Lungmili Post

10/16/2026

SCEF Le Pau Dohthlennak Hriamtlai Phu 19 Fonh Nih An Dirh Mi SRA Cu A Voi (2)nak Tonbiaruahnak An Ngei Kho
=========
𝐋𝐮𝐧𝐠𝐦𝐢𝐥𝐢 𝐏𝐨𝐬𝐭 | 𝐓𝐡𝐨 16 | 2026

CNF, KIO, KNU, Karenni, CRPH le NUG fonh nih an dirh mi Steering Council for the Emergence Of a Federal Democratic Union – SCEF le Chin Brotherhood (CB) telh in dohthlennak hriamtlai phu 19 fonh nih an drih mi Spring Revolution Alliance – SRA cu nizan October 15 ah khan Online in a voi (2)nak tonbiaruahnak an ngeih khawh kong, theih a si.

"Cu tonbiaruahnak ah cun NUG cozah lei in President Duwa Lashi La nih a hmasa bik ah biachimnak caan a ngei. Cun SCEF ah Secretary a ṭuan lio mi Padoh Saw Tadoh Moo nih SCEF i an ramkhel ning le an rianṭuan ning kong he pehtlai in chimfiannak le ceihmainak a ngeihpi hna i SCEF le SRA kar ah biahalnak le ceihmainak zong an ngei kho hna. Cu hnu ah SRA lei in General Secretary Ko Sawng Kha nih an donghnak caah biachimnak le biacahnak a ngeih hna," tiah an langhter.

Steering Council for the Emergence Of a Federal Democratic Union – SCEF le Spring Revolution Alliance – SRA cu a luancia July 20 ah khan a voi (1)nak tonbiaruahnak an rak ngei kho i thla 2 leng a rauh hnu nizan October 15 ah a voi (2)nak tonbiaruahnak an ngei kho ṭhan, tiah kan theih.

𝐋𝐮𝐧𝐠𝐦𝐢𝐥𝐢 𝐏𝐨𝐬𝐭

10/16/2026

Mizoram Ah Pa 1 Namte In Voi 2 Tiang Sawh A Tong, A Sawhtu Pa Cu An Tlaih Khawh Colh
=========
𝐋𝐮𝐧𝐠𝐦𝐢𝐥𝐢 𝐏𝐨𝐬𝐭 | 𝐓𝐡𝐨 16 | 2026

Mizoram ramkulh, Serchhip khuapi, P&E sang ah khuasa mi John Jo Jo fapa Lalhlupuia cu k*m 23 upa Jimmy Vanlalhlua nih naamte in voi 2 tiang a sawh i thilsual tuahtu Jimmy Vanlalhlua cu ṭuanvo ngeitu palik nih an tlaih khawh colh kong, Mizoram thawngzamhnak nih nihin ah an langhter.

Serchhip thawng laaknak hrampi nih cun, "Naamte sawh a tong mi Lalhlupuia le a hawinu hi Tarpi tlang ah an leng i Jimmy Vanlalhlua zong scooty in Tarpi tlang ah cun a kal ve. Jimmy Vanlalhlua nih hin Lalhlupuia cu kuak a hal i hmunkhat ah an umṭi hna. Lalhlupuia hawinu hmun dang i a kal kar ah Jimmy nih Lalhlupuia cu a hnulei in namte in voi 2 tiang a sawh. An pahnih kar ah hin bia alnak zong a um lo. Cu hnu ah Lalhlupuia cu a scooty in inn lei ah ṭin aa tim i a hliamhma a fah ngai ruang ah lampi ah mi dang nih an buaipi hna i Serchhip pengkomh siizung ah an kalpi. Naamte in a sawhtu pa Jimmy Vanlalhlua zong siizung tiang a kal ve i ṭuanvo ngeitu palik nih an tlaih colh, tiah theih a si.

Thilsual tuahtu Jimmy Vanlalhlua hi Serchhip khuapi, Darnam sang ah inn hlang in amah te lawng khuasa mi a si. Bia an hal i chekhlatnak an tuah tik ah Jimmy Vanlalhlua nih hin Serchhip khuapi Kawnpui Biakinn i Mizoram Students’ Evangelical Union (MSEU) Spiritual Convention an tuah lio zong ah khual nu 1 pumhnak in a ṭin lio ah a thilri a firpiak kong zong a sual aa phuang, tiah an langhter.

