ላዛ ትግርኛ Laza Tigrigna

11/13/2025

ኮሚሽን መፅናዕቲ ጀኖሳይድ ትግራይ ኣብ ልዕሊ ዘፈር ህዝባዊ መሰረተ ልምዓት ትግራይ ልዕሊ 5 ቢሊዮን ዶላር ዝግመት ዕንወትን ኪሳራን ከም ዘጋጠመ ኣፍሊጡ።

ኮሚሽነር ኮሚሽን የማነ ዘርኣይ ሎሚ ኣብ ዘፈር ህዝባዊ መሰረተ ልምዓት ትግራይ ዝበፅሐ ዕንወትን ኪሳራን ዕላዊ ዝገበረ ኮይኖም በዚ ድማ ኣብ 5 ክፋላት ማለት ውን ኣብ ማይን ፅሬትን ፣መጓዓዝያን መንገድን፣ኣገልግሎት ቤት-ማዘጋጃ፣ሓይሊን መብራህቲን ከምኡ እውን ቴሌን ኣይሲቲን ዝበፅሐ ዕንወት ዕላውዊ ገይሮም ኣለው ።

ብብርኪ ዕንወት 2 ነጥቢ 03 ቢሊዮን ዶላር እንትኾን 2 ነጥቢ 97 ድማ ኪሳራ እዩ ኢሎም።

በዚ ድማ እቲ ዝዓበየ ኣብ ማይን ፅሬትን ምዃኑን ማለት ውን 1 ነጥቢ 8 ቢሊዮን ዶላር ዕንወት ከምዝበፅሖን ብሰንኪ እዚ ድማ ህዝቢ ትግራይ ንልዕሊ ክልተ ዓመታት ኣብ ከተማን ገፀርን ልዕሊ 3 ነጥቢ 6 ሚሊዮን ህዝቢ ኣብ ሓያል ስእነት መስተ ማይን ካልኦት ፀገማትን ከምዝነበረ ኮሚሽነር የማነ ገሊፆም።

ላዛ ትግርኛ
04 ሕዳር 2018
መቐለ

11/13/2025

ዓለምለኻዊ ባንኪ ኣንበሳ ንመፀገኒ ዝዓነዉ መሰረተ ልምዓታት ከተማ ዓዲግራት ንምፅጋን ዘኽእል ሰነድ ስምምዕነት ከቲሙ።

ምክትል ፕረዚደንት ዓለም ለኻዊ ባንኪ ኣንበሳ ዲስትሪክት ግእዝ ሪጅን ኣይተ ሙሉኣለም ከበደ ከም ዝገለፅዎ ትካሎም ኣብታ ከተማ ዝርከብ ልዕሊ 800 ሜትሮ ዝዓነወ ስራሕቲ ከርቭ ስቶን፣ሓፁርን ተዛመድትን ንምፅጋን ዓሊሙ ምስ ምምሕዳር ከተማ ዓዲግራት ሰነድ ስምምዕነት ከም ዝኸተመ ኣገንዚቦም።

ቁጠባዊ ሕውየት እታ ከተማ ንምግሃድ ግደኦም ከምዘበርክቱ ዝገለፁ እቶም ምክትል ፕረዚደንት እቲ ስራሕ ኣብ ውሽጢ ሰለስተ ሰሙን ከም ዝዛዘም ገሊፆም።

ኣብ ከተማ ዓዲግራት ስራሕ ካብ ዝጅምር ልዕሊ 18 ዓመት ዘቑፀረ ዓለም ለኻዊ ባንኪ ኣንበሳ ብስም ናይ ተጋሩ እዩ እናበልካ ምምካሕ ዘይኮነ ኣብ ባይታ ተግባራዊ ስራሕ ክፍፀም ከም ዝግባእ እውን ወሲኾም ገሊፆም። ከንቲባ ምምሕዳር ከተማ ዓዲግራት ኣይተ ረዳኢ ገ/ዚሄር ዓለምለኻዊ ባንኪ ኣንበሳ ዝዓነወ መሰረተ ልምዓት ኣብ ምሕዳስ ኣመልኪቱ ንዝወሰዶ ተበግሶ ከም ህዝብን ምምሕዳርን ከተማ ዓዲግራት ከም ዝንእዱ ገሊፆም።

