2026

စက်တင်ဘာလ ၁ ရက်နေ့ သတင်းထောက်များနေ့

စက်တင်ဘာလ ၁ ရက်နေ့သည် သတင်းထောက်များနေ့ ဖြစ်သည်။ လိုက်ချင်းတယ်သမ္မတ(賴清德總統)က အရည်အသွေးပြည့်မီသည့် သတင်းမီဒီယာသည် အစိုးရ၏ အုပ်ချုပ်ရေးလုပ်ငန်းများကို စောင့်ကြပ်ပေးနိုင်သည်ဟု အတည်ပြုပြီး သတင်းသမားများအား လေးစားဂုဏ်ပြုကြောင်း ၎င်း၏ ဖေ့စ်ဘွတ်တွင် ရေးသားခဲ့သည်။

လိုက်သမ္မတက သတင်းပျံ့နှံ့မှုအလွန်လျင်သည့် ခုခေတ်ချိန်ခါတွင် ရရှိလာသည့် သတင်း၏ စစ်မှန်မှုကို သေချာစိစစ်ပြီး မှန်ကန်သည့်သတင်းကို ဖော်ထုတ်တင်ပြခြင်းသည် အလွန်အရေးကြီးကြောင်း၊ သူသမ္မတဝန်စတင်ထမ်းဆောင်ချိန်မှစ၍ သမ္မတအိမ်တော်တွင်ဖြစ်စေ ပြင်ပလေ့လာရေးခရီးစဥ်ဖြစ်စေ အနီးအနားတွင် သတင်းများလိုက်လံစုဆောင်းနေသည့် သတင်းသမားများ အမြဲရှိနေတတ်ကြောင်း၊ သတင်းသမားများသည် အများပြည်သူရှေ့တွင် သတင်းတင်ပြနိုင်ရေးအတွက် နေပူမိုးရွာမရှောင် မုန်တိုင်းကျရောက်ချိန်ဖြစ်စေ၊ မိုးကြီးလေပြင်းချိန်ဖြစ်စေ၊ အစိုးရ၏ ဟန့်ကွမ်းစစ်ရေးလေ့ကျင့်ချိန်ဖြစ်စေ အခင်းဖြစ်ပွားရာသို့ လေးလံသည့်စက်ကြီးများကို ထမ်းပြီး သွားရောက်မေးမြန်းရကြောင်း၊ သတင်းသည် အချိန်နှင့်တစ်ပြေးညီ လုပြီး တင်ပြရ၍ သတင်းသမားများ၏ အလုပ်ချိန်သည် အလွန်လောကြောင်း၊ အကန့်သတ်ရှိသည့် အချိန်အတွင်း ဖြစ်စဥ်တိုင်း၏ သော့ချက်ကို သိရှိပြီး အများပြည်သူနားလည်အောင် တစ်ဆင့်ပြန်လည်တင်ပြနိုင်ခြင်းသည် အလွန်ခက်ခဲသည့် ကျွမ်းကျင်ပညာတစ်ရပ်ဖြစ်ကြောင်း ပြောကြားသွားသည်။

လိုက်သမ္မတက သတင်းအချက်အလက် ရယူရန် အလွန်လွယ်ကူသည့် ခုခေတ်ချိန်ခါတွင် သတင်းသမားများအနေဖြင့် ဖြစ်ရပ်ကို သေချာစိစစ်၍ အမှားအမှန်ခွဲခြမ်းစိတ်ဖြာပြီး ပြည်သူများအကြား မှန်ကန်သည့်သတင်းတင်ပြခြင်းသည် ယခင်ခေတ်ထက် ပိုမိုအရေးကြီးလာကြောင်း ထောက်ပြသွားသည်။ ဒီမိုကရေစီနိုင်ငံအနေဖြင့် မတူသည့်အသံ၊ မတူသည့်သတင်းများကို အများပြည်သူ သိကြားခွင့်ရှိ၍ သတင်းသမားများအနေဖြင့် ထိုအသံများ မပပျောက်ရေးအတွက် မတူသည့်သတင်းများကို ဆက်လက်ကြိုးစားတင်ပြပသင့်ကြောင်းလည်း ပြောကြားသွားသည်။ လိုက်သမ္မတက ကောင်းသည့်သတင်းသည် အစိုးရ၏ လုပ်ငန်းဆောင်တာများကို ကြီးကြပ်ပေးသည့်တစ်ချိန်တည်းတွင် နောင်လာနောက်သားများအတွက် အရင်ခေတ်က ဖြစ်ပွားခဲ့သည့်ဖြစ်ရပ်များကို သိလိုပါက သတင်းသမားများတင်ပြဖူးသည့် သတင်းနှင့် ရိပ်ပုံများမှတဆင့် သိရှိနိုင်မည်ဖြစ်ကြောင်း ပြောကြားသွားသည်။

