14/07/2026
:Rais wa Zanzibar na Mwenyekiti wa Baraza la Mapinduzi, Mhe. Dkt. Hussein Ali Mwinyi, leo tarehe 13 Julai 2026, amefunga rasmi Maonesho ya Kimataifa ya Biashara ya Dar es Salaam (DITF) ya Jubilei ya Miaka 50, akisisitiza kuwa maonesho hayo yameendelea kuwa jukwaa muhimu la kukuza biashara, uwekezaji, ubunifu, matumizi ya teknolojia na kuimarisha ushirikiano kati ya sekta ya umma na binafsi.
Rais Dkt. Mwinyi amesema katika kipindi cha miaka 50 tangu kuanzishwa kwa maonesho hayo, yamechangia kwa kiasi kikubwa kukuza diplomasia ya biashara na uchumi, kuvutia wawekezaji kutoka mataifa mbalimbali pamoja na kuwapatia wazalishaji na wafanyabiashara fursa ya kutangaza bidhaa na huduma zao katika masoko ya ndani na nje ya nchi.
Aidha, amesisitiza umuhimu wa Watanzania kutumia kikamilifu fursa zinazotokana na Soko Huru la Biashara la Afrika (AfCFTA), huku akiitaka Serikali na taasisi zake kuendelea kuondoa urasimu unaokwamisha utoaji wa huduma na biashara, ili kuongeza ushindani wa bidhaa za Tanzania katika soko la kimataifa.
Rais Dkt. Mwinyi amesema Serikali itaendelea kuweka mazingira bora na wezeshi kwa ukuaji wa sekta za biashara na viwanda, sambamba na kusimamia matumizi ya rasilimali za umma kwa uadilifu na uwajibikaji, kwa lengo la kujenga uchumi imara na wenye ushindani.
Katika hafla hiyo, Rais Dkt. Mwinyi alikabidhi tuzo kwa washindi na washiriki waliofanya vizuri katika Maonesho ya mwaka 2026, na pia alitunukiwa Tuzo Maalum ya Maadhimisho ya Miaka 50 ya Maonesho ya Kimataifa ya Biashara ya Dar es Salaam, kwa kutambua mchango wake katika kufanikisha na kuendeleza maonesho hayo.
Mapema kabla ya kufunga maonesho hayo, Rais Dkt. Mwinyi alitembelea mabanda mbalimbali na kujionea bidhaa na huduma zinazotolewa na taasisi za umma, sekta binafsi pamoja na washiriki kutoka mataifa mbalimbali walioshiriki Jubilei ya Dhahabu ya Miaka 50 ya Maonesho ya Kimataifa ya Biashara ya Dar es Salaam.