ትካል ዕቋርን ልቓሕን ኣሚጎስ፣ዓለም ለኻዊ ባንኪ ኣንበሳ፣ማሕበረሰብ ንግዲ ከተማ ዓዲግራት ኣብ ህንፀት መሰረተ ልምዓት ንዝገበርዎ እወንታዊ ተግባር ኣመስጊኖም።

ከተማ ዓዲግራት ዳግም ንምሕዋይ ኣብ ዝግበር ርብርብ ካልኦት ኣካላትን ትካላትን ግደኦም ከበርክቱ ፀዊዖም።

ፕረዚደንት ቤት ምኽሪ ዘፈር ማሕበራትን ቤትምኽሪ ንግድን ዘፈር ማሕበራትን ከተማ ዓዲግራት ዲበ ኩሉ ኣለም ብርሃነ ከም ዝገለፅዎ ዓለም ለኻዊ ባንኪ ኣንበሳ ኣብ ፅሬትን ፅባቐን ከተማ ዓዲግራት ኣድሂቡ ክሰርሖ ንዝተለሞ ሰናይ ተግባር ንኢዶም።

ኣብቲ መርሃ ግብሪ ኣመራርሓ ዓለም ለኻዊ ባንኪ ኣንበሳ ዲስትሪክት ግእዝ ሪጅን ፣ ቻምበር ነጋዶ፣ምምሕዳር ከተማ ዓዲግራት ተረኺቦም ክብል ጉዳያት ከሙዩኒኬሽን ዞባ ምብራቕ ትግራይ ፀብፂቡ።

ላዛ ትግርኛ
04 ሕዳር 2018
መቐለ

11/13/2025

እዋናዊ ሓበሬታ ካብ ቢሮ ጥዕና ትግራይ

ኣብ ክልል ደቡብ ኢትዮጵያ ከተማ ጅንካ (Hemirrhagic Fever) ሄሞራጂክ ፌቨር እንታይነቱ ንምፍላጥ ፃዕሪ ዝግበረሉ ዘሎ ሕማም ሚኒስተር ጥዕና ኢትዮጵያ 03 ሕዳር 2018 ዓ/ም ኣብ ዝለኣኾ ህፁፅ ሓበሬታ እቲ ሕማም ከምዝተኸሰተ እቲ ዳህሳስ ኣመላኺቱ እዩ።

ክሳዕ ሕዚ ሸሞንተ ሰባት በቲ ሕማም ተጠርጢሮም፣ ብምትሕብባር ሚኒስትር ጥዕና፣ ኢንስቲትዩት ጥዕናን ቢሮ ጥዕና እቲ ክልልንን መንቀሊ እቲ ሕማም ንምፍላጥን ተወሳኺ ምልባዕ ንምዕጋትን ከይተስፋሕፈሐ ንምቁፅፃርን ህፁፅ መልሲ ወሃቢ ግብሪ ሓይሊ ናፍቲ ቦታ ብምልኣኽ ኣብ ባይታ ዘሎ ጭቡጥ ገምጋምን ምርመራ ላብራቶሪን እናገበረ ከምዝርከብ ካብ ቢሮ ጥዕና ትግራይ ዝተረኸበ ሓበሬታ የመላኽት።

ስለዝኾነ ኩሉ ሕብረተሰብን ዝምልከቶም መድረግቲ ኣካላትን ሚኒስተር ጥዕና ተወሳኺ መብርሂ ክሳዕ ዝህብ ክትግበሩ ዝግበኦም ጥንቃቐታት፣ ብኣፍን ኣፍንጫን ካልኦት ክፍሊ ኣካላትን ምፍሳስ ደም፣ ዋዒ፣ ተቕማጥን ተምላስን እንትረአ ብእዋኑ ናብ ትካል ጥዕና ምኻድን ምርመራ ላብራቶሪ ምግባር።
ምልክት ኣብ ዝተርኣየሉ ዝኾነ ሰብ ዘይምንኽኻእን እንትነኽኡ ቅድሚ ምንካእ መከላኸሊ ሜላታት ምጥቃም።
ኩሉ ግዘ ኢድካ ብሳይኒታይዘር ወይ ብማይን ሳሙናን ተሓፂብካ ምፅራይ። ዝኾነ ትካል ጥዕና ሕሙሟት ፍሉይ ትኹረት ብምግባር ናይ ቫይራል ሄሞሬጂክ ፌቨር(Viral Hemmoragic Fever) ዝመስል ሕማም ምፍላይ፣ ምምርማር፣ ምሕካምን ፀብፃብ ምልኣኽን ከምዘድሊ ካብ ቢሮ ጥዕና ትግራይ ዝተረኸበ ሓበሬታ የመላኽት።