နောက်ဆုံးတွင် လိုက်သမ္မတက သတင်းထောက်အလုပ်သည် အလွန်လေးစားဖွယ်ကောင်းသည့်အလုပ်ဖြစ်ကြောင်း၊ သတင်းသမားများအနေဖြင့် မိမိအလုပ်အပေါ် ဂုဏ်ယူသင့်ကြောင်း၊ ၎င်းအနေဖြင့် သတင်းပြေးသူ၊ သတင်းရေးသူ၊ သတင်းတင်ပြသူ၊ သတင်းရိုက်ကူးသူနှင့် နောက်ကွယ်က သတင်းလုပ်သားများအားလုံးကို ကျေးဇူးတင်ကြောင်း ပြောကြားသွားပြီး သတင်းသမားများအားလုံး သတင်းထောက်များနေ့တွင် ပျော်ရွှင်ပါစေ၊ အင်တာဗျူးတိုင်း အဆင်ပြေချောမွေ့ပြီး လုပ်ငန်းခွင်လည်း အဆင်ပြေချောမွေ့ပါစေဟု ဆုမွန်ကောင်း တောင်းပေးလိုက်ပါသည်။

မနောကြည်မှ ရေးသားတင်ပြသည်။
ဓာတ်ပုံ။ ။ 賴總統臉書

မနောကြည်မှ ရေးသားတင်ပြသည်။

01/09/2026

ထိုင်ပေ မြေအောက်ရထား အနီရောင်လိုင်းတွင် Guangci/Fengtian Temple ဘူတာအသစ်ကိုပါ စတင်ထည့်သွင်းပြေးဆွဲ

ထိုင်ဝမ်နိုင်ငံရဲ့ မြို့တော်ထိုင်ပေမှာ နေထိုင်ကြတဲ့ စာဖတ်သူတွေအနေနဲ့ ထိုင်ပေမြေအောက်ရထား အနီရောင် (တန့်ဆွေ-ရှင့်ယိ 淡水信義) လိုင်းကို ရင်းနှီးပြီးသား ဖြစ်ကြမှာပါ။ အရင်တုန်းက အနီရောင်လိုင်းရဲ့ နောက်ဆုံးဘူတာတွေဟာ တန့်ဆွေဘူတာ (淡水站) နဲ့ ရှန့်စန်းဘူတာ (象山站) တွေ ဖြစ်ပါတယ်။ ဒါပေမယ့် ပြီးခဲ့တဲ့ ဩဂုတ်လ ၃၀ ရက်နေ့ မွန်းလွဲ ၂ နာရီမှာတော့ ထိုင်ပေမြို့ရဲ့ အရှေ့ဘက်မှာရှိတဲ့ နောက်ဆုံးဘူတာဟာ ရှန့်စန်းဘူတာ အစား ရထားလိုင်းရဲ့ အရှေ့ဘက်ကို ဆက်လက်တိုးချဲ့ပြေးဆွဲပြီး ကွမ်ချီ/ဖုန့်ထျန်း ဘုရားကျောင်းဘူတာ (廣慈奉天宮站 Guangci/Fengtian Temple Station) ကို နောက်ဆုံးဘူတာအဖြစ် စတင်ဖွင့်လှစ်ပြေးဆွဲခဲ့ပါတယ်။ ကွမ်ချီ/ဖုန့်ထျန်း ဘုရားကျောင်းဘူတာ ဖွင့်လှစ်ပြီးပြီးချင်း (၃) နာရီအတွင်းမှာပဲ ဘူတာအသစ်အထိ လိုက်ပါစီးနင်းခဲ့တဲ့ ခရီးသွားပြည်သူပေါင်း ၁ သောင်းနီးပါး ရှိခဲ့ပါတယ်။

