12/22/2025
សហព័ន្ធកីឡាការ៉ាតេកម្ពុជា ចូលរួមគោរពវិញ្ញានក្ខន្ធវីរៈកងទ័ព និងជាអតីត កីឡាករ ប៊ុង តុងធៀន
នាព្រឹកថ្ងៃទី២២ ខែ ធ្នូ ឆ្នាំ២០២៥នេះ ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា និងជាអគ្គលេខាធិការ សហព័ន្ធកីឡាការ៉ាតេកម្ពុជា តំណាង ឯកឧត្តម អគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាប្រធានសហព័ន្ធកីឡាការ៉ាតេកម្ពុជា បានដឹកនាំក្រុមគ្រួសារកីឡាការ៉ាតេកម្ពុជាចូលរួមគោរពវិញ្ញាណក្ខន្ធ និងចូលរួមថវិកាចំនួន១០លានរៀន ដល់គ្រួសារនៃសព វិរៈជនឆ្នើម ប៊ុង តុងធៀន វីរកងទ័ពកម្ពុជា និងជាកីឡាករការ៉តេ ដែលបានពលីជីវិតក្នុងសមរភូមិ ក្នុងបុព្វហេតុការពារបូរណភាពទឹកដីនៃមាតុភូមិកម្ពុជាពីការឈ្លានពានរបស់យោធាថៃ និងរដ្ឋាភិបាលថៃ។
នាឱកាសនោះ ឯកឧត្តម វ៉ាត់ ចំរើន បានថ្លែងអំណរគុណយ៉ាងខ្លាំងចំពោះ ឯកឧត្តម អគ្គបណ្ឌិត សភាចារ្យ អូន ព័ន្ធមុន្នីរ័ត្ន ប្រធានសហព័ន្ធកីឡាការ៉ាតេដែលតែងតែយកចិត្តទុកដាក់ឧបត្ថម្ភគាំទ្រដល់កីឡាការ៉តេ ជាពិសេស ដល់វីរៈជន ដែលជាកីឡាករការ៉តេដ៏ឆ្នើម ប៊ុង តុងធៀន វីរកងទ័ពកម្ពុជាបានពលីជីវិត ក្នុងបុព្វហេតុការពារជាតិមាតុភូមិពីការឈ្លានពានរបស់យោធាថៃមកលើដែនអធិបតេយ្យភាពរបស់កម្ពុជា។
ឯកឧត្តម អគ្គលេខាធិការ បានគូសរំលេចថា ចំពោះវីរៈភាពដ៏អង់អាចក្លាហានពលីដើម្បីជាតិមាតុភូមិននេះ ក្រុមគ្រួសារកីឡាការ៉តេកម្ពុជាទាំងអស់ និងចងចាំជានិច្ច ហើយក៏និងរចនារៀបចំរូបតំណាងវីរកងទ័ព និងជាវីរកីឡាករការ៉ាតេ ប៊ុង ប៊ុនធៀន ដើម្បីធ្វើការគោរពជាប្រចាំនៅតាមបណ្តាក្លឹបកីឡាការ៉ាតេនានាអំពីគុណូបការៈលះបង់ពលីដើម្បីជាតិ។
ក្នុងនាមក្រុមគ្រួសារកីឡាការ៉ាតេទាំងអស់ សូមបួងសួងដល់ដួងប្រលឹងវិញ្ញានៃសពប៊ុង តុងធៀន វីរកងទ័ពកម្ពុជា បានទៅកាន់សុគតិភព និងសូមឱ្យក្រុមគ្រួសារជួបតែសេចក្តីសុខគ្រប់ប្រការ។
សូមរំលឹកថា វីរៈជន ប៊ុង តុងធៀន ជាកីឡាករកីឡាការ៉ាតេខ្សែក្រវ៉ាត់ខ្មៅមួយរូប មានអាយុ២០ ឆ្នាំ បានចូលបំរើរក្នុងកងទ័ព ហើយបានធ្វើការពលីក្នុងសមរភូមិ ក្នុងបុព្វការពារបូរណភាពទឹកដីនៃមាតុភូមិកម្ពុជាពីការឈ្លានពានរបស់យោធាថៃ និងរដ្ឋាភិបាលថៃ៕
