12/04/2026
Nnamungi w'omuntu yeyiye mu Lubiri okubugiriza Ssaabasajja Kabaka Ronald Muwenda Mutebi II nga asimbula emisinde gy'amazaalibwa ge egy'omulundi gw'e 13.
Zigenze okuwera ssaawa kkumi neemu kitundu nga bukya, abantu okuva mu bitundu eby’enjawulo nga batandise okuyingira olubiri lw'e Mmengo, olwo ne Kamalabyonna Charles Peter Mayiga n'abeyungako ku ssaawa emu ey'okumakya.
Nga zikunukkiriza okuwera ssaawa bbiri ez'okumakya, Nnyinimu, Ssaabasajja Kabaka atuuse mu Lubiri wakati mu mizira n'enduulu okuva mu nnamungi w'omuntu anekaanekanye mu bujoozi obwa kasaayi.
Beene ayaniriziddwa Katikkiro Charles Peter Mayiga, Oweek Prof Twaha Kaawaase Kigongo Ssentebe w'enteekateeka z'emisinde gy'omulundi guno, Oweek Robert Sserwanga Ssaalongo Minisita w'Abavubuka Emizannyo n'Ebitone, Oweek Joseph Kawuki Minisita wa gavumenti ez'Ebitundu okulambula kwa Kabaka n'ensonga za Buganda ebweru, ne Kaggo Hajji Ahmed Matovu Magandaazi omwami w'Essaza Kyaddondo.
Nga tannasimbula baddusi, Katikkiro asoose kwanjulira Ssaabasajja Kabaka abagenyi ab’enjawulo ne bannamikago, era wano w'asinzidde n'ategeeza Beene nti abantu be bamalirivu okwekuuma mukenenya nga beesigama ku bubaka ye kennyini Beene bw'abawa.
Abakubirizza okwekuuma, bekebeze, bagendere ku biragiro by'abasawo, ate abavubuka beewale okwetaba mu bintu by'okwegatta kubanga ebirungi biri mu maaso.
Yeebazizza bonna abawagira enteekateeka z'obwakabaka era n'abakuutira obutakkirizanga mu muntu yenna abajja ku Ssaabasajja Kabaka kubanga Kabaka ye kitaffe era y'entabiro y'ebyo byetukkirizaamu.
Omutanda asoose kusimbula abaddusi ba kilomita 5, 10, ne 21.
Omulangira David Kintu Wasajja y'abadde omuddusi omukulu era adduse kilomita 21.
Abaana b'engoma okuli; Omulangira Richard Ssemakookiro, Omulangira Criapin Jjunju, Nnaalinnya Victoria Nkinzi, nabo babadewo era beetabye mu misinde gino.