ကွမ်ချီ/ဖုန့်ထျန်း ဘုရားကျောင်း ဘူတာ အသစ်ဖွင့်လိုက်တဲ့အတွက် ထိုင်ပေမြို့မှာ မြေအောက်ရထားဘူတာပေါင်း ၁၁၈ ဘူတာ ရှိလာပြီး ရထားလမ်းကြောင်းအရှည်ကလည်း ၁၃၁.၁ ကီလိုမီတာကနေ ၁၃၂.၅ ကီလိုမီတာအထိ ရှည်လာပါတယ်။ တန့်ဆွေ-ရှင့်ယိလိုင်းရဲ့ လမ်းကြောင်းအပြည့်ကလည်း တန့်ဆွေ-ရှန့်စန်း မဟုတ်တော့ဘဲ တန့်ဆွေ-ကွမ်ချီ/ဖုန့်ထျန်းဘုရားကျောင်း ဖြစ်လို့လာပါတယ်။ ဒါပေမယ့် တန့်ဆွေနဲ့ ကွမ်ချီ/ဖုန့်ထျန်း ဘုရားကျောင်း ဘူတာနှစ်ခုအကြား ရထားစီးဖို့ ကြာချိန်ကတော့ အရင်အတိုင်းလိုပဲ ဖြစ်ပါတယ်။

ဘူတာအသစ်ဖွင့်လိုက်တာကြောင့် ကွမ်ချီ/ဖုန့်ထျန်း ဘုရားကျောင်း ဘူတာ အနီးအနားမှာ နေထိုင်ကြသူတွေအတွက် သွားလာရေးအပိုင်းမှာ အဆင်ပြေလို့ လာပါတယ်။ အရင်က ပုံမှန် ဘတ်စ်ကားစီးပြီး အနီရောင်မြေအောက်ရထား ပြောင်းစီးရတဲ့သူတွေအတွက် အခုဆိုရင် ထိုင်ပေဘူတာကြီး (台北車站)၊ ပေထို (北投) နဲ့ တန့်ဆွေ (淡水) စတဲ့နေရာတွေကို ရထားစီးရုံနဲ့ အလွယ်တကူ သွားလာနိုင်ပြီပဲ ဖြစ်ပါတယ်။ ထိုင်ပေမြေအောက်ရထားကုမ္ပဏီ (台北捷運公司) ကလည်း ဘူတာအသစ် တိုးချဲ့ပြေးဆွဲနိုင်တာကို ဂုဏ်ပြုတဲ့အနေနဲ့ (၄) ရက်ကြာ လေယာဉ်လက်မှတ် မဲဖောက်ပေးမယ့် အစီအစဉ်ကိုလည်း ထည့်သွင်းထားပါတယ်။ ဒါ့အပြင် စက်တင်ဘာလ (၂၈) ရက်နေ့အထိ ရှန့်စန်းဘူတာ ကနေ ကွမ်ချီ/ဖုန့်ထျန်းဘုရားကျောင်းဘူတာ ကို စီးနင်းတဲ့အခါ ဘူတာနှစ်ခုအကြားက ရထားစီးခ ကို ပေးစရာ မလိုဘဲ ကျန်တဲ့ ကိုယ်စီးခဲ့တဲ့ ခရီးအကွာအဝေးအတွက်ပဲ ရထားခ ပေးဆောင်ရမှာပဲ ဖြစ်ပါတယ်။

စာဖတ်သူတွေထဲမှာကော မကြာသေးခင်ကမှ ဖွင့်လှစ်လိုက်တဲ့ ကွမ်ချီ/ဖုန့်ထျန်း ဘုရားကျောင်း ဘူတာ အထိ ရထားစီဖူးကြတဲ့သူတွေရှိတယ်ဆိုရင်လည်း ကိုယ် စီးနင်းခဲ့တဲ့ အတွေ့အကြုံလေးတွေကို အားလုံးနဲ့ မျှဝေပေးပါဦးလို့ ပြောရင်း စာကို အဆုံးသတ်လိုက်ပါတယ်ခင်ဗျာ။ အစဥ်လေးစားလျက်…

