01/07/2024
မောင်တောတွင် ICRC သိုလှောင်ရုံမှ အရေးပေါ်အသုံးအဆောင်ပစ္စည်းတွေကို စစ်ကောင်စီတပ်သားများ ခိုးထုတ်ရောင်းချနေဟုဆို
VOW| ဇူလိုင် ၁၊ ၂၀၂၄
ရခိုင်၊ မောင်တောမြို့ပေါ် ကညင်တန်းရပ်ကွက်မှာရှိတဲ့ အပြည်ပြည်ဆိုင်ရာ ကြက်ခြေနီကော်မတီ( International Committee of the Red Cross )ရုံးရဲ့ ကုန်ပစ္စည်းသိုလှောင်ရုံထဲကနေ အရေးပေါ် အသုံးအဆောင် ပစ္စည်းတွေကို စစ်ကောင်စီတပ်ဖွဲ့ဝင်တွေနဲ့ နယ်ခြားစောင့်ရဲတွေက ထုတ်ယူ ရောင်းချနေတယ်လို့ မောင်တောသတင်းအရင်းအမြစ်က ပေးပို့ချက်အရ သိရပါတယ် ။
ဈေးများအတွင်း ICRC သိုလှောင်ရုံ ပစ္စည်းတွေထဲက ဓါတ်မီး ၊ ခေါက်ဖျာ ၊ တာပေါ်လင် ၊ ခြင်ထောင် ၊ဓါတ်ခဲ နဲ့ ငါးသတ္တာဗူး တွေ အပြင် အခြား ပစ္စည်းတွေလည်း ရောင်းချနေတာတွေ့ရပြီး စစ်ကောင်စီတပ်သားတွေက လာရောက်ရောင်းချနေတာဖြစ်တယ်လို့ ဒေသခံတွေက ဆိုကြပါတယ်။
မောင်တောဒေသခံတစ်ဦးက “ မြင်နေပေမယ့် မပြောရဲကြဘူး ၊ အချို့ဆို အိမ်ထဲကို ဝင်ပြီး အတင်းရောင်းတာတွေရှိပါတယ် “ လို့ ၎င်းက ဆိုပါတယ် ။
အဲဒီသိုလှောင်ရုံမှာ နိုင်ငံတကာမှ လူသားချင်းစာနာထောက်ထားမှုအကူညီပေးရေး ပစ္စည်းတွေဖြစ်တဲ့ ဆေးဝါးပစ္စည်းတွေအပြင် အမျိုးသမီးနဲ့ ကလေးသူများအတွက် အာဟာရပစ္စည်းတွေ၊ လူသုံးကုန်ပစ္စည်းတွေအများအပြားရှိခဲ့တယ်လို့ အဲဒီ(ICRC)အဖွဲ့အစည်းနဲ့ နီးစပ်သူတွေက ဆိုကြပါတယ်။
အခုလို နိုင်ငံတကာကူညီကယ်ဆယ်ရေး အဖွဲ့အစည်းတွေရဲ့ အထောက်အကူပြု ပစ္စည်းတွေကို ခိုးထုတ်တာဟာ စီးပွါးရေးသက်သက်မဟုတ်ဘဲ ရခိုင်ပြည်သူတရပ်လုံးထောက်ခံနေတဲ့ ULA/AA ရဲ့ ပုံရိပ်ကိုနာမည်ဖျက်ချင်တဲ့အတွက် ထင်ယောင်ထင်မှားဖြစ်အောင်လုပ်နေတာ ဖြစ်တယ်လို့လည်း မောင်တောမြို့ဒေသခံတွေက သုံးသပ်ပြောဆိုနေကြပါတယ်။
ဒါ့အပြင် စစ်ကောင်စီဟာဇွန်လ ၂၂ ရက်နေ့ကလည်း မောင်တော ( WFP) ရုံးက ဆန်အိတ် ၂ဝဝဝ ကျော်ကို ယူဆောင်ခဲ့ကြောင်း စစ်ကောင်စီရဲ့ သတင်းနဲ့ ပြန်ကြားရေးတာဝန်ခံ ဗိုလ်ချုပ်ဇော်မင်းထွန်းကိုယ်တိုင် ဝန်ခံပြောဆိုခဲ့တာကိုလည်း တွေ့ရပါတယ်။
အဲဒီဆန်အိတ်တွေကို AA လက်ထဲကိုမရောက်ရအောင် ပြောင်းရွှေ့ခဲ့တာဖြစ်ကြောင်း ဗိုလ်ချုပ်ဇော်မင်းထွန်းက အကြောင်းပြပြောဆိုထားပြန်ပါတယ်။
မောင်တောမြို့နယ်က တပ်စခန်းအများအပြားကို ထိမ်းသိမ်းထားတဲ့ အာရက္ခတပ်တော်(ULA/AA) ကို စစ်ရေးအရရှုံးနှိမ့်နေတဲ့ စစ်ကောင်စီဟာ ဒေသခံပြည်သူတွေကို ဆေးဝါးနှင့် စားနပ်ရိက္ခာပြတ်တောက်အောင်ရည်ရွယ်ချက်ရှိရှိ ပြုလုပ်နေတာတွေ ရှိနေတယ်လို့ ဝေဖန်မှုတွေရှိနေကြပါတယ်။
