06/23/2026
PLA Nih Bomb An Hmanh Mi Ruang Ah NUG Ralkap 4 An Thi, Hliamtuar An Tam
=========
𝐋𝐮𝐧𝐠𝐦𝐢𝐢𝐥𝐢 𝐏𝐨𝐬𝐭 | 𝐏𝐮𝐫 23 | 2026
Mandalay ramṭhen, Myingyan pengkomh, Taungtha peng i NUG cozah nih an humhak mi hmunram chung ah People's Liberation Army (PLA) nih tualchung mi 1 an tlaih i tangka Kyats sing (2,000) nih an tlanhter hna pin ah hnu an piltaak mi an sakhan ah bomb an hmanh ruang ah NUG hruainak tang i a um mi tualchung Pah-Kah-Phah ralkap 4 an nunnak liam i hliamhma a tuar mi zong an tam ngai kong, NUG cozah i runvennak vuanci zung nih an thanh mi le Pah-Kah-Phah thawng laaknak hrampi nih an chim mi in theih a si.
"PLA ralkap in ṭuanvo ngeitu pakhat a si ve mi Thaung Htauk Soe nih a hruai mi hna ralkap thazaang 10 hrawng nih Taungtha peng, Wealaung khuami motor khaltu U Than Htay Aung cu Dalan zong a si lo nain a inn ah luhhnawh in an tlaih. Hmunram ngeitu PDF le Pah-Khah-Phah sin ah theihternak zeihmanh tuah hamsa lo in an tlaih hi a si i a motor 1, motorcycle 2, tangka Kyats sing 10, inn laisen le chungkhar cazin tiang phungning lo in an chuh dih."
"Cun, June 18 ah khan PLA nih an tlaih mi U Than Htay Aung cu June 20 hlan ah tangka Kyats sing (2,000) in tlanh ding le an tlanh lo ahcun thah an timh kong a nupi an ṭhihphaih ca ah a nupi nih kan zung ah report tuah in bawmh a rak kan hal. Cucaah NUG cozah, runvennak vuanci zung tang i a um mi Myingyan District Command (PDF le Pah-Kah-Phah) nih hi kong hi a phichuak kawl ding in PLA cu kan ceihmaipi hna i, ni 7 chung ah tlaih a tong mi U Than Htay Aung thlah ṭhan ding le a thilri vialte zong pek dih ṭhan ding in June 18 ah khan Taungtha Pah-Kah-Phah nih ca kan pek hna. Asinain June 19 ah PLA nih U Than Htay Aung thlah ṭhan an duh lo kong cakuat in an kan leh," tiah an langhter.
"June 22, chun suimilam 12:00 ah khan hmunram uktu NUG hruainak tang i a um mi tualchung Pah-Kah-Phah nih pehtlaihnak kan tuah ṭhan hna i PLA nih cun U Than Htay Aung kan thlah ṭhan cang, tiah an kan leh nain Wealaung khua le Ywarthit khua kar ah zeihmah hngal kho ti lo in hremnak hma he a ril mi U Than Htay Aung cu kan hmuh ca ah zualral in kan thlopbul. Cun, a thilri vialte zong cu PLA nih an pe ṭhan ti lo."
"Cu hnu ah kaphnih hnatlaknak kan ngeih cang bantuk in PLA cu Myingyan pengkomh chung in an chuak i an chuahtaak mi sakhan pawl zohfelnak tuah ding ah hmunram ngeitu kan ralkap pawl an kal. PLA nih cun an chuahtaak mi an sakhan i an ihnak hmun ah timh ciammam tein bomb an rak tarh ruang ah zohfelnak tuahtu kan ralkap pawl a puahhnawh hna i minung 4 an nunnak liam pin ah hliamhma tuar mi zong an tam ngai," tiah NUG cozah i runvennak vuanci zung nih an thanh mi ah cun an langhter chih.
People's Liberation Army (PLA) nih hin Taungtha peng, Taungkhamauk khua ah khuasa mi Ko Hpo Htu zong phungning lo in an rak tlaih bal cang i a motor an rak chuh pin ah tangka Kyats sing (550) in a chungkhar an rak tlanhter cang hna. Cu pin ah Taungtha peng chung i rian ngeitu hna motor pawl zong phungning lo in an tlaih lengmang hna i tangka in an tlanhter lengmang hna, tiah NUG cozah, runvennak vuanci zung tang i a um mi Myingyan pengkomh PDF le Pah-Kah-Phah nih an thanh ve.
People's Liberation Army (PLA) nih cun nizan June 22 ah khan cathanh an chuah ve i, "NUG cozah, runvennak vuanci zung tang i a um mi Myingyan District Command PDF ralkap thazaang 80 hrawng nih nihin June 22 ah Faw motor 2 he Myingyan peng khuate pahnih i a um mi PLA sakhan an luhhnawh i, PLA ralkap pawl a kan bawmchantu tualchung mi hna inn pawl zong an luhhnawh. A cheu cu an tlaih hna i bia an hal hna. PLA ralkap pakhat i a unu pakhat zong meithal in an ṭhihphaih i an kalpi. Nizan June 21 zong ah khan Myingyan District Command hruainak in ralkap thazaang 500 hrawng nih Taungtha peng um PLA sakhan an kulh i thilri chantu kan ralkap 2 zong tlaih an timh hna," tiah an langhter ve.
Cu pin ah NUG cozah phunglam he rian kan ṭuanṭi khawh nakhnga kan si khawh chung in kan i zuam cuahmah lio ah thazaang tampi he atu bantukin kan ralkap sakhan an luhhnawh mi le Myingyan pengkomh chuahtaak ding in an kan fial mi hi cu zeiti hmanh in kan cohlang kho lo. Hi kong he pehtlai in dohthlennak hriamtlai phu hna kanmah le mah kar ah ceihmainak he a phichuak kawl a herh i kanmah lei nih cun zeitik hmanh ah meithal kan puah hmasa lai lo, tiah People's Liberation Army (PLA) nih cun an langhter.
Lungmili Post