ဓာတ်ပုံ - 中央社
Thomas Chen မှ ရေးသားဖော်ပြသည်။ ဆက်လက်ကြိုးစားသွားပါဦးမည်။

28/08/2026

၂၀၂၆ ခုနှစ် ရှင်းကျူမြို့ နိုင်ငံတကာ စွန်လွှတ်ပွဲတော်

ရှင်းကျူမြို့သည် လေတိုက်လွန်းသဖြင့် လေမြို့(風城)ဟုပင် အမည်တွင်သည်။ ရှင်းကျူမြို့အစိုးရသည် လေများသည့် သဘောသဘာဝကို အမိအရဖမ်းပြီး လွန်ခဲ့သည့်ဆယ်နှစ်ခန့်မှစ၍ နှစ်စဥ် ရှင်းကျူငါးဖမ်းဆိပ်ကမ်း(新竹漁港)တွင် နိုင်ငံတကာစွန်လွှတ်ပွဲတော်ကို စတင်ပြုလုပ်ခဲ့သည်။ ယခုနှစ်တွင် ပြုလုပ်မည့်စွန်လွှတ်ပွဲတော်သည် ဆယ်ကြိမ်မြောက်စွန်လွှတ်ပွဲတော် ဖြစ်သည်။

၂၀၂၆ ခုနှစ် ရှင်းကျူမြို့ နိုင်ငံတကာ စွန်လွှတ်ပွဲတော်ကို ယခုအပတ်၏ စနေနှင့် တနင်္ဂနွေနေ့များတွင် နှစ်ရက်ဆက်တိုက် ပြုလုပ်သွားမည်။ အချိန်မှာ သြဂုတ်လ ၂၉ ရက်နေ့(စနေနေ့)တွင် နေ့လည် ၁၂ နာရီမှစပြီး ည ၈ နာရီထိ ဖြစ်သည်။ တနင်္ဂနွေနေ့ဖြစ်သည့် ၃၀ ရက်နေ့ကတော့ မနက် ၁၀ နာရီမှ ညနေ ၆ နာရီထိ ဖြစ်သည်။ ပွဲတော်ချိန်ခါအတွင်း အနီးအနားတဝိုက်တွင် ကိုယ်ပိုင်ကားများဝင်ရောက်ခွင့် မပြု၍ ကားမောင်းလာမည့်သူများ အကြို့အပို့ကားရှိရာ ကားရပ်ရာများတွင် ကားထားပြီး အခမဲ့ကြိုပို့ကားစီး၍ သွားနိုင်သည်။ ဆိုင်ကယ်စီးလာသူများအတွက် ရှင်းကျူငါးဖမ်းဆိပ်ကမ်းရှိ ဒုတိယကားရပ်စခန်းကို ဆိုင်ကယ်ထားရာအဖြစ် ဖွင့်ပေးထားသည်။ ရှင်းကျူမီးရထားဘူတာ(新竹火車站)၊ စုလင်ထိုကားပါကင်(樹林頭停車場)၊ ဟိုင်ရှမ်းငါးဖမ်းဆိပ်ကမ်းကားပါကင်(海山漁港停車場)နှင့် ထိုချဥ်ရှီးကြိုအမ့်မြစ်ကမ်းဘေးဥယျာဥ်ကားပါကင်(頭前溪左岸河濱公園停車場)များတွင် အခမဲ့ကြိုပို့ကားများ ရှိသည်။

