09/10/2025
Flambeau de Meyer, Viktim yon Desizyon kontwovèsal nan Coupe Dom Water
Jakmèl, septanm 2025
Yon gwo vag endiyasyon leve nan kominote foutbòl sidès la apre eliminasyon abitrè ekip Flambeau de Meyer nan kad Coupe Dom Water, yon chanpyona ki deja atire anpil enterè nan rejyon an.
Nan sant kontwovès la, se aplikasyon (oswa pi byen di vyolasyon) yon atik kle nan regleman konpetisyon an. Atik 15 nan dokiman ofisyèl la prevwa lòd ¼ de final yo:
• 1er A vs 2e B (1er match)
• 1er B vs 2e A (2e match)
• 1er C vs 2e D (3e match)
• 1er D vs 2e C (4e match)
Tèks la klè: premye Gwoup D la dwe jwe nan katriyèm match la.
Sepandan, kont tout atant, Komite Chanpyona a mande pou Flambeau de Meyer, ki te sòti 1er Gwoup D, antre nan teren pi bonè. Ekip la leve vwa pou defann dwa li dapre règ yo. Repons lan pa t yon dyalòg, men yon sanksyon: eliminasyon administrativ.
Pou ajoute sou dife a, olye yo rekonsidere pozisyon yo, òganizatè yo pibliye yon nòt pou di yo kanpe dèyè desizyon sa. Yon chwa ki soulve anpil kesyon sou kreyibilite ak transparans konpetisyon an.
Yon Ekip Senbolik nan Sidès
Flambeau de Meyer pa yon ekip òdinè. Fonde an 1977, li se youn nan pi ansyen ak pi respekte klèb nan Jacmel ak depatman Sidès la. Ekip la se pami ra fòmasyon nan rejyon an ki ofisyèlman anrejistre ak rekonèt pa Fédération Haïtienne de Football (FHF). Pandan prèske senkant ane, Flambeau pote koulè kominote li, fòme jenerasyon jèn foutbolè, epi rete yon pilye nan lavi espòtif lokal la.
Eliminasyon li sou baz yon desizyon ki pa ann amoni ak règ yo pa sèlman frape klèb la, men li souke tout moun ki kwè nan foutbòl kòm yon espò jistis, respè ak onètete.
Konsekans yo pi lwen pase yon match
Sa k pase nan Coupe Dom Water depase kad yon ¼ de final. Li mete sou tab la yon gwo kesyon:
• Èske òganizatè yo reyèlman respekte règ yo?
• Èske konpetisyon an kapab kenbe kredibilite li si règ ki ekri pa respekte?
• Ki mesaj sa voye bay lòt ekip yo ak jèn ki ap grandi nan foutbòl la?
Yon chanpyona ka gen defo, men lè desizyon yo antre dirèkteman an konfli ak tèks ofisyèl yo, sa louvri pòt pou abi ak paspouki.
Pou yon Foutbòl ki Plis Jis
Foutbòl se yon jwèt, men se tou yon zafè prensip. Règ yo egziste pou tout moun jwenn menm tretman, pou viktwa ak defèt yo sòti nan teren an, pa nan biwo. Ka Flambeau de Meyer la se yon tès pou òganizasyon espòtif nan Sidès: èske yo chwazi jistis ak respè, oubyen yo p ap janm bay foutbòl lokal la kredibilite li merite?
Pou anpil moun nan kominote a, repons lan deja klè: rejte abi, mande respè, defann valè foutbòl.
