27/11/2025
UJUMBE WANGU KWA KILA MTANZANIA. NAKUSIHI USOME NA UTAFAKARI HATA K**A MWISHO HUTAKUBALIANA NA MIMI. INAWEZEKANA MKAUKUMBUKA HUU UJUMBE SIKU SI NYINGI TOKA SASA.
Tanzania iko kwenye vita kubwa ya kiuchumi kwa rasilimali zake hasa urani na rare earth minerals (madini adimu). Marekani, China na Urusi wote wanazitaka. Kwenye mbio za kuwekeza kwenye rasilimali muhimu Tanzania nchi ya Marekani iko nyuma sana ya China na Urusi. Tanzania pia iko eneo la kimkakati kwenye nchi za kusini mwa Afrika na nchi hizo tatu kila moja inataka kuwa na ushawishi fulani Tanzania. Marekani imezidiwa. Nikisema Marekani ndani yake pia kuna washirika wake baadhi ya nchi za Ulaya. Kila figisu itafanyika Tanzania ipate kashikashi ikiwemo kunyimwa misaada, kuunga mkono vurugu na kadhalika hata kuanzisha makundi ya kigaidi na amani kutoweka kabisa si kwa mwezi bali miaka. Hata mauaji yanaweza kufanywa na maharamia wa kigeni makusudi ili kuonesha kuwa Tanzania si salama tena. Ushauri wangu kwa Watanzania wote, ukitaka kuandamana kwanza hakikisha nani unaandamana nao, unawafahamu, eneo unaloandamana unalifahamu? Tazama mazingira yako yote, chukua kila tahadhari. Unaweza kuuawa au kusogezwa eneo la kuuawa na unayeandamana naye sababu tu mwenzako yuko kwenye kazi kuonesha machafuko Tanzania. Pia ukisikia maandamano k**a huandamani kaa ndani tena mbali na dirisha au mlango, utajiepusha na mengi.
Pili ushauri kwa polisi na vyombo vya ulinzi na usalama, umakini uwe maradufu nani wanaingia Tanzania, nani wanaingia na silaha, na kadhalika. Kuna uwezakano mkubwa hata Oktoba 29 kuna mauaji yalifanywa na watu makusudi hasa point-blank range na kurekodiwa maiti na wauaji wale wale ili kuonesha polisi wameua raia. Hii imeshatokea nchi nyingi tu duniani tafuteni mtaona ushahidi. Polisi inaweza kuwa ngumu kujielezea kwamba wako watu walikuwa na silaha wanaua "waandamanaji wenzao" lakini hili linawezekana. Kuna uwezekano ndani ya waandamanaji na mitaa yetu kulikuwa na maharamia wasio maafisa ulinzi na usalama wa Tanzania wakiua watu kwa makusudi kwa lengo fulani. Inawezekana pia propaganda ya kwamba kulikuwa na raia wa kigeni kuja kuua Watanzania ililetwa makusudi ili hata tukiona raia wa kigeni tuseme ameletwa na Serikali kumbe uhalisia kaletwa na mtu mwingine mwenye nia hizo ambazo nimeeleza. Tuko katika wakati wa kipekee na mwenye lengo la kuichoma Tanzania kupata anachotaka hataki tufikirie mara mbili kuhusu uhalisia wa mambo. Hata Watanzania wenzetu wanaounga mkono baadhi ya mambo hayo inawezekana hawajui lengo kuu ni nini. Tuchukue tahadhari, tutafakari mambo kwa kina. Mungu ibariki nchi yetu, tujalie busara na kiu ya kufahamu ukweli wa mambo na kuvuka salama.
Kwame Kivaisi
Ntoma, Kemondo Bay, Kagera