Naamte sawh a tong mi Lalhlupuia cu siizung ah thlopbul cuahmah a si i, a dirhmun cu thinphang tuk a si lem lo, tiah theih a si.

Lungmili Post
Source: Zawlbuk Daily News

10/16/2026

Chaung-U Khuapi Ah Khuasa Mi SSPC Ralkap He Pehtlaihnak Ngei Mi Nuva Hna 2 An Fimhlawm Hna
=========
𝐋𝐮𝐧𝐠𝐦𝐢𝐥𝐢 𝐏𝐨𝐬𝐭 | 𝐓𝐡𝐨 16 | 2026

Sagaing ramṭhen, Chaung-U khuapi, Yehle sang ah khuasa mi SSPC ralkap pawl he pehtlaihnak a ngei mi nuva hna 2 cu an umnak inn ah luhhnawh in an fimhlawm hna kong, Chaung-U khuapi thawng laaknak hrampi nih nihin October 16 ah an chim.

October 14, zanlei sang ah khan Chaung-U khuapi, Yehle sang ah khuasa mi nuva hna 2 cu meithal aa tlaih mi minung cheukhat nih an umnak inn chung ah luhhnawh in an kah hna i an inn chung ah cun an pahnih tein an thi, tiah theih a si.

"An thah mi hna nuva hna 2 hi SPC ralkap pawl he pehtlaihnak a ngei mi an si i zeibantuk hriamtlai phu nih dah an fimhlawm hna ti mi kong tu cu dikthliar in hngalh a si rih lo. Cun annih nupa hi a karh in mi dang tangka a cawihtu le aungbali tuah mi zong an si i an inn ah hin SSPC ralkap kuttang Pyusawhti pawl zong an lutchuak ngai," tiah Chaung-U khuapi thawng laaknak hrampi nih Khit Thit ah a chim.

Thah a tong mi nuva hna 2 cu Ko Aye Min Htun le Daw Khine Zin Phyo an si i, tangka thap in lentecelhnak a tuah mi le a karh in mi dang tangka a cawihtu zong an si i Chaung-U khuapi ah a um mi SSPC ralkap le an kuttang Pyusawhti pawl he pehtlaihnak an ngei mi zong an si, tiah tualchung mi nih an chim ve.

Lungmili Post

10/16/2026

US Ram Siangniamrun Sianginn 1 Ah K*m 16 Ngakchia 1 Meithal Kahnak In Minung 4 An Thi
=========
𝐋𝐮𝐧𝐠𝐦𝐢𝐥𝐢 𝐏𝐨𝐬𝐭 | 𝐓𝐡𝐨 16 | 2026

US ram i a um mi siangniamrun sianginn pakhat ah k*m 16 ngakchia 1 meithal kahnak ruang ah ngakchia 3 le k*m upa 1 tiin an dihlak fonh minung 4 an nunnak liam kong, nawlngeitu nih an chim.

Nizan October 15, zanlei sang ah khan US ram, Bend khuapi i a um mi Silver Rail siangniamrun sianginn cu k*m 16 ngakchia 1 nih luhhnawh in meithal in a kah hna i ṭuanvo ngeitu palik pawl an phank hlan ah meithal kaptu cu tualchung mi pa 1 nih meithal in a rak kah i a thi, tiah theih a si.

"Meithal aa tlaih mi k*m 16 ngalchiapa nih hin sianginn lenglei i a dir mi motor 1 a kah hmasa. Cu hnu ah sianginn chung ah a lut i siangngakchia pawl a kah ṭhan hna. Sianginn leng i kah a tong mi motor khaltu nih cun meithal sau mi aa tlaih mi pa pakhat nih a ka kah, tiah ṭuanvo ngeitu palik pawl sin ah theihternak (Report) a tuah hmasa. K*m 16 ngakchiapa meithal kahnak ruang ah cun k*m 5, k*m 8, k*m 11 ngakchia le siangcachim 1 tiin an dihlak fonh minung 4 an nunnak a liam. Cu pin ah k*m 7 ngakchia 1 le k*m 54 upa siangcachim nu 1 nih hliamhma faak ngai an tuar i siizung ah thlopbul cuahmah an si," tiah Bend khuapi nawlngeitu nih an chim.

