02/09/2026
𝐓𝐚𝐢𝐰𝐚𝐧 𝐂𝐢𝐯𝐢𝐜 𝐆𝐫𝐨𝐮𝐩𝐬 𝐍𝐚𝐧𝐚𝐰𝐚𝐠𝐚𝐧 𝐬𝐚 𝐇𝐨𝐧𝐠 𝐊𝐨𝐧𝐠 𝐧𝐚 𝐏𝐚𝐥𝐚𝐲𝐚𝐢𝐧 𝐬𝐢 𝐉𝐨𝐬𝐡𝐮𝐚 𝐖𝐨𝐧𝐠 𝐚𝐭 𝐁𝐚𝐰𝐢𝐢𝐧 𝐚𝐧𝐠 𝐦𝐠𝐚 𝐊𝐚𝐬𝐨
Pumasok ngayong September 2 sa plea at sentencing stage sa Hong Kong High Court ang national security case laban sa Hong Kong democracy activist na si Joshua Wong. Kasabay nito, nagtipon sa labas ng Legislative Yuan sa Taipei ang ilang Hong Kong activists at Taiwan civic groups upang manawagan sa Hong Kong government na bawiin ang mga kaso at palayain si Wong nang walang kondisyon.
Ang dating secretary-general ng Demosistō na si Wong ay kasalukuyang nagsisilbi ng 4 na taon at 8 buwang sentensiya kaugnay ng tinatawag na “Hong Kong 47” case. Nakatakda sana siyang makalaya sa January 2027, ngunit muli siyang inaresto ng Hong Kong national security police noong June 2025.
Inakusahan si Wong na noong 2020 ay humiling siya sa mga dayuhang bansa na magpatupad ng sanctions laban sa China at Hong Kong. Dahil dito, muli siyang kinasuhan sa ilalim ng Hong Kong National Security Law, sa alegasyong nakipagsabwatan siya sa foreign forces upang ilagay sa panganib ang national security.
Bago ang pagdinig sa Hong Kong High Court, nagsagawa ng solidarity action sa Taipei ang ilang Taiwan civic groups. Sinabi ni Fu Tong, founder ng Hong Kong Human Rights Front, na mula noong 2019 anti-extradition protests ay ginamit umano ng Hong Kong government ang batas bilang sandata at mahigit 10,000 katao na ang naaresto.
“Kung talagang may kasalanan si Joshua Wong at ang iba pa, ang tanging kasalanan nila ay ang paghahangad ng demokrasya, kalayaan, fairness at justice,” ayon kay Fu.
Sinabi naman ni Sang Pu, chairman ng Taiwan Hong Kong Association, na mag-30 taong gulang si Wong sa susunod na buwan, ngunit halos one-fifth ng kanyang buhay ay ginugol na niya sa kulungan. Binigyang-diin niyang mahigpit na binabantayan ng international community ang magiging desisyon ng Hong Kong court.
Ayon kay Shih Yi-hsiang, senior researcher ng Taiwan Association for Human Rights, mahigit 2,100 araw nang pinagkaitan ng kalayaan si Wong. Iginiit niyang ang kasalukuyang paglilitis sa ilalim ng National Security Law ay lumalabag sa right to a fair trial na nakasaad sa Article 14 ng International Covenant on Civil and Political Rights.
Nagpahayag din ng suporta ang Taiwan human rights activist na si Lee Ming-che, na binanggit ang pakikilahok ni Wong mula sa 2011 anti-national education movement at 2014 Umbrella Movement hanggang sa 2019 anti-extradition protests. Naalala rin ni Lee na nang siya ay makulong sa China, nagtungo si Wong sa Taiwan noong 2017 upang ipakita ang suporta sa kanya.
Samantala, sinabi ng dating Hong Kong lawmaker na si Ted Hui, na wanted ngayon ng Hong Kong authorities, na ang Joshua Wong na kilala niya ay hindi gugustuhing malungkot lamang ang mga tao para sa kanya. Sa halip, aniya, gugustuhin nitong humanap sila ng paraan upang lumaban, kabilang ang pagsusulong ng sanctions laban sa mga Hong Kong officials na sangkot sa pagpapatupad ng national security laws.
Nanawagan ang mga civic group na bawiin ang lahat ng kaso laban kay Wong at palayain siya nang walang kondisyon, kasama ang iba pang Hong Kong political prisoners na ikinulong dahil sa paggamit ng kanilang karapatan sa freedom of expression, association at peaceful assembly.
Hiniling din nila sa mga democratic countries na lumampas sa simpleng pagkondena at gumawa ng konkretong hakbang, kabilang ang targeted sanctions laban sa mga opisyal na responsable sa mga kontrobersyal na batas at pag-aresto. Hinikayat din nila ang gobyerno at legislature ng Taiwan na makipagtulungan sa international community upang bumuo ng mas konkretong mekanismo para suportahan ang human rights at democracy sa Hong Kong.
News source: Rti
Photo source: Rti