ላዛ ትግርኛ
04 ሕዳር 2018
መቐለ

11/12/2025

በሃር ዓሪፉ
/ ብደራስን ጋዜጠኛን ፀጋይ ሓድሽ /
======================

ተዘክሮ -1

ቅድሚ 32 ዓመታት 1986 ዓ.ም ኣነን መሓዙተይን ኣብ ከተማ ዓዲግራት ዘስመና ኣማተር ከየንቲ እናሃለና ዘጉህን ዘተክዝን መርድእ ሰማዕና።

መርድእ ሃንደበታዊ ዕረፍቲ ዶ/ር ድምፃዊ ኪሮስ ኣለማዮሁ ። መቸስ ህንጡዋት ኣማተር ከየንቲ እንዲና ዝነበርና ብሕልፈት ዶ/ር ድምፃዊ ኪሮስ ኣለማዮሁ ካብ ምትካዝ ዝዘለለ ተግባር ክንፍፅም ከምዘለና ብምእማን ንስራሕቱ ዘውስእ ዜማ ምስራሕና እዝክር።

ሽዑኡ ማለት እውን 1986 ዓ.ም ዶ/ር ድምፃዊ ኪሮስ ኣለማዮሁ ዝዓረፈላ መዓልቲ ዓርቢ ወይ እውን ቀዳም ነበረት ይመስለኒ እሞ በሃር ድምፃዊ በረኸት መንግስትኣብ ካብ ስዑድ ዓረብ ናብ ሬድዮ ኢትዮጵያ ቋንቋ ትግርኛ መደብ ፀሓይ ብራቕ ስልኪ ደዊሉ ብዕረፍቲ ዶ/ር ድምፃዊ ኪሮስ ኣለማዮሁ ዝተሰሞዖ ዓሚዩቕ ሓዘን ብምግላፅ ንስድራን ህዝቢ ትግራይን ኣፀናንዐ።

ተዘክሮ - 2

ፋሲካ 1987 ዓ.ም ምስ በሃር ድምፃዊ በረኸት መንግስትኣብ ኣብ ዓዲግራት ሰውሒ ወልዋሎ ኣብ ሓንቲ መድረኽ ብሓደ ሰሪሕና ። ኣነን መሓዙተይን ኣብ'ቲ ብቴሌቪዥን ኢትዮጵያ መደብ ቋንቋ ትግርኛ ዝተዳለወ ፍሉይ ናይ ፋሲካ ፕሮግራም ባህላዊ ደርፊ እንትነቕርብ : በሃር ድምፃዊ በረኸት መንግስትኣብ ድማ ምስ እኒ ድምፃውያን ብርሃነ ሃይለ : ይሕደጋ ኣስገዶም : ኣታኽልቲ ሃ/ሚካኤል : ሶፍያ ኣፅብሃ : ተሾመ ወ/ማርያም : ተሰፋፅዮን ገ/መስቀልን ካልኦትን ብምኻን በባህላዊ ትግራይ ተሰንዩ 'ሲስ ሹሽ ' ኣበለና።

ሽዑኡ እታ በዓልቲ ፔዳል ጥዕምቲ ክራሩ እናገረፈ
' ተመንየያ ነይረ ተመንየያ
ዓባይ ዓዲግራት ብዓይነይ
እኳ ሪኤያ :
ተመንየያ ነይረ ተመንየያ
ዓባይ ዓጋመ ብዓይነይ
እኳ ሪኤያ :
ተመንየያ ነይረ ተመንየያ
ዓባይ ትግራይ ብዓይነይ
እኳ ሪኤያ :
ብምባል መበቆል ወለዱ ዝኾነት ትግራይ ኣወዲሱዋ ንኢዱዋ። ይግባእ ብሓቂ።

