06/04/2026
LAKAY TV : Dimanch 31 me 2026 la make yon moman enpòtan pou sektè agrikòl, elvaj, pwodiksyon atizanal ak anviwonman nan Nòdwès peyi a, avèk lansman ofisyèl òganizasyon TAKFA (Tè Ak Kè Fanm Ayiti). Evènman sa a te fèt nan okazyon selebrasyon fèt manman, yon chwa ki gen anpil sans pou yon estrikti ki mete fanm ak devlopman agrikòl, anviwonman, pwodiksyon atizanal ak elvaj nan sant aksyon li.
Depi 10:00 AM pou rive 4:00 PM, anviwon yon santèn moun, ki gen ladan manb òganizasyon an ansanm ak envite espesyal, te reponn prezan pou patisipe nan lansman sa a. Anbyans lan te chaje ak lakontantman ak espwa pou yon pi bon avni nan domèn agrikilti ak anviwonman, sitou pou fanm yo.
Pandan aktivite a, plizyè patisipan te pran lapawòl pou eksprime opinyon yo, poze kestyon sou baz fondamantal ak objektif TAKFA, epi konprann pi byen vizyon òganizasyon an genyen pou kominote a. Entèvansyon sa yo te pèmèt mete limyè sou enpòtans angajman kolektif pou devlopman dirab la tout bon vre.
Lansman an pa t sèlman yon seri diskou. Li te anime ak plizyè aktivite kiltirèl tankou sketch, dans tradisyonèl, deklarasyon angajman, san konte bèl son kout tanbou ki te bay evènman an yon koulè espesyal. Sa te kreye yon atmosfè vivan ki marye kilti ak devlopman.
Avèk lansman sa a, TAKFA montre klèman detèminasyon li pou travay nan direksyon pou amelyore kondisyon lavi fanm yo atravè agrikilti, pandan l ap kontribye nan pwogrè kominote yo nan Nòdwès peyi a.
Se yon premye pa ki louvri pòt pou anpil lòt inisyativ ki kapab pote chanjman pozitif nan sosyete a. Déjà TAKFA bay tout moun randevou 17 jen 2026 la pou yon fòmasyon sou transfòmasyon fatra, ankò Pòdepè.
Frantz-Roosvelt Romondt
Responsab Kominikasyon