ယခုနှစ်၏ စွန်လွှတ်ပွဲတော်ကို ထိုင်ဝမ်အင်းမေ့(台灣印象)ဆိုသည့် ခေါင်းစဥ်ဖြင့် ပြုလုပ်သွားမည်ဖြစ်၍ ထိုင်ဝမ်နို့ပလဲလက်ဖက်ရည်(珍奶)၊ ထိုင်ဝမ် LV အိတ်(茄芷袋)၊ ထိုင်ဝမ်ခြေညှပ်ဖိနှပ်(藍白拖) ဒီဇိုင်းရှိသည့်စွန်များကို တွေ့ရမည်။ ပွဲတော်တွင် အကြီးစားလေသွင်းစွန်များ၊ စတန့်စွန်နှင့် အုပ်စုလိုက်ပုံသဏ္ဌာန်ဖော်သည့် စွန်ပြကွက်များကို မတူသည့်အချိန်များတွင် မတူသည့် ပြကွက်များ ပြသသွားမည်။ ဤပြကွက်များကို ထိုင်ဝမ်၊ ဆွစ်ဇာလန်၊ ပြင်သစ်နှင့် အီတလီနိုင်ငံမှ ကျွမ်းကျင်ပညာရှင်အဖွဲ့များ ပူးပေါင်းဆောင်ရွက်သွားမည်။ ပထမနေ့ဖြစ်သည့် စနေနေ့ညတွင် အမှောင်ထဲတွင်ပင် မြင်နိုင်သည့် ရောင်ပြန်စွန်လွှတ်ပွဲ ရှိသေးသည်။ ရှင်းကျူမြို့၏ နိုင်ငံတကာစွန်လွှတ်ပွဲသည် နှစ်စဥ်၏ နွေရာသီကျောင်းပိတ်ရက်အနှောင်းပိုင်းတွင် ပြူလုပ်လေ့ရှိပြီး ကလေး၊ လူကြီးများအတွက် ပင်လယ်ကမ်းခြေတွင် လေတဖြူးဖြူးဖြင့် စိန်လွှတ်ပွဲများ၊ စတိတ်ရှိုးများကြည့်၊ မိတ်ဆွေသူငယ်ချင်းများနှင့် စားကောင်းသောက်ဖွယ်များစားပြီး စိတ်ပြေလက်ပျောက် ရုံးပိတ်ရက်ကိုဖြတ်သန်းနိုင်သည့် ပွဲတော်တစ်ခု ဖြစ်သည်။

ယခုအပတ်၏ရုံးပိတ်ရက်များတွင် အချိန်ရပါက ရှင်းကျူမြို့၏ နိုင်ငံတကာစွန်လွှတ်ပွဲတော်သို့ လာရောက်ခံစားကြည့်ပါရန် ဖိတ်ခေါ်ပါသည်။

မနောကြည်မှ ရေးသားတင်ပြသည်။
ဓာတ်ပုံ။ ။ 新竹國際風箏節官網

28/08/2026

ဥရောပတွင် ပထမဆုံး ဆေးဘက်ဆိုင်ရာ ပူးပေါင်းဆောင်ရွက်မှု — ထိုင်ဝမ်မှ ယူကရိန်းကို ခိုင်မာစွာ ထောက်ခံ

ထိုင်ဝမ်အစိုးရက ယူကရိန်းနိုင်ငံ Lviv မြို့ရှိ မြို့ပိုင်ဆေးရုံများ၏ Smart Healthcare (ဉာဏ်ရည်မြင့် ကျန်းမာရေးစောင့်ရှောက်မှု) စွမ်းရည်ကို မြှင့်တင်ပေးရန် ကူညီလျက်ရှိနေတာ ဖြစ်ပါတယ်။

ထိုင်ဝမ်နိုင်ငံခြားရေးဝန်ကြီးဌာနက ဩဂုတ်လ ၂၆ ရက်နေ့မှာ ပြောကြားခဲ့တာကတော့ ဒီအစီအစဉ်ဟာ အပြည်ပြည်ဆိုင်ရာ ပူးပေါင်းဖွံ့ဖြိုးရေးဖောင်ဒေးရှင်း (TaiwanICDF) က ဥရောပဒေသမှာ ပထမဆုံးအကြိမ် အကောင်အထည်ဖော်တဲ့ ဆေးဘက်ဆိုင်ရာ ပူးပေါင်းဆောင်ရွက်မှုစီမံကိန်း ဖြစ်ပါတယ်။ စီမံကိန်းကို အပြည့်အဝ အကောင်အထည်ဖော်ပြီးတဲ့အခါ Lviv မြို့မှာ နေထိုင်တဲ့ လူဦးရေ ၇သိန်း၂သောင်းခန့် အကျိုးခံစားရမယ်လို့ ခန့်မှန်းထားပါတယ်။ ထိုင်ဝမ်ဘက်ကလည်း ယူကရိန်းကို ခိုင်မာစွာ ထောက်ခံပြီး ယူကရိန်းနဲ့အတူ ဆက်လက်ရပ်တည်သွားမယ်လို့ ထိုင်ဝမ်နိုင်ငံခြားရေးဝန်ကြီးဌာနက ထပ်မံပြောကြားခဲ့ပါတယ်။