Meithal kahnak a ruang cu dikthliar in hngalh a si rih lo ca ah ṭuanvo ngeitu palik nih pehzulh in hlathlainak an tuah cuahmah. Meithal kahnak a chuak ti mi thawngpang an theih hnu in siangngakchia pawl i an nu le pa cu sianginn hmai ah an phan cio i a pawngkam ah a um mi sianginn dang pawl zong nizan October 15 thawk khan caan karlak chung an khar hna, tiah theih a si.

Lungmili Post

10/16/2026

Thailand Ah Myanmar Ram Mi Rianṭuan Pawl Cit Mi Motor Aa Let I Minung 59 Hliam An Tuar
=========
𝐋𝐮𝐧𝐠𝐦𝐢𝐥𝐢 𝐏𝐨𝐬𝐭 | 𝐓𝐡𝐨 16 | 2026

Thailand ram, Chonburi pengkomh, Bo Thong peng, Wat Suwan khua ah Myanmar ram mi rianṭuan pawl a dong/thlahtu motor pakhat aa let i aa cit mi minung 59 nih hliamhma an tuar kong, Thailand thawngzamhnak nih nihin ah an langhter.

Nizan October 15, zanlei suimilam 6:30 hrawng ah khan Chonburi pengkomh, Bo Thong peng chung i a um mi rungtaban (pineapple) sehzung ah rianṭuan mi Myanmar ram mi 70 leng a phurtu motor pakhat aa let, tiah theih a si.

"Aa let mi motor hi Myanmar ram mi rianṭuan pawl 70 leng a dong/thlahtu hna ke 6 motor a si i, an rianṭuannak hmun in a thlah hna lio Bo Thong lampi cung ah rang tuk in a khalh ruang ah a tlai kho ti lo i aa leh hi a si. Cu chung ah minung 59 nih hliamhma an tuar i minung 9 hi a hliamhma a fah ngai ca ah zualral in siizung ah an kalpi hna. Cun a dang 36 zong anmah tein siizung ah i thlopbul ding in an kal ve. A dang 14 hi cu an hliamhma a faak tuk lo. Motor khaltu pa nih cun an motor a break a rawk ruang ah atu bantukin vanchiat a ton hi a si kong a chim," tiah Thailand thawngzamhnak nih cun an langhter.

Atu hi Thailand palik pawl nih motor aa lehnak kong he pehtlai in chekhlatnak an tuah cuahmah lio a si i upadi ning tein tawlrel an timh hna, tiah theih a si.

Lungmili Post

10/16/2026

- CNF, KNU Le ABSDF Zong Remdaihnak An Ser Mi Ah I Tel Ve Ding Min Aung Hlaing Nih A Sawm Ṭhan Hna

- UFC World Champion Joshua Van Nih A Biakam Bantuk In Guitar Tumthiam Chit San Maung Cu K*thruk A Kuat Khawh Cang

- Falam Khuapi Siizung Ah Thla 9 In K*m 5 Kar Ngakchia Pawl Hmaihu Zawtnak Kham Sii (Vaccine) An Chunh Hna Lai

- Mizoram Ah Myanmar Ram Mi 1 Rithaisii Tam Ngai An Tlaih

- Kachin Ah SSPC Ralkap Nih Nu Le Ngakchia Telh In Tualchung Mi 20 Leng An Tlaih Hna I An Kalpi Hna

- Paungde Peng Kahdohnak Ah Ralbawi 1 Telh In SSPC Ralkap 12 An Thi

- October A Zarh Khatnak Chung Ah SSPC Ralkap Ruang Ah Tualchung Mi 40 Leng An Thi

- Pakistan Ram, Peshawar Khuapi Ah Sianginn Pakhat A Cim I Siangngakchia 20 Leng An Thi

