17/12/2025
‎Ujenzi wa Bwawa Kubwa la Kuhifadhi Maji la Kidunda, linalojengwa mkoani Morogoro, umefikia asilimia 40. Bwawa hilo linatarajiwa kuhifadhi zaidi ya lita bilioni 190 za maji na kugharimu zaidi ya shilingi bilioni 335.
‎
‎Mradi huo mkubwa unalenga kuondoa changamoto ya upatikanaji wa maji safi na salama katika mikoa ya Dar es Salaam na Pwani, pamoja na kusaidia kukabiliana na athari za mabadiliko ya tabianchi mara baada ya kukamilika kwake mwaka 2026.
‎
‎Akizungumza mara baada ya kutembelea na kukagua ujenzi wa bwawa hilo la Kidunda mkoani Morogoro, Waziri wa Maji Mheshimiwa Jumaa Aweso, ambaye aliambatana na wakuu wa mikoa ya Dar es Salaam, Pwani na Morogoro, amesema Serikali imedhamiria kuhakikisha mradi huo unakamilika kwa wakati ili kutatua changamoto ya maji kwa wakazi wa mikoa hiyo.
‎
‎Kuhusu ulinzi wa vyanzo vya maji na kuhakikisha bwawa hilo linajaa maji mara baada ya kukamilika, Mheshimiwa Aweso amesema ni wajibu wa wananchi na mamlaka husika kulinda mazingira na vyanzo vya maji ili mradi huo uwe endelevu.
‎
‎Kwa upande wake, Mkuu wa Mkoa wa Morogoro Bw. Adam Malima, pamoja na Mkurugenzi Mkuu wa Bodi ya Bonde la Wami/Ruvu Mhandisi Elibariki Mmassi, wameeleza umuhimu wa bwawa hilo kwa maendeleo ya kijamii na kiuchumi, huku wakisisitiza suala la ulinzi na usimamizi wake.
‎
Powered by
