09/19/2026
# # # Joshua Van နောက်က ခြေလှမ်းနင်းလာတဲ့ ချင်းလူငယ်ဖိုက်တာ Biak Za Cung
အခုတစ်ခါ ပြောပြချင်တာကတော့ အမေရိကန်နိုင်ငံမှာ MMA လေ့ကျင့်ပြီး ပြိုင်ပွဲတွေ ဝင်ရောက်ထိုးသတ်နေတဲ့ အသက် ၂၁ နှစ်အရွယ် ချင်းလူငယ်ဖိုက်တာ **Biak Za Cung** အကြောင်းပါ။
လက်ရှိ UFC Flyweight ချန်ပီယံ **Joshua Van** လိုပဲ ချင်းလူမျိုးဖြစ်ပြီး အမေရိကန်မြေပေါ်မှာ MMA အားကစားနယ်ပယ်ထဲ ဝင်ရောက်လာနေတဲ့ လူငယ်တစ်ယောက် ဖြစ်ပါတယ်။
Biak Za Cung ကတော့ အမေရိကန်နိုင်ငံ Missouri ပြည်နယ်၊ Springfield မြို့မှာရှိတဲ့ **Team Fusion** မှာ လေ့ကျင့်နေပါတယ်။
သူ့ကို MMA ပရိသတ်တွေ စိတ်ဝင်စားလာရတဲ့ အကြောင်းရင်းတစ်ခုကတော့ Joshua Van နဲ့ ရုပ်ရည်ပိုင်း၊ ခန္ဓာကိုယ်တည်ဆောက်ပုံနဲ့ တိုက်ခိုက်တဲ့ပုံစံတွေမှာ ဆင်တူတာကြောင့်ပါ။ ဒါကြောင့် ပရိသတ်တချို့က သူ့ကို **“Joshua Van အငယ်စား”** လို့တောင် ခေါ်လာကြပါတယ်။
# # # ပွဲ ၂ ပွဲ၊ ၂ ပွဲစလုံး TKO နဲ့ အနိုင်
Biak Za Cung ဟာ လက်ရှိမှာ Amateur အဆင့်မှာ ပြိုင်ပွဲဝင်နေပါတယ်။
သူ့ရဲ့ ပထမဆုံးပွဲက **Synergy FC 30** မှာ ဖြစ်ပါတယ်။ အဲဒီပွဲမှာ Jeremy Hoyt နဲ့ ထိုးသတ်ခဲ့ပြီး ဒုတိယအချီမှာ **TKO နဲ့ အနိုင်ရခဲ့ပါတယ်။**
ပွဲဦးထွက်မှာတင် အထင်ကြီးစရာကောင်းတဲ့ စွမ်းဆောင်ရည် ပြသနိုင်ခဲ့ပါတယ်။
အဲဒီနောက် **Synergy FC 31** မှာလည်း Dian Justus နဲ့ ထပ်မံထိုးသတ်ခဲ့ပြီး ဒုတိယအချီမှာပဲ TKO နဲ့ အနိုင်ရခဲ့ပါတယ်။
ဒါကြောင့် လက်ရှိ Amateur မှတ်တမ်းက—
**၂ ပွဲထိုး၊ ၂ ပွဲနိုင်၊ ၂ ပွဲစလုံး TKO** ဖြစ်ပါတယ်။
# # # နောက်ဆုံးပွဲက လွယ်လွယ်ကူကူ မဟုတ်ခဲ့ပါဘူး
နောက်ဆုံးပွဲမတိုင်ခင် Fight Week အတွင်းမှာ Biak Za Cung ဟာ ပြင်းပြင်းထန်ထန် ဖျားနာခဲ့ပြီး ကိုယ်အလေးချိန်လည်း အများကြီးကျသွားခဲ့တယ်လို့ သူကိုယ်တိုင် ပြောထားပါတယ်။
ဒါပေမဲ့ အဲဒီအခက်အခဲတွေကြားကနေ ပွဲကို ဝင်ရောက်ထိုးသတ်ပြီး ပြိုင်ဘက်ကို TKO နဲ့ အနိုင်ယူနိုင်ခဲ့ပါတယ်။
ပွဲအပြီးမှာတော့ သူက ဒီအောင်ပွဲဟာ ယေရှုခရစ်တော်နဲ့ သူ့ရဲ့နည်းပြတွေ၊ အသင်းဖော်တွေရဲ့ အကူအညီမပါဘဲ မဖြစ်နိုင်ဘူးလို့ ပြောပြီး ဘုရားသခင်ကို ကျေးဇူးတင်ကြောင်း ရေးသားခဲ့ပါတယ်။
ဒါ့အပြင် ချင်းဘာသာစကားနဲ့လည်း မိသားစုနဲ့ အားပေးသူတွေကို ကျေးဇူးတင်စကား ပြောခဲ့ပြီး နောက်လာမယ့်ပွဲတွေအတွက် ဆက်လက်ဆုတောင်းပေးကြဖို့ တောင်းဆိုခဲ့ပါတယ်။
# # # UFC အထိ ရောက်နိုင်မလား?
လက်ရှိအချိန်မှာ Biak Za Cung က Amateur အဆင့်မှာပဲ ရှိသေးပါတယ်။
ဒါပေမဲ့ အသက် ၂၁ နှစ်ပဲ ရှိသေးတာ၊ ပွဲ ၂ ပွဲစလုံးကို TKO နဲ့ အနိုင်ရထားတာနဲ့ သူ့ရဲ့ တိုက်ခိုက်ပုံတွေကြောင့် MMA ပရိသတ်တွေက သူ့ရဲ့ နောက်လာမယ့် ပွဲတွေကို စိတ်ဝင်စားစွာ စောင့်ကြည့်နေကြပါတယ်။
တချို့မြန်မာပရိသတ်တွေကလည်း **“UFC အထိ တက်လှမ်းလိုက်ပါ ညီလေး၊ မြန်မာပြည်ကနေ အားပေးနေတယ်”** ဆိုပြီး အားပေးနေကြပါတယ်။
အခုအချိန်မှာတော့ Biak Za Cung အတွက် အရေးကြီးဆုံးက Amateur အဆင့်မှာ ပွဲတွေ ဆက်ထိုးပြီး သူ့ရဲ့အရည်အချင်းကို တဖြည်းဖြည်း တိုးတက်အောင်လုပ်သွားဖို့ပါ။
အမေရိကန်မြေပေါ်မှာ ကိုယ့်အိပ်မက်နောက်ကို လိုက်ပြီး MMA လောကထဲမှာ ကြိုးစားနေတဲ့ ဒီအသက် ၂၁ နှစ်အရွယ် ချင်းလူငယ်ဖိုက်တာရဲ့ ခရီးစဉ်ကတော့ စောင့်ကြည့်ရမယ့် ဇာတ်လမ်းတစ်ခု ဖြစ်လာပါတယ်။
Crd- June