10/16/2026

Mandalay PDF Ṭuanvo Ngeitu Ko Wunna Aung Cu SSPC Ralkap Nih Thihdan An Pek, NDAA Nih SSPC Ralkap K*t Ah An Ap Mi A Si
=========
𝐋𝐮𝐧𝐠𝐦𝐢𝐥𝐢 𝐏𝐨𝐬𝐭 | 𝐓𝐡𝐨 16 | 2026

National Unity Government (NUG) hruainak tang i a um mi Mandalay ramṭhen Pah-Kah-Phah in ṭuanvo ngeitu Ko Wanna Aung Na Kyi cu National Democratic Alliance Army (NDAA) hriamtlai phu nih an tlaih i SSPC ralkap sin ah an ap hnu in Mandalay khuapi um Oebo thonginn ah pehzulh in thong an thlak i October 14 ah khan SSPC ralkap biaceih zung nih thihdan an pek kong, thawng laaknak hrampi nih fehter in an chim.

Mandalay ramṭhen Pah-Kah-Phah in ṭuanvo ngeitu Ko Wanna Aung hi an tlaih hlan ni khat aa duh a luancia June 23 ah khan Shan ramkulh, Kyaingtong khuapi pawng i a um mi check-gate ah SSPC ralkap nih a nupi an tlaih. Cu hnu ah SSPC ralkap pawl nih cun pehzulh in hlathlatnak an tuah i Mongla khuapi a phan mi Ko Wanna Aung cu SSPC ralkap nawl peknak in Mongla hrambunh NDAA hriamtlai phu pawl nih an tlaih i July 24 ah khan SSPC ralkap sin ah an ap, tiah amah he naihniam in a um mi le thawng laaknak hrampi nih an chim.

"Mandalay ramṭhen Pah-Kah-Phah in ṭuanvo ngeitu Ko Wanna Aung Na Kyi cu SSPC ralkap nih Mandalay khuapi um Oebo thonginn ah pehzulh in thong an thlak i October 14 ah khan SSPC ralkap biaceih zung nih thihdan an pek hi a si. Amah he naihniam in a um mi hna le a chungkhar nih an fehter mi a si," tiah Burma VJ Post nih a langhter.

SSPC ralkap nih thihdan an pek mi Ko Wanna Aung Na Kyi a nupi le a fanute cu SSPC ralkap nih an thlah ṭhan cang hna. Mandalay ramṭhen Pah-Kah-Phah in ṭuanvo ngeitu Ko Wanna Aung hi a liamcia 2020 k*m thimnak lio ah khan teinak hmu mi a si i, Tada-U peng ah NLD Party i Pyithu Hluttaw palai pakhat zong a si, tiah thawng laaknak hrampi nih an chim mi in kan theih.

Lungmili Post

10/16/2026

Delhi Khuapi Ah Rianṭuan Mi Mizo Nu 1 Motor Nih A Pah I A Thi
=========
𝐋𝐮𝐧𝐠𝐦𝐢𝐥𝐢 𝐏𝐨𝐬𝐭 | 𝐓𝐡𝐨 16 | 2026

Mizoram ramkulh, Aizawl khuapi, Ramhlun Venglai ah khuasa mi Helen Lalzikpuii fanu B. Lalnunpuii (k*m 29) cu rian a ṭuannak India ram khualipi, Delhi ah motor nih a pah ca ah hliamhma faak ngaiin a tuar i nizan October 15, zan suimilam 11:25 hrawng ah khan a hliamhma tuar kho ti lo in a nunnak liam kong, theih a si.

Ramhlun Venglai le Delhi lei in thawngpang theih ning ah cun, B. Lalnunpuii hi Delhi khuapi Pilates Company ah rianṭuan mi a si i, a luancia September 16 ah khan a rianṭuannak hmun in inn lei a ṭin pah ah motor nih a pah. A hliamhma a fah ngai ruang ah siizung ah an thlopbul.

"B. Lalnunpuii cu siizung ah caan zeimawzet chung thlopbul a si hnu nizan October 15, zan suimilam 11:25 hrawng ah khan Delhi khuapi Medanta Medicity Hospital ah a hliamhma tuar kho ti lo in a nunnak a liam. Zeitik ah a ruak tlunpi a si lai ti tu cu hngalh a si rih lo. B. Lalnunpuii hi a fel ngai mi nungak pakhat zong a si i, KTP zong ah aa hmang ngai mi a si," tiah Mizoram thawngzamhnak nih an langhter.