ተዘክሮ - 3

ግንቦት 1990 ዓ.ም ኮይኑ ኲናት ኢትዮ-ኤርትራ ተወሊዑ። በሃር ድምፃዊ በረኸት መንግስትኣብ ነታ "ዓባይ " ዝበላ ትግራይ ብዜምኡን ቃለመጠይቑን ከናሽዋ ሰሚዕናዮ። በረኸት ነቶም ንናፅነት ሃገሩ ከቢድ ዋጋ ዘኸፈሉ ደቂ ትግራይ " ንፈልጦም እንዲና " ብዝዓይነቱ : ብህግደፍ ተኣዚዙ ዘይኮነስ ኣሚኑሉ ብዘምስል ንትግራይን ገድላን ኣናሽዩ ። ሽዑኡ ደቂ ትግራይ ንበረኸት " እንጭዋ ክልተ ዓንዴል " ኢልናዮ።

በዚ በለ በቲ በሃር በረኸት መንግስትኣብ እነሆ ኣብ መበል
89 ዓመቱ ናብ'ቲ ኩልና ንኸዶ ከይዱ።

መእሰሪ

በሃር ድምፂዊ በረኸት መንግስትኣብ ኣብ ምዕቃብን ምብራኸን ጥበብ ትግርኛ ደሚቕ ኮኾብ እዩ ። ጥንታዊ ቋንቋና ትግርኛ ዘለዎ ዒሚዩቕ ፀጋ ጥበባዊ ፅባቐ ( aesthetic value ) ወሲኹ ዘወረቐ ዕንቊ ጠቢብ ኣሓት ህዝብታት ትግራይን ኤርትራን እዩ ። ብስርሑ 'በሃር' ን 'ዶክተር' ን ዝብሉ ናይ ክብሪ መፀውዒታት ዝረኸበ ድምፃዊ በረኸት መንግስትኣብ መንግስተ ሰማይ የዋርሶ።

በዝን በትን ዘለና ስድራ : መቕርብ ርሑቕን ቀረባን ኣድነቕትን ተሓለቕትን ጥበብ ትግርኛ ፅንዓት እሃበና።

ብሰላም ዕረፍ በሃር ድምፃዊ በረኸት መንግስትኣብ !!

11/12/2025

ኤርትራዊ ድምፃዊ በረከት መንግስተኣብ ካብዛ ዓለም ከም ዝተፈለየ ተገሊፁ።

ኣብ መበል 89 ዓመቱ ካብዛ ዓለም ከም ዝተፈለየ ዝተገልፀ ድምፃዊ በረከት ልዕሊ 200 ደርፍታት ንህዝቢ ከም ዘቕረበ ቅድሚ ሐዚ ተዛሪቡ ምንባሩ ይዝከር።

ሚዲያና ላዛ ትግርኛ Laza Tigrigna ንመላእ ህዝቢ ኤርትራን ቤተሰቡን ፅንዓት ይምነ።

ላዛ ትግርኛ
03 ሕዳር 2018
መቐለ

11/12/2025

ናይ ሚዲያ ናጽነት ኣብ ትግራይ ከመይ ኣሎ?

#ላዛትግርኛ

#ላዛትግርኛ 🌟 This short segment shares a powerful message you won’t want ...

11/12/2025

ባንኪ ኣንበሳ ዲስትሪክት ዞባ ሰሜን ምዕራብ ብልዕሊ 167 ሽሕ ብር ዝዓደጎም ናውቲ ትምህርቲ ብሓገዝ ንደቂ ስውኣት ከም ዘበርከተ ተገሊፁ።

ኣብ ከተማ ሸረ እ/ሰላሰ ንዝርከቡ 80 ተምሃሮ ደቂ ስውኣት ባንኪ ኣንበሳ ብልዕሊ 167 ሸሕ ብር ዝዓደጎም ደረጀኦም ዝሓለው ቦርሳ 80 ፣ደፍተር 40 ደርዘን ፣ መፅሓፍ 80፣መደምሰስ፣ቢሮ ፣እርሳስን መፅረቢን ድማ ሰለስተን ፈረቃን ደርዘን ሕድሕዶም ዓዲጉ ሎሚ ከም ዘከፋፈለ ቤት ፅሕፈት ርክብ ህዝብን መንግስትን ከተማ ሽረ እንዳስላሰ ኣፍሊጡ።

ድጋፍ ዝተገበረሎም ደቂ ስውኣት ተምሃሮ ብወገኖም ከም ዝበሉዎ ንህላወ ህዝቢ ትግራይ ክብሉ መስዋእቲ ዝኸፈሉ ወለዶም ከይሓዘኑን ተሰፋ ከይቆረፁን ትምህርቶም ከም ዝከታተሉን ባንኪ ኣንበሳ ፀገሞም ተረዲኡ ንዝገበረሎም ድጋፍ ሓበንን ሞራልን ከም ዝስመዖም ተዛሪቦም ክብል ጉዳያት ርክብ ቢሮ ትምህርቲ ትግራይ ፀብፂቡ።

