Ensulo y'Obuwanguzi - Wellspring of Success, Lugazi (2025)

20/07/2023

NE BW'ETONNYA GUMALA NE GWAKA

Abantu abagezigezi batera okutambulirako mu muzira n'ekigendererwa eky'okubuzaabuza enkulukuta y'amaziga gaabwe. Tebakoma kw'ekyo, wabula entambula yaabwe bagifuula ssomo okutegeerera ddala ababalowoozaako.

Nga mmunyeenyi bwe zeewenjeza amakubo omutambulira ebitangaala byazo mu bizikiza ebitagambika, embeera y'obulamu erina okututendeka okusigala nga tugenda n'ebyo ebinaatugasa ne bitufuula abasukkulumu era abeegombesa.

Ebisoomooza bisigala nga maddaala agaba gatemeddwa ku kasozi akava emugga, nga kwe kulina okulinnyibwa n'obwegendereza okusobola okusomoka n'emikisa egiba gyesundira mu bidomola bye tuba twetisse.

Mu mpola, kyaddaaki tweyongera mu maaso olwo ebiyitiddwamu ne bifuuka lufumo. Buli kadde, tulina kutunulanga awo wennyini we tusaana okussa ebigere kubanga okulobesebwa kimu ku biyinza okutusuula wakati mu basekerezi.

20/06/2023

LENGERA EBIRIBAAWO NG'OKOZESA OLUNAKU LW'AMAZAALIBWA

Ng'okunoonyereza bwe kugenda mu maaso, Bannassaayansi n'abatutumufu bangi bongedde okukozesa enkola y'okuzuula emikisa mu baagalwa baabwe n'okweteekerateekera ebiyinza okugwaawo nga beeyambisa ennaku ez'obuzaaliranwa. Kino kyatandikira mu Balooma nga beeyambisanga ennamba ez'enjawulo okusinziira ku bifo bya zi mmunyeenyi ezigambibwa okubaamu ebyama.

Kino kikolebwa na kufuna ennamba emu okuva mu muwendo gw'ezo ez'amazaalibwa. Okugeza, singa omuntu aba yazaalibwa nga 28.07.2001, agatta 2+8+0+7+2+0+0+1 n'afuna 20. Ayongera n'agatta 2+0 okufuna omuwendo gumu, 2. Ennamba eno egambibwa okulaga ki ky'aliba. Era asobola okumanya ebinyusi ku bituuka mu bulamu bwe buli lunaku. Tugeze, bwe ziba 21.06.2023, afuna ennamba emu okuva mu nnaku z'omwezi ezo nga bwe tukoze, n'agattako ennamba ye. Buli emu eba ne ky'etegeeza nga bwe zirambikibwa mu bufunze:

1 - Kubaako ky'akulembera, 2 - Kwenyigira mu kintu eky'awamu, 3 - Buyiiya, 4 - Kunyweza mpisa na mutindo, 5 - Bwetwaze, 6 - Buvunaanyizibwa obukirawo, 7 - Bwekenneenyi, 8 - Buvumu, 9 - Bulwaniririzi bwa ddembe. Eky'okulabirako, kyangu eri oyo afuna 3 okuba omuyimbi, n'owo 7 yandiba munnamateeka. Wabula waliwo ezitagattibwa: 11 - Bunnaddiini, 22 - Butonzi, 33 - Buwonya. Eri afuna 44, 55, 66, 77, 88 ne 99, kitegeeza nti alina okukubisaamu amaanyi ge mu byakola oba si kyo okuva mu nsi nga talina ke yeekoledde.

«Real» Ibraheem Ahmad Ntakambi

14/07/2022

SSADDAAKA AWALI 'CAMERA' EFUUKA KIRANGO

Kituufu, teri kintu kikolebwa okuggyako nga waliwo ekiruubirirwa mu kyo — oluusi ku lw'Omutonzi oba ku lw'abantu bannaffe.

Naddala okutandika n'ekyasa kino, bangi bagenze beeyambisa okukwata ebifaananyi olumu ne webitajjira, nga balaga obuyambi obuba buweereddwa abalala, bo kwebayita okulumirirwa.

Mu kubitambuza; olw'okubanga kino byandisigala nga biswaliza ddala abamu ku baba bakwatiddwa ku mikono, kuba kweranga okutaliiko na kabuuza.

Butereevu, muno temulina kusuubirwa mpeera za Katonda, wabula okusuutibwa abalala. Buli omu aba waddembe okulondawo ekimusingira kubanga byombi bikulu.

Ibraheem Ahmad Ntakambi

12/06/2022

EDDEMBE LY'OKWEROWOOLEZA
Abantu abamu basuubira nti okwawukanya endowooza kiba kivve, era baba baagala nnyo buli omu alowooze nga bo; n'ababawakanya bandifuuka abalabe.

Okutandikira ddala ku Mutonzi, y'amanyi ekkubo ettuufu wadde nga abantu be bakwata ga njawulo. Ekireetera kino, kuba kwawula birowoozo. Singa yali taganya ddembe lino, buli yandikuttenga ekkubo ekyaamu we yandifiiridde.

Eky'okulabirako ekirala, eriyo abantu abasiima akasente oba akantu konna ne bwekaba katono, okusinga okutonerwa ebintu enkuyanja nga bibaguliddwa bugulirwa, oba nga tebabyesaliddeewo.

Ne bwe biba byabufuzi oba mu mbeera za bulijjo, buli omu asaana okussibwaamu ekitiibwa mu ngeri gy'alowooza era guno tegubangako musango. Ekikulu kwe kufuga ebirowoozo, singa bibaako ne kye biyinza okukola eri abantu abarala.

01/03/2022

Y'ESSAAWA OKUSIGA MU TTAKA LY'EMITIMA

Nga bwe kitera okwogerwa, omukwano ogwannamaddala gusibuka mu bigambo n'ebikolwa ebibaawo mu kaseera omuntu w'afunira okunyigirizibwa.

Naye tekitegeeza nti kiba kityo ebbanga lyonna. Bwe twolekedde omwezi gw'okusiga, kino tekiri eri birime byokka; wabula bwe kyandibadde ne mu nsi y'okwagala, nga tuzza emitima egyali gyatuddukako.

Omutonzi yekka y'amanyi emikisa n'ebibala ebiri mu mwezi guno. Ke kaseera otegeeze mukwano gwo, n'eyali mukwano gwo nti "Nkwagaliza omwezi omujja". Ebitaagenda bulungi byandikyuka n'okusinga bwe gwali!

Teri kiyinza kugatta mitima nga kagambo ako naddala mu kiseera bwe kityi. Bwe budde obutuufu wezze bujja, otereeze ebisobye mu mwezi oguyise; otambule n'empisa y'omwezi ogutemagana — ogutannatalagga.

Ibraheem Ahmad Ntakambi
Mugulansigo 1, 2022

Address

Lugazi

Telephone

+256755869911

Website

https://IbraNtakambi.wordpress.com/uplifting

Alerts

Be the first to know and let us send you an email when Ensulo y'Obuwanguzi - Wellspring of Success posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Ensulo y'Obuwanguzi - Wellspring of Success:

Ensulo y'Obuwanguzi - Wellspring of Success