Lungmili Post

10/16/2026

Kyainseikgyi Kahdohnak Ah SSPC Ralkap Thi Mi Ruak 4 Le Hriamnam Cheukhat An Laak, SSPC Ralkap Kah Meithal Kah Mi Ruang Ah Tualchung Mi 3 An Thi
=========
𝐋𝐮𝐧𝐠𝐦𝐢𝐥𝐢 𝐏𝐨𝐬𝐭 | 𝐓𝐡𝐨 16 | 2026

Karen ramkulh, Kyainseikgyi peng, Pulein khua pawng kahdohnak ah SSPC ralkap a thi mi ruak 4 le hriamnam zeimawzat zong Karen National Liberation Army – KNLA ṭangṭi phu hna nih an laak chih khawh i SSPC ralkap nih duhpaoh in an kah mi meithal kuan ruang ah sualnak ngei lo tualchung mi 3 an nunnak liam kong, thawng laaknak hrampi nih nihin October 16 ah an chim.

"October 12-14 tiang Pulein khua thlanmual lei ah rallam sial mi SSPC ralkap pawl le KNLA ṭangṭi phu hna kar ah kahdohnak a faak. October 12, chunhnu suimilam 2:20 ah voi 1 le chunhnu suimilam 3:45 ah voi 1 tiin ni khat chung lawng ah kaphnih kar kahdohnak voi 2 tiang a faak. October 14 tiang kha kaphnih kar kahdohnak a faak i SSPC ralkap lei thi mi ruak 4 le hriamnam tam tam ngai zong KNLA ṭangṭi phu hna nih kan laak chih khawh," tiah KNLA thawng laaknak hrampi nih an chim.

"Kaphnih kar kahdohnak ah hin SSPC ralkap a thi mi le hliamtuar mi an tam ngai ca ah hnu an pil ṭhan i Pulein khua ah an um ti lo. Cu kahdohnak ah cun SSPC ralkap nih duhpaoh in meithal an kah ruang ah Pulein khua ralhrial mi mino 1 le khualtlawng mi 2 tiin an dihlak fonh sualnak ngei lo tualchung mi 3 an nunnak a liam," tiah KNLA thawng laaknak hrampi nih nih an chim chap.

Cu pin ah nizan October 15 zong ah Hlutshan khua le Ratphaw khua kar i a um mi Htee Toe Kaw hmunram chung ah SSPC ralkap nih pehzulh in rallam an sial ca ah kaphnih kar kahdohnak a faak ṭhan i atu hi SSPC ralkap nih Nyeinchanmyaing khua lei ah pehzulh in thazaang an chap, tiah theih a si.

Lungmili Post

10/16/2026

- CNF, KNU Le ABSDF Zong Remdaihnak An Ser Mi Ah I Tel Ve Ding Min Aung Hlaing Nih A Sawm Ṭhan Hna

- UFC World Champion Joshua Van Nih A Biakam Bantuk In Guitar Tumthiam Chit San Maung Cu K*thruk A Kuat Khawh Cang

- Falam Khuapi Siizung Ah Thla 9 In K*m 5 Kar Ngakchia Pawl Hmaihu Zawtnak Kham Sii (Vaccine) An Chunh Hna Lai

- Mizoram Ah Myanmar Ram Mi 1 Rithaisii Tam Ngai An Tlaih

- Kachin Ah SSPC Ralkap Nih Nu Le Ngakchia Telh In Tualchung Mi 20 Leng An Tlaih Hna I An Kalpi Hna

- Paungde Peng Kahdohnak Ah Ralbawi 1 Telh In SSPC Ralkap 12 An Thi

- October A Zarh Khatnak Chung Ah SSPC Ralkap Ruang Ah Tualchung Mi 40 Leng An Thi

- Pakistan Ram, Peshawar Khuapi Ah Sianginn Pakhat A Cim I Siangngakchia 20 Leng An Thi

Tho[October] 15, 2026, Zinglei Thawngchimnak