ထိုင်ဝမ်နိုင်ငံခြားရေးဝန်ကြီးဌာနက TaiwanICDF ကို တာဝန်ပေးအပ်ပြီး အကောင်အထည်ဖော်နေတဲ့ “ယူကရိန်း Lviv မြို့ပိုင်ဆေးရုံ Smart Healthcare စွမ်းရည်မြှင့်တင်ရေးစီမံကိန်း” အတွက် ဩဂုတ်လ ၂၅ ရက်နေ့မှာ သဘောတူစာချုပ် လက်မှတ်ရေးထိုးပွဲ ပြုလုပ်ခဲ့ပါတယ်။ လက်မှတ်ရေးထိုးတဲ့အဖွဲ့တွေကတော့ TaiwanICDF၊ Lviv မြို့အစိုးရ၊ Lviv First Medical Union နဲ့ UNBROKEN Foundation တို့ ဖြစ်ပါတယ်။

ဒီစီမံကိန်းက Lviv First Medical Union လက်အောက်ရှိ St. Panteleimon ဆေးရုံနဲ့ St. Nicholas ကလေးဆေးရုံတို့ရဲ့ အရေးပေါ်ဌာန (Emergency Department) နဲ့ အထူးကြပ်မတ်ကုသဆောင် (ICU) တွေရဲ့ စွမ်းဆောင်ရည်ကို မြှင့်တင်ပေးမှာ ဖြစ်ပါတယ်။ အဓိကအားဖြင့် ဆေးဘက်ဆိုင်ရာ Hardware နဲ့ Software ပစ္စည်းတွေ၊ Artificial Intelligence (AI) အခြေပြု သတင်းအချက်အလက်စနစ်တွေကို ပေါင်းစပ်အသုံးပြုမှာဖြစ်ပြီး ဆေးဘက်ဆိုင်ရာဝန်ထမ်းတွေနဲ့ IT ဝန်ထမ်းတွေကိုလည်း အထူးပြုသင်တန်းတွေ ပေးသွားမှာ ဖြစ်ပါတယ်။

အွန်လိုင်းကနေ လက်မှတ်ရေးထိုးပွဲကို သက်သေအဖြစ် တက်ရောက်ခဲ့တဲ့ ထိုင်ဝမ်နိုင်ငံခြားရေးဝန်ကြီးဌာန ဒုတိယဝန်ကြီး ဝူကျိကျုန်း (Wu Chih-chung) က ထိုင်ဝမ်ဟာ Smart Healthcare နဲ့ ကျန်းမာရေးလုပ်ငန်းကဏ္ဍမှာရှိတဲ့ အားသာချက်တွေကို အသုံးချပြီး ဒီမိုကရေစီနဲ့ လွတ်လပ်မှုတန်ဖိုးတွေကို မျှဝေတဲ့ မိတ်ဖက်နိုင်ငံတွေနဲ့ ပူးပေါင်းဆောင်ရွက်နေတယ်လို့ ပြောကြားခဲ့ပါတယ်။

ရုရှားက ၂၀၂၂ ခုနှစ်မှာ ယူကရိန်းကို ကျူးကျော်တိုက်ခိုက်ခဲ့တဲ့အချိန်ကစပြီး ထိုင်ဝမ်ဟာ ယူကရိန်းနဲ့အတူ ခိုင်မာစွာ ဆက်လက်ရပ်တည်လာခဲ့တယ်လို့လည်း ၎င်းက ပြောကြားခဲ့ပါတယ်။ မကြာသေးမီက ပြန်လည်မွမ်းမံပြီး ဖွင့်လှစ်ခဲ့တဲ့ Lviv ရှိ UNBROKEN ဆေးဘက်ဆိုင်ရာစင်တာရဲ့ ပြန်လည်ထူထောင်ရေးအဆောက်အအုံကို “Taiwan Friendship Building” (ထိုင်ဝမ်ချစ်ကြည်ရေးအဆောက်အအုံ) လို့ အမည်ပေးထားခြင်းဟာလည်း ထိုင်ဝမ်က ယူကရိန်းကို ထောက်ခံနေမှုရဲ့ အရေးကြီးတဲ့ သင်္ကေတတစ်ခု ဖြစ်တယ်လို့ ဆိုပါတယ်။

