19/07/2025
SUNDAY 20/07/2025
KWAN ME ACEL
KWAN KI I BUK ME JENESIS : 18:1-10
Rubanga onen bot Abram i cal pa dano kacel ki malaika ma Abramo ojolo gi ki yomcwiny, omiyo cam bot gi.
I kare ma ca Rubanga onen bot Abram i lung me Mambre, onongo en obedo piny i dog kema ne, i kare me dyeceng ma piny lyet mada. En otingo wange malo ci oneno dano adek ma gicung inyime. Ma oneno gi, oringo bot gi ki i dog kema ka jolo gi, ogungu, okulu wiye wa i ngom, owaco ni : "Ladita, ka cwinyi yom i koma, pe ikat woko ki bot laticci. Kong gikel pii, wulwok ki tyen wu, wuywee ma nok i te yat man. An abikelo wu mugati mo ma nok, wucam, wek okony iwu, ma pud peya wucako woto anyim, ma calo d**g wuoo i gang pa latic wu-ni."
Gin gugamo ni : "Tim kit ma iwaco." Abram d**g olaro oyot i kema bot Sara owaco ni : "Oyotoyot kwany moko, inywang mugati mo adek, ited gi oyot."
Ci Abram oringo idwol, omako latin twon ma bulu bulu, omiyo bot laticce, ma ocako yubo ne oyot. En dok okwanyo moo dyang ki cak ki ringo twon ma gitedo ni, oketo inyim gi. I kare ma gitye ka cam, Abram ocung ka nget gi ite yat.
Lacen gin gupenyo ni : "Dako ni Sara tye kwene ?". En ogamo ni : "Tye i kema kuca". Welo ne dok omedo ni : "I nge mwaka acel abidwogo boti, ci abinongo i ada ni dako ni tye ki latin kore."
MAN LOK PA RUBANGA
WER I KIN PWONY : Ps 14
JO MA CWINY GI LENG GI BI BEDO I OT PA RUBANGA
1- Rwot, anga ma bibedo i kema ni ? Dano ma woto ma cwiny gi leng, ma tiyo atir, ma loko lok ada, ma pe balo nying dano ki goba.
Jo ma cwiny gi leng gi bi bedo i ot pa Rwot ...
2- Ma pe timo gin marac bot lareme, ma pe maro yeto lowot gi.
En pe mito neno dano ma cwinye rac, ento woro dano ma lworo Rubanga.
Jo ma cwiny gi leng gi bi bedo i ot pa Rwot ...
3- Miyo banya labongo penyo magoba, pe yee me gamo cente pi ngolo pwod wi ngat ma pe ki bal.
Dano ma tiyo kitmeno pe twero nongo can.
Jo ma cwiny gi leng gi bi bedo i ot pa Rwot ...
KWAN ME ARYO
KWAN KI I WARAGA PA PAULO MALENG BOT JO KOLOSSI : 1:24-28
Lok ma yam okanne i cwiny Rubanga wa con aye man ni : Tam pa Rubanga aye me laro jo ducu.
Omega ki lomegi na, an cwinya yom mada me canne pi wun. Pien ki can ma mako koma, acobo gin ma pud od**g i kom can pa kristo, pi ber pa Eklesya ma en aye kome. Rubanga oketa latic pa Eklesya, i kare ma omiya tic me tito bot wu lok me kwena pa Rubanga. Kwena man obedo lok ma yam tye i cwiny Rubanga wa con ( me laro dano ducu wa lokampir bene ) ; ento lok man okanne pi kare ma lac wa bot dano ducu, ci d**g Rubanga onyuto atyer bot lwakke lok madit man me yomcwiny wa me awora, ma en ogwoko ki lokampir bene. Man aye lok ma yam tye i mung ni : Kristo tye i kin wu me poko kuc pa Rubanga kwedwu. Man aye omiyo watito lok pa kristo bot dano ducu. Waciko d**g jo ducu ka mako pwony man, ki kit ryeko ducu ma tweere, wek kit gi obed mupoore pi kit pa kristo.
MAN LOK PA RUBANGA
Alleluia, Alleluia
Komgi gum jo ma gikano lok ma giwinyo i cwiny gi, ma gio i kac.
Alleluia, Alleluia
EVANJELI
KWAN KI I EVANJELI MALENG MA LUKA OCOYO : 10:38-42
Marta ojolo Yesu i ode, Maria obedo ka tyen Yesu ka winyo lokke.
I kare ma ca Yesu odonyo i gang mo, ci dako acel ma nyinge Marta ojole i ode. En onongo tye ki laminne ma gilwongo Maria, ma obedo ka tyen Yesu ka winyo lokke.
Ento Marta onongo tye ka yelle mada pi dwong tic ; ci obino owaco ni : "Rwot, pe ineno kit ma lamera obwota kwede, atiyo kena ? Cwale d**g obin ka konya."
Ci Yesu ogamo owace ni : " Marta, Marta in itye ka paro wa ka yelle pi jami mapol ; ento lok acel keken aye ma pire tek. Maria oyero mere mabere, ma pe gibikwanyo woko ki bote."
EVANJELI PA RWOT WA YESU KRISTO
