09/25/2025
राष्ट्रिय स्वतन्त्र पार्टी डोटीको प्रमुख जिल्ला अधिकारीलाइ ध्यानाकर्षण पत्र
श्रीमान प्रमुख जिल्ला अधिकारी ज्यू
जिल्ला प्रशासन कार्यालय,डोटी
विषय: अन्तरिम सरकारले गरेका प्रमुख निर्णयहरूको स्थानीय तहमा प्रभावकारी कार्यान्वयन सम्बन्धमा ध्यानाकर्षण।
महोदय,
वर्तमान अन्तरिम सरकारले मुलुकमा राजनीतिक स्थिरता, शान्ति–सुरक्षा कायम गर्ने तथा आसन्न निर्वाचनलाई निष्पक्ष र सफल बनाउन विभिन्न महत्वपूर्ण निर्णयहरू गरेका छन्। ती निर्णयहरूको प्रभावकारी कार्यान्वयनमा स्थानीय प्रशासनको भूमिका निर्णायक हुने भएकाले यस पत्रमार्फत विशेष ध्यानाकर्षण गराउन चाहन्छौं।
१) प्रतिनिधि सभा निर्वाचन आगामी २०८२ फागुन २१ गते हुने मिति तोकिएको छ। यसको तयारीमा जिल्ला प्रशासनले सुरक्षात्मक, व्यवस्थापकीय र आवश्यक समन्वयात्मक कार्य तत्काल अघि बढाउन जरुरी छ।
२)शिक्षा, कृषि, उद्योग, सञ्चार लगायतका क्षेत्रमा नयाँ मन्त्री नियुक्ति भइसकेकोले मन्त्रालयगत निर्णयहरूलाई जिल्ला स्तरसम्म कार्यान्वयन गर्न विशेष पहल आवश्यक छ।
३)हालैका आन्दोलनहरूमा मृत्यु तथा क्षति सम्बन्धी छानबिन गर्न गठित आयोगलाई आवश्यक तथ्य संकलन र सहकार्य उपलब्ध गराउन जिल्ला प्रशासन सक्रिय हुनुपर्छ।
४)शान्ति–सुरक्षा, भ्रष्टाचार नियन्त्रण, राहत र पुनर्निर्माण कार्यक्रमलाई जिल्लास्तरमा तत्काल कार्यान्वयन गर्न आवश्यक संयन्त्र सक्रिय बनाउनुपर्ने हुन्छ।
५)संसद् अधिवेशन अन्त्य भएकाले अध्यादेशमार्फत आउने कानूनी व्यवस्थाहरूको स्पष्ट जानकारी जनस्तरमा पुर्याई प्रशासनिक सहजता दिलाउनु अपरिहार्य छ।
६) नयाँ महाअधिवक्ता तथा अन्य पदाधिकारीहरूको नियुक्तिपश्चात् कानूनी अभ्यासमा आउने मार्गनिर्देशनलाई जिल्ला स्तरमै लागू गर्नतर्फ ध्यान दिनुपर्ने हुन्छ।
७) डोटी जिल्लामा अलपत्र परेका आयोजनाहरुलाई पूरा गर्न सम्बन्धित निकायलाई आवश्यक निर्देशन र समन्वय गर्नुपर्ने देखिन्छ।
८) सरकारी गाडीहरुको प्रयोगमा पारदर्शीता अपनाउनु पर्ने देखिन्छ। कतिपय कार्यालयका गाडीहरू व्यक्तिगत प्रयोजनमा प्रयोग भएको पाईएकोले कार्यालय कामकाज बाहेक सार्बजनिक बिदामा कार्यालय वा जिल्ला बाहिर लग्न नपाइने व्यवस्था मिलाउनु आवश्यक छ।
९) विद्यालयको १०० मिटर वरिपरि खोलिएका धुप्रपान र मध्यपान जन्य पदार्थको पूर्ण रूपमा बिक्री गर्न रोक लगाउनु आवश्यक छ।
१०) दशैं तथा तिहार पर्वमा मान्छेको आवत जावत बढी हुने भएकाले सम्भावित दुर्घटना कम गर्न सार्वजनिक गाडीहरुको नियमन तथा व्यवस्थापन गर्नुपर्ने देखिन्छ।
११) जिल्ला अस्पताल डोटीमा अलपत्र परेका भवनहरू छिटो निर्माण गर्न आवश्यक पहल गर्नुपर्ने देखिन्छ। जिल्लामा स्वास्थ्य सेवालाई अझै प्रभावकारी बनाउन काम गर्नुपर्ने देखिन्छ।
१२) अहिले सम्म डोटी जिल्लाका पालिकाहरुले वेरूजु फर्छ्यौटमा कुनै पनि किसिमको काम नगरेको देखिन्छ जसकारण राज्यको अरबौं रकम जोखिममा रहेको छ।
१३) मिति २०७९-०७-२२ गते पूर्वीचौकी गाउँपालिका वडा न.३ , गैरागाउँ केन्द्रबिन्दु बनाएर गएको भूकम्पको कारण पालिकाले त्रिपाल वितरण कार्यक्रम गरेको थियो तर पालिकाले सार्बजनिक खरिद नियमावलीको सही पालना नगर्दा जुम्ला घर भई सिलगढीमा व्यापार गर्दै आईरहनु भएका व्यापारी गौरी शंकर उपाध्यायको झण्डै ३५ लाख डुब्ने अवस्थामा पुगेको छ। एक व्यापारीको न्याय को लागि आवश्यक समन्वय गर्नुपर्ने देखिन्छ।
१४) कतिपय जिल्ला प्रशासन कार्यालयहरुले नागरिकता र मतदाता परिचयपत्र एउटै कार्यालयबाट दिने ब्यबस्था मिलाएको छ। तर डोटी जिल्लामा निर्वाचन कार्यालय विपरित ठाउँमा हुँदा सेवा ग्राहीले सास्ती भोग्नुपर्ने अवस्था छ र नयाँ मतदाता परिचयपत्र बनाउने सङ्ख्या न्यून रहेको छ।
निष्कर्षमा, हामी सरोकारवालाहरूको हैसियतले जिल्लामा यी निर्णयहरूको कार्यान्वयन प्रभावकारी बनाउन, जनहितमुखी सेवा प्रवाह पारदर्शी बनाउन र समन्वयात्मक कदम चाल्न जिल्ला प्रशासन कार्यालयलाई हार्दिक अनुरोध गर्दछौं
लेखिएको छ।