Lviv မြို့တော်ဝန် အန်ဒရီး ဆာဒေါ့ (Andriy Sadovyi) က ဒီစီမံကိန်း စတင်ခြင်းဟာ ယူကရိန်းနိုင်ငံရဲ့ လွတ်လပ်ရေး ၃၅ နှစ်ပြည့် အထိမ်းအမှတ်ကာလနဲ့ တိုက်ဆိုင်နေတယ်လို့ ပြောကြားခဲ့ပါတယ်။ ရုရှားရဲ့ ကျူးကျော်မှုကြောင့် ယူကရိန်းဟာ အဖိုးတန်လူ့အသက်တွေကို ဆက်လက်ဆုံးရှုံးနေရပေမယ့် လွတ်လပ်မှုနဲ့ ကိုယ်ပိုင်အချုပ်အခြာအာဏာရဲ့ တန်ဖိုးကို ခိုင်မာစွာ ယုံကြည်ပြီး လွတ်လပ်ရေးအတွက် ဆက်လက်တိုက်ပွဲဝင်နေတယ်လို့ ဆိုပါတယ်။ ဒါ့အပြင် အခက်အခဲတွေကို ရင်ဆိုင်နေရတဲ့အချိန်မှာ မိတ်ဆွေစစ်တွေရဲ့ တန်ဖိုးကို ပိုမိုနက်ရှိုင်းစွာ နားလည်လာရတယ်လို့လည်း ဖြည့်စွက်ပြောကြားခဲ့ပါတယ်။

TaiwanICDF အထွေထွေအတွင်းရေးမှူး ဟွမ်ယွိလင်း (Huang Yu-lin) က ယူကရိန်းဟာ ကမ္ဘာကို ထူးခြားတဲ့ ရဲစွမ်းသတ္တိနဲ့ ခံနိုင်ရည် (resilience) ကို ပြသနေတယ်လို့ ပြောကြားခဲ့ပါတယ်။ ခံနိုင်ရည်ဆိုတာ အကျပ်အတည်းကို ကျော်လွှားနိုင်ရုံသာမက ပြောင်းလဲလာတဲ့အခြေအနေတွေနဲ့ လိုက်လျောညီထွေဖြစ်အောင် နေထိုင်နိုင်ခြင်း၊ မိမိတို့ရဲ့ နိုင်ငံနဲ့ အိမ်တွေကို ပြန်လည်တည်ဆောက်နိုင်ခြင်းနဲ့ အနာဂတ်အတွက် အခွင့်အလမ်းအသစ်တွေ ဖန်တီးနိုင်ခြင်းတို့လည်း ဖြစ်တယ်လို့ ၎င်းက ဆိုပါတယ်။

ဒါကြောင့် ထိုင်ဝမ်နိုင်ငံခြားရေးဝန်ကြီးဌာနရဲ့ တာဝန်ပေးအပ်မှုအရ TaiwanICDF က ဥရောပမှာ ပထမဆုံးအကြိမ် ဆေးဘက်ဆိုင်ရာ ပူးပေါင်းဆောင်ရွက်မှုစီမံကိန်းကို အကောင်အထည်ဖော်ပြီး Hardware နဲ့ Software ပေါင်းစပ်အသုံးပြုမှု၊ ပညာရေးနဲ့ လေ့ကျင့်သင်ကြားရေး၊ ကျွမ်းကျင်လူသားအရင်းအမြစ် ဖွံ့ဖြိုးရေးတို့ကနေတစ်ဆင့် ယူကရိန်းကို Smart Healthcare ဖြေရှင်းချက်တွေ ပံ့ပိုးပေးသွားမှာ ဖြစ်တယ်လို့ ပြောကြားခဲ့ကြောင်း သိရပါတယ်။

Photo: Rti (中央廣播電台）
27 Aug 2026

26/08/2026

ရှောင်းမေချင် - သုညနီးပါးမှ အလျင်အမြန် လိုက်မီလာသည့် ထိုင်ဝမ်ဒရုန်းကဏ္ဍ၊ ကမ္ဘာ့အဆင့်သို့ ဆက်လက်တိုးချဲ့သွားမည်

26/08/2026

ဒရုန်းကဏ္ဍ ဖွံ့ဖြိုးရေး “Better late than never” — ရှောင်းမေချင် - ထိုင်ဝမ်အနေဖြင့် မကြာခင် လိုက်မီနိုင်မည်ဟု ယုံကြည်

RtiMyanmar

03/09/2026

03/09/2026

03/09/2026

01/09/2026

01/09/2026

28/08/2026

28/08/2026

26/08/2026

26/08/2026

Address

Telephone

Website

Alerts

Shortcuts

Share

Category

Listing takedown request