ላዛ ትግርኛ
03 ሕዳር 2018
መቐለ

11/12/2025

ላዕለዎት ኣመራርሓ ማልት ምስ ኣቦወንበራት ኣብያተ ምኽርን ኣባላት ቦርድን ማልት፤ ምጅማር ምብሳር ህንፀት ሸውዓተ ፍሉያት ካልኣይ ብርኪ ኣብያተ ትምህርቲ ኣመልኪቱ ብፍሉይ ዝተዳለወ ሰነዳዊ ፊልም ክትከታተሉ ንዕድም።

"ኣብ ፅላልና ንዕሰል" ምስ ኣመራርሓ ኣቦወንበራት ኣብያተ ምኽርን ኣባላት ቦርድን ማልት፤ ምጅማር ምብሳር ህንፀት ሸውዓተ ፍሉያት ካልኣይ ብርኪ ኣብያተ ትምህርቲ ኣመልኪቱ ብፍሉይ ዝተዳ...

11/12/2025

ትግራዋይ ዝኸውን ብህይወት እንተፀኒሐ እዩ - ጋዜጠኛ ኣድሓኖም

11/11/2025

ፕረዚደንት ኡጋንዳ ዮዌሪ ሙሴቬኒ ንወ/ሮ ኣዜብ መስፍን ኣብ ቅድሚ ህዝቢ ኡጋንዳ ብግልጺ ኣመስጊኖም።

ፕረዚደንት ዮዌሪ ሙሴቬኒ፡ ኣብ ሓደ ናይ ምርጫ ጎስጓስ መደብ ኣብ ዘስምዕዎ መደረ፡ ንወ/ሮ ኣዜብ ኣብ ኡጋንዳ ንዝገበርኦ ኣበርክቶ ኒኢዶም።

"ንዓና ውፅኢታውያን ብምግባር ንሳ እውን ውፅኢታዊት ኮይና እያ" ዝበሉ ፕረዚደንት ዮዌሪ ሙሴቬኒ፡ ወሲኹ ድማ "ከማና ተቓላሲት ናጽነት ስለዝኾነት ውጽኢት ኣመዝጊባ፥ ተቓላሲት ናጽነት'ውን እያ" ብምባል ምስጋናኦም ኣቕሪቦም።

ወ/ሮ ኣዜብ መስፍን ኣብ ኡጋንዳ ኣብ ዓውዲ ማኑፋክቸሪንግ እናሰርሐት ዝፀንሐት ኮይና እቶም ፕረዚደንት ኣብታ ወ/ሮ ኣዜብ ትሰርሓሉ ዝነበረት ቦታ ናይ ጎስጓስ ዑደት ኣብ ዝገበሩሉ እዋን እዮም ናእዶም ዝገለፁ።

ላዛ ትግርኛ
02 ሕዳር 2018
መቐለ

11/11/2025

ናይ ሚዲያ ናጽነት ኣብ ትግራይ ከመይ ኣብ ከመይ ኩነታት ይርከብ?

ድሕሪ ውዕሊ ፕሪቶርያ ብኣይተ ጌታቸው ረዳ ዝተመርሐን ብሌ/ጀ ፕሬዝደንት ታደሰ ወረደ እናተመርሐ ዝርከብ ግዝያዊ ምምሕዳራት ዘተኣናገደት ትግራይ ኣብ ናይ መን ዘመን ስልጣን ዝሐሸ ናጽነት ሚዲያ ኔሩ?

ሚዲያና ላዛ ትግርኛ Laza Tigrigna ምስ ጋዜጠኛ ኣድሓኖም ፃኒሒት ጌይሩ ኣሎ ፤ ሙሉእ ትሕዝቶ እቲ መደብ ንምክትታል ሊንክ ኣብ ኮሜንተ ኣቐሚጥና ኣለና።

#ላዛትግርኛ

11/11/2025

ወሓስ ተመዛበልቲ መን እዩ?

#ላዛትግርኛ

#ላዛትግርኛ unauthorized use, copying or distribution is strictly prohibited.Laza Tigrigna Me...