18/09/2026
Kliniki ya Viwanda na Biashara imetajwa kuwa kiungo muhimu katika utekelezaji wa mipango mikubwa ya kitaifa ikiwemo Dira ya 2050, Sera ya Taifa ya Biashara, na Ilani ya Chama cha Mapinduzi ambapo kupitia mpango huo, serikali inalenga kujenga uchumi shindani, jumuishi, na shirikishi.
Hayo yamebainishwa na Mkuu wa Wilaya ya Arusha Mhe. Modest Mkude alipomwakilisha Mkuu wa Mkoa wa Arusha katika ufunguzi wa Kliniki ya Viwanda na Biashara iliyoandaliwa na Wizara ya Viwanda na Biashara Mkoani humo katika Viwanja vya Ngarenaro Septemba 17,2026.
Aidha amesema Faida kubwa inayopatikana ni pamoja na urahisi wa kupata huduma za usajili wa majina ya biashara, utoaji wa leseni za Kundi A na B, elimu ya vipimo na viwango, taarifa za masoko na mienendo ya bei, pamoja na matumizi ya teknolojia rahisi za uzalishaji.
Vilevile amesema Uwepo wa zaidi ya taasisi 20 za serikali na sekta binafsi katika eneo moja unawasaidia wafanyabiashara kuondoa kero za urasimu na kuokoa mud pamoja na fursa za kupata mikopo yenye riba nafuu kwa ajili ya kuendeleza mitaji yao.
Mbali na kutoa huduma, kliniki hiyo inahamasisha urasimishaji wa biashara ili kuziwezesha kupata fursa mpya za kifedha na masoko ya ndani na nje, Hatua hiyo inalenga kuwaandaa wajasiriamali wa Arusha kunufaika kiuchumi na fursa zitakazojitokeza wakati wa Mashindano ya (AFCON 2027).
Jukwaa hili pia linasaidia kuongeza tija na thamani katika sekta kuu za kiuchumi jijini Arusha zikiwemo utalii, kilimo, mifugo, na uzalishaji wa viwandani. Faida hiyo inawapa vijana na nguvu kazi iliyopo fursa ya kutumia maarifa na weledi wao kujiajiri na kuajiri wengine, jambo linalochochea ukuaji wa uchumi wa mkoa huo.
Akizungumza kwaniaba ya Mkurugenzi wa Maendeleo ya Biashara wa Wizara ya Viwandana Biashara Bw. Milton Manyara amesema wizara imeandaa kliniki hiyo iliyoanza Septemba 14,2026 na kufikia tamati Septemba 19,2026 lengo lake ni kuwasogezea huduma karibu wafanyabiashara na wajasiriamali zaidi ya 3500 pamoja na kuwapatia elimu kuhusu fursa zinazopatikana kupitia serikali na taasisi zake.
